1. Nen pa Daudi ubino ang’o iwi Yehova, man eno ucwale nitimang’o?

UBIMO DAUDI ukiewo kumae: “Yehova e dwong’, man maku jupake dit.” (Zab. 145:3) Daudi ugam umaru Yehova lee mandha man merne ucwale nipake ‘i kind cokiri.’ (Zab. 22:22; 40:5) M’umbe jiji, in de imaru Yehova, man itie ku nen ma rom ku pa Daudi m’ugam uwacu kumae: “Mugisa bed iri, E Yehova, Mungu mir Israel ma Wegwa, mi rondo ku rondo.”​—1 Kei. 29:10-13.

2. (a) Wacopo paku Yehova i ayi ma kani? (b) Dhanu moko gitie ku peko ma kani man wabineno lembang’o?

² Tin eni, ayi acel ma wapaku ko Yehova utie nidwoko wang’ penji i coko mwa mi Jukristu. Re umego ku nyimego mwa ma dupa gitie ku peko moko. Gimito gidwok wang’ penji i coko, re lworo beyio igi ngo. Dong’ gicopo timang’o pi nivoyo lworone? Juk ma kani ma copo konyo wan ceke kara wabed wadwok wang’ penji i ayi ma gierojo? I wang’ nidwoko wang’ penji maeno, wakenen thelembe ang’wen m’uketho wabed wadwoko jibu i coko.

3-5. (a) Nimakere ku Juebrania 13:15, pirang’o wabed wadwoko wang’ penji i coko? (b) Nyo wan ceke wacikara nidwoko wang’ penji i kite ma rom? Kekor.

³ Yehova umio rwom mi pake iwa ceke. (Zab. 119:108) Dwokowang’ penji mwa i coko utie i kind “lam mi pak” ma wamio ni Mungu, ma ng’atu mange ma copo mie kakawa mbe. (Som Juebrania 13:15.) Nyo Yehova bekwayu nia wan  ceke wamii kit lam ma rom, niwacu wadwok wang’ penji i ayi ma rom? Ungo, kumeno ngo!

⁴ Yehova ung’eyo nia watie ku copo m’ukoc, man lembe ma wabenwang’ara ko i kwo de urombo ngo; pieno eneno lam ceke ma waii nimio ire ni gin ma pire tek mandha. Kepar pi lam m’ebed eyio nyithindho mir Israel gimii ire. Juisrael moko gibino ku copo mi thiero rombe kunoke diegi. Re Yehova ugam uyio nia Jaisrael ma jacan copo thiero “akuru ario kunoke nyithi nyathuk ario.” Ento kan ecopo nwang’u ngo kadok winyo maeno de, Yehova uyio nia emii “ng’et mogo ma yom mir apaje.” (Law. 5:7, 11) Bei mogo ubino yot, re asu Yehova ubed uyio lam mi “mogo ma yom,” niwacu mogo ma cuu mandha.

⁵ Tin de Mungu mwa tie ku pidoic ma rom eno. Kinde ma wabedwoko wang’ penji i coko, Yehova kwayu ngo nia wan ceke wawec ku bodho ve Paulo kunoke wawec cuu ve Apolo. (Tic. 18:24; 26:28) Gin ma Yehova ubemito watim utie nia wadwok jibu ma beco nimakere ku copo mwa. Kepar nyanok pi dhatho m’ugam ubolo sente ma nok ario mi tonglo. Pire ubino tek i Yehova pilembe egam emio nimakere ku copo pare.​—Lk. 21:1-4.

6. (a) Nimakere ku Juebrania 10:24, 25, dwokowang’ penji ma wabed wawinjo i coko utie kud adwogi ma kani i wiwa? (b) Icopo nyutho foyofoc nenedi ni jumange pi dwoko wang’ penji ma gibemio?

⁶ Watielo cwinywa i kindwa ka wabedwoko wang’ penji i coko. (Som Juebrania 10:24, 25.) I coko, wan ceke wabed wamaru niwinjo dwokowang’ penji ma tung’ tung’ mir umego ku nyimego mwa. Jibu ma yot man ma cuu m’awiya bedwoko nyang’u wan ceke. Ka wabewinjo ng’atu moko ubekoro ku mutoro pi lemandha moko ma nyen m’eponjo, wanwang’u bende amora. M’umedo maeno, anyong’a negowa ka wabeneno umego ku nyimego ma gilwor kunoke ma gibeponjo dhok aponja ‘gibetegri’ nidwoko wang’ penji. (1 Tes. 2:2) Wacopo nyutho foyofoc mwa nenedi pi kero ma gibetimo? I ng’ei coko, waromo foyogi pi dwoko wang’ penji ma gimio. Bende, wacopo nyutho foyofoc igi nwang’u wan giwa de wabedwoko wang’ penji i coko. Eno biketho wabinwang’u tielocwiny i coko man wan de wabitielo cwiny jumange.​—Rum. 1:11, 12.

