Ka Bay Ban’en Nrayog ni Nge L’agan’um Ngay
FAPI ARTICLE ni ke yan e be dag ni pi n’en ni ma buch rodad nib kireb e rayog ni nge k’aringdad ni ngad lemnaged ndabkiyog ni ngad athamgilyed e pi magawon rodad. Ra ga be mada’nag e magawon, ma rayog ni nge k’aringem ni ngam lemnag ko ka bay fan e yafos rom ara ka bay be’ ni be lemnagem fa dariy. Machane, dab mu pagtalin ni be lemnag Got e gafgow ni ga be yan u fithik’ mab ga’ fam u wan’.
En ni yoloy e Psalm 86 e weliy murung’agen e pagan’ rok ngak Got ni gaar: “Gu be piningem ko yu ngiyal’ ni ku gu aw nga fithik’ e oloboch [“ke kireban’ug,” NW], ni bochan e ga ma fulweg taban e meybil rog.” (Psalm 86:7, BT) Machane, rayog ni ngam lemnag ni nge lungum, ‘Uw rogon ni nge fulweg Got taban e meybil rog u nap’an ni “ke kireban’ug”?’
Yugu aram rogon nsana dabi chuweg Got e magawon rom nib papey, machane be micheg e Thin rok u Bible nrayog ni nge pi’ e gapas nga lanin’um ya nge yag nim athamgil u fithik’ e pi magawon rom. Aram fan ni be gaar e Bible: “Dariy ban’en ni nge magafan’med ngay, machane faan gimed ra meybil ngak Got mi gimed ning ngak e tin ni nge yog ngomed, ma gubin ngiyal’ ni nguum ninged ngak ni gimed be pining e magar ngak u lanin’med. Ma gapas rok Got ndabi chuchugur ni nge nang e girdi’ fan e ra yororiy gum’ircha’med nge tafinay romed.” (Filippi 4:6, 7.) Ere wenig ngom, mu lemnag rogon ni be tamilangnag e pi thin nu Bible ni baaray nriyul’ ni ma lemnag Got rarogodad.
Bay Fam u Wan’ Got
“Dariy taa bagayad [fa nochi arche’ ni sparrow] ni ke pag Got talin. . . Ka ba ga’ famed ngak boor fa nochi arche’ ni sparrow fithingan!”—Luke 12:6, 7.
AM LEMNAG E RE N’EY: Nochi arche’ nib achig e de ga’ fan u wan’dad, machane ba ga’ farad u wan’ Got. Urngin e nochi arche’ ni sparrow fithingan ni goo manang Got mab ga’ fan u wan’. Machane, girdi’ e kab ga’ farad u wan’ Got ko nochi arche’ ni sparrow. Girdi’ e aram e n’en th’abi fel’ u fithik’ urngin ban’en ni ke sunmiy Got, ma kan sunmiyrad ni yad bod ‘yaan’ Got nrayog ni ngar maruweliyed pi fel’ngin me m’ug ko ngongol rorad.—Genesis 1:26, 27.
“Somol, ga be guy lanin’ug, ma ga manangeg. . . . ba tamilangan’um u urngin e tin ni gu be lemnag . . . mu sikengnigeg ngam nang e lem rog.”—Psalm 139:1, 2, 23.
AM LEMNAG E RE N’EY: Ri manangem Got. Ri manang fiti lanin’um nge pi magafan’ rom. Sana bay boch e girdi’ ndarur nanged fan e pi magawon nge magafan’ rom, machane ma lemnagem Got ma baadag ni nge ayuwegem. Bochan e re n’ey, ma aram fan ni ka bay ban’en u lan e yafos rom nrayog ni nge l’agan’um ngay.
