NGANI SYASIPITE sila, silosisye kuti yakutendekwa yine yakutengusya mpaka yiŵe yakusawusya kuyipilila. Patukupilila ni yayikututendechela paumi wetu mpaka tuliwusyeje naga umi wetu ukwete chakulinga kapena naga pana jwinejwakwe jwakusasamala ya m’weji. Tuŵeje ŵakusimichisya kuti Mlungu akusatusamalila patukulagasika nganisyo soni kuti tuli ŵakusosekwa mnope kwa jwalakwe.

Jwaŵalembile Salimo 86 jwasasile kuti akusamkulupilila Mlungu mwakuŵecheta kuti, “Pa lisiku lya yisawusyo ngusinaŵilanga ŵalakwe, pakuŵa akusajanga mapopelo gangu.” (Salimo 86:7) Komboleka kuti mpaka asimonjeje ni kuliwusyaga kuti, ‘Ana Mlungu mpaka anjanje chamtuli “pa lisiku lya yisawusyo”?’

Atamose kuti Mlungu nganaŵa atutyochesye mwachitema yakusawusya yatukusimana nayo nambo Maloŵe gakwe mpaka gatukamuchisye kuti tukole mtendele wa mumtima nambosoni kuti tumalane ni yakusawusyayo. Maloŵega gakusati, “Mkadandawula ni kandu kane kalikose, nambo pandaŵi jimkupopela mumŵendeje Mlungu yindu yayikumsoŵa, nipo ndaŵi syosope myiŵendeje yindu yeleyi ni mitima jakutogolela. Mtendele wa Mlungu, wele uli wakupunda umanyilisi wosope wa ŵandu tiwuchisunga chenene mitima jenu ni nganisyo syenu.” (Afilipi 4:6, 7) Kwende tulole mwampaka Malemba gakuyichisyaga gatusimichisye kuti Mlungu akusasamala ya m’weji.

“Nambotu Mlungu jwangayiliŵalila [yijuni] amta chimo chose. . . . Jemanja mli ŵa mtengo wapenani kupunda yijuni ya timba yejinji.”—Luka 12:6, 7.

AGANICHISYE AYI: Yijuni yamwanamwana mpela ya timba, ŵandu akusayiwona kuti yili yangasosekwa nambo Mlungu akusayisamalilaga. Mlungu akusachimanyilila chijuni cha timba chilichose soni akusachiwona chilichose kuti chili chakusosekwa kwa jwalakwe. Ŵandu ali ŵakusosekwa mnope kwa Mlungu kupunda yijuni nambosoni ali mbali jimo ja yakupanganyikwa ya pachilambo chapasi, yayili yakusosekwa mnope kwa Mlungu. Jemanjaji ŵapanganyidwe ‘mchilandanichisyo’ chakwe soni mpaka akombole kola nambosoni kulosya ndamo syakwe syapenani.—Genesesi 1:26, 27.

“Ambuje, ŵalakwe alolite mkati mwamtima wangu, ni akumanyilila yosope ya une . . . Akusamanyilila nganisyo syangu . . . Alinje une, kuti amanyilile nganisyo syangu.”—Salimo 139:1, 2, 23.

AGANICHISYE AYI: Mlungu akusatumanyilila chenene. Jwalakwe akusamanyilila mwatukusapikanila mumtima mwetu soni yakusawusya yetu. Atamose kuti ŵandu nganaŵa atupikanichisye payakusawusya yatukusimana nayo nambope Mlungu akusasamala ya m’weji. Yeleyi yikulosya kuti umi uli wakusosekwa.

“Ŵalakwe Ambuje, apikane lipopelo lyangu; kulila kwangu kuyichile kwa ŵalakwe. . . . Ambikane, ajanje mwachitema pandaŵi jingwaŵilanga, . . . Tachijanga lipopelo lya ŵandu ŵakwe ŵakwasika” kapena kuti ŵakulagasika nganisyo.—Salimo 102:1, 2, 17.

AGANICHISYE AYI: Kutandila pandaŵi jele ŵandu ŵatandite kusimana ni yipwetesi, Yehofa aŵele mkujiwona misosi ja ŵandu jakusagwisya ligongo lya yipwetesi. (Salimo 56:8) Yeleyi yikupwatikapo misosi jetu. Ligongo lyakuti tuli ŵandu ŵakusosekwa mnope kwa Mlungu, jwalakwe akukumbuchila yakusawusya yetu yosope soni misosi jatukusagwisa.

“Mkatenda woga, pakuti une ndili ni m’mwejo. Tinjimpa machili, soni kumkamuchisya . . . Pakuti, une, Ambuje Mlungu jwenu, . . . Ni jwangumsalila kuti ‘mkatenda woga; tinjimkamuchisya.’”—Yesaya 41:10, 13.

AGANICHISYE AYI: Mlungu ali jwakoseka kutukamuchisya. Patutengwiche, jwalakwe chachitupa machili.

“Mlungu ŵachinonyele chilambo chapasi mwamti jwalakwe jwampeleche mwanache jwakwe jumopejo, ni kuti jwalijose jwakukulupilila jwalakwe akawa nambo akole umi wangamala.”—Yohane 3:16.

AGANICHISYE AYI: Mlungu akusatunonyela mnope mwamti mwakusachilila ŵapeleche Mwanache jwakwe Yesu kuti atuwombole. Yeleyi yatendekasisye kuti tupate upile wakola umi usyesyene soni wakusangalala. *