Chifukwa Wuli Umoyo Ngwakuzirwa Chomene?
MU NKHANI izo zajumpha tawona umo masuzgo ghakupambanapambana ghangapangiskira munthu kuwona umoyo kuŵa wambura ntchito. Apo namwe mukuzizipizga masuzgo agho muli nagho, panji mungawona nga umoyo ulije ntchito kweniso kuti palije uyo wakumupwelelerani. Kweni manyani kuti Chiuta wakuŵikako mahara ku masuzgo ghinu. Ndipo ndimwe ŵakuzirwa chomene.
Uyo wakalemba Salimo 86 wakagomezganga Chiuta. Iyo wakati: “Pa zuŵa la suzgo yane, nkhumuchemani, pakuti munizgorenge.” (Salimo 86:7) Kweni imwe nyengo zinyake mungajifumba kuti, kasi ‘Chiuta wanizgorenge wuli “pa zuŵa la suzgo yane”?’
Nangauli Chiuta wangawuskapo yayi masuzgo nyengo yeneyiyo, kweni Baibolo likutisimikizgira kuti iyo wangatipa mtende wa mu mtima mwakuti tizizipizge suzgo. Baibolo likuti: “Lekani kwenjerwa na chinthu chilichose, kweni mu vinthu vyose, mu lurombo na maŵeyelero pamoza na kuwonga, madandawuro ghinu ghamanyikwe kwa Chiuta. Ndipo mtende wa Chiuta uwo ukuluska maghanoghano ghose, uvikilirenge mitima yinu na maghanoghano ghinu.” (Ŵafilipi 4:6, 7) Wonani umo mavesi ghakulondezgapo agha ghakulongolera kuti Chiuta wakutipwelelera.
Chiuta Wakumupwelelerani
“Palije [mpheta] nanga njimoza iyo Chiuta wakuyiluwa. . . .Imwe muli ŵakuzirwa kuluska mpheta zinandi.”—Luka 12:6, 7.
WONANI FUNDO IYI: Taŵanthu tingawona tuyuni tuchokotuchoko kuŵa twambura kuzirwa, kweni Chiuta wakutupwelelera. Chiuta wakuwona nanga nkhampheta kachoko chomene ndipo yiliyose njakuzirwa kwa iyo. Kweni pa vinthu vyose ivyo Chiuta wali kulenga pa charu chapasi, ŵanthu ndiwo mbakuzirwa chomene kwa iyo. Ŵanthu wali kulengeka mu “chikozgo” chake ndipo ŵangalongora mikhaliro ghake ghapachanya.—Genizesi 1:26, 27.
‘A Yehova, mwanisanda ndipo mukunimanya. Maghanoghano ghane mukughamanya. Nipimani, na kumanya vyenjezgo vya mu maghanoghano ghane.’—Salimo 139:1, 2, 23.
WONANI FUNDO IYI: Chiuta wakumumanyani makora imwe pamwekha. Wakumanya ivyo vili mu mtima winu, umo mukujipulikira, na ivyo mukwenjerwa navyo. Ŵanthu ŵangamanya makora yayi umo mukujipulikira para vyasuzga, kweni Chiuta wakumupwelelerani ndipo wakukhumba kumovwirani. Ntheura umoyo ngwakuzirwa chomene.
Umoyo Winu Ngwakuzirwa
“A Yehova, pulikani lurombo lwane. Kulira kwane kupempha wovwiri kufike kwa imwe. . . . Thyani khutu kwa ine. Nizgorani mwaluŵiro para nkhumuchemani. . . . Wategherezgenge lurombo lwa ŵakusokwa.”—Salimo 102:1, 2, 17.
WONANI FUNDO IYI: Kufuma waka apo Yehova wakalengera charu wakuwona masozi ghose agho ghakuthika para tikulira chifukwa cha masuzgo. Vili nga wali kuchita kulemba mu buku. (Salimo 56:8) Chiuta wakukumbuka masuzgo ghinu ghose na kulira chifukwa muli ŵakuzirwa chomene kwa iyo.
“Ungenjerwanga chara, pakuti ndine Chiuta wako. Nikukhozgenge, enya, nikovwirenge, . . . Pakuti ine Yehova Chiuta wako . . . nkhuyowoya nawe kuti: ‘Ungawopanga chara, ine nikovwirenge.’”—Yesaya 41:10, 13.
WONANI FUNDO IYI: Chiuta ngwakunozgeka kumovwirani. Para mwawa, iyo wamuwuskaninge.
Vinthu Viŵenge Makora Munthazi
“Pakuti Chiuta wakachitemwa chomene charu, lekani wakapeleka Mwana wake wapadera, kuti waliyose uyo wakupulikana mwa iyo waleke kuparanyika kweni waŵenge na umoyo wamuyirayira.”—Yohane 3:16.
WONANI FUNDO IYI: Chiuta wakumutemwani chomene mwakuti wakapeleka Mwana wake Yesu kuti wapeleke umoyo wake chifukwa cha imwe. Sembe iyi yikupeleka mwaŵi kuti muzakasange umoyo uwemi kweniso wamuyirayira. *
Nangauli mungasangana na masuzgo ghakuru wuli, kweni mukwenera kuŵerenga Baibolo mwakupwelelera na kukhozga chipulikano chinu mu ivyo Chiuta walayizga. Ivi vimovwiraninge kuti muŵe ŵakukondwa na kukhorwa kuti umoyo ngwakuzirwa chomene.
^ ndime 19 Kuti mumanye vinandi umo mungasangira chandulo na sembe ya Yesu, wonelerani vidiyo ya mutu wakuti Kukumbukira Nyifwa ya Yesu pa www.pr418.com. Lutani pa MABUKU > MAVIDIYO > MAUNGANO GHITHU NA UTEŴETI.
Panji Mungatemwa Kuŵerengaso Nkhani Izi
MANYANI VYA ISE
Chifukwa Wuli Mukwenera Kusambira Baibolo?
Baibolo likuzgora mafumbo ghakuzirwa gha ŵanthu ŵanandi pa charu chose. Kasi mukukhumba kuti mafumbo ghinu ghazgoreke?
GONGWE LA MULINDA
Kasi Kulomba Nkhwakovwira?
Kasi chichitikenge ntchivichi para mukulomba nyengo zose?
GONGWE LA MULINDA
Kasi Pali Uwemi Wuli Kumanya Kuti Chiuta Wakutipwelelera?
Malemba ghakutovwira kukhozga chipulikano chithu pa ivyo Yehova wali kutilayizga.
GONGWE LA MULINDA
Chifukwa Wuli Chawanangwa cha Chiuta Ntchakuzirwa Chomene?
Kasi ni vinthu wuli ivyo vikupangiska chawanangwa kuŵa chakuzirwa chomene kwa imwe? Para tikughanaghanira vinthu ivi tiwongenge chomene chawanangwa icho Yehova wali kutipa.
