ICIPANDE CA KUSAMBILILAMO 2
Mulelumbanya Yehova mu Cilonganino
“Mu lukuta e mo nkamulumbanishisha.”—AMALU. 22:22.
ULWIMBO 59 Natulumbanye Jah
IFYO TWALASAMBILILA *
1. Bushe Davidi aleumfwa shani pali Yehova, kabili ifyo aleumfwa fyalengele alecita cinshi?
IMFUMU DAVIDI yalembele aiti: “Yehova mukulu kabili alinga ukulumbanishiwa nga nshi.” (Amalu. 145:3) Davidi alitemenwe Yehova kabili ici calengele alelumbanya Lesa “mu lukuta.” (Amalu. 22:22; 40:5) Ukwabula no kutwishika, na imwe bene mwalitemwa Yehova kabili kuti mwalanda ifyalandile Davidi. Atile: “Mucindikwe, mwe Yehova Lesa wa kwa Israele shifwe, ukufuma umuyayaya ukuya umuyayaya.”—1 Imila. 29:10-13.
2. (a) Finshi twingacita pa kuti tulelumbanya Yehova? (b) Cinshi cilenga aba bwananyina bamo belaasukapo, kabili finshi twalasambilila?
2 Muno nshiku, cimo ico tucita pa kulumbanya Yehova kwasukapo ilyo tulelongana na Bena Kristu banensu. Lelo aba bwananyina bamo cilabakosela sana ukwasukapo. Kwena balafwaya ukwasukapo nomba balatiina. Finshi bengacita pa kuti baleke ukutiina? Kabili finshi fingatwafwa pa kuti tuleasuka ifingakoselesha aba bwananyina? Ilyo tushilaasuka aya amepusho, natubalilepo ukulanda pa fintu fine ifilenga tuleasukapo ilyo tulelongana.
IFILENGA TULEASUKAPO ILYO TULELONGANA
3-5. (a) Ukulingana ne lembo lya AbaHebere 13:15, cinshi cilenga tuleasukapo ilyo tulelongana? (b) Bushe tulingile ukulaasuka nge fyo aba bwananyina bonse basuka? Londololeni.
3 Bonse Yehova alitupeela ishuko lya kulamulumbanya. (Amalu. 119:108) Nga tuleasukapo ilyo tulelongana ninshi tuletuula “ilambo lya kulumbanya,” kabili takuli nangu umo uwingatutuulilako ili ilambo. (Belengeni AbaHebere 13:15.) Bushe Yehova afwaya tuletuula amalambo yamo yene, e kutila bushe afwaya tuleasuka nge fyo aba bwananyina bambi basuka? Awe!
4 Yehova alishiba ukuti fwe bantu twalipusanapusana mu fyo twacenjelamo, e lyo na mu fyo ifintu fyaba mu bumi kabili alatasha sana pa fyo tuipeelesha pa kumubombela. Tontonkanyeni pa malambo ayo aebele abena Israele ukuti baletuula. Abena Israele bamo baletuula utwana twa mpaanga nelyo imbushi. Lelo abali abapiina bena baletuula “ifipele fibili atemwa utwana twa nkunda tubili.” Nomba nga ca kuti umwina Israele takwete ifyuni fibili, Yehova alemusuminisha ukutuula “ulupe lwa buunga ubwapeleka.” (Lebi 5:7, 11) Ubuunga tabwayafishe ukusanga, lelo Yehova aletasha sana, kulila fye umuntu atuula “ubuunga ubwapeleka.”
5 Lesa wesu wa cikuuku kabili ifi fine e fyo afwaya na ifwe tulecita muno nshiku. Nga tuleasukapo ilyo tulelongana, tenekela ukuti bonse tube abalongoloka nga filya Apolo alelanda bwino sana nelyo tube nga Paulo uwalenashanasha pa kulanda. (Imil. 18:24; 19:8) Yehova afwaya fye tuleasuka apapela amaka yesu. Ibukisheni mukamfwilwa uwatuulile utundalama tubili utunono. Yehova alimutashishe sana pantu apeele ukulingana ne sho akwete.—Luka 21:1-4.
