TEʼ XOOKOʼOB máanoʼ tʼaanajoʼon tiʼ jujunpʼéel baʼaloʼob jeʼel u beetik u tuklik máak minaʼan u biilal u kuxtaleʼ. Maʼ xaaneʼ teech xaneʼ táan a muʼyaj yéetel bey a wóol mix máak beetik a cuentaileʼ, le oʼolal ka tuklik minaʼan u biilal a kuxtal. Chéen baʼaleʼ Dioseʼ jach ku yaatal u yóol kéen u yil bix a muʼyaj. Letiʼeʼ jach u yaabiltmech yéetel taak u yáantkech.

Le máax tsʼíibt le Salmo 86, tu yaʼalaj: «Tiʼ teech kin kʼáatik áantaj tu kʼiinil táan in muʼyaj tumen in wojel yaan a núukik in oración» (Salmo 86:7). Maʼ xaaneʼ ka tuklik: «¿Bix wal u núukik Dios le baʼaxoʼob k-aʼaliktiʼ tu kʼiiniloʼob táan k-muʼyajoʼ?».

Kex maʼ u jáan luʼsiktoʼon Dios le baʼaxoʼob k-muʼyajtikoʼ, letiʼeʼ ku tsʼáaiktoʼon jeetsʼelil utiaʼal k-aktáantik. Le Bibliaoʼ ku yaʼalik: «Maʼ a sen chiʼichnaktaleʼex tu yoʼolal mix baʼal, baʼaxeʼ aʼaleʼex tiʼ Dios ich oración tuláakal baʼax a kʼáateʼex. Kʼáat óolneneʼex tiʼ letiʼ yéetel tsʼáaʼex gracias tiʼ, beeteʼex yéetel tuláakal a puksiʼikʼaleʼex. Bey túunoʼ le jeetsʼelil maʼ tu páajtal u naʼataʼal tumen wíinik ku tsʼáaik Diosoʼ, yaan u kanáantik a puksiʼikʼaleʼex yéetel a tuukuleʼex» (Filipenses 4:6, 7). Koʼox ilik jujunpʼéel tekstoʼob ku yeʼeskoʼob Dioseʼ jach ku tuukul ta woʼolal.

‹Mix juntúul chan chʼíichʼ tuʼubsaʼan tumen Dios, teʼexeʼ maas koʼoj a tojoleʼex ke yaʼab mejen chʼíichʼoʼob› (Lucas 12:6, 7).

TUKULT LELAʼ: Tu táan Dioseʼ tak juntúul chan chʼíichʼeʼ koʼoj u tojol, le oʼolaleʼ a kuxtaleʼ maas koʼoj u tojol tiʼ juntúul chan chʼíichʼ. Dioseʼ tu beetoʼon jeʼel bix letiʼeʼ, le oʼolal ku béeytal k-eʼesik u jatsʼuts modos (Génesis 1:26, 27).

‹Jéeoba Dios, techeʼ a kʼaj óolen tumen tsʼoʼok a jach ilik bix in kuxtal. Kex teʼ kaʼan yanechoʼ ku páajtal a wojéeltik baʼax kin tuklik. Ilawil baʼax kin beetik bey xan baʼax kin sen tuklik› (Salmo 139:1, 2, 23).

TUKULT LELAʼ: Dioseʼ jach u kʼaj óolech, u yojel bix a wuʼuyikaba yéetel u yojel baʼax chiʼichnakkúuntikech. Kex yaan máaxoʼob maʼ tu naʼatkoʼob le baʼax ka muʼyajtikoʼ, Dioseʼ ku naʼatik yéetel u kʼáat u yáantech. A wojéeltik lelaʼ yaan u beetik u yantal u biilal a kuxtal.

«Jéeoba Dios, uʼuy in oración. Táan in sen kʼáatiktech áantaj, kexiʼ ka kʼuchuk tak ta wiknaleʼ [...]. Chʼenxikinteniʼ. Le kéen in kʼáattech áantajeʼ núuk in oración tu séebaʼanil». Jéeobaeʼ «yaan u yuʼubik u oración le máaxoʼob jach mix baʼal yaantiʼoboʼ» (Salmo 102:1, 2, 17).

TUKULT LELAʼ: Dioseʼ maʼ tu tuʼubsik bix u sen muʼyaj máak, letiʼeʼ u yilmaj bix káajik le muʼyajiloʼ (Salmo 56:8). Tsʼoʼoleʼ u yilmaj xan bix u yokʼol tuláakal máak, ichiloʼobeʼ táakaʼanech xaniʼ. U yojel baʼaxoʼob tsʼoʼok a aktáantik yéetel maʼ tu tuʼubsik le bukaʼaj okʼol tsʼoʼok a beetkoʼ, tu táan letiʼeʼ jach táaj koʼoj a tojol.

«Teen a Dios, maʼ u péek a wóol. Teen kin tsʼáaik a muukʼ, teen kin áantkech». Tsʼoʼoleʼ Jéeobaeʼ, ku yaʼaliktech: «Maʼ a chʼaʼik saajkil. Teneʼ jach tu jaajil yaan in wáantkech» (Isaías 41:10, 13).

TUKULT LELAʼ: Dioseʼ u kʼáat u yáantech, wa teech ka lúubuleʼ letiʼeʼ yaan u kaʼa líiʼskech.

«Dioseʼ tumen jach u yaabiltmaj yóokʼol kaabeʼ tu tsʼáaj u juntúuliliʼ Paal, utiaʼal beyoʼ maʼ u xuʼulsaʼal tiʼ le máaxoʼob ken u tsʼáa u fejoʼob tiʼ letiʼoʼ, baʼaxeʼ ka yanaktiʼob kuxtal minaʼan u xuul» (Juan 3:16).

TUKULT LELAʼ: Dioseʼ jach u yaabiltmech, le oʼolal tu kʼubaj u Paal ta woʼolal. U kuxtal Jesúseʼ jeʼel u tsʼáaik u biilal a kuxtal teʼ kʼiinoʼobaʼ bey xan teʼ kʼiinoʼob ku taaloʼ. *