1. Samaanay ko harateng ni Tafiti ci Yihofaan? Pakalalokay konini cingraanan makalim midemak to maanan?

HONGTI ci Tafiti sanay ko sowal: ‘O tadamaanay ci Yihofa, o papakahemeken.’ (ˈOlic 145:3) Tangongolay ko olah ningra ci Yihofaan, o hatiniay a olah, miocoray cingraanan makalim ‘itini i kasakopang a pahemek’ to Kawas. (ˈOlic 22:22; 40:5) Maolahay kiso to Kawas, wa mihai to sowal ni Tafiti: ‘O Kawas no Israil Yihofaaw, nanay tahadaˈoc mapahemek Kiso.’—1 Rayray 29:10-13.

2. (1) O cecay sapakahemek ci Yihofaan a pakayraan o maanan? (2) O roma salikaka matalaway to maanan? (3) Oniya lalakaw wa milengo to maanan hani?

² O cecay pakayraan ita a pakahemek ci Yihofaan i, pacaˈof to salicay i kasaˈopoan. Kawra, pasangaran nanay ko ˈalomanay salikaka. Makalimay cangra pacaˈof, kawra matalaway a pakamay. Sasamaan cangra miremo to matalaway a falocoˈ hani? Iraay ko maanan a ciepocay sapaini padama kitaanan, mihadak to pakalalokay a sapacaˈof han? ˈAyaw no papacaˈof to salicay, cipinangho kita to sepat kalimlaan a lalangian pacaˈof i kasaˈopoan.

3-5. (1) Tooren ko Hipray 13:15, hano pacaˈof kita i kasaˈopoan hani? (2) O sapacaˈof mahecaday o patoˈayaay, wa misaali ci Yihofa to kahacecay tamdaw mahecad ko patoˈayaan a dafong han?

³ Pafeliay ci Yihofa to sakaliko ita a pahemek Cingraanan. (ˈOlic 119:108) Pacaˈof i kasaˈopoan mahecaday o ‘tano sapahemek a sapatoˈaya’, o hatiniay a sapatoˈaya awaay ko papatado kitaanan a patafang. (ˈOsien ko Hipray 13:15.) O sapacaˈof mahecaday o patoˈayaay, wa misaali ci Yihofa to kahacecay tamdaw mahecad ko patoˈayaan a dafong han? Cowa ko mamihaen!

 ⁴ Mafanaˈay ci Yihofa to cowa ka hecad ko ˈicel ato pakayraan no mita, ano misarocoday kita patoˈaya to sangaˈayay i, misaaretengan Ningra maemin. Haratengen ko litengan Israil tamdaw, o maanan ko sapatoˈaya ci Yihofaan. O roma Israil tamdaw ngaˈayay patoˈaya to lopayˈay siri anca lotok siri, o roma Israil tamdaw manikaway, o sapatoˈaya nangra o “tosa no lotok topi anca tosa no lomaˈ topi,” ano caka pakaˈaca to tosa ˈayam, ngaˈayay miala to ‘sangaˈayay emi’ a patoˈaya. (Lifi 5:7, 11) Soˈlin madoloay ko ˈaca no emi, kawra ano o sangaˈayay a emi ko sapatoˈaya, kamayan a misaareteng ci Yihofa to hatiniay a sapatoˈaya.

⁵ Anini, o sidaˈitay a Kawas pakayni sapacaˈof ita i kasaˈopoan mahecaday ko pinengneng, cowa pisaali Cingra to kahacecay mahecad ci Apolosan mafanaˈ a mikimad, anca mahecad ci Pawloan mafanaˈ a misaharaterateng. (Dmak 18:24; 26:28) O tokel ni Yihofa i, misarocod kita, mihadak to sangaˈayay a sapacaˈof. Maharatengay iso ko pakiyahoan noya maponengay a tosa tangloy han? Minengneng ci Yihofa cingraanan o kalimlaan, samanen patoˈayaan ningra ko sangaˈayay no niyah.—Luka 21:1-4.

6. (1) Tooren ko Hipray 10:24, 25, matengil ko sapacaˈof no tao, samaanay ko harateng iso hani? (2) Ano mapakalalok kiso to sapacaˈof no tao i, wa ngaˈay samaan ko demak iso hani?

