1. Kɛ David naa Yehowa ha kɛɛ, nɛ mɛni lɔ ɔ ha nɛ e pee?

MATSƐ DAVID ngma ke: ‘Yehowa kle, nɛ e sa kaa a je e yi wawɛɛ nitsɛ.’ (La 145:3) David suɔ Yehowa, nɛ suɔmi nɛ ɔ ha nɛ e je Mawu yi ‘ngɛ he nya buami he ɔ.’ (La 22:22; 40:5) Atsinyɛ jemi ko be he kaa mo hu o suɔ Yehowa, nɛ o kɛ David kpa gbi ngɛ munyu nɛ nyɛɛ se ɔ he. E de ke: ‘Yehowa, wa nɛ̃ Yakob Mawu, e sa nɛ a je o yi kɛ ya neneene!’​—1 Kron. 29:10-13.

2. (a) Mɛni wa ma nyɛ maa pee kɛ je Yehowa yi? (b) Mɛni nyagba nɛ ni komɛ kɛ kpeɔ, nɛ mɛni he wa ma susu?

² Mwɔnɛ ɔ, sanehi a heto nɛ wa haa ngɛ Kristofohi a kpehi a sisi ɔ ji blɔ kake nɛ wa guɔ nɔ kɛ jeɔ Yehowa yi. Se kɛ̃ ɔ, wa nyɛmimɛ ɔmɛ ekomɛ kɛ nyagba ko kpeɔ. A suɔ kaa a ma ha sanehi a heto, se a yeɔ gbeye. Mɛni maa ye bua mɛ konɛ a ko ye gbeye? Nɛ mɛni maa ye bua wɔ tsuo konɛ sanehi a heto nɛ wa ma ha a nɛ wo ni kpahi he wami? Loko wa ma ha sane bimi nɛ ɔmɛ a heto ɔ, nyɛ ha nɛ wa susu níhi eywiɛ komɛ a he je nɛ wa haa sanehi a heto ngɛ asafo mi kpehi a sisi ɔ he.

3-5. (a) Kaa bɔ nɛ Hebri Bi 13:15 ɔ tsɔɔ ɔ, mɛni he je nɛ wa haa sanehi a heto ngɛ asafo mi kpehi a sisi ɔ? (b) Anɛ Yehowa hyɛɛ blɔ kaa wɔ tsuo wa heto ɔmɛ nɛ sɔ lo? Moo tsɔɔ nya.

³ Yehowa ha wɔ tsuo he blɔ konɛ wa je e yi. (La 119:108) Sanehi a heto nɛ wa haa ngɛ asafo mi kpehi a sisi ɔ hu ji “yi jemi afɔle” nɛ wa sãa kɛ haa Mawu, nɛ nɔ ko be nyɛe maa sã afɔle nɛ ɔ ha wɔ. (Kane Hebri Bi 13:15.) Anɛ Yehowa hyɛɛ  blɔ kaa afɔle nɛ wa sãa aloo hetohi nɛ wɔ tsuo wa haa a nɛ sɔ lo? Dɛbi!

⁴ Yehowa le kaa e slo wa ti nɔ fɛɛ nɔ nyɛmi kɛ e si fɔfɔɛ, se kɛ̃ ɔ, e bua jɔɔ afɔle nɛ wa sãa kɛ haa lɛ ɔ he wawɛɛ. Mo susu ní slɔɔtohi nɛ Israel bi ɔmɛ kɛ sã afɔle ha lɛ ɔ he nɛ o hyɛ. Israel bi komɛ ngɔɔ jijɔ bi aloo apletsi kɛ sãa afɔle. Se Israel bi nɛ a be nɔ́ ko ɔ ngɔɔ “lahuɛ enyɔ, loo beleku lahuɛ enyɔ” kɛ yaa. Se ke Israel no ko be nyɛe ma ha lohwe pɛlitsɛ enyɔ, nɛ e ngɛ “mamu bukɔbukɔ kilo kake” ɔ, Yehowa maa kplɛɛ nɔ. (3 Mose 5:7, 11) E ngɛ mi kaa mamu he jua wɛ mohu lɛɛ, se Yehowa bua jɔ jamɛ a afɔle ɔ he, nɔ́ nɛ he hia ji kaa e ji “mamu bukɔbukɔ.”

