NHAA popera natchiga nidea na ngẽma gutchaü̃gü i tama nüü̃ rüngümaẽü̃ rü nanagutchaẽẽ i tórü maü̃. Rü düwa bemana nhaü̃́gu curüĩnü: ‘Taúema rü tchauca tagutchaãẽ.’ Nagu yaõ na Tupana rü nüü̃ nacuaꞌü̃ i curü gutchaü̃ i nawa cungẽmaü̃. Cuma rü Tupanaü̃́ cumeẽtchi.

Yatü ya Salmo 86 ümatücü rü nanaweꞌ na Tupanagu nayaoü̃ yeguma nhagu: “Rü nhuꞌma na gutchaü̃wa tchangemaü̃, rü cuna tchaca erü cuma rü guü̃guma tchoü̃ cungãü̃ga.” (Salmo 86:7) Notürü, bemana cugüãẽwa nhaacu: ‘Nhuãcü tá Tupana tchoü̃ nangãü̃ga ngẽguma ‘gutchaü̃wa tchangemagu’?’

Bemana Tupana rü tautáma paa nayaguꞌẽẽ i curü gutchaü̃, notürü Norü Ore rü nüü̃ niu na Nüma rü aicumaü̃tchitama cuü̃ narüngü̃ẽẽ na cutaãẽamaü̃caꞌ, woo gutchaü̃gü cuü̃́ ngẽma. Ngẽmacaꞌ niĩ Norü Orewa nhaü̃: “Rü tauü̃caꞌma penaiꞌãtchiãẽgü! Notürü ngẽguma woo taꞌacü peü̃ üpetügu rü guü̃guma name niĩ na Tupanamaã nüü̃ peiuü̃ i perü yumüẽwa. Rü nacaꞌ ípeca i norü ngü̃ẽẽ i ngẽguma taꞌacü peü̃́ gutchagu, rü moẽ nüna peãgü! Rü ngẽmaãcü Tupanamaã nüü̃ peiu i guü̃ma i ngẽma nüna nacaꞌ pecagütchaü̃ü̃! Rü ngẽmaãcü i nüma ya Tupana rü tá peü̃ nataãẽẽẽ namaã i wüi i taãẽ i meẽtchiü̃ i guü̃ma i taãẽ i nüü̃ icuáü̃ãrü yeera meẽtchiü̃ . . . rü ngẽma taãẽ i Tupana pena ãü̃ rü tá nüna peü̃ ínapoü̃ i ngẽma tchieü̃ i nagu perüĩnüẽtchaü̃.” (Piripucü̃ãꞌ 4:6, 7) Tupana rü tüü̃ nangetchaü̃ rü tüna nadau. Yicama rü nangẽma tá i wetchicurugü i ngẽmatchiga tüü̃ weꞌü̃.

Luca 12:6, 7 rü nhanagürü: “Tupana rü tama tüü̃ inayarüngüma ya yíema weriacüãꞌgü, rü bai ya wüi . . . Erü pema rü muü̃ma i weriacügüarü yeeraü̃tchi peü̃ nangetchaü̃ ya Tupana.”

NHAÜ̃GU RÜĨNÜ: Tupana rü tama nüü̃ narüngüma i weriacüãꞌgü. Tupana rü nüü̃́ nameẽtchi i wüitchigü i ngẽma weriacüãꞌgü. Tupana rü werigüü̃ nangetchaü̃, notürü duü̃ü̃güü̃ niĩ yeeraü̃tchi nangetchaü̃. Tupana rü nüü̃́ nameẽtchi i ngẽma guü̃ma i naanewa naüü̃, notürü nüma rü ãũrima nüü̃ nangetchaü̃ i duü̃ü̃gü̃. Erü Tupana rü ‘nügüraü̃ãcü nanaü ga duü̃ü̃gü’ ngẽmacaꞌ niĩ natautchaü̃ na nacüma nayaugüü̃.—Gênesis 1:26, 27.

Salmo 139:1, 2 rü nhanagürü: “[Pa Yeuwa] Pa Tupana, cuma rü marü tchoü̃ cungugü rü meama nüü̃ cucuaꞌ i tchorü maü̃ . . . Nüü̃ cucuaꞌama i ngẽma nagu tcharüĩnüü̃.”

 NHAÜ̃GU RÜĨNÜ: Tupana rü meama cuü̃ nacuaꞌ. Nüma rü nüü̃ nacuaꞌ i ngẽma nagu curüĩnüü̃ rü curü oegaãẽgü, nüü̃ nacuaꞌ i ngẽma cuü̃ ngupetüü̃ rü cuü̃ narüngü̃ẽẽ. Duü̃ü̃gü tama nüü̃ nacuaꞌgü i ngẽma cuü̃ ngupetüü̃, notürü Tupana rü cutchiga nacuaꞌ. Ngẽmatchiga rü cuü̃ nataãẽẽẽ tá.

Salmo 102:1, 2 rü 17 rü nhanagürü: “Pa Cori [ya Yeuwa] tchoü̃́ nüü̃ naĩnü i tchorü yumüẽ! Rü nayau i ngẽma tagaãcü cumaã nüü̃ tchiuü̃! . . . Rü paa tchoü̃ nangãü̃ i ngẽguma cuna tchacagügu! . . . Rü nüma ya Cori ya Tupana rü tá nüü̃ naĩnü i norü yumüẽ i ngẽma ngẽ́ma wogümareü̃.”

NHAÜ̃GU RÜĨNÜ: Tupana rü nüü̃ nadau i naü̃tchiüetü i duü̃ü̃gü yeguma oẽẽ naügügucürüwa. Nhuꞌma rü ta Tupana rü curü naü̃tchiüetü nadau. Nüma rü nüna nacuaꞌãtchi i guü̃ma i marü cuü̃ ngupetüü̃ erü cuü̃ nangetchaü̃ü̃tchi.

Isaías 41:10, 13 rü nhanagürü: “Rü tauü̃́ i pemuü̃eü̃! . . . Erü tchama [ya Yeuwa] rü perü Tupana tchiĩ. Tchama rü pora pena tchaã rü peü̃ tcharüngü̃ẽẽ. . . . Rü marü pemaã nüü̃ tchiu rü nhatchagürü: ‘Tauü̃́ i pemuü̃ẽü̃! Erü tchama tá peü̃ tcharüngü̃ẽẽ.’”

NHAÜ̃GU RÜĨNÜ: Tupana rü guü̃gutáma cuü̃ narüngü̃ẽẽ ngẽguma ícuturagu. Tupana rü cuü̃ naporaẽẽ tá.

Juã́ũ 3:16 rü nhanagürü: “Rü Tupana rü poraãcü nüü̃ nangetchaü̃ i nhama i naanecü̃ãꞌ i duü̃ü̃gü. Rü yemacaꞌ inanamu ga Nane ga nügümaã wüicacü na guãma ya teé ya nüü̃́ yaõgüe rü tama itarütaueü̃caꞌ rü tüü̃́ nangẽmaü̃caꞌ i maü̃ i taguma guꞌü̃.”

NHAÜ̃GU RÜĨNÜ: Tupana rü cuü̃ nangetchaü̃ü̃tchi, yemacaꞌ niĩ Nane cucaꞌ nayuü̃. Ngẽmagagu cuü̃́ nangẽma tá i maü̃ i meü̃ i tagutáma guꞌü̃. a