⁶ Pacaˈof kita i kasaˈopoan, wa ngaˈay pakalalolalok. (ˈOsien ko Hipray 10:24, 25.) Maolahay kita itini kasaˈopoan matengil ko masakenaay a sapacaˈof. Tinakoen, maolahay kita to kantangay nai falocoˈay a caˈof no kaemangay. Ano mihadak ko tamdaw to nafalocoˈan a harateng minanam, pakalalokay kitaanan. O roma tamdaw soˈlin kalingodoay anca minanamay to sowal ita, satimolo saan a pacaˈof to salicay, masemeray kita to pisaˈicel nangra. (1 Tisalonika 2:2) Wa ngaˈay kita samaan a mikoˈid cangranan hani? Ano maharek ko saˈopo wa ngaˈay koˈiden ita cangra mihadak to pakalalokay a sapacaˈof. O roma piakoˈid cangranan a pakayraan mirienang ko niyah a pacaˈof, ano mihaen cowa ko mikitini aca i sapacaˈof no tao, milifok to sapakalalok, ngaˈayho pakalalok to tao.—Loma 1:11, 12.

7. Pacaˈof to salicay hano saka ciepoc no niyah?

⁷ Pacaˈof to salicay, saka ciepoc no niyah. (Isaya 48:17) Misamaanay hani? Saka cecay, ano sapacaˈofaw kiso, oha mamisongilaˈ  misaday to lalakaw no saˈopo. Malalok kita a misaday, wa matongal ko kacipinang to Kimad no Kawas, matongal ko kafanaˈ sasamaan misaka dademak to minanaman. Saka tosa, misaˈicel kita pacaˈof, wa matongal ko kaolah to saˈopo. Saka tolo, misaday pacaˈof o mamihadak to ˈicel, soˈlin halafinto, wa maharatengho ko kalimlaan a nano sowal no niyah.

8-9. (1) Tooren ko Malaki 3:16, samaanay ko harateng ni Yihofa to sapacaˈof no mita? (2) Matalaway ko roma tamdaw to maanan hani?

⁸ Paihkal kita to pakasoˈlinan wa pahemek ci Yihofaan. Mafanaˈay kita makahiay ci Yihofa mitengil to sowal ita, misaaretengay to mihadakan ita a ˈicel mipacaˈof. (ˈOsien ko Malaki 3:16.) Misaˈicel kita pakahemek Cingraanan, paparahekeren Ningra kita, paihkal to kasemer kitaanan.—Malaki 3:10.

⁹ Mahapinangay ita adihayay ko lalangian ita pacaˈof i kasaˈopoan. Kawra, matalaway ko roma tamdaw pakamay pacaˈof to salicay. Ano mahaenay ko harateng iso, hamaan matoled. Milengo kita to pina safalod ato tinakoan no Fangcalay Cudad, ato pina ciepocay a sapaini, wa ngaˈay padama kitaanan kina pina a pacaˈof i kasaˈopoan.

10. (1) ˈAlomanay salikaka pakayniay maanan a demakan a marawraw? (2) Matalaw ko tamdaw pacaˈof mitaypiyaway to iraay ko maanan a capeling ningra?

¹⁰ Ano maharateng iso pakamay a pacaˈof sakahadakaw sanay ko falocoˈ han? Hatiraayto, ano pacaˈof ko ˈalomanay tamdaw i marawraway ko falocoˈ. Sapiremoaw to hatiniay a falocoˈ, kilimen iso ko lalangian to hano marawraw. Calemcemay to mamapawan to o maanan ko hasowal han? Anca calemcem mararaw ko sowal? Anca eca pakalini to tao ko sapacaˈof no niyah han? Soˈlinay i, mihaen a calemcem kiso paihkalay to iraay ko misapoeneray a capeling iso, minengneng to tao mikikakaay ko kangaˈay to niyah, o hatiniay a capeling o kaolahan ni Yihofa. (ˈOlic 138:6; Filipi 2:3) Mitokelay ci Yihofa tisowanan pakahemek Cingraanan,  hanaca itini kasaˈopoan pakalalok to salikaka. (1 Tisalonika 5:11) Maolahay ci Yihofa tisowanan, papadamaen Ningra kiso timolo a pacaˈof.

11. O maanan a sinael papakalalok kitaanan timolo a pacaˈof hani?

¹¹ Iraay ko pina sinael wa ngaˈay pakalalok kitaanan timolo a pacaˈof. Sowal no Fangcalay Cudad mararaway ko sowal no kahacecay tamdaw, latekay mararaway ko pakayraan a somowal. (Yakop 3:2) Nikawrira, cowa pisaali ci Yihofa kitaanan a malefot, cowa ko mamihaen ko salikaka a misaali kitaanan. (ˈOlic 103:12-14) Mahecaday o paro no lomaˈ ita ko salikaka, hanaca maolahay kitaanan. (Marko 10:29, 30; Yohani 13:35) Cipinangay cangra, ano pacaˈof kita i, awaay ko pinang ihkal a mihadak to harateng no niyah.