⁵ Mwɔnɛ ɔ hu ɔ, Mawu hyɛ we blɔ kaa ke wa ngɛ sanehi a heto hae ɔ, wa nya mi nɛ tsɔ kaa Apolo, aloo wa heto ɔ nɛ plɛ nihi a yi mi kaa Paulo. (Níts. 18:24; 26:28) Nɔ́ nɛ Yehowa suɔ pɛ ji kaa wa ma ha sanehi a heto bɔ nɛ wa ma nyɛ. Anɛ o kai yalɔyo ɔ nɛ e ngɔ sika nyafii enyɔ kɛ ya wo daka a mi ɔ lo? Yalɔyo ɔ tsui mi tsuo nɛ e je kɛ ha sika a he je nɛ Yehowa bua jɔ e he ɔ nɛ.​—Luka 21:1-4.

6. (a) Ngɛ Hebri Bi 10:24, 25 ɔ nya a, kɛ hetohi nɛ nihi haa a ma ha nɛ waa nu he ha kɛɛ? (b) Ke nɔ ko ha sane heto nɛ e wo mo he wami ɔ, mɛni o ma nyɛ maa pee kɛ je hɛsa kpo?

⁶ Wa haa sanehi a heto kɛ woɔ wa sibi he wami. (Kane Hebri Bi 10:24, 25.) Ke wa nu nɛ jokuɛ ko ha sane heto kpiti ɔ, wa bua jɔɔ wawɛɛ. Ke nɔ ko ngɛ sane heto hae nɛ e kɛ bua jɔmi ngɛ anɔkuale ɔ nɛ e ba kase ɔ he munyu tue ɔ, e woɔ wɔ he wami nitsɛ. Jehanɛ hu ɔ, ke wa le nyɛmi ko nɛ e gboɔ zo aloo kpaako e ngɛ wa je gbi ɔ kasee, se e ngɛ sane heto hae ‘kɛ kã’ a, wa bua jɔɔ wawɛɛ. (1 Tɛs. 2:2) Mɛni wa ma nyɛ maa pee kɛ tsɔɔ kaa wa bua jɔ a mɔde bɔmi ɔ he? Ke a kpa asafo mi kpe ɔ, wa ma nyɛ maa na mɛ si ngɛ heto nɛ a ha a he. Blɔ kpa nɛ wa ma nyɛ maa gu nɔ kɛ je hɛsa kpo ji kaa wɔ nitsɛmɛ hu wa ma ha sane heto. Ke wa pee jã a, wɔ hu wa maa wo ni kpahi he wami.​—Rom. 1:11, 12.

7. Ke wa ha sane heto ɔ, kɛ wa náa he se ha kɛɛ?

⁷ Ke wa ha sanehi a heto ɔ, wɔ nitsɛmɛ wa náa he se. (Yes. 48:17) Ngɛ mɛni blɔ nɔ? Kekleekle ɔ, ke wa to kaa wa ma ha sane heto ɔ, lɔ ɔ haa nɛ wa dlaa wa he saminya  loko wa yaa kpe ɔ. Ke wa dla wa he saminya a, wa nuɔ Mawu Munyu ɔ sisi wawɛɛ. Ke wa kase Mawu Munyu ɔ nɛ wa nu sisi saminya a, lɔ ɔ yeɔ bua wɔ nɛ waa kɛ níhi nɛ wa kase ɔ hu tsuɔ ní saminya. Nɔ́ nɛ ji enyɔ ɔ, ke wɔ hu wa je wa gbi kpo ɔ, wa bua maa jɔ. Nɔ́ nɛ ji etɛ ɔ, akɛnɛ wa dla wa he saminya loko wa ha heto he je ɔ, ke a kpa kpe ɔ po ɔ, wa hɛ ji heto nɛ wa ha a nɔ.

8-9. (a) Kaa bɔ nɛ wa na ngɛ Malaki 3:16 a, kɛ Yehowa naa sanehi a heto nɛ wa haa a kɛɛ? (b) Se mɛni nɛ ni komɛ yeɔ gbeye kaa a maa pee?

⁸ Wa hemi kɛ yemi ɔ nɛ wa jajeɔ ɔ jeɔ Yehowa yi. Wa ngɛ nɔ mi mami kaa Yehowa nuɔ wa heto ɔ, nɛ e bua jɔɔ wa hɛ mi nɛ wa miaa loko wa nyɛɔ nɛ wa haa heto ɔ he saminya. (Kane Malaki 3:16.) Ke wa ngɛ mɔde bɔe kaa wa ma je e yi ɔ, e jɔɔ wɔ kɛ tsɔɔ kaa e bua jɔ wa mɔde bɔmi ɔ he.​—Mal. 3:10.

