1. Uga perasan Daud man Jahwe, janah enda ngiahken ia ngelakoken kai?

 ITULIS Raja Daud, ‘Jahwe kap si Meganjangna, emaka arus man baNa pujin si Meganjangna.’ (Msm. 145:3) Keleng atena Jahwe, e me si erbanca ipujina Ia “i bas perpulungen.” (Msm. 22:23; 40:6) Pasti keleng atendu Jahwe janah cocok kapndu kata-kata Daud enda, ‘Jahwe Dibata nini kami Jakup, terpujilah Kam asa lalap seh rasa lalap.’​—1 Kro. 29:10-13.

2. (a) Uga carana muji Jahwe? (b) Kai saja tantangenna mereken komentar, janah kai si man bahasenta?

² Gundari, sada cara muji Jahwe eme mereken komentar bas perpulungen. Tapi lit turang seninata si mesera akapna ngelakokenca. Situhuna mere komentar nge atena, tapi mbiar ia. Kai si arus ilakokenna gelah lanai ia mbiar? Janah uga carana gelah kerina kita banci mereken komentar si mpegegehi? Sope sijawap e, sibahas lebe empat alasen ngkai maka perlu mereken komentar bas perpulungen.

3-5. (a) Bagi si ikataken Heber 13:15, ngkai maka perlu kita mereken komentar? (b) Seri nge komentar si ipindo Jahwe arah kita kerina? Jelasken.

³ Kesempaten istimewa si ibereken Jahwe guna muji Ia. (Msm. 119:108) Komentarta bas perpulungen termasuk ‘korban pujinta’ man Dibata, janah la banci kalak si deban si nggantikenca. (Baca Heber 13:15.)  Seri nge korban ntah pe komentar si ipindo Jahwe arah kita kerina? Lang, la seri.

⁴ Iteh Jahwe la seri kerina keadanta bage pe kengasupenta. IergaiNa kel kerina pengorbanenta. Lit piga-piga korban si ialoken Jahwe arah kalak Israel. Piga-piga kalak Israel ngasup mereken sada biri-biri ntah pe kambing. Tapi adi kalak mesera ia, banci ikorbankenna “dua ndukur ntah dua nderapati.” Adi si e pe la ia ngasup, “sepersepuluh epa tepung si mehulina” pe ialoken Jahwe. (Im. 5:7, 11, Terjemahan Dunia Baru) Memang tepung la merga, tapi tetap iergai Jahwe adi tepung e “tepung si mehulina.”

⁵ Bage ka pe gundari. Labo arus beluh kita ngerana bagi Apolos ntah pe Paulus adi mere komentar ateta. (Perb. 18:24; 19:8) Ate Jahwe sibere min asa ngasupta. Ingetlah diberu si mbalu si mereken dua sen logam si kitik. Meherga ia iakap Jahwe perban iberekenna si mehulina asa ngasupna.​—Luk. 21:1-4.

6. (a) Menurut Heber 10:24, 25, kai pengaruh komentar bas perpulungen man banta? (b) Kai si banci ilakokenndu guna ngergai kalak si mereken komentar si mpegegehi kam?

⁶ Mpegegehi sada ras si debanna. (Baca Heber 10:24, 25.) Meriah siakap megi erbage komentar bas perpulungen. Misalna, komentar anak-anak si sederhana bas pusuhna nari. Lit ka komentar kalak si mbaru erlajar si nuriken uga riahna ukurna dat kebenaren. Meriah ka siakap ngidah kalak si iusahakenna kel gelah pang mereken komentar, amin gia ia permela ntah pe mbaru denga ipelajarina bahasata. (1 Tes. 2:2) Kai si banci silakoken guna ngergai usaha kalak e? Kenca perpulungen, banci sikataken bujur kerna komentarna si mpegegehi. Cara si deban, ikut ka kita mereken komentar. Alu bage labo kita saja si ipegegehi tapi kita pe ikut mpegegehi.​—Rom. 1:11, 12.

7. Kai gunana banta adi kita mere komentar?

⁷ Lit gunana banta. (Jes. 48:17) Kai saja e? Si pertama, adi mere komentar  ateta, pasti siusahaken erban persiapen si mehuli. Adi silakoken e, reh bagesna pemetehta kerna Kata Dibata. Adi nggo reh bagesna pemetehta, banci reh ulina kita ndalankenca. Si peduaken, reh riahna siakap perpulungen perban ikut kita bas pembahasen e. Si peteluken, perban nggo siusahaken mere komentar, banci ndekah siinget komentarta e.

8-9. (a) Bagi si ikataken Maleaki 3:16, menurutndu uga perasan Jahwe kerna komentarta? (b) Kai ka si mbiar denga piga-piga kalak ngelakokenca?