Nga tuleasukapo tulanonkelamo kabili tulakoselesha na balekutika (Moneni paragrafu 6 na 7) *
6. (a) Ukulingana ne lembo lya AbaHebere 10:24, 25, tumfwa shani aba bwananyina nga baleasukapo ilyo tulelongana? (b) Finshi mulingile ukucita pa kuti muletasha pa masuko ayamukoselesha?
6 Nga tuleasukapo tulakoseleshanya. (Belengeni AbaHebere 10:24, 25.) Bonse tulatemwa sana nga twaumfwa aba bwananyina baleasukapo ilyo tulelongana. Na kabili tulomfwa bwino umwana umunono nga aasukapo no mweo onse. Uwa bwananyina nga alanda no mweo onse pa cine ico asambilila muli ilyo isambililo, tulatemwa. Na kabili tulatemwa aba bwananyina nga ‘bashipa’ pa kuti basukepo, nangu ca kuti bansoni nelyo nga e lyo batendeke fye ukusambilila ululimi tulanda. (1 Tes. 2:2) Finshi tufwile ukucita pa kuti tulelanga ukuti tulabatasha pa fyo baibikilishako? Tufwile ukubatasha pa numa ya kulongana pa fyo bacasukapo. Inshila na imbi iyo twingabatashishamo, kulaasukapo. Nga tulecita ifi ninshi tulekoseleshanya ilyo tulelongana.—Rom. 1:11, 12.
7. Tunonkelamo shani nga tuleasukapo?
7 Nga tuleasukapo na ifwe bene tulanonkelamo. (Esa. 48:17) Tunonkelamo shani? Ica kubalilapo, nga twapanga ukuyaasukapo, tulafwaisha ukupekanya bwino sana. Nga twapekanya bwino, tulomfwikisha ifyaba mu Cebo ca kwa Lesa. Nga twaumfwikisha ifyaba mu Cebo ca kwa Lesa, cilatwangukila ukulacita ifyo tulesambilila. Icalenga bubili, tulaipakisha ilyo tulelongana pantu ninshi tuleasukapo. Icalenga butatu, nga twaibikilishako pa kuti twasukepo, ilingi line tatulaba ifyo twalandilepo ilyo twalelongana.
8-9. (a) Ukulingana ne fyaba pali Malaki 3:16, bushe Yehova omfwa shani nga tuleasukapo ilyo tulelongana? (b) Cinshi cingalenga bamo balefilwa ukwasukapo?
8 Tulalumbanya Yehova nga tulelanda pa fyo twasuminamo. Te kuti tutwishike no kutwishika ukuti Yehova alatasha nga nshi pa fyo tuibikilishako pa kuti twasukepo ilyo tulelongana. (Belengeni Malaki 3:16.) Alatupaala pa kulanga ukuti alatasha sana pa fyo tuibikilishako pa kuti tulemusekesha.—Mal. 3:10.
9 Cailanga fye apabuuta tuutu ukuti kwaliba ifintu ifisuma ififwile ukulenga tuleasukapo ilyo tulelongana. Lelo aba bwananyina bamo nalimo kuti balatiina ukwimya amaboko pa kuti basukepo. Nga ca kuti mulatiina, tamulingile ukufuupuka. Natusambilile pa mashinte ya mafunde ya mu Baibolo yamo, pa malyashi ya mu Baibolo yamo, e lyo na pali fimo ifyo twingacita pa kuti tuleasukapo sana ilyo tulelongana.
IFYO TUFWILE UKUCITA PA KUTI TWILATIINA SANA
10. (a) Finshi filenga fwe bengi tulefilwa ukwasukapo ilyo tulelongana? (b) Cinshi twingalandila ukuti caliba fye bwino ukukwatako umwenso wa kwasukapo?