12-13. Mikitini tinakoan ni Nihimiya aci Yona mamananam ita ko maanan hani?

¹² O tinakoan i Fangcalay Cudad wa ngaˈay padama kitaanan miremo to matalaway a falocoˈ, tinakoen ci Nihimiya. Itiniay i lomaˈ no hongti a matayal cingra. Tiya mafanaˈ cingra to kamayan maperar ko ˈadipel no Yirusalim i, cowaho ka salofen ko fawahan no lowil, tada masomaday. (Nihimiya 1:1-4) Licayen no hongti ci Nihimiya hano caka hemek, maedeng marawraway ci Nihimiya itiya. Tangsolay cingra mitolon halo pacaˈof to hongti, telocto taˈangayay ko sapadama no hongti to finawlan no Kawas. (Nihimiya 2:1-8) Saka tosa tinakoan ci Yona. Tiya ocoren ni Yihofa cingra mirikec to Ninifi a tamdaw i, tada matalaway ci Yona, palaliyocay a milaliw. (Yona 1:1-3) Kawra pakayni sapadama ni Yihofa, salikor malaheciay ni Yona koniya demak. O milasilan ningra a lihaf ngaˈayay ko pifiyor to Ninifi tamdaw. (Yona 3:5-10) Mikitini ci Nihimiyaan mananamay ita, ˈayaw no pacaˈof i, mitolonho masakalimlaan. Roma i, o tinakoan ni Yona mahapinangay ita, ano samaanto ko talaw ita, wa ngaˈay padama ci Yihofa kitaanan padotoc a mihodop Cingraanan. Hanaca, pacaˈof i kasakopang cowa ko mamahaen o pitosil to Ninifi a tamdaw a masaka talawan kira!

¹³ Iraay ko maanan ciepocay a sapaini, padama kitaanan pacaˈof to pakalalokay to tamdaw a sapacaˈof hani? Sanay aca nengnengen ita.

14. (1) Misamaanay hano sarocoden ita misaday ko lalakaw no saˈopo hani? (2) Ngaˈay kita hacowa a toki paˈayaw a misaday hani?

¹⁴ Misaday to lalakaw no saˈopo. Halakaen iso ko sapisaday a toki misarocod a misaday, wa timoloto a pacaˈof. (Taneng 21:5) Manaokaniw, iraay kono niyah a toki a micekiw. Tinakoen ci Aros, o 80 ko mihecaan a maponengay cingra, mananamay i satapangan no lipay misaday to Mikecolay cacekiwen, sanay cingra: “Paˈayaw kako misaday to lalakaw no saˈopo, misamacayayto a mirienang to saˈopo.” Ci Ciwi mieminay to toki matayal, tocerid milimasmas  to toki a micekiw to Mikecolay itini Pieneman, sanay cingra: “Maolahay kako misaday itini ˈayaw no cecay romiˈad no saˈopo, ano mihaen manaˈengay i ponoˈ.” Ci Ayke o misakafahay, o ˈifowaay a malohemay malitengay, sanay ko sowal ningra: “Kina pinapina a misaday i cecay lipay, cowa ka koˈdaw ko toki a micekiw, ikakaay ko epoc to kinacecay aca, koˈdaw ko toki a micekiw.”

15. Samaan kiso misongilaˈ a misaday to lalakaw no saˈopo hani?

¹⁵ Samaan ko demak o misongilaˈay a misaday to lalakaw no saˈopo hani? Salakat, iˈayaw no micekiw, milongoc ci Yihofaan a pafeli tisowanan to fangcalay saocor. (Luka 11:13; 1 Yohani 5:14) Ikor, ngaˈayay kiso misolap to kihcod a lalakaw no saˈopo, mahawpay ko lalangian, dama lalangian, coka, ato roma sapatongal lalakaw. Ano micekiw kiso to cecacecay fatac i, ngaˈayay miˈosi to polong a sinael. Dadotimen ko lalakaw halo misaday to sapacaˈof a fatac ato sasinanoten a kalimlaan. Ano misarocod kiso a misaday, wa milifok to adihayay a epoc, matongal ko nikaolah a pacaˈof.—2 Korinto 9:6.

16. (1) Samaanay a lalosidan ngaˈay padama a micekiw? (2) Sowalen samaanay kiso misaka dademak toniya lalosidan hani?

