TA YANTIK TAL artikuloetik la kiltik te ay bintik kʼax tulan ya xkʼax ta jkuxlejaltik te ya yakʼ x-och xiwel ta koʼtantike, ta skaj-abi jichniwan ya awaʼiy te maba ya anaʼix te bin ya apas yuʼune. Ta ora ini ayniwan ataoj awokol te ya awaʼiy te ma xkujchix awuʼun o te ya akuy te maʼyuk machʼa ya smel yoʼtan ta atojole. Pero naʼame te ayat ta yoʼtan te Jehová. Bayalme akʼoplal ta yoʼtan.

Te machʼa la stsʼibay te Salmo 86 jich la yal ta stojol te Diose: «Ta scʼahcʼalel jwocol ya jcʼoponat, como haʼat yac ajacʼbon jcʼop» (Salmo 86:7). Pero yaniwan anop: «¿Bin-utʼil ya sjakʼbon jkʼop te Dios te kʼalal bayal bin ya jmel koʼtan yuʼune?».

Manchukme ma schajpan ta oranax te jwokoltik te Diose, yaloj ta jamal te ya xjuʼ ya yakʼbotik slamalil koʼtantik yuʼun ya xkujch kuʼuntik-a te jwokoltike. Jich ya yalbotik ta jamal te Biblia: «Ma me ayuc bin ya snaʼulan awoʼtanic yuʼun, pero ta scuenta scʼoponel Dios soc yalel wocol, aʼbeya snaʼ Dios spisil te bintic yac acʼambeyic, soc halbeyahic wocol Dios yuʼun. Hich te lamal qʼuinal te ya yacʼ te Diose, te cʼax mucʼ te ma xhuʼ cuʼuntic snaʼel, ya me scanantaybeyex awoʼtanic soc apensaric ta scuenta te Cristo Jesús» (Filipenses 4:6, 7). Ilawil ta lek te tekstoetik yuʼun Biblia te liʼ tsʼibaybilik, jichme ya ata ta ilel te bayal ya smel yoʼtan Dios ta atojol.

Ni jkojtuk jaʼmal mut «chʼayem ta oʼtanil yuʼun te Diose. [...] cʼax hich acʼoblalic a te bin utʼil bayel haʼmal mutetic» (Lucas 12:6, 7).

NOPA AWAʼIY INI: Ta sit te Diose kʼax mukʼ skʼoplal te jkojt tut jaʼmal mut, pero jaʼ kʼaxtoxan bayal skʼoplal ta yoʼtan te ants winiketike. Jaʼ yaʼtel skʼabotik te kʼax mukʼ skʼoplale, melel «hich yilel te bin utʼil Dios» pasbilotik sok ya xjuʼ kuʼuntik yakʼel ta ilel tʼujbil taleliletik (Génesis 1:26, 27).

«Jehová, awilbeyejon coʼtan soc anaʼbeyejon jba. [...] anaʼoj [...] te bintic jnopoj ta coʼtan.  [...] tsajawon soc naʼbon bintic jnopoj ta coʼtan» (Salmo 139:1, 2, 23).

NOPA AWAʼIY INI: Te Diose ya snaʼbat aba ta lek. Jaʼnix jich ya snaʼ te bin ya amel awoʼtan yuʼun sok te bin yaʼiyel ya awaʼiy abae. Manchukme ma xkʼot ta yoʼtanik ta lek te yantik te bin yaʼiyel ya awaʼiy aba, ya xkʼot ta yoʼtan stukel te Diose soknix ya skʼan ya skoltayat. Snaʼel-abi jaʼ ya yakʼ jmulanbeytik yutsilal te kuxinele.

«Jehová, aʼiybon awaʼiy te ya jcʼoponat, acʼa cʼohtuc ta atojol te caw. [...] Acʼa tal achiquin ta jtojol; jacʼbon jcʼop ta ora te cʼalal ya jcʼoponate. Te Jehová «ya me yichʼ ta cuenta te bin ya xhalbot yuʼun te machʼatic mayuc bin ay yuʼunic» (Salmo 102:1, 2, 17).

NOPA AWAʼIY INI: Te Diose yichʼoj ta wenta spisil te jayeb yalel sit smaloj te ants winiketik kuxinemike (Salmo 56:8). Jaʼnix jich yichʼoj ta wenta-euk te awuʼune. Ta swenta te bayal akʼoplal ta yoʼtan te Diose ay ta yoʼtan spisil te awokol sok te jayebto okʼemate.

«Ma me xamel awoʼtan, como hoʼon te Dioson awuʼune; ya caʼbat awip, ya jcoltayat [...]. Como hoʼon Jehovahon, te Dioson awuʼun [...] ya calbat: Ma me xiwat, hoʼon ya jcoltayat» (Isaías 41:10, 13).

NOPA AWAʼIY INI: Teme jich ya awaʼiy yan buelta te maʼyuk swentail te akuxlejale, jaʼme ya stamat jajchel te Diose. Yame skʼan ya skoltayat.

«Como hich cʼux ta yoʼtan Dios te bahlumilal te la sticon tal te hip jtuhl Snichʼan, scuenta yuʼun spisil te machʼatic ya schʼuhunic ma ba ya xchʼayic, ay scuxlejalic sbahtel qʼuinal yuʼun» (Juan 3:16).

NOPA AWAʼIY INI: Mero kʼuxat ta yoʼtan te Diose jaʼ yuʼun la yakʼ ta lajel te jip jtul sNichʼan, jaʼ te Jesuse. Ta swenta-abi ya xjuʼ ya atabey swentail te akuxinel sok ya ata stseʼelil awoʼtan ta sbajtʼelkʼinal. *