1. David, ¿chem rakiduamkey Jewba mew? Feymu, ¿chem femi?

TI LONGKO ÜLMEN DAVID wirintukuy: “Jewba tati doykülelu ka doy felelu ñi püramyengeal” (Sal. 145:3). David piwkeyefi ta Jewba, feymu püramyefi ta Chaw Dios “rangiñ ti trawünche mew” (Sal. 22:22; 40:5). Iñchiñ ka piwkeyeniefiyiñ ta Jewba, ka rakiduamkeiñ David reke: “Rumel mu püramyengeaymi, awem Jewba, iñchiñ taiñ chaw Israel ñi Ngünechen” (1 Crón. 29:10-13).

2. 1) ¿Chumngechi püramyeafuiñ ta Jewba? 2) Kiñeke peñi ka lamngen, ¿chumngelu küdawtukey ñi wiñoldungual? Fey, ¿chem ngüneduamaiñ?

² Famülke mu, ¿chumngechi püramyeafuiñ ta Jewba? Taiñ wiñoldungun trawün mu. Welu kiñeke peñi, lamngen rume küdawtukey ñi femal tüfa. Fey ayükefuyngün ñi wiñoldungual trawün mu, welu llükakeyngün, feymu femkelayngün. ¿Chem femafuy ñi llükawenoal? Kafey küdawtuafuiñ taiñ yafültukuafiel taiñ pu peñi, pu lamngen taiñ wiñoldungun mu, fey ¿chem ngülam kelluaeiñmu? Petu taiñ wiñoldungunon tüfa, wüne ngüneduamaiñ meli falin dungu chumngelu wiñoldungual trawün mu.

3. Ebrew 13:15 ñi feypin mu, ¿chumngelu wiñoldungukeiñ trawün mu?

³ Jewba elukeeiñmu ta kom iñchiñ taiñ püramyeafiel (Sal. 119:108). Wiñoldunguliyiñ trawün mu, femngechi chalintukukeiñ reke “püramyen dungu Ngünechen mew”, iney no rume femlayafuy tüfa iñchiñ mew (papeltunge Ebrew 13:15).

4, 5. ¿Feypikepeeiñmu may Jewba kiñentrür femngechi wiñoldungual? ¿Chumngelu kimnieiñ tüfa?

 ⁴ ¿Feypikepeeiñmu may Jewba kiñentrür femngechi wiñoldungual? Femlay. Jewba kimniey ñi kakerumen taiñ pepilnieel ka chumngen, feymu rume falintukey kom taiñ femkeel chalintukun reke felelu. Kuyfi mew, Jewba llowkey kakerume dungu ñi chalintukukeel pu israelche. Kiñeke wülkefuy kiñe pichi ufisa kam pichi kapüra. Pu israelche pofrengelu chalintukuafuy epu maykoño kam epu pichike we palluma. Welu kiñe israelche pepi chalintukunofule epu üñüm, chalintukuafuy pichin küme rüngo, Jewba küme llowkey tüfa (Lev. 5:7, 11). Tati rüngo pichi fali, welu tati doy küme rüngo chalintukulelngele, Jewba falintukey llemay.

⁵ Jewba ka femngechi rakiduamkey famülke mu. Wiñoldunguliyiñ trawün mu, Jewba feypikelaeiñmu taiñ fente küme dungual Apolu reke, kam fente küme kimeltuchefengeal Pablo reke (Hecho 18:24; 19:8). Jewba ayüniey taiñ wiñoldungual trawün mu tunte taiñ pepilel. Longkontukuaiñ tüfa, tati pofre lantu domo epu pichike moneda wüli. Welu Jewba rume falintukeeyew, ¿chumngelu? Feychi lantu domo wüli tati doy küme dungu ñi nieel (Luka 21:1-4).

6. 1) Ñi feypin Ebrew 10:24, 25, wiñoldungungele trawün mu, ¿chum duamelafeiñmu? 2) ¿Chumngechi pengelafuymi fente tami falintukefiel ñi wiñoldungukeel pu peñi, pu lamngen?

⁶ Taiñ wiñoldungun mu, welukonke yafültukuwkeiñ (papeltunge Ebrew 10:24, 25). Kom iñchiñ falintukeiñ allkütual fillke wiñoldungun trawün mu. Ayüwmakeeiñmu allkütual chumngechi wiñoldungukey pu pichikeche rüf piwke mu. Müna ayüwülkeeiñmu allkütual chumngechi kiñe taiñ peñi, lamngen ayüwün mu nütramkakey kiñe dungu ñi kimürpuel. Kafey kiñeke yewenchengey ka petu kimürpuy taiñ kewün dungu, welu wiñoldungukey “fente küme yafüluwün mew”, feymu iñchiñ rume falintukefiyiñ engün (1 Tes. 2:2). ¿Chumngechi pengelelafuiñ fente taiñ falintukefiel ñi femken engün? Afle ti trawün, mañumtuafuiñ, “müna yafültukuenew tami feypin” piafuiñ. Kafey iñchiñ wiñoldunguaiñ, femngechi iñchiñ ka yafültukuafiyiñ taiñ pu peñi, pu lamngen (Rom. 1:11, 12).

