A MATAUPU mai mua i te fakasologa tenei e fakaasi mai i ei a tulaga fakafanoa‵noa i te olaga kolā ka fai i ei ke faigata te olaga. I te taimi e kufaki ei koe i ou fakalavelave, ka mafaufau ifo koe me e mata koi aoga eiloa te olaga io me e mata, e isi se tino e fia saga atu ki a koe. Ke fakamalosi me i te Atua e iloa ne ia a mea e manavase koe ki ei. A koe e tāua ki a ia.

A te tino tusitala o te Salamo 86 ne fakaasi mai ne ia tena loto talitonu ki te Atua, penei: “E kalaga atu au ki a koe i te aso o toku puapuaga, me ka tali mai koe ki a au.” (Salamo 86:7) E ui i ei, ka mafaufau aka koe penei, ‘Ka tali mai pefea te Atua “i te aso o toku puapuaga”?’

Faitalia me e se faka‵lei fakavave ne te Atua ‵tou fakalavelave, a ko tena Muna, te Tusi Tapu, e fakatalitonu mai me ka tuku mai ne ia a te filemu o te mafaufau ke fesoasoani mai ki a tatou ke kufaki: “Ke mo a ma manava‵se koutou ki so se mea, kae ke tuku atu a mea katoa kolā e ma‵nako koutou ki ei ki te Atua fakatasi mo otou fakafetai e auala i otou talosaga; kae ko te filemu o te Atua telā e sili fakafia atu i mea katoa kolā e malamalama i ei a tino ka puipui ne ia otou loto mo otou mafaufau.” (Filipi 4:6, 7, fakamatalaga mai lalo) Fakamolemole ke onoono ki te fakasologa o tusi fai‵tau konei mai i te Tusi Tapu kolā e fakatalitonu mai i ei a te atafai mai o te Atua ki a tatou.

“Kae e se mafai o puli i te Atua se manu [eva foliki] e tasi i a latou . . . E sili atu te tāua o koutou i lō manu eva fo‵liki e uke.” —Luka 12:6, 7.

KE MAFAU‵FAU KI TE MEA TENEI: A te ‵tonuga loa, a manu eva fo‵liki e sē tāua ki tino, kae e tāua eiloa ki te Atua. E se mafai o puli i te Atua a manu eva fo‵liki konā takitasi. Kae e tāua malosi atu ki te Atua a tino i lō manu eva fo‵liki konā. E tu ‵kese eiloa a tino mai i mea katoa a te Atua ne faite, me ne faite ki ana “foliga” kae e maua eiloa ne latou te atamai ke ati aka kae fakaasi atu ana uiga ‵gali tu ‵kese.—Kenese 1:26, 27.

“Ieova, ne iloilo ne koe au, kae ko iloa ne koe au. . . . E iloa ne koe oku mafaufauga . . . Iloilo mai au, e te Atua, kae fai ke iloa ne koe toku loto.”—Salamo 139:1, 2, 23.

KE MAFAU‵FAU KI TE MEA TENEI: E iloa faka‵lei ne te Atua a koe. E iloa ne ia ou lagonaga ‵loto mo mea e manavase koe ki ei faitalia me e se malamalama a nisi tino i ou tulaga. E atafai te Atua kae manako o fesoasoani atu ki a koe. Tenā te mea e fai i ei ke aoga tou olaga.

“Ieova, fakalogo mai taku ‵talo; ke oko atu eiloa ki a koe taku tagi mō se fesoasoani. . . . Tuku mai ou taliga ki a au; tali fakavave mai ki a au māfai e kalaga atu au. . . . Ka saga atu a ia ki te ‵talo a te tino mativa.”—Salamo 102:1, 2, 17.

KE MAFAU‵FAU KI TE MEA TENEI: Mai te kamataga eiloa o puapuaga o tino, ne iloa katoa ne Ieova a loimata o tino taki tokotasi kolā ne ‵tagi ona ko olotou logo‵maega. (Salamo 56:8) E aofia ei ou loimata. E masaua ne te Atua ou fakalavelave mo ou loimata katoa me i a koe e pele ki a ia.

“Sa manavase, me i a au ko tou Atua. Ka fakamalosi ne au a koe, ao, ka fesoasoani atu au ki a koe . . . Me i a au, Ieova tou Atua, . . . Ko te Atua telā e fai atu ki a koe, ‘Sa mataku. Au ka fesoasoani atu ki a koe.’”—Isaia 41:10, 13.

KE MAFAU‵FAU KI TE MEA TENEI: A te Atua e toka o fesoasoani atu ki a koe. Kafai koe ko siga, ka sau aka ne ia koe ki luga.

“Ona ko te lasi o te alofa o te Atua ki te lalolagi ne tuku mai ei ne ia tena tama fagasele e tokotasi, ko te mea ke se fakaseai atu so se tino telā e fakaasi atu faeloa te fakatuanaki ki a ia kae ke maua ne ia te ola se-gata-mai.”—Ioane 3:16.

KE MAFAU‵FAU KI TE MEA TENEI: E pele eiloa koe ki te Atua me ne talia eiloa ne ia ke tuku mai ne ia te ola o tena Tama, ko Iesu, e pelā me se taulaga mō koe. A te taulaga togiola tenei e tuku atu mai ei ki a koe te fakamoemoega mō se olaga gali kae fiafia ki te se-gata-mai. *