ኣብ ዝሓለፈ ዓንቀጻት፡ ኣብ ህይወት ዜጋጥም እተፈላለየ ዜሰምብድ ነገራት፡ ህይወት ንምጻራ ዘይትከኣል ኬምስል ከም ዚኽእል ርኢና ኔርና። ጸገማት ጾይርካ ኽትመላለስ ከለኻ፡ ብህይወት ምንባር ዚሓይሽ እንተ ዀይኑ ወይ ብዛዕባኻ ዚሓሊ እንተ ኣልዩ ትሓስብ ትኸውን። ኣምላኽ ብዛዕባ ጭንቅኻ ብርግጽ ይሓሊ እዩ። ኣብ ቅድሚኡ ኽቡር ኢኻ።

ጸሓፍ መዝሙር 86 ኣብ ኣምላኽ ዘለዎ እምንቶ ኺገልጽ ከሎ፡ “ንስኻ ኽትምልሰለይ ኢኻ እሞ፡ ብመዓልቲ ጭንቀይ ክጽውዓካ እየ” ኢሉ እዩ። (መዝሙር 86:7) ንስኻ እዚ ድሕሪ ምፍላጥካ ግና፡ ‘“ብመዓልቲ ጭንቀይ” ከመይ ገይሩ እዩ ኣምላኽ ዚምልሰለይ፧’ ኢልካ ትሓትት ትኸውን።

ኣምላኽ ንጸገማትካ እኳ ብኡብኡ እንተ ዘየወገዶ፡ ቃሉ መጽሓፍ ቅዱስ ግና ንጸገማትካ ኽትጾሮ ዜኽእል ውሽጣዊ ሰላም ከም ዚህበካ ኸምዚ ብምባል የረጋግጽ እዩ፦ “ብዛዕባ ዅሉ ነገር ደኣ ልማኖኹም ብጸሎትን ብምህለላን ምስ ምስጋና ኣብ ኣምላኽ ይፈለጥ እምበር፡ ብዛዕባ ገለ እኳ ኣይትጨነቑ፣ እቲ ኻብ ኵሉ ሓሳብ ዚበልጽ ሰላም ኣምላኽ ድማ ንልብኹምን ንሓሳብኩምን ብክርስቶስ የሱስ ኪሕልዎ እዩ።” (ፊልጲ 4:6, 7፡ እግረ ጽሑፍ) እዚ ዚስዕብ ጥቕስታት መጽሓፍ ቅዱስ፡ ንሓልዮት ኣምላኽ ከመይ ገይሩ ኸም ዜረጋግጸልና ርአ።

“ሓንቲ [ጭሩ] እኳ፡ ኣብ ቅድሚ ኣምላኽ ዕሽሽ ኣይትብሃልን እያ። . . . ንስኻትኩም ካብ ብዙሓት ጨራሩ ትበልጹ ኢኹም።”—ሉቃስ 12:6, 7፡ እግረ ጽሑፍ።

ነዚ ዚስዕብ ሕሰበሉ፦ ዋጋ ዘይብለን ዚመስላ ጨራሩ፡ ኣብ ቅድሚ ኣምላኽ ዘየገድሳ ኣይኰናን። ኣምላኽ ንሓንቲ ደቃቕ ጭሩ እኳ የስተብህለላ እዩ፣ ኵላተን ኣብ ቅድሚኡ ኽቡራት ህያዋን ፍጥረታት እየን። ኣብ ቅድሚ ኣምላኽ፡ ሰባት ካብ ጨራሩ ኣጸቢቖም ይበልጹ እዮም። ደቂ ሰብ “ብመልክዕ” ኣምላኽ እተፈጥሩ ብምዃኖም ካብ ምድራዊ ፍጥረቱ ብሉጻት እዮም፣ ነቲ ኽብ ዝበለ ባህርያት ኣምላኽ ናይ ምምዕባልን ናይ ምንጽብራቕን ክእለት እውን ኣለዎም።—ዘፍጥረት 1:26, 27።

“ኦ የሆዋ፡ ውሽጠይ ፈቲሽካንን ፈሊጥካንን። . . . ንሓሳባተይ . . . ተስተውዕሎ። . . . መርምረኒ፡ ዜጨንቐኒ ሓሳባተይ ድማ ፍለጥ።”—መዝሙር 139:1, 2, 23።

ነዚ ዚስዕብ ሕሰበሉ፦ ኣምላኽ ብብሕቲ ይፈልጠካ እዩ። ውሽጣዊ ስምዒታትካን ሓሳባትካን ይፈልጦ እዩ። ካልኦት ንጭንቅኻ እኳ እንተ ዘይተረድእዎ፡ ኣምላኽ ግና ይሓልየልካን ኪሕግዘካ ይደልን እዩ። እምበኣር፡ ብህይወት ምንባር ይሓይሽ።

“ኦ የሆዋ፡ ጸሎተይ ስማዕ፣ ኣውያተይ ከኣ ኣባኻ ይብጻሕ። . . . እዝንኻ ኣድንነለይ፣ ክጽውዓካ ኸለኹ፡ ቀልጢፍካ መልሰለይ። ንጸሎት ነዳያት ኬቕልበሉ እዩ።”—መዝሙር 102:1, 2, 17።

ነዚ ዚስዕብ ሕሰበሉ፦ የሆዋ ንንብዓት ነፍሲ ወከፍ ሰብ ከም ዝመዝገቦ ጌርካ ተገሊጹ ኣሎ። (መዝሙር 56:8) ስለዚ፡ ንንብዓትካ እውን መዝጊብዎ ኣሎ። ኣብ ቅድሚ ኣምላኽ ኽቡር ስለ ዝዀንካ፡ ንዅሉ መከራኻን ንብዓትካን ይዝክሮ እዩ።

“ኣነ ኣምላኽካ እየ እሞ፡ ኣይትጨነቕ። ከጽንዓካ፡ እወ፡ ክረድኣካ፡ . . . ክሕዘካ እየ። . . . ‘ኣይትፍራህ። ክረድኣካ እየ’ ኸኣ ዝብለካስ ኣነ የሆዋ ኣምላኽካ እየ።”—ኢሳይያስ 41:10, 13።

ነዚ ዚስዕብ ሕሰበሉ፦ ኣምላኽ ኪረድኣካ ድሉው እዩ። እንተ ወዲቕካ፡ ኬተንስኣካ እዩ።

“ኣምላኽሲ በቲ ሓደ ወዱ ዚኣምን ኵሉ ናይ ዘለኣለም ህይወት ምእንቲ ኺረክብ እምበር፡ ከይጠፍእሲ፡ ንወዱ በጃ ኽሳዕ ዚህብ፡ ክሳዕ ክንድዚ ንዓለም ኣፍቂርዋ እዩ።”—ዮሃንስ 3:16።

ነዚ ዚስዕብ ሕሰበሉ፦ ኣብ ቅድሚ ኣምላኽ ኣዚኻ ኽቡር ብምዃንካ፡ ንሱ ብፍታዉ ተላዒሉ ወዱ የሱስ ምእንታኻ በጃ ኪኸውን ሂቡ እዩ። እዚ መስዋእቲ እዚ ድማ፡ ሓጐስን ዕላማን ዘለዎ ናይ ዘለኣለም ህይወት ክትረክብ ኣጋጣሚ ኸፊቱልካ ኣሎ። *