7. Wanwang’u bero ma kani tek wabedwoko wang’ penji i coko?

 ⁷ Wan giwa de wanwang’u bero ka wabedwoko wang’ penji i coko. (Isa. 48:17) Nenedi? Mi kwong’o, ka wapangu nia wabidwoko wang’ penji i coko, eno ketho wabedo kud ava mi yikara cuu mandha pi cokone. Ka wayikara cuu ke, watuc ninyang’ ma ber i Lembe pa Mungu. Ka wanyang’ ma ber i Lembe pa Mungu, watio kude cuu akeca i kwo mwa. Mir ario, calu ma wan de wabedwoko wang’ penji, wanwang’u kony lee i coko. Mir adek, wiwa bepoi yot yot i kum jibu ma wadwoko kadok nindo ma dupa i ng’eye, pilembe nwang’u watimo kero lee pi nidwoko jibune.

8-9. (a) Nimakere ku Malaki 3:16, Yehova utie ku nen ma kani iwi jibu ma wabed wadwoko? (b) Dhanu moko gibed gilworo ang’o?

⁸ Wanyayu mutoro i Yehova ka wabeweco pi yioyic mwa. Wang’ei nia Yehova winjowa man anyong’a nege lee mandha pi kero ma wabetimo pi nidwoko wang’ penji i coko. (Som Malaki 3:16.) Yehova bemio mugisa iwi kero ma wabetimo pi nifoyo ie; kumeno re m’enyutho nia anyong’a ubenege i kumwa.​—Mal. 3:10.

⁹ Waai waneno nia thelembe tie dupa ma ketho wadwoko wang’ penji i coko. Re asu jumoko gibed gilworo niting’o cing’gi pi nidwoko wang’ penji. Ka in de lworo benegi, cwinyi kud utur. Wakenen poyowic moko mi Biblia, lapor mi dhanu moko, man juk ma beco ma wan ceke wacopo tio ko kara waii nidwoko wang’ penji wang’ ma pol i coko.

10. (a) Ang’o ma benyayu lworo i iwa ceke? (b) Ka lworo benegi nidwoko wang’ penji, nyutho nia itie ku kite ma kani ma cuu?

¹⁰ Nyo cwinyi bedhongo saa ceke m’ibemito ting’o cingi pi nidwoko wang’ penji? Ka kumeno, ng’ei nia itie kendi ngo. I andha, wan ceke nyathi lworo moko bemondo i iwa tek wabemito wadwok wang’ penji. Kara ituc niriemo lworo ma beceri nidwoko wang’ penji, mi kwong’o kwayu ilar ing’ei nia girang’o ma bepiko  lworone i ii. Nyo lworo benegi pilembe iparu nia wii copo wil ku jibu m’imito dwoko, kunoke nyo ibelworo nia icopo coro lembe swa? Nyo ibed ilworo nia jibu peri biwok ungo cuu ve mi jumange? Kan itie ku kit lworo ma kumeno, nyutho nia itie ku jwigiri man ibeneno nia jumange gisegi. Yehova umaru jwigiri. (Zab. 138:6; Flp. 2:3) Re Yehova ubemito bende nia ipake, man itiel cwiny umego ku nyimego i coko. (1 Tes. 5:11) Emeri man ebimio iri tegocwiny m’itie ku yenyne.

11. Poyowic ma kani mi Lembagora ma copo konyowa?

¹¹ Wakenen poyowic moko ma nwang’ere i Lembagora. Biblia uwacu nia wan ceke wakier i wec ma wayero, man i ayi ma wayere ko. (Yak. 3:2) Yehova bekwayu ngo nia wateng’ wang’ wec mwa tetete, man umego ku nyimego mwa de gikwayu ngo nia watim kumeno. (Zab. 103:12-14) Gitie wedi mwa mi tipo man gimaruwa. (Mk. 10:29, 30; Yoh. 13:35) Gibed ginyang’ nia saa moko wayero ngo tap tap lembe ma wapangu niyero.