7. Wiñoldungual trawün mu, ¿chumngechi kümelkakeeiñmu?

⁷ Wiñoldungual trawün mew kümelkakeeiñmu (Is. 48:17). ¿Chumngechi kay?  1) Ayüliyiñ wiñoldungual, doy küme pepikayafiyiñ ti trawün. Fey doy küme adümafiyiñ Chaw Dios ñi Dungu, feymu doy küme inayaiñ taiñ mongen mu chem taiñ kimürpuel. 2) Doy ayüwülmayaeiñmu ti trawün, iñchiñ koneltulelu kay tüfa mu. Ka 3) taiñ wiñoldungual müley taiñ yafüluwal, feymu doy küme longkontukuaiñ taiñ feypin.

8, 9. 1) Chumngechi ñi pengelkeel Malaquías 3:16, ¿chem rakiduamkey Jewba taiñ wiñoldungukeel trawün mu? 2) Welu kiñeke, ¿chum duamkülekeyngün?

⁸ Nütramkaliyiñ taiñ feyentun mu, ayüwülkefiyiñ ta Jewba. Kidu allkütukeeiñmu llemay, ka rume falintukefi taiñ yafüluwken ñi wiñoldungual trawün mu. Biblia feypi: “Feychi mu pu yamniefilu ta Jewba welukentu dunguwingün, kiduke pu kompañwen, fey Jewba ngüneduamniefuy ka allkütuniefuy. Fey kidu ñi adkiñ mu, wirintukungey kiñe lifru ñi akordaniengeam, fey mu wirintukuley pu yamniefilu ta Jewba ka pu rakiduamaniefilu Kidu tañi üy” (Malaquías 3:16). Fey falintukefilu kay taiñ femken, Jewba kümelkakeeiñmu (Mal. 3:10).

⁹ Feley llemay, müley falinke dungu taiñ yafüluwal ñi wiñoldungual trawün mew. Welu kiñeke petu llükaleyngün ñi wiñoldungual trawün mu. Femngechi dungu rupalmi, weda duamkülelayaymi. Inaduamaiñ kiñeke dungu ñi feypin Biblia, kiñeke che ñi rupan ka kümeke ngülam taiñ kelluaetew ñi doy küme wiñoldungual trawün mu.

10. 1) Epe kom iñchiñ, ¿chumngechi duamkülekeiñ? 2) Femngechi duamkülelmi, ¿chumngelu weda dungu no ta tüfa?

¹⁰ Fillke rupa tami küpa wiñoldunguel trawün mu, ¿llükakekepeymi may? Eymi müten femngechi duamkülelaymi. Epe kom iñchiñ pichi llükakeiñ taiñ wiñoldungual trawün mu. Welu tüfa katrütuelmu tami wiñoldungunoal, müley tami kimal chumngelu femngechi duamkülekeymi. ¿Llükakepeymi may akordanoal tami chem feypial, kam welulkadungual? “Chumngechi ñi wiñoldungukeel kiñeke peñi, lamngen, iñche fente küme femlayan”, ¿pikepeymi  may? Weda dungu no tami femngechi duamküleal, ¿chumngelu? Tüfa pengelafuy tami ñom chengen, ka doy kümelu trokikefiel kakelu pu peñi, pu lamngen. Jewba piwkeyefi pu ñom chengelu (Sal. 138:6; Filip. 2:3). Welu kafey, Jewba ayükey tami püramyeafiel ta kidu ka tami yafültukuafiel pu peñi, pu lamngen trawün mu (1 Tes. 5:11). Jewba piwkeyenieeymu, ka kelluaeymu tami llükawenoal.

11. ¿Chem feypin mülelu Biblia mu kelluafeiñmu?

¹¹ Ngüneduamaiñ chem ñi feypilen Chaw Dios ñi Dungu. Biblia feypi kom welulkawkeiñ taiñ dungun mu (Sant. 3:2). Jewba feypikelaeiñmu taiñ turpu kulpanoal, taiñ pu peñi, pu lamngen no rume femngechi feypikelaeiñmu (Sal. 103:12-14). Kafey kidu engün piwkeyenieeiñmu, kiñe familia reke feleiñ (Mar. 10:29, 30; Juan 13:35). Kidu engün kimniey taiñ welulkadungual kiñeke mu.

12, 13. ¿Chem kimeltueiñmu Neemia ka Jona ñi rupan?

