¡Noʼ razón par guibanylo!
LÓ ARTÍCULOS ni ma bisetlano bibiʼno que tipnés galnagan labúu gonyni que guisacno que ma diti labúu gony guantaryno. Sigory nigoreʼca looy cadudylo ló toib galnagan né ronylo pensary que diti noʼ razón par guibanylo o que diti noʼ chú rioʼ galrrasaʼ por looy. Per labúu gaplo confianz que rioʼobni Dios órni rabiʼbu looy cadudylo ló galrrioʼob. Nigolú rasaclo par Dios.
Toib buñ ni bicaʼ Salmo 86 goniʼ que napbu confianz lóo Dios, órni bicaʼbu: «Racaʼya rudx looy dzú ni noʼya ló xiroʼ galrrasaʼ, portín looy sacapylo naʼ» (Salmo 86:7). Per sigory ranabdiitzlo looyca: «¿Ximod racapy Dios lóono órni noʼno ló xiroʼ galrrasaʼ?».
Ná sigory diti nimaca sabeʼ Dios guirá galnagan ni cadudyno ló, Dios ná que sasialdó xcalnabanyno par labúu gony guantaryno. Ló Xtiitzbu la Biblia raibybu lóono: «Diti tzoʼto ló galrrasaʼ por nitisi cós, ni gonyto ngú guininéto, guinabto lóo Dios né guidudyto guixquix láabu; modreʼ Dios gan xi canabto; né paz xtuny Dios ni rony gan guirá pensary san xcalnabanyto né xpensaryto» (Filipenses 4:6, 7). Buny pensary ló textos ni sieed reʼ, né sadudylo cuent balaati rioʼ Dios galrrasaʼ por looy.
Dios rioʼ galrrasaʼ por looy
Ni toib manybiguinien «rialadx Dios. [...] Lóoto rasacto más que xidal manybiguinien» (Lucas 12:6, 7).
BUNY PENSARY LÓ NDEʼ: Par Dios dada toib manybiguinien nigolú rasacmu. Por ngú, lóono más rasacno nisló Dios que nitisi manybiguinien. Portín bisaʼbu lóono xomodpa láabu né labúu gapno né guislooyno cualidades sacróyen ni napbu (Génesis 1:26, 27).
«Jehová, looy cabiʼtzaylo, né rimbutzaaylo naʼ. [...] Rienlo mod nac xpensari [...]. Bibiʼtzay naʼ, né bimbu xí galrrasaʼ noʼ ló xpensari» (Salmo 139:1, 2, 23).
BUNY PENSARY LÓ NDEʼ: Dios rimbutzaay looy. Nanbu ximod rasaclo né xi galrrasaʼ noʼlo ló. Ná stipnés buñ diti rienyibu galrrioʼob ni cadudylo ló, Dios rioʼ galrrasaʼ por looy né raniiny gacnébu looy. Ngú ragoʼ gan xcalnabanyno par guibanyno.
Noʼ razón par guibanylo
«Jehová, bicadiag ni canaba looy; bidudy lagary que xirudxi guidxinni ronoʼlo. [...] Bigachcadaʼ par guicadiaglo naʼ; cuapyca naʼ órni cacaʼya rudx looy». Jehová «sacadiagbu buñ pobre ni caniné láabu» (Salmo 102:1, 2, 17).
BUNY PENSARY LÓ NDEʼ: Nacni suusi Dios nagoʼtzay nís ni rareʼ bisaló buñ desde órni gosaló goyoʼ buñ ló Gudxlio (Salmo 56:8). Láaca nagoʼtzaybu nís ni bireʼ bisalólo. Dios rasetnaladx guirá galnagan ni godudylo ló né rasetnaladxbu guirá nís ni bireʼ bisalólo portín rasacni par láabu.
«Diti tzoʼlo ló galrrasaʼ, portín naʼ naca Dios xtunylo. Naʼ sony nadipa looy, naʼ sacnéya looy. [...] Naʼ Jehová Dios xtunylo [...] raabi looy: Diti guidzuibylo. Naʼ sacnéya looy» (Isaías 41:10, 13).
BUNY PENSARY LÓ NDEʼ: Dios ná gacné looy. Pal riablo, láabu salísbu looy.
Noʼ cós sacróyen ni cabésno
«Portín nigolú gondxiʼ Dios buñgudxlio por ngú bidudybu toibguielot Xiimbu, modreʼ guirá ni gap fe láabu diti guinitló né labúu guibany tipzó» (Juan 3:16).
BUNY PENSARY LÓ NDEʼ: Dios nigolú nadxiʼ looy, dada bidudybu Xiimbu Jesús goity por looy. Xcalgoitybu radudyni oportunida looy par guiniiny guibanylo nigoreʼ, né ló dzú ni sietra labúu sabanylo nakit por tipzó. *
Ná cayoʼob xcalnabanylo né ma nac nacsi nabanylo, goleʼ tiemp par guisuidylo la Biblia, né buny nadip confianz ni naplo ló guirá ni ma goniʼ Dios gony ló dzú ni sietra. Ngú sagoʼ nakit xcalnabanylo né sacnéni looy par guidudylo cuent que noʼ razón par guibanylo
^ Pal nainy looy ganlo más xi galnasác racaʼno por ni goity Jesús por lóono, bibiʼ video ni laa Guisetnaladxno xcalgoity Jesús, ni sieed ló www.pr418.com/zpa. Goyee ro ná DE LÓODO > MEMORIAL.
Sigory láaca sioladxlo ndeʼ
DE LÓODO
¿Xigony guisuidyno la Biblia?
La Biblia cayacné a xidalguixo buñ ló guidopynac Gudxlio par guidzelyibu guirá galrranabdiitz ni más rony buñ. ¿Nainy looy gaclo toibtica de layibu la?
GUIICH NI CANIʼ
¿Ximod labúu gacné xcalnadxiʼ Dios lóono?
La Biblia rony nadip confianz ni napno ló cós sacróyen ni ma goniʼ Dios guiduidy lóono.