¹⁶ Ngaˈayay tano soci, pingpan, anca tano tingnaw a lalosidan a micekiw. Pakaynian ni Yihofa i likakawa Ningra mihadak ko adihayay no tingnaw a lalosidan, padama kitaanan misaday to lalakaw no saˈopo. Ngaˈay saka dademaken ko JW Library^® app, misiyacay to sapicekiw a lalakaw to soci anca pingpan no niyah. Mihaenay, ngaˈay kiso icowacowa a miˈosi anca mitengil to lalakaw. O roma tamdaw mikalic to tosiya, misaka dademak toniya JW Library^® app a micekiw, o matayalay anca o micudaday misaka dademakay to paselaˈan a toki mihaen to demak. O roma, Mikecolay Soko ato Mikecolay WANGCANAN A SOKO, o tada ngaˈayay a lalosidan, wa madolo a mikilim to kalimlaan a lalakaw.

17. (1) Hano adihayen ko misadayan a sapacaˈof hani? (2) Itini ika no Malo Widang ni Yihofa—Misaday to Sapacaˈof i Saˈopo, mananamay iso ko maanan?

¹⁷ Sadayen ko adihayay sapacaˈof. Cowa ka kiso aca ko pacaˈof, alatek o roma tamdaw mahecaday a pakamay, telocto misikayay a salikaka mitoroˈ to roma tamdaw ko pacaˈofay. Roma i, sapitooraw to toki mihererek to saˈopo, mitawmecan ko papacaˈof a tamdaw. Mihaenay, ano cowa ko kiso ko pacaˈofay, hamaan a maketer a masomad. Ngaˈay kiso misaday to adihayay a sapacaˈof, mihaen wa adihayay ko toki a pacaˈof i saˈopo. Wa ngaˈayho kiso misaday to maanan a sapacaˈof hani? Ngaˈayay miˈosi to sinael anca tano niyah a sowal pacaˈof. *

18. Misamaanay hano kantangen ko sapacaˈof hani?

 ¹⁸ Kamotoˈen ko sapacaˈof. Kantangay ihkalay a caˈof tada mikowaday to tamdaw. Mihaenay, sarocoden a kantang ko caˈof, lalomaˈ no 30 miyaw mahererek. (Taneng 10:19; 15:23) Ano halafinayto a mananam kiso pacaˈof i kasaˈopoan, masakalimlaan ko demak iso, ngaˈay patireng to taˈarawan, mihadak to kamotoˈay a sapacaˈof. Ano sasifod saan ko caˈof iso, pina ehon ko sowal, wa matalawto ko roma tamdaw a pacaˈof, cato ka hecad o miso a ngaˈay, saan a miharateng. Roma i, kantang ko caˈof iso, wa ira ko adihayay toki no roma tamdaw pacaˈof i kasaˈopoan. Ano saka cecay kiso a pacaˈof, kantangen a ihkal ko caˈof, hamaan emin han a mihadak ko kalimlaan. Maharek milengo ko kalimlaan, ngaˈayay mitongal to roma kalimlaan.—Nengnengen ko sapatongal lalakaw, “ O Manan ko Pacaˈofen Ako?”

19. Ano sapipacaˈofaw kiso to salicay, wa ngaˈay kiso samaan ko demak hani?

¹⁹ Pasowalen ko misikayay salikaka, o maanan ko papacaˈofen iso. Ano sapihaenaw kiso, ˈayaw no saˈopo fanaˈen ko misikayay a salikaka. Maraod ko papacaˈofen iso a fatac tangsol a pakamay, ˈakawangen ko pakamay, ho maˈaraw no misikayay a salikaka.

20. Misamaanay o saˈopo mahecaday o malacafayay to widang a mitaheka hani?

²⁰ Ano tahidangen no salikaka kiso mitapay to titi, papisaday tisowanan to kakaenen, wa calemcem kiso alatek, kawra wa kamayan kiso misarocod misaday to kaolahan no ˈalomanay a kakaenen. O saˈopo mahecaday o malacafayay to widang a mitaheka, o Tatapangan ita ci Yihofa maharekayto misaday to ˈaredetay a dateng, itini kasaˈopoan a mitaheka. (ˈOlic 23:5; Matay 24:45) Misaday kita to kantangay sapacaˈof, mahecaday miˈorongay to mimingay sapatelong, wa mahemek ci Yihofa, samanen mafanaˈay Cingra miˈorongay kita to sangaˈayay a dafong no niyah. Mihaenay songilaˈen ita a misaday ato misarocod a pacaˈof, ano mihaen cowa ko pitaheka aca to misadayan ni Yihofa kadofahay a kakaenen, wa ngaˈayho paladaˈ to salikaka to mikiriwiˈan ita a misaday a sapatelong.