¹² Ngüneduamaiñ epu che ñi rupan taiñ kelluaetew ñi llükawenoal. Wüne ngüneduamaiñ Neemia ñi rupan. Kidu küdawelkefi kiñe fütra longko ülmen. Neemia allküy ñi teyfükangeel tati kura malal Jerusalen mu ka niewelay konwe no rume, feymu rume weñangküley (Neh. 1:1-4). Fey ti longko ülmen ramtueyew chumngelu ñi weda duamkülen, Neemia llükapelay. Petu ñi wiñoldungunon, Neemia ngillatufemfi ta Jewba. Feymu ti longko ülmen rume kellufi Jewba tañi pu che (Neh. 2:1-8). ¿Chem kimeltueiñmu Neemia ñi rupan? Fente falin-ngey ngillatual petu taiñ wiñoldungunon. Kafey rakiduamaiñ Jona ñi rupan mu. Jewba feypifi ñi dungulelafiel pu ninifeche, welu fente ñi llükalen Jona kañpüle lefmawi (Jona 1:1-3). Welu Jewba ñi kellun mew, Jona amuy pu ninifeche mew ka amuldungulelfi engün. Tüfa müna kümelkafi pu che Ninife mew (Jona 3:5-10). ¿Chem kimeltueiñmu Jona ñi rupan? Llükaliyiñ rume, Jewba kelluaeiñmu taiñ küme poyeafiel ta kidu. Rakiduamiyiñ feyta mu: taiñ pu peñi, pu lamngen llükafalngelay pu ninifeche reke, ¿feley no am?

¹³ ¿Mülepey may kümeke ngülam taiñ kelluaetew ñi doy küme wiñoldungual? May, fewla inaduamaiñ kiñeke.

14. 1) ¿Chumngelu müley taiñ küme pepikayafiel chem ñi ngüneduamngeal trawün mu? 2) ¿Chumül elantükünuaiñ taiñ chillkatual?

¹⁴ Pepikayafiyiñ chem ñi ngüneduamngeal kom tati trawün mu. Elantükünuliyiñ taiñ küme pepikawal, llükalayafuiñ taiñ wiñoldungual trawün mu (Efes. 5:16). Feley, kake kiñeke iñchiñ dullikeiñ chumngechi taiñ chillkatual. Kiñe lantu domo doy 80 tripantu nielu, Eloise pingey, eluwkey ñi chillkatual Ti Werken we konlu ti semana. Kidu feypi: “Küme pepikawli kiñeke antü petu ñi puwnon ti trawün, tüfa doy ayüwülkeenew”. Kiñe lamngen küdawkelu fill antü, Joy pingey, feypi ñi chillkatufiel Ti Werken kiñe antü petu ñi puwnon ti trawün, “femngechi doy küme longkontukuken  tati kimeltun” pikey taiñ lamngen. Kiñe longkolelu fentren duam nielu, Ike pingey, ka wünelekey amuldungun mu, kidu feypi: “Kom chillkatuli kiñe antü müten, müte kellukelaenew, doy kümey pichi chillkatuli fill antü semana mu”, pi taiñ peñi.

15. ¿Chumngechi küme pepikayafiyiñ ti trawün?

¹⁵ ¿Chumngechi küme pepikawafuiñ? Petu taiñ chillkatunon, ngillatuafiyiñ ta Jewba taiñ eluaetew kidu tañi newen (Luka 11:13; 1 Juan 5:14). Fey wülafuiñ kiñeke minuto taiñ ngüneduamal chem piley ellakonlu ti chillkatun fütrake wirin mu ka chem piley konlu kake kiñeke trokiñ ñi nieel ti chillkatun, ka ngüneduamaiñ ti adentun ka wichulechi dungu. Petu taiñ chillkatufiel tati parrafo, yafüluwaiñ taiñ papeltuafiel kom tati versikulo ñi mülen. Rakiduamaiñ taiñ papeltuel mu, doyelchi may feychi trokiñ ayülu iñchiñ taiñ wiñoldungual trawün mu. Fey doy küme pepikawliyiñ, doy kümelkayaeiñmu ti trawün ka llükalayaiñ taiñ wiñoldungual (2 Kor. 9:6).

16. Taiñ chillkatual, ¿chem kellun müley? Eymi kay, ¿chumngechi adümkefimi?

¹⁶ Pepi femliyiñ, adümafiyiñ fillke elektroniko kellun ñi mülen kiñe kewün mu taiñ kimnieel. Kidu tañi trokiñche mew, Jewba elukeeiñmu fillke elektroniko kellun taiñ pepikawal. Tati aplicacion JW Library^® mülelu taiñ tablet kam celular mu, entuafuiñ fillke papel taiñ chillkatual. Fey chew ka chumül rume chillkatuafuiñ, papeltuafuiñ kam allkütuafuiñ. Tüfachi aplicacion mu, kiñeke chillkatukey petu tañi yafütuken küdaw kam kolegio mu, kam petu ñi miyawken engün. Kafey müley tati kellun Watchtower Library ka INTERNET MÜLEYECHI LIFRU Watchtower^™, fey mu küdawngelay doy küme ngüneduamal kiñeke dungu taiñ ayükeel.

