THERO dzo fhiraho dzo sumbedza uri thaidzo khulwane dzo fhamba fhambanaho dzi nga ita uri ri vhone u nga u fa ndi khwine. Musi ni tshi khou konḓelela thaidzo dzaṋu, ni nga ḓivhudzisa arali u tshila zwi zwa ndeme kana arali hu na muthu ane a vha na ndavha na inwi. Ivhani na vhungoho ha uri Mudzimu u na ndavha na inwi. Ni wa ndeme khae.

Muṅwali wa Psalme ya 86 o sumbedza uri u fhulufhela Mudzimu musi a tshi ri: “Musi ndo khakhelwa ndi vhidzelela Iwe, ngauri ndi Iwe U mpfaho.” (Psalme ya 86:7) Fhedzi ni nga ḓivhudzisa uri: ‘Mudzimu u ḓo mphindula hani “musi ndo khakhelwa”?’

Naho Mudzimu a sa ḓo fhelisa thaidzo dzaṋu nga u ṱavhanya, Ipfi ḽawe Bivhili ḽi ni khwaṱhisedza uri a nga ni ṋea mulalo uri ni kone u konḓelela, ḽi ri: “Ni songo vhilaela nga tshithu na tshithihi, fhedzi zwoṱhe zwine na zwi ṱoḓa ni humbele Mudzimu nga thabelo khathihi na u livhuha; nahone mulalo wa Mudzimu une wa fhira u ṱalukanya hoṱhe u ḓo tsireledza mbilu dzaṋu na maanḓa aṋu a muhumbulo.” (Vhafilipi 4:6, 7) Ṱhogomelani nḓila ine ndimana dza Bivhili dzi tevhelaho dza khwaṱhisedza ngayo uri Mudzimu u na ndavha na riṋe.

“A hu na na tshithihi tshazwo [tshiṋoni tshiṱuku] tshine Mudzimu a tshi hangwa. . . . inwi ni vha ndeme vhukuma u fhira zwiṋoni zwiṱuku zwinzhi.”​—Luka 12:6, 7.

ṰHOGOMELANI: Zwiṋoni zwine vhunzhi ha vhathu vha zwi dzhia zwi si zwa ndeme, kha Mudzimu ndi zwa ndeme. Mudzimu u livhisa ṱhogomelo kha tshiṋoni tshiṅwe na tshiṅwe tshiṱuku; zwoṱhe ndi zwa ndeme khae. Vhathu ndi vha ndeme kha Mudzimu u fhira zwiṋoni zwiṱuku. Vhathu ndi tsiko ya Mudzimu yo khetheaho kha ḽifhasi. Vho sikwa nga “tshifanyiso” tshawe nahone vha a kona u ṱahulela na u sumbedza pfanelo dzawe dzavhuḓi.​—Genesi 1:26, 27.

“Yehova, U a nṱalukanya, U a nḓivha. . . . Zwa mbiluni yanga U zwi vhona U kule . . . U ḓivhe zwiné nda elekanya.”​—Psalme ya 139:1, 2, 23.

ṰHOGOMELANI: Mudzimu u a ni ḓivha zwavhuḓi. U a ḓivha zwithu zwine zwa ni vhilaedzisa. Naho vhaṅwe vha sa pfesesi thaidzo dzaṋu, Mudzimu u na ndavha na inwi nahone u ṱoḓa u ni thusa. Nga nṱhani ha zwenezwo, vhutshilo haṋu ndi ha ndeme.

“Yehova, ipfa thabelo yanga; u lila hanga kha hu swike ha Iwe. . . . Sendedza nḓevhe yau ndi tshi vhidzelela. . . . U ḓo thetshelesa thabelo ya vhatshinyali.”​—Psalme ya 102:​1, 2, 17.

ṰHOGOMELANI: Yehova u a vhona musi vhathu vha tshi lila nga nṱhani ha thaidzo dzine vha vha nadzo. (Psalme ya 56:⁠8) Zwenezwo zwi katela na u lila haṋu. Mudzimu u a humbula milingo na u lila haṋu ngauri ni wa ndeme khae.

“U songo [vhilaela]; ngauri Mudzimu wau ndi Nṋe. Ndi ḓo U khwaṱhisa, ndi ḓo U farisa . . . Ngauri Nṋe Yehova ndi Mudzimu wau . . . ndi U vhudza ndi ri: U songo ofha; a U farisaho ndi Nṋe.”​—Yesaya 41:10, 13.

ṰHOGOMELANI: Mudzimu o lugela u ni thusa. Arali na wa, u ḓo ni takusa.

“Mudzimu o funa shango zwihuluhulu a vhuya a kumedza Murwa wawe mubebwa e eṱhe, uri muṅwe na muṅwe ane a vha na lutendo khae a si fheliswe, fhedzi a wane vhutshilo vhu sa fheli.”​—Yohane 3:16.

ṰHOGOMELANI: Nga nṱhani ha uri Mudzimu u a ni funa, o ni ṋea Murwa wawe Yesu sa tshiṱhavhelo. Tshenetshi tshiṱhavhelo tshi ita uri ni vhe na fhulufhelo ḽa u tshila vhutshilo vhu takadzaho lwa tshoṱhe. *