AN NAHIUNA nga mga artikulo nagpapakita han iba-iba nga makasurubo nga mga panhitabo nga baga hin makuri gud mailob. Samtang gin-iilob mo an imo personal nga mga problema, bangin nahunahuna mo kon may pulos pa ba an kinabuhi o kon may nahigugma ba ha imo. Sarig nga nakikita gud han Dios an imo kasakit. Presyoso ka ha iya.

An parasurat han Salmo 86 nagpahayag han iya pagsarig ha Dios: “Natawag ako ha imo ha adlaw han akon kasakitan, kay ikaw mabaton ha akon.” (Salmo 86:7) Pero bangin mahunahuna mo, ‘Paonan-o ako babatunon han Dios “ha adlaw han akon kasakitan”?’

Bisan kon diri dayon kuhaon han Dios an imo mga problema, an iya Pulong, an Biblia, nagpapasarig ha imo nga makakahatag hiya hin kamurayawan ha hunahuna basi buligan ka nga makailob: “Ayaw kamo kabaraka ha bisan ano nga butang, kondi ha ngatanan nga butang pinaagi han pag-ampo ngan pangamuyo nga may pagpasalamat, ipahibaro niyo ha Dios an iyo mga hangyo; ngan an kamurayawan han Dios nga labaw ha ngatanan nga pagsabot magbabantay han iyo kasingkasing ngan han iyo panhunahuna.” (Filipos 4:6, 7) Alayon tagda kon paonan-o an masunod nga mga teksto naghahatag ha aton hin pasarig nga nahigugma gud ha aton an Dios.

“Waray bisan usa [nga maya] an nalilikatan han Dios. . . . Mas birilhon kamo kay ha damu nga maya.”—Lucas 12:6, 7, footnote.

HUNAHUNAA: An baga hin waray bili nga mga tamsi importante ha Dios. Waray bisan usa han gudtiay nga maya an diri nakikita han Dios; presyoso an kada tagsa ha ira. An mga tawo mas birilhon ha Dios kay han mga maya. An mga tawo an pinakapresyoso nga ginlarang han Dios dinhi ha tuna. Ginhimo hira ha iya “dagway” ngan may kapas hira ha pagkultibar ngan pagpakita han iya mag-opay gud nga mga kalidad.—Genesis 1:26, 27.

“O Jehova, imo ako gin-usisa, ngan nakilala ka ha akon. . . . Nasasabtan mo an akon mga panhunahuna . . . Usisaha ako, ngan hibaroi an akon nababaraka nga mga panhunahuna.”—Salmo 139:1, 2, 23.

HUNAHUNAA: An Dios nakilala gud ha imo. Maaram hiya han imo personal nga mga pagbati ngan kabaraka. Bisan kon bangin diri nasasabtan han iba an imo makasurubo nga kahimtang, an Dios nahigugma ha imo ngan naruruyag nga buligan ka. Tungod hini, may pulos gud an kinabuhi.

“O Jehova, pamatii an akon pag-ampo; makaabot unta ha imo an akon pangaraba para hin bulig. . . . Ikiling an imo talinga ha akon; batona dayon ako kon natawag ako. . . . Maghahatag hiya hin atensyon ha pag-ampo han mga waray bisan ano.”—Salmo 102:1, 2, 17.

HUNAHUNAA: Baga hin tikang pa ha tinikangan han pag-antos han tawo, nakikita na ni Jehova an tagsa nga luha nga igintangis han mga tawo. (Salmo 56:8) Upod hini an imo mga luha. Nahinunumdoman han Dios an tanan mo nga pagsari ngan luha kay presyoso ka ha iya.

“Ayaw kabaraka, kay ako an imo Dios. Paririg-unon ko ikaw, oo, bubuligan ko ikaw . . . ako, hi Jehova nga imo Dios . . . an nasiring ha imo, ‘Ayaw kahadlok. Bubuligan ko ikaw.’”—Isaias 41:10, 13.

HUNAHUNAA: Andam an Dios nga buligan ka. Kon matumba ka, ibabangon ka niya.

“Hinigugma gud han Dios an kalibotan salit iginhatag niya an iya bugtong nga Anak, basi an bisan hin-o nga nagpapakita hin pagtoo ha iya diri mabungkag kondi magkaada kinabuhi nga waray kataposan.”—Juan 3:16.

HUNAHUNAA: Hinigugma ka gud han Dios salit kinaburut-on nga iginhatag niya an iya Anak, hi Jesus, sugad nga halad para ha imo kaopayan. Ini nga halad naghahatag ha imo hin paglaom nga magkaada malipayon ngan may katuyoan nga kinabuhi ha kadayonan. *