⁹ E sa nɛ enɛ ɔ nɛ wo wɔ he wami nɛ wa ha sanehi a heto ngɛ asafo mi kpehi a sisi. Se kɛ̃ ɔ, ni komɛ maa ye gbeye kaa a ma wo a nine nɔ konɛ a ha sanehi a heto. Ke e peeɔ mo jã a, o kɔni mi ko jɔ̃. Nyɛ ha nɛ wa susu Baiblo sisi tomi mlaa komɛ, nɔ hyɛmi níhi, kɛ ní komɛ nɛ maa ye bua wɔ konɛ wa nyɛ nɛ wa ha sanehi a heto pe bɔ nɛ wa ngɛ pee amlɔ nɛ ɔ he nɛ waa hyɛ.

10. (a) Mɛni he je nɛ wa ti nihi fuu yeɔ gbeye kaa wa ma ha sanehi a heto ɔ? (b) Ke o yeɔ gbeye jã a, mɛni su kpakpa nɛ lɔ ɔ tsɔɔ kaa o ngɛ?

¹⁰ Ke o suɔ nɛ o wo o nine nɔ konɛ o ha sane heto ɔ, anɛ o mi mi sãa mo, loo o nuɔ he kaa o nine ɔ mi jiɔ lo? Ke e peeɔ mo jã a, lɛɛ koo hao tsɔ, ejakaa tsa pi mo pɛ. Ngɛ anɔkuale mi ɔ, ke wa ti nihi fuu ngɛ sane heto hae ɔ, wa yeɔ gbeye bɔɔ. Se loko o ma nyɛ maa ye gbeye yemi nɛ ɔ nɔ ɔ, ja o le nɔ́ nɛ haa nɛ o yeɔ gbeye ɔ. Anɛ o yeɔ gbeye kaa o hɛ maa je heto nɛ o yaa ha a nɔ aloo o ma ha heto nɛ dɛ lo? Anɛ e peeɔ mo kaa o heto ɔ be kpakpa pee kaa ni kpahi a nɔ́ ɔ lo? Ke e pee ɔ mo jã a, lɛɛ lɔ ɔ tsɔɔ kaa o baa o he si  nɛ o naa ni kpahi kaa a nɔ kuɔ pe mo. Yehowa suɔ nihi nɛ a ngɛ he si bami. (La 138:6; Filip. 2:3) Se kɛ̃ ɔ, Yehowa suɔ nɛ o je e yi nɛ o wo o nyɛmimɛ ɔmɛ he wami ngɛ kpehi a sisi. (1 Tɛs. 5:11) Yehowa suɔ mo, nɛ e maa wo mo he wami konɛ o ko ye gbeye.

11. Mɛni he wami womi munyuhi lɛ ngɛ Ngmami ɔ mi nɛ maa ye bua wɔ?

¹¹ Yehowa ha nɛ a ngma he wami womi munyu komɛ ha wɔ ngɛ Baiblo ɔ mi. Baiblo ɔ tsɔɔ kaa wɔ tsuo wa tɔ̃ɔ ngɛ wa munyu tumi mi. (Yak. 3:2) Yehowa hyɛ we blɔ kaa waa pee wa ní kaa hiɔwe bɔfohi, nɛ wa nyɛmimɛ ɔmɛ hu hyɛ we blɔ jã. (La 103:12-14) Wa nyɛmimɛ ɔmɛ piɛɛ Mawu weku ɔ he, nɛ a suɔ wɔ. (Maak. 10:29, 30; Yoh. 13:35) A le kaa pi be fɛɛ be nɛ wa nyɛɔ haa sanehi a heto kaa bɔ nɛ wa suɔ kaa wa pee ɔ.

12-13. Mɛni wa ma nyɛ maa kase ngɛ Nehemia kɛ Yona a sane ɔmɛ a mi?

