1. Aha do na didok si Daud taringot pangkilalaanna tu Jahowa jala boasa?

DIDOK Raja Daud, “Na sangap do Jahowa jala ingkon mansai sangap do pamujion tu Ibana.” (Ps. 145:3, Bibel siganup ari) Holong do rohana tu Jahowa. Alani i, dipuji ibana do Debata “di tongatonga ni huria”. (Ps. 22:23; 40:6) Songon si Daud, tontu hamu pe holong do rohamuna tu Jahowa. Didok ibana, ‘Pinuji ma Ho, ale Jahowa, Debata ni Israel, amanami, ro di salelenglelengna!’​—1 Kron. 29:10-13.

2. (a) Songon dia do caranta mamuji Jahowa? (b) Alai boasa adong na so barani mangalehon komentar, jala aha do na laho taulas?

² Saonari, sada cara laho mamuji Jahowa, i ma mangalehon komentar di parpunguan. Alai adong do angka donganta na mabiar mangalehon komentar. Nang pe sasintongna lomo do roha ni nasida mangalehon komentar. Alai songon dia carana asa unang mabiar? Jala aha do na boi mangurupi hita asa barani mangalehon komentar? Andorang so taalusi sungkun-sungkun on, parjolo taulas ma boasa ingkon talehon komentar di parpunguan.

3-5. (a) Songon na didok Heber 13:15, boasa ingkon talehon komentar di parpunguan? (b) Ingkon sarupa do denggan ni komentarta dohot na asing?

³ Sada hasangapon do di hita mamuji Jahowa. (Ps. 119:108) Sada “pujian tu Debata” do molo talehon komentar di parpunguan. Jala ingkon hita sandiri do na mangalehon pujian i tu Jahowa. (Jaha Heber 13:15.) Alai, ndang dipangido Jahowa ingkon sarupa denggan ni komentarta dohot halak na asing.

 ⁴ Diboto Jahowa do, ndang sai boi sarupa na talehon tu Ibana. Alai, diargai Ibana do aha pe na talehon. Songon halak Israel, adong do na tolap mangalehon biru-biru manang hambing. Molo pogos, boi do holan dilehon “dua anduhur tabu manang dua anak ni darapati”. Alai molo i pe ndang tolap dilehon nasida, diloas Jahowa do nasida mangalehon “saparsampulu sian saepa itak na lamot”. (3 Mus. 5:7, 11) Nang pe mura “itak”, alai arga do i di Jahowa molo dilehon itak na dumenggan.

⁵ Sahat tu saonari, sarupa dope pangkilalaan ni Jahowa. Alani i, tingki mangalehon komentar, ndang dipangido Jahowa ingkon malo hita songon si Apollos manang songon si Paulus. (Ul. 18:24; 26:28) Lomo do rohana asa talehon komentar sian nasa tolapta. Taingot ma sahalak ina na mabalu na mangalehon dua hepeng logam na otik argana. Nang pe otik, arga do ibana di Jahowa ala dilehon ibana na dumenggan sian nasa tolapna.​—Luk. 21:1-4.

6. (a) Hombar tu Heber 10:24, 25, aha do labana tu hita tingki mambege komentar ni angka dongan? (b) Songon dia do hamu mangargai komentar ni angka dongan?

⁶ Tapatogu ma angka dongan marhite komentarta. (Jaha Heber 10:24, 25.) Las do rohanta mambege marragam komentar di parpunguan. Songon komentar ni angka dakdanak nang pe jempek alai las do rohanta mambege i. Boi do muse lam togu rohanta tingki tabege komentar ni halak na baru marsiajar Bibel. Tingki adong halak parila olo mangalehon komentar, manang halak na baru marsiajar bahasanta, tapuji ma “habaranion” ni nasida. (1 Tes. 2:2) Molo dung sae marpungu, tadok ma mauliate tu nasida. Alai hita sandiri pe ingkon talehon do komentarta. Alana ndang holan hita na ingkon dipatogu, na asing pe porlu do tapatogu.​—Rom 1:11, 12.

7. Aha do labana molo talehon komentar?

⁷ Tadapot do laba sian komentar na talehon. (Jes. 48:17) Boasa? Na parjolo, tontu ingkon persiapan do hita molo naeng mangalehon komentar. Molo  denggan hita persiapan, gabe lam bagas ma taantusi Hata ni Debata. Jala gabe lam denggan ma hita mangulahon na taparsiajari i. Na paduahon, tamba do las ni rohanta molo dohot hita mangalehon komentar. Na patoluhon, molo marsitutu hita mangalehon komentar, tontu taingot do na takomentari.

8-9. (a) Songon na didok Maleaki 3:16, songon dia do pangkilalaan ni Jahowa tu komentar na talehon? (b) Boasa adong na so olo mangalehon komentar?

