NÁA artículos rí ninújngoo, ndiʼyáá rí maraxtaa náa awúu̱n ga̱ʼkhu̱ nindxu̱u̱ mingíjyúuʼ wéñuʼ rí asndu nandaaʼ makhañáaʼ. Mbáa xúgi̱ ikháán xtaa ranújngaaʼ náa mbá gamiéjunʼ rí mingíjyúuʼ wéñuʼ ga̱jma̱a̱ naku̱ma̱a̱ʼ rí nánguá gíʼdoo numuu maraxtaa ma̱ngaa rí nimbáa tsixmiéjuunʼ kaʼyaaʼ. Mú atayáá gajkhun rí Dios naxtáa gíná índo̱ ndaʼyaaʼ rí natamíni̱i̱ʼ. Ikhaa ndaʼyoo rí ikháán xtaʼdáá wéñuʼ numaaʼ.

Bi̱ niʼnirámáʼ Salmo 86 nikumuu kaʼyoo Dios ikha jngó niʼthí rígi̱: “Mbiʼi rí maxtáá gíná matakháñaaʼ, numuu rí ikháán má gátriʼñuʼ” (Salmo 86:7). Ikha jngó, mbáa ikháán natraximínáʼ: “Xú káʼnii embáyulú Dios índo̱ kuwáanʼ gíná rá.”

Maski ajndu Dios xárigu̱u̱ mbá nacha̱ gaʼkhu rí xtaʼdáá, mú ikhaa maʼni rí maʼngaaʼ matraʼníí. Náa Ajngá rawuunʼ naʼthúlúʼ rígi̱: “Xaxmiéjuanʼla ga̱jma̱a̱ numuu nimbá, gutajkháan ga̱jma̱a̱ gutakáñii Dios ma̱ngaa guxna̱a̱ núma̱aʼ, gunda̱ʼa̱a̱ xúgíʼ rí eyála; ikhú tsímáá rí na̱ʼkha̱ náa Dios rí itháan gíʼdoo tsiakii, mañewu̱u̱n a̱jkia̱la ga̱jma̱a̱ rí nundxaʼwamíjna̱” (Filipenses 4:6, 7). Atayáá májánʼ texto ndrígóo Biblia rí na̱ʼkha̱ agoo. Ikhú ma̱ta̱ya̱a̱ rí Dios naxmiéjuunʼ kaʼyaaʼ wéñuʼ.

Asndu ño̱ʼo̱ “Dios tsémbumuu kaʼñún nimbáa rí ikhiin. [...] Ikháanʼ kuaʼdáá itháan numala ki xóo mbaʼin ño̱ʼo̱” (Lucas 12:6, 7).

ATATSAʼWÁMINAʼ GA̱JMA̱A̱ NUMUU RÍGI̱: Dios ndaʼyoo rí ño̱ʼo̱ guáʼdáá numún. Mú, ndaʼyoo rí xa̱bu̱ numbaaʼ guaʼdáá itháán numún ki xóo ño̱ʼo̱. Rí phú gajkhun nindxu̱u̱, Dios niʼniáánʼ xó má kaʼnii ikhaa, ikha jngó ma̱ndoo manindxu̱lúʼ xó má ikhaa (Génesis 1:26, 27).

“Oh Jeobá, ikháán natayáá májánʼ xóo ni̱ndxu̱ʼ, ga̱jma̱a̱ natatsinúnʼ májánʼ. [...] Asndu mitsínguánʼ etayáá xóo endxa̱ʼwa̱mínáʼ [...]. Atayáaʼ náa ikhúúnʼ ga̱jma̱a̱ atayáá xú káʼnii endxa̱ʼwáminaʼ ma̱ngaa rí naʼni maxmiéjunʼ” (Salmo 139:1, 2, 23).

ATATSAʼWÁMINAʼ GA̱JMA̱A̱ NUMUU RÍGI̱: Dios naninínʼ. Ndaʼyoo xóo kuma̱a̱ʼ ga̱jma̱a̱ rí naʼni maxmiéjuanʼ. Maski ajndu eʼwíínʼ tsékru̱ʼu̱u̱n xú kaʼnii xtaa ratamíniiʼ, mú Dios nakro̱ʼo̱o̱ ga̱jma̱a̱ naxmiéjuunʼ kaʼyaaʼ ga̱jma̱a̱ nandoo mambáyáaʼ. Rígi̱ naʼni magiʼdoo numuu maraxtaa.

“Oh Jeobá, mbá péñu atadxun rí natajkáan; ga̱jma̱a̱ gaʼganú náa ikháán aʼwóʼ rí nandxa̱ʼwa̱ mu matambáyuʼ. [...] Mijngii gáraxtaa; mbiʼi rí gáthanʼ, nacha̱ gátriʼñuʼ”. Jeobá “maʼdxun rí nutajkáan bi̱ migíníi” (Salmo 102:1, 2, 17).

ATATSAʼWÁMINAʼ GA̱JMA̱A̱ NUMUU RÍGI̱: Dios niguxi̱i̱ iyooʼ idún xa̱bu̱ asndu nákha xa̱bu̱ nigíʼdi̱i̱ nikuwa náa tsu̱du̱u̱ Ku̱ba̱ʼ (Salmo 56:8). Ikhí rígá iyooʼ idaaʼ mangáán. Dios narmáʼáan a̱jkiu̱u̱n xúgíʼ xkujndu rí ninújngáaʼ ga̱jma̱a̱ xúgíʼ rí nitambiyaʼ numuu rí ikháán xtaʼdáá wéñuʼ numaaʼ eʼyoo ikhaa.

“Xaxmiéjuanʼ, numuu rí ni̱ndxu̱ʼ Dios ndrígáʼ. Ikhúúnʼ maxnaʼ tsiakii, gajkhun mambáyaʼ. [...] Jeobá Dios ndrígáʼ [...] naʼthán: ‹Xámiñaʼ. Ikhúúnʼ má gambayaaʼ›” (Isaías 41:10, 13).

ATATSAʼWÁMINAʼ GA̱JMA̱A̱ NUMUU RÍGI̱: Dios nandoo mambáyáaʼ. Á mu ikháán naxpatriga̱a̱n, ikhaa makuxiín.

“Numuu rí Dios nindoo kaʼñún wéñuʼ xa̱bu̱ numbaaʼ rí asndu nixnáa A̱ʼdióo bi̱ mbáwíi, mu xúgínʼ bi̱ gaguaʼdáá fe xákhañun, makuwá kámuu mbiʼi” (Juan 3:16).

ATATSAʼWÁMINAʼ GA̱JMA̱A̱ NUMUU RÍGI̱: Dios nandoo kaʼyaaʼ wéñuʼ rí asndu nixnáa A̱ʼdióo ga̱jma̱a̱ numaaʼ. Ga̱jma̱a̱ numuu tsigijñaʼ rígi̱, ikháán ma̱ndoo maraxtaa májánʼ ga̱jma̱a̱ tsímáá kámuu mbiʼi. *