¹² Nɔ hyɛmi ní komɛ hu ngɛ Baiblo ɔ mi nɛ ma nyɛ maa ye bua mo konɛ o ko ye gbeye. Anɛ o kai Nehemia lo? E sɔmɔ matsɛ ko nɛ e ngɛ he wami wawɛɛ. Be ko ɔ, Nehemia nu kaa Yerusalem gbogbo ɔmɛ hule, nɛ agbo ɔmɛ tsuo puɛ. Enɛ ɔ ha nɛ Nehemia hao. (Neh. 1:1-4) Hyɛ bɔ nɛ e mi mi maa sã lɛ ha benɛ matsɛ ɔ bi lɛ nɔ́ he je nɛ e bua jɔɛ ɔ! Se loko Nehemia ma ha matsɛ ɔ heto ɔ, e sɔle kpiti. Matsɛ ɔ bu lɛ tue, nɛ e ye bua Mawu we bi ɔmɛ. (Neh. 2:1-8) Mo susu Yona hu he nɛ o hyɛ. Benɛ Yehowa ha lɛ sɛ gbi ko kaa e ya de Nineve bi ɔmɛ ɔ, Yona ye gbeye, nɛ e tu fo. (Yona 1:1-3) Se Yehowa ye bua lɛ nɛ e nyɛ tsu ní tsumi nɛ e ngɔ kɛ wo e dɛ ɔ. Sɛ gbi nɛ e kɛ ya ha Nineve bi ɔmɛ ɔ ye bua mɛ wawɛɛ. (Yona 3:5-10) Nehemia sane ɔ tsɔɔ wɔ kaa e sa nɛ waa sɔle loko wa ha sane heto. Nɛ Yona sane ɔ hu tsɔɔ wɔ kaa ke wa yeɔ gbeye po ɔ, Yehowa ma nyɛ maa ye bua wɔ konɛ wa nyɛ nɛ wa sɔmɔ lɛ. Moo lɛɛ mo susu he nɛ o hyɛ. Sane heto nɛ o ma ha ngɛ asafo mi kpe sisi, kɛ Nineve bi ɔmɛ nɛ o ma ya fiɛɛ ha a, te nɛ ngɛ gbeye?

¹³ Mɛni ji ní kpa komɛ hu nɛ maa ye bua mo konɛ o ha hetohi nɛ maa wo ni kpahi he wami? Ha nɛ wa susu ní nɛ ɔmɛ ekomɛ a he nɛ waa hyɛ.

14. Mɛni he je nɛ e sa nɛ wa dla wa he saminya loko waa ya asafo mi kpe ɔ, nɛ mɛni be wa ma nyɛ ma kɛ dla wa he?

¹⁴ Mo dla o he kɛ ha asafo mi kpehi tsuo. Ke o sɛ hlami nɛ o kase níhi nɛ a maa kase ngɛ asafo mi kpe ɔ sisi ɔ, lɔ ɔ maa ye bua mo nɛ o kɛ kã ma ha sanehi a heto. (Abɛ 21:5) Ngɛ anɔkuale mi ɔ, e slo wa ti nɔ fɛɛ nɔ si fɔfɔɛ. Yalɔyo ko nɛ a tsɛɛ lɛ ke Eloise, nɛ e ye maa pee jeha 80 ɔ kaseɔ Hwɔɔmi Mɔ ɔ kɛ sɛɛ hlami ngɛ otsi ɔ mi. E de ke: “Ke i sɛ hlami kase níhi nɛ wa maa kase ɔ, ye bua jɔɔ wawɛɛ ngɛ kpe ɔ sisi.” Nyɛmiyo ko nɛ a tsɛɛ lɛ ke Joy nɛ e tsuɔ ní ngɛ otsi ɔ mi tsuo ɔ kaseɔ e Hwɔɔmi Mɔ ɔ Hɔ. E de ke: “Ke i dla ye he, nɛ  be pue we mi tsɔ loko wa ya asafo mi kpe ɔ, e wɛ ha mi kulaa kaa ma kai níhi nɛ i kase ɔ.” Ike nɛ e ji asafo mi nɔkɔtɔma kɛ blɔ gbalɔ ɔ de ke, “I ba yɔse kaa ke i kase ní bɔɔbɔɔbɔɔ ngɛ otsi ɔ mi ɔ, i náa he se pe nɛ ma kase ní ɔmɛ tsuo si kake.”

