DZINDRIMA dzi vbindridego dzo yeyedza edzi sigaradzo si nga lemedzisago khidzo womi wathu. Wa gu ba u emisana ni sigaradzo sago, adzina u nga dzi wudzisa gu khuwe gasi nyi ngo vbanyeya ginani, mwendro ina womo kamo khathalago kheni! Tiyisega gu khuwe Nungungulu a ngu si wona sigaradzo sago. U na ni lisima ngudzu gwaye.

Mulovi nya Ndzimo 86 yeyedzide gutumba gwaye ga Nungungulu, khu gu khuye: “Musigaradzoni, nya gu lila avbo gwago, kholu uwe u ngu nyi hakha.” (Ndzimo 86:7) Adzina u nga dzi wudzisa gu khuwe: ‘Nungungulu a na nyi hlamula kharini “musigaradzoni” gwangu?’

Ambari Nungungulu a gu mba dzegeya gu lamula sigaradzo sago, Lito laye, Bhibhiliya, li ngu gu tiyisegisa gu khilo Nungungulu a na rudzisa mapimo yago ni gu gu phasa gu emisana ni sigaradzo sago: “Mu nga garadzegi khu gilo. Omu nya milombelo yanu lombani esi mu si vbwetago ga Nungungulu, khu monyo nya gubonge. Gurula ga Nungungulu gu dzi kodzago gu vboha ni omu hi si gu alakanyigo, gu na sayise myonyo ni mapimo [yanu].” (Vafilipi 4:6, 7) Wona edzi mavhesi yaya nya Bhibhiliya ma landreyago ma hi ningago khidzo gutumba nyo khethu Nungungulu a ngu khathala khethu.

“Gimwalo ni [ginyoni] gimwegyo gi si thedwigo kota khu Nungungulu. . . . Enu mu na ni giphaso ngudzu guvbindra sinyoni nya singi.” — Luka 12:6, 7.

NGA DUNDRUGEYA KHESI: Sinyoni nya sidugwana si nga wonega na siri mwalo lisima ga vathu nya vangi, ganiolu Nungungulu a ngu khathala ngudzu khiso. Nungungulu a nguti sinyoni satshavbo gimwegyo khu gimwegyo; sinyoni satshavbo sivangwa nya lisima ngudzu si vbanyago. Vathu va na ni lisima ngudzu ga Nungungulu guvbindra sinyoni. Vathu khavo sivangwa nyo samadzise ngudzu vbakari nya sivangwa satshavbo si giridwego khu Nungungulu mafuni. Va giridwe khu “mufananiso” wa Nungungulu nigu va na ni makodzelo nyo haguleye ni gu yeyedza makhalelo yaye nyo samadzise. — Genesi 1:26, 27.

 “PFHUMU Nungungulu, uwe u nyi hoIeIede gwadi, u ngu nyiti . . . U ngu yiti mipimiso yangu . . . Nyi khedzise gwadi, uwe Nungungulu; nyi linge uti mapimo yangu.” — Ndzimo 139:1, 2, 23.

NGA DUNDRUGEYA KHESI: Nungungulu a ngu guti gwadi. A nguti esi si gomogo monyoni gwago ni esi si gu garadzago. Ambari tepo vambe va si pwisisigo sigaradzo u tshanganago naso, Nungungulu a ngu khathala khuwe nigu a gu vbweta gu gu phasa. Guti isoso, sa gu hi ninga sighelo nyo simame gu vbanya.

“PFHUMU Nungungulu yingisa nombelo wangu . . . Neredza ndzeve yago u nyi yingisa; vbiredza gu nyi hakha gikhati nyi gu ranago . . . A [ngu] yingisa nombelo nya khulungu.” — Ndzimo 102:1, 2, 17.

NGA DUNDRUGEYA KHESI: Jehovha a ngu wona marongo yatshavbo ma vbaladzwago khu vathu khu kotani gutshaniseka gwawe. (Ndzimo 56:8) Gupata ni marongo yago. Nungungulu a ngu dundruga silingo satshavbo u tshanganago naso ni marongo yago kholu u na ni lisima ngudzu gwaye.

“U nga vbeli tshivba, kholu eni kheni Nungungulu wago; nyi na gu tiyisa ni gu gu phasa . . . Kholu eni, [Jehovha] Nungungulu wago . . . [nyo] gu embela, kheni: ‘U nga thavi, eni nyi ngu gu phasa.’” — Isaya 41:10, 13.

NGA DUNDRUGEYA KHESI: Nungungulu dzi emisede gu gu phasa. Wa gu tshuka u thega, a na gu wusa.

“Nungungulu haladzide ngudzu litigo gu kala a ningela Mwanaye wa moyo, gasi ni wevbi a khodwago gwaye a si mbembi, aholu a mane guvbanya nya gupindruge.” — Johane 3:16.

NGA DUNDRUGEYA KHESI: U na ni lisima ngudzu ga Nungungulu nyo kala a ningeya ni Gyanana gyaye, Jesu, kha nga muphaso gasi gu gu handza gighoni ni gufani. Muphaso wowo nya gudzegiswe wu gu tulede ndziya nyo mane guvbanya nyo tsakise mafuni kala gupindruga. *