⁸ Las do roha ni Jahowa tingki talehon komentar. Pos ma rohanta ditangihon jala diargai Jahowa do molo marsitutu hita mangalehon komentar. (Jaha Maleaki 3:16.) Pasu-pasuon ni Jahowa do hita molo marsitutu pasonangkon rohana.​—Mal. 3:10.

⁹ Ra ala mabiar adong dope na so olo mangalehon komentar. Alai nunga taboto be boasa ingkon talehon komentar di parpunguan. Molo songon i do na dihilala hamu, unang ma marmetmet ni roha. Taulas ma piga-piga prinsip ni Bibel, angka contoh, dohot cara asa barani mangalehon komentar.

10. (a) Aha do na mambahen hita mabiar mangalehon komentar? (b) Boasa ndang sala molo mabiar hita tingki mangalehon komentar?

¹⁰ Hea do hamu taroktohon tingki naeng martudu? Sasintongna sude do hita hea mangkilala sisongon i. Alai porlu do botoonmuna aha na mambahen hamu mabiar. Ra, na mabiar do hamu lupa aha na laho didok hamu. Manang mabiar sala komentarmuna. Asing ni i, ra mabiar hamu molo ndang songon na asing denggan ni komentarmuna. Sasintongna denggan do molo dihilala hamu songon i. Alana didok rohamuna ummalo do na asing sian hamu. On patuduhon na serep do rohamuna. Las do roha ni Jahowa molo serep rohanta. (Ps. 138:6; Plp. 2:3) Alai lomo roha ni Jahowa asa tapuji Ibana jala tapatogu dongan  di huria. (1 Tes. 5:11) Dihaholongi Jahowa do hamu jala diurupi Ibana do hamu asa barani.

11. Ayat na dia do na boi mangurupi hita?

¹¹ Adong piga-piga ayat na boi mangurupi hita. Didok, sude hita boi do sala mangkatai manang sala caranta pasahathon hata. (Jak. 3:2) Ndang dipangido Jahowa dohot angka dongan hita sude asa sempurna. (Ps. 103:12-14) Nunga gabe keluarganta be angka dongan jala dihaholongi nasida do hita. (Mrk. 10:29, 30; Joh. 13:35) Alani i, diantusi nasida do molo sipata ndang pas komentar na tapasahat.

12-13. Aha do na boi taparsiajari sian pengalaman ni si Nehemia dohot si Jona?

¹² Rimangi ma angka contoh di Bibel na boi mangurupi hamu asa unang mabiar. Ingot ma pengalaman ni si Nehemia. Pelayan do ibana di istana ni raja. Tingki dibege ibana nunga hancur tembok dohot gerbang ni Jerusalem, marsak ma ibana. (Neh. 1:1-4) Bayangkon ma, tingki disungkun raja boasa marsak ibana, tontu mabiar do ibana. Alai andorang so dialusi ibana dope raja, pintor martangiang do ibana. Alani i, gabe diurupi raja ma naposo ni Debata. (Neh. 2:1-8) Na asing, i ma pengalaman ni si Jona. Tingki disuru Jahowa ibana pasingothon halak Ninive, ndang dioloi ibana Jahowa. Mabiar do ibana tu halak Ninive. (Jona 1:1-3) Alai ala diurupi Jahowa, gabe olo ma si Jona pasingothon halak Ninive. Ujungna gabe muba do halak Ninive. (Jona 3:5-10) Sian pengalaman ni si Nehemia taboto ma, ringkot do martangiang andorang so mangalehon alus. Sian pengalaman ni si Jona taboto ma, diurupi Jahowa do hita asa unang mabiar tugas na dilehon Jahowa. Alana, ndang adong angka dongan di huria na songon halak Ninive na boi mambahen hita mabiar.

¹³ Aha na ingkon taulahon asa boi lam ringgas mangalehon komentar di parpunguan? Taulas ma piga-piga carana.

14. Boasa ingkon persiapan hita andorang so ari parpunguan, jala andigan do hita boi persiapan?

¹⁴ Persiapan tu ganup parpunguan. Molo denggan hita persiapan tu parpunguan, gabe barani do hita mangalehon komentar. (Poda 21:5) Tontu, ndang sai sarupa tingkinta sude laho persiapan. Songon si Eloise sahalak na mabalu na marumur 80 taon, nunga dipersiaphon ibana Joujou Paboahon saminggu andorang so ari parpunguan. Didok ibana, “Molo persiapan ahu saminggu andorang so ari parpunguan, boi ma denggan huihuthon parpunguan i.” Si Joy, di ari Sabtu do persiapan Joujou Paboahon, ala karejo ibana mulai ari Senin sahat tu ari Jumat. Didok ibana, “Gabe ummura do huingot  parsiajaran i.” Si Ike, sahalak sintua jala huhut merintis mandok, “Tumagon do ahu satongkin-satongkin persiapan ganup ari, unang apala hupersiaphon sude di bagasan sadari.”