15. Mɛni o ma nyɛ maa pee kɛ dla o he saminya loko o ya asafo mi kpe?

¹⁵ Mɛni ji ní komɛ nɛ wa ma nyɛ maa pee kɛ dla wa he saminya loko waa ya asafo mi kpe? Loko o maa je ní kasemi ɔ sisi ɔ, moo sɔle nɛ o bi Yehowa nɛ e ha mo mumi klɔuklɔu ɔ. (Luka 11:13; 1 Yoh. 5:14) Lɔ ɔ se ɔ, ngɔɔ be bɔɔ kɛ susu munyuyi ɔ, munyuyi nyafinyafi ɔmɛ, foni ɔmɛ, kɛ mi nylɔmi sane bimi ɔmɛ a he. Ke o bɔni kuku ɔmɛ kasemi ɔ, kane ngmamihi nɛ a tsɛ se ɔmɛ abɔ nɛ o ma nyɛ. Mo pue o yi mi tɛ ngɛ otihi nɛ ngɛ kuku ɔ mi nɛ o suɔ nɛ o tu a he munyu ɔ he. Ke o dla o he saminya a, o ma ná ní kasemi ɔ he se wawɛɛ, nɛ eko ɔ, e be yee ha mo kaa o ma ha sane heto.​—2 Kor. 9:6.

16. Mɛni ji ní komɛ nɛ asafo ɔ pee nɛ waa kɛ ma nyɛ maa kase ní, nɛ kɛ a kɛ tsuɔ ní ha kɛɛ?

¹⁶ Ke e maa hi ɔ, ngɔɔ fon, tablɛti aloo kɔmpiuta kɛ kase ní ɔ. Yehowa gu asafo ɔ nɔ kɛ to blɔ nya konɛ wa nyɛ nɛ waa ngɔ fon, tablɛti kɛ kɔmpiuta kɛ kase níhi nɛ wa kaseɔ ngɛ asafo mi kpehi a sisi ɔ. Wa ma nyɛ maa gu JW Library^® app ɔ nɔ kɛ gbla Baiblo kasemi womihi kɛ fɔ wa fon aloo tablɛti nɔ. Wa ma nyɛ maa kane ní, nɛ wa ma nyɛ maa fia munyu ɔmɛ nɛ waa bu tue be fɛɛ be ngɛ he fɛɛ he nɛ wa ngɛ. Nyɛmimɛ komɛ kaseɔ ní ngɛ JW Library^® app ɔ nɔ ngɛ sukuu kɛ ní tsumi he ke a ya piani he jɔɔmi aloo ke a ngɛ blɔ hiae. A to Watchtower Library kɛ Hwɔɔmi Mɔ INTANƐTI NƆ NITO HE ɔ he blɔ nya konɛ ke wa ngɛ ní kasee ɔ, wa kɛ hla níhi a mi.

17. (a) Mɛni he je nɛ e he hia nɛ o dla hetohi fuu ɔ? (b) Mɛni o kase ngɛ Moo Pee Yehowa Huɛ​—Dla O Munyu Heto Saminya video ɔ mi?

¹⁷ Ke e maa hi ɔ, mo dla hetohi fuu. Mɛni he je? Ejakaa e ma nyɛ maa ba kaa ke o suɔ nɛ o ha heto ko ɔ, a be mo tsɛe. Eko ɔ, ni kpahi hu ma wo a nine nɔ, nɛ nɔ nɛ ngɛ ní kasemi ɔ nɔ hyɛe ɔ ma tsɛ a ti nɔ ko, se pi mo. Jehanɛ hu ɔ, akɛnɛ e sa nɛ a kpa ngɛ be nya he je ɔ, nɔ nɛ ngɛ ní kasemi ɔ nɔ hyɛe ɔ be nyɛe ma tsɛ nɔ fɛɛ nɔ nɛ wo e nine nɔ ɔ. Enɛ ɔ he ɔ, ke a je ní kasemi ɔ sisi nɔuu nɛ a tsɛ we mo ɔ, o mi mi ko fu, nɛ o kɔni mi hu ko jɔ̃. Ke o dla hetohi fuu ɔ, o ma ná he blɔhi fuu kɛ je o gbi kpo ngɛ kpe ɔ sisi. O ma nyɛ ma dla o he konɛ o kane ngmami hulɔ. Se ke e maa hi ɔ, mo dla o he konɛ o ngɔ mo nitsɛ o munyu kɛ ha heto. *