12-13. Lapor pa Nehemia man pa Yona ubeponjowa ku lembang’o?

¹² Wakenen lapor moko mi Biblia ma copo konyi niriemo lworo ma benegi. Kepoi pi Nehemia. Ebed etimo i lelagang’ p’ubimo moko ma dit. Nindo moko, can ugam umondo i Nehemia pilembe ewinjo nia gang’ kidi man dhugang’ mi Yerusalem unyothere. (Neh. 1:1-4) Kepar kite ma cwinye ugam udhongo ko kinde m’ubimo upenje nia pirang’o anyong’a mbe i ie! E wang’ acel Nehemia urwo, man edwoko wang’ penji p’ubimo. Eno uketho ubimo ukonyo dhanu pa Mungu lee mandha. (Neh. 2:1-8) Kepar bende pi Yona. Kinde ma Yehova uore nia ecidh erwei i adhura mi Nineve, lworo umake ma rac mandha uketho eringo kamange. (Yon. 1:1-3) Re ku kony pa Yehova, Yona udok urweyo ni dhanu mi Nineve. Adwogine ubino ang’o? Rwonglembe m’eyero ubedo ku matoke ma cuu iwi dhanu mi Nineve. (Yon. 3:5-10) Lapor pa Nehemia ubeponjowa nia pire tie tek nilar rwo i wang’ dwoko jibu. Lapor pa Yona ke ubeponjowa nia Yehova copo konyowa nitimo ire kadok watie ku lworo ma rukani de. Re kadok juyero ngo de, nidwoko wang’ penji i coko ku nicirweyo pi pokolembe i adhura mi Nineve, ma kani ma copo nyayu lworo nisagu?

¹³ Juk ma kani ma copo konyi kara i coko ibed idwok wang’ penji i ayi ma gierojo? Wakenen jukne moko m’icopo tio ko.

14. Pirang’o wacikara niyiko coko cuu, man wacopo yike saa ma kani?

¹⁴ Bed iyik coko ceke. Kan ikoyo saa pi niyikiri cuu, ibidwoko wang’ penji ma kumi kwio. (Ef. 5:16) Enre program mwa mi yiko coko ubed ukoc. Ku lapor, nyamego Eloise ma dhatho mi oro 80 ku wie, becaku niyiko Otkur ma Wiw i caku pa yenga. Ewacu kumae: “Coko benyang’a nisagu kan alar ayike con con i wang’e.” Nyamego Joy ma tic pare mi kum  bemaku saa ma lee uwacu nia ebed ekoyo saa ceng’ soko pi niyiko Otkur ma Wiw. Ekoro kumae: “Wiya bepoi i kum lembe yot yot kan ayiko coko nindo acel kende i wang’e.” Lapor mange tie pa jadit cokiri moko ma nyinge Ike. Umego maeno progam pare usagu, man etie bende jayab yo. Ewacu kumae: “Anwang’u nia etie ber dit kan abed ang’iewo saa nok nok i kind yenga pi niyiko coko, kakare niyike wang’ acel kende pi saa ma lee.”

15. Pi niyiko coko cuu ubekwayu itim lembe ma kani?

¹⁵ Pi niyiko coko cuu ubekwayu itim lembe ma kani? I wang’ nicaku yiko coko, lar ikwai Yehova umii iri tipo pare maleng’. (Lk. 11:13; 1 Yoh. 5:14) I ng’eye, ting’ dakika moko pi nineno lembe ma dongo dongo m’i thiwiwec m’ibeyiko. Nen i thiwiwec ma dit, nen i nyithi thiwiwec, i cal, man i sanduku m’unuti. Kinde ma dong’ ibeyiko udukuwecman, kan ecopere som giragora ceke ma nwang’ere i ie. Nyam i lembe m’ibeyiko, man keth wii kilili i kum thenge m’ipangu nia ibiwok weco i wie. Tek ibeyikiri cuu mandha, ibinwang’u kony lee i coko man ibidwoko wang’ penji yot yot.​—2 Kor. 9:6.