10 Bushe mulakwata mutunta ilyo mushilaimya no kuboko? Nga mulakwata mutunta, te imwe mweka mumfwa ifi. Ukulanda fye icishinka, bonse tulomfwa umwenso ilyo tuleasukapo. Pa kuti mwilatiina ukwasukapo, mulingile ukwishiba ifilenga muletiina. Bushe ico mutiinina ni co mumona ukuti mwalalaba ifyo mulefwaya ukusosa nelyo ni co mumona kwati mwalalanda ifishili fya cine? Bushe ico mufililwa ukwasukapo ni co mumona kwati te kuti mwasuke nge fyo aba bwananyina bambi basuka? Kwena caliba fye bwino ukumfwa ifi, pantu filanga ukuti mwaliicefya kabili mumona ukuti aba bwananyina bambi balimucila. Yehova alitemwa abantu abaicefya. (Amalu. 138:6; Fil. 2:3) Na lyo line, Yehova afwaya ukuti mulemulumbanya kabili mulekoselesha aba bwananyina ilyo mulelongana. (1 Tes. 5:11) Yehova alimutemwa kabili akamwafwa pa kuti mukashipe.
11. Finshi Baibolo ilanda ifingatwafwa?
11 Natulande pali fimo ifyo Baibolo yalandapo. Baibolo itila bonse fye tulaipununa mu kusosa. (Yako. 3:2) Yehova tatwenekela ukuba abapwililika kabili aba bwananyina nabo tabatwenekela ukuba abapwililika. (Amalu. 103:12-14) Bamunyinefwe na bankashi lupwa lwesu ulwa ku mupashi kabili balitutemwa. (Marko 10:29, 30; Yoh. 13:35) Balishiba ukuti limo tatwasuka ukulingana ne fyo twacilafwaya ukwasuka.
12-13. Finshi tusambilila ku lyashi lya kwa Nehemia na ku lya kwa Yona?
12 Tontonkanyeni pali bamo abo Baibolo yalandapo abo mwingasambililako. Ibukisheni Nehemia. Alebombela kwi sano lya mfumu iyali na maka sana. Nehemia ali no bulanda pantu aumfwile ukuti ifibumba fya musumba wa Yerusalemu ne mpongolo sha uko fyalyonaike. (Nehe. 1:1-4) Elenganyeni mutunta uo akwete ilyo imfumu yamwipwishe ico abelele no bulanda! Nehemia alyangufyenye ukupepa e lyo nomba ayasuka. Lyena imfumu yalyafwile sana abantu ba kwa Lesa. (Nehe. 2:1-8) Tontonkanyeni na pali Yona. Ilyo Yehova atumine Yona ukuyalanda na bena Ninebe, alitiinine sana ica kuti abutukile ku cifulo cimbi. (Yona 1:1-3) Lelo Yehova alimwafwile kabili alibombele umulimo uo amupeele. Kabili ifyo Yona aebele abena Ninebe fyalengele baaluka. (Yona 3:5-10) Kuli Nehemia tusambililako ico cawamina ukupepela ilyo tushilaasuka. Kabili kuli Yona tusambililako ukutila Yehova kuti atwafwa pa kuti tumubombele nangu twingaba no mwenso wa musango shani. Bushe kwena kwaliba aba bwananyina abatiinya nge fyo abena Ninebe baletiinya?
13 Finshi fingalenga mwalaasuka ifyasuko ifingakoselesha aba bwananyina ilyo mulelongana? Natusambilileko pali fimo.
14. Mulandu nshi tulingile ukulapekanishisha bwino ifyo tukasambilila ilyo tukalalongana, kabili ni lilali twingapekanya?
14 Mulepekanya ifyo mukasambilila ilyo mukalalongana. Nga mwapangila libela ukuyaasukapo kabili nga mwapekanya bwino, tamwakaletiina ukwasukapo. (Amapi. 21:5) Kwena inshita tupekanya ilapusanapusana. Ba Eloise bamukamfwilwa abali ne myaka 80 batampa ukupekanya Isambililo lya Ulupungu lwa kwa Kalinda ilyo umulungu watendeka fye. Ba Eloise batile, “Ndaipakisha sana ilyo ndelongana nga ca kuti nalipekanishishe libela ifyo tulesambilila.” Ba Joy ababomba incito balandile ukuti bena bakwata inshita ya kupekanya Isambililo lya Ulupungu lwa kwa Kalinda pa Cibelushi. Batile, “Mfwaya ukusambilila ilyo nshilalaba ifyo nasambilile mwi sambililo ilyo nalepekanya.” Ba Ike baeluda abakwata ifya kucita ifingi kabili bapainiya batile, “Ine nasanga ukuti cilanyangukilapo ukulakwatako akashita ka kupekanya Isambililo lya Ulupungu lwa kwa Kalinda mu mulungu ukucila ukulipekanya fye pa muku umo.”