18. Mɛni he je nɛ e sa nɛ o heto ɔ nɛ pee kpiti ɔ?

¹⁸ O heto ɔ nɛ pee kpiti. Behi fuu ɔ, hetohi nɛ a ngɛ kpiti nɛ a sisi numi yi ɔ woɔ nɔ he  wami. Enɛ ɔ he ɔ, ha nɛ o heto ɔ nɛ pee kpiti. Moo bɔ mɔde kaa o maa ngɔ tsuifia 30 kɛ ha heto. (Abɛ 10:19; 15:23) Ke jehahi babauu ji nɛ ɔ nɛ o bɔni sanehi a heto hami po ɔ, ha nɛ o heto ɔmɛ nɛ a pee kpitikpiti konɛ ni kpahi nɛ a kase. Ke o ngɛ heto hae, nɛ o kɛ munyu ɔ ngɛ si lɔgɔe, nɛ munyu ɔ hu ka tsɔ ɔ, e ma jɔ̃ ni kpahi a kɔni mi. E ma ha nɛ a susu kaa a be nyɛe ma ha heto kaa mo. Jehanɛ hu ɔ, ke wa heto ɔmɛ pee kpitikpiti ɔ, e ma ha nɛ nihi fuu ma ná he blɔ kɛ je a gbi kpo. Ke a bi sane ko, nɛ mo ji kekleekle nɔ nɛ a tsɛ ɔ, o heto ɔ nɛ ya tɛɛ nɛ e pee kpiti. Koo tu oti ɔmɛ tsuo nɛ a ngɛ kuku ɔ mi ɔ he munyu. Ke oti ɔmɛ tsuo je kpo ɔ, o ma nyɛ maa tu ní kpahi nɛ kɔɔ he ɔ he munyu.​—Hyɛ daka nɛ ji, “ Hetohi Nɛ Ma Nyɛ Ma Ha.”

19. Ngɛ mɛni blɔ nɔ nɛ ní kasemi ɔ nɔ hyɛlɔ ɔ ma nyɛ maa ye bua mo, se mɛni e sa kaa o pee?

¹⁹ Moo sɛ hlami nɛ o de nɔ nɛ maa hyɛ ní kasemi ɔ nɔ ɔ kaa o ma ha sane bimi pɔtɛɛ ko heto. Ke o suɔ nɛ o ha sane bimi pɔtɛɛ ko heto ɔ, lɛɛ mo de nɔ nɛ maa hyɛ ní kasemi ɔ nɔ ɔ loko kpe ɔ nɛ je sisi. Ke a su jamɛ a sane bimi ɔ nɔ ɔ, mo wo o nine nɔ mla konɛ nɔ hyɛlɔ ɔ nɛ na.

20. Ngɛ mɛni blɔ nɔ nɛ asafo mi kpehi ngɛ kaa niye ní nɛ waa kɛ wa huɛmɛ bla kɛ ngɛ yee?

²⁰ Moo na asafo mi kpehi kaa niye ní nɛ o kɛ o huɛmɛ bla kɛ ngɛ yee. Ngɔɔ lɛ kaa nyɛmimɛ komɛ ngɛ nyɛ asafo ɔ mi to hɛja jemi ko he blɔ nya, nɛ a de mo ke o hoo nɔ́ ko kɛ ba. Kɛ o maa nu he ha kɛɛ? Eko ɔ, o tsui maa po bɔɔ. Se kɛ̃ ɔ, o maa bɔ mɔde nɛ o maa hoo niye ní ɔ konɛ e ngɔ kɛ ha nɔ fɛɛ nɔ. Yehowa hu fɔ wɔ nine, nɛ e ngmɛ okplɔɔ kɛ e nɔ niye ní kpakpahi fuu kɛ ha wɔ. (La 23:5; Mat. 24:45) Ke wɔ hu wa ngɔ nike ní ko nɛ klee we po kɛ ba a, e bua maa jɔ, ejakaa e le kaa lɔ ɔ nɛ wa ma nyɛ ma ha. Lɔ ɔ he ɔ, mo dla o he saminya, nɛ o ha sanehi a heto bɔ nɛ o ma nyɛ. Ke o pee jã a, lɔ ɔ maa tsɔɔ kaa tsa pi niye ní pɛ nɛ o ba yeɔ ngɛ Yehowa okplɔɔ ɔ he, mohu ɔ, mo hu o ngɔɔ nike ní kɛ ba haa o nyɛmimɛ.