Ensonga Habwaki Obwomeezi Bwine Omugaso
OMU BICWEKA eby’enyuma turozere enyikara ezisobora kuletera obwomeezi bwaitu kuguma. Obwoba noraba omu bizibu byawe nk’omuntu, nosobora kwekaguza obwomeezi obuburaaba bwine omugaso rundi obuharaaba haroho omuntu wena arukukufaaho. Baitu kimanye ngu Ruhanga nakufaaho kandi oli w’omuhendo haluwe.
Omuhandiiki wa Zabuli 86 akooleka ngu nayesiga Ruhanga obuyagambire ati: “Omu kiro ekyomuhito gwange ndikukunga; baitu olingarukamu.” (Zabuli 86:7) Baitu nosobora kwekaguza ‘Ruhanga alingarukamu ata, “omu kiro ekyomuhito gwange”?’
N’obukiraaba ngu Ruhanga asobora kutamaraho ebizibu byawe bwangu bwangu, Ekigambo kye Baibuli nikisobora kukukonyera kutunga obusinge omu mutima oburakukonyera kugumiisiriza: “Mutatuntu’ra na kake, baitu omu kusaba kwona nokwesengereza hamu nokusima mumanyisege ebimuse’ra hali Ruhanga. Kandi nobusinge bwa Ruhanga oburukukira okumanywa kwona bulirinda emitima yanyu nebitekerezo byanyu.” (Abafiripi 4:6, 7) Wetegereze omulingo enkarra zinu zirukutugumya nk’oku Ruhanga natufaaho.
Ruhanga Nakufaaho
‘[Ekisirya] kimu kyonka tikyeba omu maiso ga Ruhanga. . . . Muli b’omuhendo okukira ebisirya bingi.’—Luka 12:6, 7.
KITEKEREZEEHO: Ruhanga nafaaho obunyonyi obutaito nk’ebisirya n’obukiraaba ngu abantu baingi tibaburora nk’obw’omugaso. Ruhanga narora buli kisirya kyona kandi byona by’omuhendo haluwe. Abantu b’omuhendo muno hali Ruhanga kukira n’ebisirya ebingi. Abantu nibyo bihangwa bya Ruhanga ebirukukirrayo kimu oburungi omu nsi habwokuba bakahangwa omu kisisani kye kandi baine obusobozi obw’okukurakuraniza n’okwoleka emiringo nk’eye.—Okubanza 1:26, 27.
“Ai Mukama, okandora muno oka’manya. . . . Okenga okutekereza kwange . . . Ondenge, omanye ebitekerezo byange.”—Zabuli 139:1, 2, 23.
KITEKEREZEEHO: Ruhanga akumanyire kimu kurungi. Amanyire enyehurra zaawe zoona eziri omu mutima kandi n’ebirukukweraliikiriza. Abantu abandi n’obubalemwa kwetegereza ebizibu byawe rundi ebintu ebirukukweralikiriza, Ruhanga uwe nakufaaho kandi naija kukukonyera. Kinu kiretera obwomeezi bwawe kuba bw’omugaso.
Obwomeezi Bwawe Bwine Ekigendererwa
“Hurra okusaba kwange, ai Mukama, okurra kwange kuhike namberoli. . . . Otege okutu kwawe hali nyowe; ha kiro ekinkungiramu ongarukemu bwango. . . . Ataire omutima ha kusaba kwabasege.”—Zabuli 102:1, 2, 17.
KITEKEREZEEHO: Yahwe aikaire narora amaziga goona abantu balizire habw’okubonabona kwabo. (Zabuli 56:8) Kinu nikimanyisa ngu n’amaziga gaawe garumu. Ruhanga naijuka okubonabona kwawe hamu n’amaziga gaawe habwokuba oli w’omuhendo muno haluwe.
“Otafube’ra, baitu ninyowe Ruhanga wawe: nyowe ndikuha amani; ego, ndikukonyera . . . Nyowe Mukama Ruhanga wawe . . . ninkugambira nti Otatiina; ndakukonyera.”—Isaya 41:10, 13.
KITEKEREZEEHO: Ruhanga ayetegekere kukukonyera. Obworagwa hansi, naija kukwimukya.
Obusumi obw’Omu Maiso Nibwija Kuba Burungi
“Ruhanga nukwo yagondeze ati ensi, nahayo Omwanawe ayazairwe omu wenka, omuntu wena anyakumuikiriza aleke okubura, baitu atunge obwomezi obutahwaho.”—Yohana 3:16.
KITEKEREZEEHO: Habwokuba oli w’omuhendo muno hali Ruhanga, akahayo Omwana we Yesu kukufeera. Ekihongwa kya Yesu kinu nikikuha okunihira okw’okutunga obwomeezi obutahwaho oburumu okusemererwa kandi obw’ekigendererwa. a
N’obworaaba oyetuntwire kandi nohurra obwomeezi bukutamire, wesomese Ekigambo kya Ruhanga Kandi oyombeke okwikirza kwawe omu mirago ya Ruhanga. Nikiija kukuletera kusemererwa n’okukigumya ngu obwomeezi bwine omugaso.
a Kumanya ebirukukiraho ebirukukwata ha mulingo osobora kugasirwa ha kihongwa kya Yesu, rora vidiyo Ijuka Okufa kwa Yesu enyakuli ha mukura ogwa www.pr418.com/ttj. Rora nambere hali EBIRUKUTUKWATAHO > EKIIJUKYO.
Nosobora Kugonza na Binu;
EBIRUKUTUKWATAHO
Habwaki Osemeriire Kwega Baibuli?—Akavidiyo Akakooto
Baibuli ekonyire obukaikuru n’obukaikuru bw’abantu omu nsi yoona kutunga eby’okugarukamu by’ebikaguzo ebikuru omu bwomeezi. N’ebyawe wakugondeze bigarukwemu?
OMUNAARA GW'OMULINZI
Kitugasira Kumanya Ruhanga n’Atufaaho
Ebyahandiikirwe nibitukonyera kwombeka okwikiriza omu mirago ya Ruhanga oy’omu kasumu ak’omu maiso.
OMUNAARA GW'OMULINZI
Ekisembo Ekirukukirayo Kuruga Hali Ruhanga—Habwaki Kiri ky’Omuhendo Mwingi?
Nsonga ki eziretera ekisembo kimu kuba eky’omuhendo kukira ebindi? Kucumiitiriza ha nsonga zinu nikiija kutuletera kusiima ekicunguro.
