LI TA mantaletik echʼe laj kalbetik skʼoplal ti oy kʼusitik chopol xuʼ xkʼot ta jtojolaltik ti muʼyuk xa xchapanobil yilele. Yikʼaluk van jaʼ jech yakal chanuptan xchiʼuk ti muʼyuk sbalil chavaʼi li akuxlejale o ti muʼyuk buchʼu tskoltaot yilele. Pe mu jechuk maʼ taje, yuʼun li Diose kʼux tajek chaʼi kʼalal chavil avokole xchiʼuk oyot tajek ta yoʼonton.

Li buchʼu la stsʼiba li Salmo 86 spatoj lek yoʼonton ta stojolal li Diose, yuʼun xi laj yale: «Ta jkʼanbot vokol kʼalal jaʼo oy jvokole, yuʼun chatakʼbun» (Salmo 86:7). Pe xuʼ van xi chanope: «¿Kʼuxi tstakʼbutik Dios kʼalal chkil jvokoltike?».

Akʼo mi muʼyuk bu tslajes ta ora jvokoltik li Diose, jamal chal ti chakʼbutik jun oʼontonal sventa xkuch batel kuʼuntike. Xi chalbutik ta jamal li ta Skʼope: «Mu me kʼusi xavul-o avoʼontonik jsetʼuk, jaʼ lek albeik Dios ta orasion li kʼusi chavul-o avoʼontonike, ta sjunul avoʼontonik xakʼanik vokol xchiʼuk tojik ta vokol kʼalal chapasik orasione; vaʼun li jun oʼontonal yuʼun Dios ti toj echʼ xa noʼox lek ti jaʼ mu sta li snopben krixchanoetike chchabi avoʼontonik xchiʼuk anopbenik» (Filipenses 4:6, 7). Kʼelbo skʼoplal li tekstoetik ta jkʼeltik batele, vaʼun chavakʼ venta ti oyot tajek ta yoʼonton li Diose.

Mi jkotuk saktarin «chʼayem ta sjol li Diose [...]. Voʼoxuk mas tsots akʼoplalik kʼuchaʼal li epal saktarine» (Lukas 12:6, 7).

NOPO TA SVENTA LIʼE: Li Diose toj tsots skʼoplal chil li uni kʼox saktarine. Pe li Diose mas to tsots jkʼoplal chilutik, jaʼ mu sta li uni saktarinetike. Voʼotik mas tsots jkʼoplaltik ta skotol li spasbentake, yuʼun la spasutik kʼuchaʼal slokʼol stuk, xuʼ jchanbetik li slekil talelaltake xchiʼuk xuʼ xkakʼtik ta ilel (Jenesis 1:26, 27).

«Kajval Jeova, achajojun lek ta kʼelel xchiʼuk xavojtikinun [...]. Ta nom to chavil tal li kʼusitik oy ta jnopbene [...]. Kʼelun lek avil xchiʼuk naʼo lek li kʼusitik ta jvul-o koʼontone» (Salmo 139:1, 2, 23).

NOPO TA SVENTA LIʼE: Lek xojtikinot li Diose, snaʼoj ti kʼu yelan chavaʼi abae xchiʼuk li kʼusi chavul-o avoʼontone. Akʼo mi mu xaʼibeik lek smelolal avokoltak li yantike, li Diose oyot ta yoʼonton xchiʼuk tskʼan tskoltaot. Taje chakʼbe sbalil li akuxlejale.

«Kajval Jeova, chikintao li j-orasione. Kʼotuk ta atojolal ti xivokolet ta jkʼan koltaele [...]. Tsʼetano tal achikin ta jtojolal; ta melel, takʼbun ta anil kʼalal ta jkʼoponote». Li Jeovae «chchikintabe s-orasion li buchʼutik muʼyuk kʼusi x-ayan yuʼunike» (Salmo 102:1, 2, 17).

NOPO TA SVENTA LIʼE: Li Diose stsakoj ta venta kʼalal ch-okʼ li krixchanoetik ta skoj li svokolike (Salmo 56:8). Te kapal akʼoplal ek, li Diose xvul ta sjol skotol li vokoliletik anuptanoj talele xchiʼuk ti ep ta velta okʼemote, yuʼun toj ep abalil chilot.

«Mu xavul avoʼonton, yuʼun voʼon Adiosun. Voʼon ta jtsatsubtasot, jech, voʼon ta jkoltaot [...]. Voʼon ti Jeovaune, voʼon li Adiosune, xi chkalbote: ‹Mu xaxiʼ. Voʼon ta jkoltaot›» (Isaias 41:10, 13).

NOPO TA SVENTA LIʼE: Li Diose tskʼan tskoltaot. Yuʼun mi layal ta lume, tstoyot likel.

«Skʼanoj tajek krixchanoetik li Diose, jaʼ yuʼun laj yakʼ li jun noʼox Xnichʼon sventa mu xichʼ lajesel li buchʼu chakʼ xchʼunel yoʼonton ta stojolale, moʼoj, yuʼun jaʼ sventa tsta-o xkuxlejal sbatel osil» (Juan 3:16).

NOPO TA SVENTA LIʼE: Li Diose skʼanojot tajek, yuʼun ta sjunul yoʼonton laj yakʼ li Xnichʼon sventa stoj li jmultike. Li matanal laj yakʼe jaʼ sventa oyuk sbalil xavaʼi li akuxlejale xchiʼuk ti xamuyubajuk noʼox sbatel osile. *