15. Finshi mufwile ukucita pa kuti mulepekanya bwino ifyo mukasambilila ilyo mukalalongana?
15 Finshi mufwile ukucita pa kuti mulepekanya bwino ifyo mukasambilila ilyo mukalalongana? Ilyo mushilatendeka ukupekanya, mulelomba Yehova ukuti alemupeela umupashi wa mushilo. (Luka 11:13; 1 Yoh. 5:14) Lyena mulepituluka mu mutwe we sambililo, mu tumitwe utunono, mu filangililo, na mu tubokoshi utulimo. Ilyo mwatampa ukubelenga amaparagrafu, mulebelenga amalembo ayalimo. Muletontonkanya sana pa fyebo mulebelenga kabili mulebika sana amano ku fishinka ifyo mwingafwaya ukuyaasukapo. Nga mwapekanya bwino, mukeshiba ifingi kabili tacakamukosele ukwasukapo ilyo mukalalongana—2 Kor. 9:6.
16. Finshi icilonganino ca kwa Lesa catupekanishisha, kabili kuti mwafibomfya shani?
16 Nga kuti mwakwanisha, mulebomfya impapulo sha pa foni nelyo pa tabuleti na pa kompyuta isha mu lulimi mwaishiba. Yehova ukupitila mu cilonganino cakwe alitupeela ifyo twingabomfya pa kupekanya ukulongana. Tulabomfya JW Library® app pa kukopolola impapulo sha kusambililamo pa foni nelyo pa tabuleti. Lyena kuti twabelenga impapulo, kuti twakutika ifyebo ifyo bakopa pa nshita yonse iyo tulefwaya kabili konse uko twingaba. Bamo balabomfya JW Library® app pa kuisambilisha pa nshita ya kutuusha pa ncito, pa sukulu, nelyo ilyo bali pa bulendo. Watchtower Library iya pa kompyuta na Watchtower LAIBRARE YA PA INTANETI kuti yalenga catwangukila ukusanga ifyebo ifyo tulefwaya ukwishiba bwino.
Ni lilali mukwata inshita ya kupekanya ifyo mukasambilila ilyo mukalalongana? (Moneni paragrafu 14 ukushinta ku 16) *
17. (a) Mulandu nshi cawamina ukupekanya ifyasuko ifingi? (b) Finshi mwasambilile muli vidio itila Beni Cibusa wa kwa Yehova—Pekanyeni Ifya Kwasuka?
17 Mulepekanya ifyasuko ifingi. Mulandu nshi? Pantu nalimo te kuti bamusonte ilyo mwaimya ukuboko pa muku wa kubalilapo. Nga ca kuti mwe baimya amaboko namufula, katungulula we sambililo kuti asontapo fye umo. Nga ca kuti ifishinka nafyumfwika, katungulula we sambililo takasonte abakwasukapo na bambi pa kuti ukulongana kupwe pa nshita kufwile ukupwilapo. E ico tamufwile ukufulwa atemwa ukufuupulwa nga ca kuti tabamusontele ilyo isambililo lyatendeka fye. Nga mulepekanya ifyasuko ifingi, te kuti isambililo lipwe fye ukwabula ukwasukapo. Cimo ico mwingacita pa kuti mukayeasukapo, kupekanya ukuyabelenga ilembo. Nga kuti mwakwanisha, kuti mwapekanya no kuyaasukapo mu mashiwi yenu. *
