Mea hoona IHO Â ia ora
UA FAAITE to na mua ˈtu mau tumu parau e e rave rahi tupuraa ino mau e mea fifi ia faaruru atu. A faaoromai ai i to oe iho mau fifi, e ui paha oe mea hoona anei ia ora aore ra te tâuˈa ra anei vetahi ê ia ˈu. Ia papu ia oe e te ite ra te Atua i to oe ahoaho. Mea faufaa roa oe no ˈna.
Ua faaite te papai Bibilia o te Salamo 86 i to ˈna tiaturi i te Atua a na ô ai: “Ia tae i te mahana e ati ai au ra ua tiaoro vau ia oe ra, e faaroo mai hoi oe ia ˈu nei.” (Salamo 86:7) Noa ˈtu râ, te ui ra paha oe: “E nafea te Atua e pahono mai ai ‘i te mahana e ati ai au ra’?”
Noa ˈtu aita te Atua e faaafaro i te mau fifi i teie nei, te haapapu ra ta ˈna Parau, te Bibilia, e nehenehe oia e horoa mai i te hau o roto no te tauturu mai ia faaruru i te reira: “Eiaha ïa e haapeapea noa ˈˈe, na roto râ i te pure e te taparuparuraa e te haamaitairaa, a faaite i ta outou mau aniraa i te Atua. E na te hau o te Atua, tei hau ê i te mau manaˈo atoa, e tiai i to outou aau e feruriraa.” (Philipi 4:6, 7) A hiˈopoa na i to muri nei mau irava Bibilia o te haapapu ra e te tâuˈa mau ra te Atua ia tatou.
Te tâuˈa mau ra te Atua ia oe
“Aita râ hoê noa ˈˈe [manu rii] i moˈe i te Atua. . . . Mea faufaa aˈe outou i te manu rii e rave rahi.”—Luka 12:6, 7.
A FERURI NA: E mea faufaa ore te manu rii i te rahiraa o te taata, te haapao ra râ te Atua ia ratou. Te tâuˈa ra oia i te mau manu rii atoa no te mea e mau animara ora faufaa roa ratou. No te Atua, mea faufaa aˈe te taata i te manu rii. E poieteraa faahiahia mau te taata ia faaauhia i te tahi atu mau poieteraa i nia i te fenua. Ua poietehia ratou mai to te Atua “huru” e e nehenehe ratou e faatupu i te hoê â mau huru maitatai e to te Atua.—Genese 1:26, 27.
“E Iehova, ua hiˈopoahia vau e oe e ua itea. . . . Ua ite oe i to ˈu nei manaˈo . . . E tamata hua mai ia ˈu, e ia ite oe i tau manaˈo.”—Salamo 139:1, 2, 23.
A FERURI NA: Ua ite maitai te Atua o vai mau na oe. Ua ite oia i to oe mau huru aau hohonu roa ˈˈe. Oia atoa ta oe mau tapitapiraa. Peneiaˈe aita vetahi e taa ra i to oe mau fifi e ahoaho. Ua taa râ i te Atua e te hinaaro nei oia e tauturu ia oe. No reira, mea hoona iho â ia ora.
Mea faufaa to oe ora
“E Iehova e, e faaroo mai i tau pure, e ia tae atu hoi tau reo ia oe ra. . . . E fariu mai i to tariˈa ia ˈu nei; ia tae i te mahana e tiaoro atu ai au ra, e faaroo enaena mai oe ia ˈu. . . . E haapaohia e ana te pure a tei ati ra.”—Salamo 102:1, 2, 17.
A FERURI NA: E au ra e mai te haamataraa iho â o te mau fifi o te taata, ua ite Iehova i te mau roimata atoa o te taata no te mauiui rahi. (Salamo 56:8) Oia atoa to oe mau roimata. Te haamanaˈo ra te Atua i te mau tamataraa atoa ta oe i faaruru e te mau roimata atoa tei tahe mai no te mea mea faufaa oe no ˈna.
“Eiaha e taiâ, o vau hoi to Atua. E faaetaeta vau ia oe, e tauturu vau ia oe. . . . O vau hoi to Atua ra, o Iehova, . . . o tei parau atu ia oe e, Eiaha e mǎtaˈu; o vau hoi to oe tauturu.”—Isaia 41:10, 13.
A FERURI NA: Ua ineine te Atua i te tauturu mai ia oe. Mai te peu e topa oe, e tauturu te Atua ia oe ia tia faahou mai.
E a muri aˈe maitai aˈe te tiai ra ia oe
“No to ˈna here rahi i to te ao i horoa mai ai te Atua i ta ˈna Tamaiti otahi ia ore ia mou te taata o te faatupu i te faaroo ia ˈna, ia roaa râ te ora mure ore.”—Ioane 3:16.
A FERURI NA: No te mea mea faufaa roa oe no te Atua, ua tae roa oia i te horoa mai i ta ˈna Tamaiti o Iesu no te pohe no tatou. Te haapapu ra teie tusia i te tiaturiraa o te hoê oraraa oaoa e te maitai e a muri noa ˈtu. a
Noa ˈtu te hepohepo ra oe e e au ra e aita e ravea faahou, a haapii maite i te Parau a te Atua e a haapuai i to oe faaroo i roto i te mau parau fafau a te Atua. E oaoa oe e e papu ia oe mea hoona iho â ia ora.
a No te ite atu â e nafea oe e faufaahia ˈi i to Iesu tusia, a mataitai na i te video A haamanaˈo i te mahana poheraa o Iesu i nia www.pr418.com. A hiˈo i te tuhaa NO NIA IA MATOU > OROA HAAMANAˈORAA.
E au atoa outou . . .
NO NIA IA MATOU
No te aha e haapii ai i te Bibilia?
E horoa te Bibilia i te mau pahonoraa i te mau uiraa faufaa o te oraraa i te mau mirioni taata na te ao nei. E hinaaro anei oe e ite i tera mau pahonoraa?
TE PARE TIAIRAA
E nafea oe e faufaahia ˈi a ite ai e te tâuˈa ra te Atua ia oe
Te tauturu mai ra te Bibilia ia faatupu i te faaroo i ta te Atua parau fafau no nia i te tau a muri aˈe oaoa.
TE PARE TIAIRAA
O te ô rahi roa ˈˈe a te Atua te mea faufaa mau
Eaha te tumu e riro ai te hoê ô ei mea faufaa no oe? A feruri na i na manaˈo e maha o te tauturu atu ia mauruuru mau i te hoo.
