Le Māfuaaga e Tāua ai le Ola Pea
I MATAUPU ua mavae, ua faailoa mai ai tulaga faigatā eseese e ono foliga mai ai ua lē mafai ona onosaia le olaga. A o e feagai ma faafitauli, e te ono tomānatu pe e tāua le ola pea, pe faamata e iai se isi o manatu mamafa mai iā te oe. Ia e mautinoa o loo manatu mamafa mai le Atua i ou mafatiaga ma e tāua oe iā te ia.
Na faailoa mai e le tusitala o le Salamo 86 lona faatuatuaina o le Atua e faapea: “Ou te valaau atu iā te oe i le aso o loʻu puapuaga, auā e te tali mai lava iā te aʻu.” (Salamo 86:7) E te ono tomānatu, ʻE faapefea ona tali mai le Atua “i le aso o loʻu puapuaga”?’
E ui lava e lē aveesea e le Atua i le taimi lava lenā o tatou faafitauli, ae ua faamautinoa mai i lana Afioga le Tusi Paia, e na te foaʻi mai le filemu o le mafaufau e fesoasoani e feagai ai ma faigatā: “Aua neʻi popole i se mea, ae ia faailoa atu o outou manaʻoga i mea uma lava i le Atua, i le tatalo ma le faatoga, atoa ma le faafetai; ona leoleoina ai lea o o outou loto ma mafaufau i le filemu mai i le Atua, e silisili i mea uma lava e manatu i ai.” (Filipi 4:6, 7) Faamolemole mātau pe e faapefea i mau faale-Tusi Paia o loo mulimuli mai, ona faamautinoa mai ai le alofa faapelepele o le Atua iā i tatou.
E Manatu Mamafa Mai le Atua iā te Oe
“E lē galo i le Atua se tasi o na tamaʻi manulele . . . e sili atu ona tāua outou nai lo tamaʻi manulele e tele.”—Luka 12:6, 7.
MĀTAU: O nei tamaʻi manulele e foliga mai e faatauvaa i le toʻatele o tagata, ae e tāua i latou iā Ieova. E silafia e Ieova nei manulele taʻitasi; e tāua nei meafaiola uma. E sili atu ona tāua tagata i le Atua nai lo o nei tamaʻi manulele. O le tagata o le vaega mataʻina lea o le foafoaga a le Atua i le lalolagi, auā ua faia i lona “faatusa,” ma e mafai ona latou atiaʻe ma faaalia ona uiga matagofie.—Kenese 1:26, 27.
“Ieova e, ua e suʻesuʻe mai aʻu, ma ua e silafia lava aʻu. . . . Ua e silafia mamao mai foʻi oʻu manatunatuga . . . Ia e suʻesuʻe mai iā te aʻu, ma silafia ai oʻu popolega.”—Salamo 139:1, 2, 23.
MĀTAU: E silafia lelei oe e le Atua ma e na te silafia ou faalogona loloto ma popolega. E ui lava e lē malamalama isi i ou faafitauli ma popolega, ae e manatu mamafa mai le Atua ma finagalo e fesoasoani mai iā te oe. Ona o lenei tulaga, e tāua ai le ola pea.
E Iai se Fuafuaga o Lou Olaga
“Ieova e, ia e faafofoga mai i laʻu tatalo; ia oo atu foʻi iā te oe laʻu alaga mo se fesoasoani. . . . Ia liliu mai ou fofoga iā te aʻu; ia e vave tali mai i le aso ou te valaau atu ai. . . . E liliu mai lava o ia i le tatalo a ē ua aveesea a latou mea uma.”—Salamo 102:1, 2, 17.
MĀTAU: Mai lava i le taimi na amata mafatia ai tagata, na silafia lelei e Ieova o latou loimata uma ona o na mafatiaga. (Salamo 56:8) E aofia ai ma ou loimata. E manatua e le Atua ou mafatiaga ma ou loimata ona e tāua oe iā te ia.
“Aua e te vaai solo, auā o aʻu o lou Atua. Ou te faamalosi iā te oe. Ou te matuā fesoasoani iā te oe. . . . O aʻu o Ieova lou Atua, . . . o Lē e fai atu iā te oe, ʻAua e te fefe. Ou te fesoasoani iā te oe.’”—Isaia 41:10, 13.
MĀTAU: E nofosauni le Atua e fesoasoani iā te oe. O le a ia faatū iā te oe pe a e paʻū.
E Iai le Faamoemoe mo se Lumanaʻi Matagofie
“Ona o le alofa tele o le Atua i le lalolagi, na ia foaʻi mai ai lona Atalii e toʻatasi, ina ia lē fano tagata uma e faatuatua iā te ia, a ia maua le ola e faavavau.”—Ioane 3:16.
MĀTAU: Ona e tāua oe i le Atua, ua ia finagalo malie ai e foaʻi mai lona Alo e fai ma taulaga mo oe. O lenā taulaga, ua e maua ai le avanoa e ola ai i se olaga fiafia ma faamalieina e faavavau. *
E ui lava e te ono feagai ma popolega ma foliga mai ai ua lē mafai ona onosaia le olaga, ae ia suʻesuʻe māeʻaeʻa le Afioga a le Atua ma atiaʻe le faatuatua i folafolaga a le Atua. O le a e maua ai le fiafia ma faamautinoa ai e tāua le ola pea.
^ Ina ia aʻoaʻo atili e faatatau i auala e mafai ona e maua ai aogā mai i le taulaga togiola a Iesu, ia maimoa i le vitiō Faamanatuga o le Maliu o Iesu i le www.pr418.com/sm. Tagaʻi i le vaega MOLIMAU A IEOVA > FAAMANATUGA.
E te Ono Fiafia Foʻi
MOLIMAU A IEOVA
Aiseā e Suʻesuʻe ai le Tusi Paia?
Ua saunia mai e le Tusi Paia tali i fesili tāua o le olaga mo le faitau miliona o tagata i le lalolagi aoao. Pe e te manaʻo e avea oe ma se tasi o i latou na?
LE OLOMATAMATA
Tatalo—O Aogā mo Oe
O le ā e te faatalitalia pe a fai ma au masani le tatalo e lē aunoa?
LE OLOMATAMATA
E Faapefea Ona Aogā iā te Oe le Alofa o le Atua?
O le a fesoasoani mai le Tusi Paia e atiaʻe lo tatou faatuatua i folafolaga a le Atua mo se lumanaʻi matagofie.
LE OLOMATAMATA
Le Meaalofa Silisili a le Atua
O ā vala e matuā tāua ai le isi meaalofa nai lo o le isi meaalofa? O le iloaina o na vala e mafai ona fesoasoani iā i tatou e faalolotoina ai lo tatou talisapaia o le togiola.