18. Mulandu nshi tulingile ukulaipifisha ifyasuko?
18 Muleipifya pa kwasuka. Ilingi line ifyasuko ifipi kabili ifyayanguka e fikoselesha sana. E ico muleipifya pa kwasuka. Ilyo muleasuka tamufwile ukucila pa masekondi 30. (Amapi. 10:19; 15:23) Nga ca kuti ni kale mwatampa ukwasukapo, muleipifya pa kwasuka pa kuti aba bwananyina bambi balemupashanya. Nga muleasuka ifyasuko ifitali, aba bwananyina bambi kuti balatiina ukwasukapo pantu kuti balamona kwati te kuti basuke nge fyo mwasuka. Na kabili nga muleipifya pa kwasuka aba bwananyina abengi bakalaasukapo. Nga ca kuti ni mwe mwabalilapo ukwasuka, asukeni ukulingana ne cipusho bepwishe kabili icasuko cilingile ukuba icayanguka. Tamulingile ukulanda ifishinka fyonse ifili mu paragrafu. Ifishinka ifikalamba ifili mu paragrafu nga fyalandwapo, kuti mwalanda pa fishinka fimbi ifinono.—Moneni akabokoshi akaleti, “ Finshi Ningalandapo Ilyo Ndeasuka?”
19. Bushe uuletungulula kuti amwafwa shani, lelo finshi mulingile ukucita?
19 Mulingile ukweba uuletungulula isambililo paragrafu iyo mulefwaya ukwasukamo. Nga mulefwaya ukucita ifi, mufwile ukwebela limo uuletungulula ilyo mushilatendeka ukulongana. Ilyo mwafika mu paragrafu mulefwaya ukwasukamo, imyeni ukuboko bwangu bwangu kabili imisheni pa kuti uuletungulula amumone.
20. Bushe ukulongana kwaba shani kwati kuliila pamo ifya kulya ne fibusa?
20 Mulemona ukulongana nge fya kulya ifyo muleliila pamo ne fibusa fyenu ifisuma. Finshi mwingacita nga ca kuti bamwita ku kuliila pamo ifya kulya na ba bwananyina ba mu cilonganino kabili bamweba ukupekanyako ifya kulya ifinono? Kwena kuti mwaumfwako umwenso, lelo kuti mwabombesha pa kuti mupekanye ifya kulya ifyo bonse bengaipakisha. Yehova uutwita ku kulongana alitupekanishisha ifintu ifingi nga nshi ifyo tusambilila ilyo tulelongana. (Amalu. 23:5; Mat. 24:45) Kabili alatemwa sana nga ca kuti na ifwe twaisako na cimo ico twingapeela aba bwananyina. Kanshi mulepekanya bwino kabili muleibikilishako pa kuti muleasukapo sana. Nga mulecita ifi, tamwakalelya fye pe tebulo lya kwa Yehova, lelo mukalapeelako na ba bwananyina ubupe ilyo muleasukapo.
ULWIMBO 2 Ni Mwe Yehova
^ para. 5 Bonse twalitemwa Yehova kabili twalitemwa ukumulumbanya nga filya fine Davidi uwaimbile amalumbo alecita. Nga tulelongana na ba bwananyina e nshita iisuma nga nshi iyo tukwata iya kulanga ifyo twatemwa Lesa. Na lyo line bamo cilatukosela ukwasukapo ilyo tulelongana. Nga cilamukosela, cino cipande calamwafwa ukwishiba ifilenga cilemukosela kabili calamwafwa no kwishiba ifya kucita pa kuti cilemwangukila ukwasukapo.
^ para. 17 Pa jw.org/bem, tambeni vidio itila Beni Cibusa wa kwa Yehova—Pekanyeni Ifya Kwasuka. Kabiyeni apo balemba ati AMASAMBILISHO YA MU BAIBOLO > ABANA.
^ para. 63 UBULONDOLOSHI BWA CIKOPE: Aba bwananyina mu cilonganino baleasukapo pe Sambililo lya Ulupungu lwa kwa Kalinda.
^ para. 65 UBULONDOLOSHI BWA CIKOPE: Aba mu cilonganino bamo abaciba pa cikope ca kubalilapo ninshi baleasukapo pe Sambililo lya Ulupungu lwa kwa Kalinda. Nangu ca kuti ifyo ifintu fyaba mu bumi fyalipusanapusana, bonse balakwata inshita ya kupekanya ifyo bakayasambilila ilyo bakalalongana.