Bay Fan e Yafos Rom
“Somol, mu telim ko meybil rog, mu rung’ag lamag ni gu be yornag e ayuw! . . . Mu telim ngog, [ko] ngiyal’ ni gu ra piningem ma ga fulweg lungug nib papey! . . . Bayi rung’ag laman e girdi’ rok ni ke n’agrad.”—Psalm 102:1, 2, 17, BT.
AM LEMNAG E RE N’EY: Rayog ni nga nog ni ka aram u tabolngin e gafgow ni tay e girdi’ ma be guy Jehovah urngin gaf e lu’ ni be map’ u owcherad. (Psalm 56:8) Ka gab muun ko re n’ey. Manang Got urngin e gafgow ni ga be yan u fithik’ nge kireban’ ni ga be tay ni bochan e ba ga’ fam u wan’.
“I gag e Got rom, dab mu rus nga ban’en . . . i gag e Somol ni Got rom . . . Dab mu rus; ya bay gu ayuwegem.”—Isaiah 41:10, 13.
AM LEMNAG E RE N’EY: Ke fal’eg Got rogon ni nge ayuwegem. Faan ga ra paraw, ma ra ayuwegem ngam sak’iy nga lang.
Ka Bay Ban’en nib Fel’ Boch Nga M’on
“Got e rib t’uf e girdi’ nu fayleng rok, ma aram me pi’ Fak ni kari maagirag rok nge yib, ni fan e nge urngin e piin ni michan’rad ngak e aram e dab kur m’ad, ya ke yog e yafos ndariy n’umngin nap’an ngorad.”—John 3:16.
AM LEMNAG E RE N’EY: Bochan nrib ga’ fam u wan’ Got ma aram fan ni ke pi’ Jesus ni Fak ni nge mang biyul ni maligach ni fan ngom. Re biyul ney e ke bing e kanawo’ nrayog ni nge yag e yafos ndariy n’umngin nap’an ngom u fithik’ e felfelan’ boch nga m’on. *
Yugu aram rogon ni be mooch’och lanin’um ni gowa dabkiyog ni ngam athamgil u fithik’ e pi magawon rom, machane thingar mu fal’eg i fil e Thin rok Got me michan’um ko pi n’en ni ke micheg Got ni fan ngodad boch nga m’on. Re n’ey e ra yibnag e felfelan’ ngom me ayuwegem ni nge pagan’um ni ka bay ban’en u lan e yafos rom nrayog ni nge l’agan’um ngay.
^ Ra ga baadag ni ngkum nang boch rogon nrayog ni nge yib angin e biyul rok Jesus ngom, mag yaliy fare video ni kenggin e Ngaum Lemnag e Yam’ ni Tay Jesus ko www.pr418.com. Mu yaliy e MURUNG’AGMAD > PUGURAN.
You May Also Like
MURUNG’AGMAD
Mang Fan ni Ngam Fil e Bible?—Fare Video ni N’umngin
Be pi’ e Bible e fulweg ko pi deer nib ga’ fan ni ma fith bokum milyon e girdi’ u ga’ngin yang e fayleng. Ga baadag ni ngam mang bagayad e pi girdi’ ney?
FARE WULYANG KO DAMIT
N’en Nrayog ni Nge Rin’ e Meybil ni Fan Ngom
Mang angin nra yib ngom ni faanra um meybil ni gubin ngiyal’?
FARE WULYANG KO DAMIT
Rogon ni Ma Lemnagem Got nge Angin Nra Yib Ngom
Thin rok Got e be ayuwegdad ni ngad gelnaged e michan’ rodad ko pi n’en nib manigil ni ke micheg Got nra buch boch nga m’on.
FARE WULYANG KO DAMIT
Mang Nrib Ga’ Fan e Bin Th’abi Fel’ e Tow’ath ni Ke Pi’ Got?
Ra uw rogon reb e tow’ath ma aram e rib ga’ fan? Faan gad ra fal’eg i lemnag e re n’ey ma rayog ni nge ayuwegdad ni ngari ga’ fan u wan’dad fare biyul.