15. Songon dia cara na denggan laho persiapan?

¹⁵ Songon dia cara na denggan laho persiapan? Andorang so persiapan, martangiang ma hamu asa dilehon tondi parbadia. (Luk. 11:13; 1 Joh. 5:14) Denggan ma parrohahon na laho diparsiajari i, mulai sian judul, subjudul, gambar, dohot kotak tinjauan. Jaha ma angka ayat na adong di paragraf. Dung i, rimangi ma jala bahen hian ma aha na laho dikomentari hamu. Lam denggan hamu persiapan, lam godang ma laba na dapotmuna. Jala lam mura ma hamu mangalehon komentar.​—2 Kor. 9:6.

16. Aha do alat na boi di pangke hamu laho persiapan, jala songon dia cara mamangke i?

¹⁶ Boi do dipangke hamu alat elektronik laho persiapan. Saonari, diparade organisasi do angka bahan sian elektronik laho mangurupi hita asa denggan persiapan. Umpamana, sian aplikasi JW Library^® boi do ta-download angka na laho diparsiajari di HP manang di tabletta. Gabe boi ma hamu marsiajar didia pe manang sadihari pe. Boi do dijaha manang dibege hamu angka na laho diparsiajari i tingki istirahat di parkarejoan, di singkola manang tingki mardalani. Gabe mura ma hamu marsiajar jala mangariset molo mamangke Watchtower Library dohot PERPUSTAKAAN ONLINE^™ Joujou Paboahon.

17. (a) Boasa denggan molo tabahen hian piga-piga komentarta? (b) Aha do na boi taparsiajari sian video Gabe Aleale ni Jahowa—Parade ma Komentarmuna?

¹⁷ Bahen hian ma piga-piga komentarmuna. Alana godang do na martudu. Alani i, olo do ndang ditudu na manguluhon i hamu. Ra ndang boi sude ditudu na manguluhon i angka na martudu, asa boi parpunguan i sae pas di tingkina. Molo ndang sanga dope hamu ditudu, unang ma hansit rohamuna manang marmetmet ni roha. Alai bahen hian ma piga-piga komentarmuna, asa adong kesempatan boi mangalehon komentar. Molo naeng manjaha ayat, boi do dipersiaphon hamu hian. Alai dumenggan do molo dipersiaphon hamu komentarmuna. *

18. Boasa ingkon jempek komentarta?

¹⁸ Bahen ma komentar na jempek. Sipata, komentar na jempek jala na mura diantusi, boi do patoguhon roha. Alani i, bahen ma komentar na lelengna 30 detik. (Poda 10:19; 15:23) Hamu angka naung leleng gabe Sitindangi, gabe sitiruon ma  hamu tu na asing tingki mangalehon komentar. Unang ma pagodanghu na dikomentari hamu. Alana, olo do gabe didok roha ni na asing, ndang boi ditiru nasida songon komentarmuna i. Ujungna gabe mabiar ma nasida mangalehon komentar. Alai molo jempek komentarmuna, gabe adong ma kesempatan di na asing laho mangalehon komentar. Molo hamu na parjolo ditudu, bahen ma alus na pas tu sungkun-sungkun i. Unang ma sude komentari na adong di paragraf i. Molo nunga sude diulas, boi ma dilehon hamu komentar tambahan.​—Ida ma kotak “ Aha do na Boi Hukomentari?”

19. Songon dia na manguluhon parsiajaran i boi mangurupi hamu jala aha do na ingkon diulahon hamu?

¹⁹ Boi do dipangido hamu tu na manguluhon, di paragraf dia hamu naeng mangalehon komentar. Andorang so mulai dope parpunguan, jumpangi ma na manguluhon parsiajaran i. Tingki diulas paragraf na laho di komentari hamu, pintor martudu ma jala timbo ma angkat tanganmuna asa boi diida na manguluhon i.

20. Boasa parpunguanta dipatudos songon na mambagi sipanganon dohot angka dongan?

²⁰ Tingki ro tu parpunguan, dos songon na mambagi sipanganon do hita dohot angka dongan. Umpamana, molo adong dongan sian huria mambahen acara di jabuna. Alai, dipangido asa diboan hamu sipanganon na asing. Ra, bingung do hamu, hira-hira sipanganon aha do na laho boanonmuna. Alai nang pe songon i, diboan hamu do sipanganon na dihalomohon angka dongan. Suang songon i ma Jahowa, nunga diparade Ibana gok sipanganon di parpunguan. (Ps. 23:5; Mat. 24:45) Alai lomo do rohana, adong na taboan tingki ro tu parpunguan. Alani i, denggan ma hamu persiapan asa boi mangalehon godang komentar. Alana ndang sae holan na diparade Jahowa i na tadapot. Alai ingkon adong na boi tabagi dohot angka dongan.