16. Watie ku jamtic ma tung’ tung’ ma kani, man ibed itio kugi nenedi?

¹⁶ Kan icopo, tii ku jamtic mir elektronik ma nwang’ere i dhok m’ing’eyo. Dilo pa Yehova uwodho iwa jamtic ma tung’ tung’ mir elektronik ma konyowa niyiko coko. Watie kud application JW Library^® ma konyowa nitoko girasoma mi ponji i telefon, i tablette kunoke i ordinater. Kan idaru toke, icopo yiko coko, kunoke icopo winje awinja saa moko ci m’imaru man kaka moko ci. Jumoko gitio kud application JW Library pi niponjo piny i saa mi yom i tic kunoke i somo, kunoke saa ma gini woth moko. Wacopo tio bende ku Watchtower Library man Watchtower KAPANG BUKU I INTERNET^™, pi nitimo sayusac yot yot iwi lembe moko ma wabemito wanyang’ i ie cuu.

17. (a) Pirang’o etie ber niyiko dwokowang’ penji dupa? (b) Video Deviens l’ami de Jéhovah : Prépare ta réponse, umio iri ponji ma kani?

¹⁷ Yik dwokowang’ penji dupa i kadiri m’icopo. Pirang’o? Pilembe saa moko icopo ting’o cingi, re junyuthi ngo. Wucopo ting’o cingwu wu dupa wang’ acel, re jatel wi ponji binyutho ng’atu acel kende. Bende, kara coko uthum i saane, jatel wi ponji copo neno nia kwayu ngo jugal akeca iwi udukuwec moko. Pieno, lembe kud uton i ii kunoke amora peri kud ujwiki kan enyuthi ngo i acaki mi ponji. Kan iyiko jibu dupa, icopo dwoko kadok wang’ penji mange. Icopo yikiri bende nisomo verse. Kan ecopere yik jibu m’ibidwoko i wec peri giri m’umbe nisomo asoma. *

18. Pirang’o ukwayu nidwoko wang’ penji i adundo?

 ¹⁸ Dwok wang’ penji i adundo. Wang’ ma pol, dwokowang’ penji m’adundo man ma yot re ma gierojo. Pieno, saa ceke bed iyik dwokowang’ penji m’adundo. Tim kero nidwoko wang’ penji pi segond ma romo 30. (Rie. 10:19; 15:23) Kan icaku dwoko wang’ penji i coko niai con, ubekwayu ibed ni lapor ma ber ni jumange; pieno, bed idwok wang’ penji i adundo. Kan ibeweco iwi lembe dupa, ke pi dakika ma lee, lworo binego jumange kum gibiparu nia gicopo dwoko ngo wang’ penji katiendi. M’umedo maeno, kan ibedwoko wang’ penji i adundo, eno bimio kaka ni dhanu ma dupa nidwoko wang’ penji i coko. Tek junyuthi ma kwong’a, dwok wang’ penji ma jupenjo m’umbe nimedo lembe mange. Kud icok lembe mir udukuwec acel zoo inikendi. Ka judaru weco iwi lembe mir ukungu mir udukuwec moko, icopo dwoko wang’ penji iwi lembe mange mir udukuwecne.​—Nen sanduku ma thiwie tie, “ Acopo dwoko wang’ penji iwi lembang’o?”

19. Jatel wi ponji copo konyi nenedi, re ubekwayu itim ang’o?

¹⁹ Lar inyuth ni jatel wi ponji nia ibidwoko wang’ penji mir udukuwec moko. Kan ipangu nitimo kumeno, lar inyuth ni jatel wi ponji i wang’ coko. Tek jutundo i udukuwec m’iyiko dwokowang’ penji i ie, ting’ cingi pio pio malu kara jatel wi ponji uneni cuu.

20. I ayi ma kani ma coko utie ve cam ma jubecamu karacelo ku jurimo?

²⁰ Nen coko ve nia wubedo i dhu cam karacelo ku jurimbi. Kepar nia umego ku nyimego mi cokiri giyiko nambu moko man in de gilwong’i i nambune, e gikwayu nia iyik cam moko ma yot. Icopo timang’o? M’umbe jiji, cwinyi copo pido nyanok, re iromo ii niyiko cam ma copo wonyang’u dhanu ceke. Yehova ulwong’owa i coko, man eyiko iwa piny dupa ma beco. (Zab. 23:5; Mat. 24:45) Bende, anyong’a nege lee kinde ma wabetero giramia moko ma romo nen ve kabang’e mbe, ma re wabetimo kero mwa ceke pi nimie. Pieno, yik coko cuu man dwok wang’ penji i kadiri m’icopo. Tek itimo kumeno, binen ungo nia icidh icamu acama kende i dhu meza pa Yehova, ento in de ikelo giramia moko ni cokiri.