17. 1) ¿Chumngelu fente kümey taiñ pepikayafiel mufüke wiñoldungun? 2) Ti video Weniyefinge ta Jewba: Küme pepikawnge tami wiñoldungual, ¿chem kimeltueymu?

¹⁷ Pepi femliyiñ, kiñe chillkatun mew pepikayafiyiñ mufüke wiñoldungun. ¿Chumngelu? Mufükechi taiñ witrañpüramal kuwü, elungelayaiñ taiñ wiñoldungual. Kakelu peñi, lamngen ka femngechi witrañpüramafuy tañi kuwü, fey ti longkolelu eluafeyew ñi wiñoldungual kidu engün. Kafey ñi yochi küme fentepual ti trawün, ti longkolelu elulayafuy ñi wiñoldungual kom pu ayülu ñi femal. Feymu elungenoliyiñ taiñ wiñoldungual tati wünenke parrafo mew, ngelay taiñ weda duamküleal ka weñangküleal. Fey pepikaliyiñ mufüke wiñoldungun, doy elungeafuiñ taiñ wiñoldungual. Kafey pepikawafuiñ taiñ papeltual kiñe texto Biblia mu. Welu pepi femliyiñ, pepikawaiñ taiñ wiñoldungual iñchiñ taiñ dungun mu. *

18. ¿Chumngelu duamfali ñi pichi puwal taiñ wiñoldungun?

 ¹⁸ Pichi puwpe taiñ wiñoldungun. Alün rupa, doy yafültukukeeiñmu pichiñmale chem ñi wiñoldungungeel. Feymu yafüluwaiñ ñi puwal 30 segundo müten taiñ wiñoldungun (Prov. 10:19; 15:23). Fentren tripantu yenieliyiñ taiñ wiñoldunguken trawün mu, doyelchi may eluwaiñ ñi pichi puwal taiñ feypin, femngechi taiñ inayentufalngeal. Welu alüñmale taiñ wiñoldungun ka feypiliyiñ fillke dungu, kakelu che llükayafuy, fey “iñche femngechi fente küme wiñoldungulayafun” piafuy. Kafey pichi puwle taiñ wiñoldungun, doy koneltuafuy kakelu peñi kam lamngen. Wüne wiñoldunguliyiñ ti parrafo mew, doyelchi may duamfali taiñ wiñoldungual ti ramtun müten. Feypilayaiñ kom ñi mülen parrafo mu. Dew feypingele tati doy falin dungu ti parrafo mew, feypiafuiñ kakelu falin dungu (inaduamnge ti wichulechi dungu “ ¿Chem wiñoldunguafuiñ?”).

19. ¿Chumngechi kelluafeiñmu ti longkolelu? Welu, ¿chem müley taiñ femal?

¹⁹ Pepikaniefiliyiñ kiñe parrafo taiñ wiñoldungual, feypiafuiñ tati longkolelu chillkatun mu. Dulliliyiñ (ngümintuliiñ) femal tüfa, kümeafuy taiñ feypiafiel tati longkolelu petu kon-nole ti trawün. Fey puwle ti parrafo taiñ wiñoldungual, müchay müten alü püra witrañpüramaiñ taiñ kuwü, femngechi taiñ peaetew ti longkolelu.

20. Taiñ trawün, ¿chumngelu trürümngey ta kiñentrür iyal taiñ pu weni engu?

²⁰ Taiñ trawün trürümngey ta kiñentrür iyal taiñ pu weni engu. Rakiduamaiñ tüfa, kiñeke peñi ka lamngen mangeleliyiñmu taiñ trür iyal ka feypieliyiñmu taiñ yeal pichin iyael, ¿chem femafuiñ? Pichi llükayafuiñ chi, welu eluwaiñ taiñ yeal kiñe iyael kom pu mangel ñi kümentukeel. Ka femngechi, Jewba mangelkeeiñmu taiñ trawün mu ka pepikalelkeeiñmu fentren kümeke dungu iyael reke felelu (Sal. 23:5; Mat. 24:45, TNM). Welu kidu ka ayükey taiñ wülal tati doy küme dungu taiñ nieel, feychi pichin iyael reke felelu. Feymu küme pepikawaiñ ka fillke rupa wiñoldunguaiñ trawün mu. Femngechi re llowlayaiñ tati kümeke dungu ñi wülkeel Jewba iyael reke felelu, doy may kelluafiyiñ ta kakelu peñi ka lamngen ñi ka femngechi femal.