⁸ Meriah siban ukur Jahwe. Tek kita pasti ibegiken Jahwe komentarta janah iergaiNa kel usahata mere komentar. (Baca Maleaki 3:16.) Ipasu-pasuNa kita adi siusahaken kel erban meriah ukurNa.​—Mal. 3:10.

⁹ Jelas me, lit alasenna ngkai maka perlu mere komentar bas perpulungen. Tapi, lit denga si mbiar ngangkat tanna. Adi kam pe bage, ula kitik ukurndu. Mari sibahas piga-piga pedah Pustaka, piga-piga contoh, ras uga carana gelah reh buena kita mere komentar.

10. (a) Kai saja si erban kita mbiar mere komentar? (b) Engkai maka mejile adi lit sitik perbiarta mere komentar?

¹⁰ Jantungen nge kam sanga angkatndu atendu tanndu mere komentar? Labo kam ngenca bage. Situhuna teremen nge kita mbiar mere komentar. Gelah lanai kam mbiar, arus tehndu lebe kai si erban kam mbiar. Misalna, mbiar nge kam uga kari adi rempet kam lupa kai si atendu ibelaskenndu? Ntah, mbiar nge kam salah kari komentarndu e? Mbiar nge kam la seri jilena komentarndu ras komentar si deban? Situhuna, mejile nge adi lit bage perasanndu. Enda buktina kam meteruk rukur, janah ganjangen akapndu kalak  asangken kam. Ngena ate Jahwe kalak si bage. (Msm. 138:6; Pil. 2:3) Tapi ate Jahwe ipujindu min Ia janah ipegegehindu ka turang senina bas perpulungen. (1 Tes. 5:11) Keleng ate Jahwe kam janah pasti isampatiNa kam gelah pang.

11. Pedah Pustaka si apai si banci nampati kita?

¹¹ Mari siperdiateken piga-piga pedah Pustaka. Nina Pustaka kerina kita erban salah i bas ngerana. (Jak. 3:2) Labo iarapken Jahwe kita sempurna, turang seninata pe bage. (Msm. 103:12-14) Keluargata nge kalak e, keleng atena kita. (Mrk. 10:29, 30; Joh. 13:35) Iangkaina maka mon-mon komentarta e labo bagi ukurta.

12-13. Kai si banci sipelajari arah Nehemia ras Juna?

¹² Lit piga-piga contoh bas Pustaka si banci nampati kam gelah lanai mbiar. Misalna Nehemia. Erdahin ia bas istana raja si mbelin kuasana. Bas sada wari ibegina nggo runtuh tembok ras gerbang Jerusalem, emaka sedih ia. (Neh. 1:1-4) Isungkun Raja ngkai maka ia sedih. Bayangken uga perasan Nehemia paksa si e. Pasti jantungen kel ia. Tapi minter ia ertoto, e maka ijawapna Raja. Dungna, melala penampat si ibereken Raja man umat Dibata. (Neh. 2:1-8) Contoh si deban eme Juna. Sanga isuruh Jahwe ia mpersingeti kalak Niniwe, mbiar kel ia janah kiam ia. (Jun. 1:1-3) Tapi isampati Jahwe Juna, emaka banci idalankenna tugasna. Janah, si ipesehna e erguna kel man kalak Niniwe. (Jun. 3:5-10) Arah contoh Nehemia, siteh maka penting kel ertoto sope mere komentar. Arah contoh Juna, siteh maka isampati Jahwe kita Ia soal uga kita biarna. Lit kin turang seninata bagi kalak Niniwe seramna?

¹³ Kai saja carana gelah banci sibere komentar si mpegegehi bas perpulungen? Mari sibahas.

14. Engkai maka arus mejile siban persiapen guna perpulungen, janah ndigan waktu si cocok?

¹⁴ Persiapen. Lanai kam mbiar mere komentar, adi rencanakenndu lebe janah mejile banndu persiapenndu. (Kua. 21:5) Memang, labo seri kerina jadwalta. Eloise, sekalak diberu si nggo mbalu si umurna 80-en, persiapen Sora Ermomo ia bas awal minggu. Nina, “Reh riahna kuakap perpulungen adi ndauh-ndauh wari nggo kuban persiapen.” Joy, si erdahin sepenuh waktu, persiapen Sora Ermomo ia sada wari sope perpulungen. Nina, “Menukah kuakap ngingetsa adi la ndauh jarak persiapen ras perpulungen.” Junior, sekalak  pertua si sibuk janah merintis ngataken, “Adi aku, padin kuakap sitik-sitik persiapen bas sada minggu asangken sekaligus kerina bas sada wari.”

15. Uga carana erban persiapen si mejile?

¹⁵ Uga carana erban persiapen si mejile? Sope persiapen, ertotolah mindo kesah si badia man Jahwe. (Luk. 11:13; 1 Joh. 5:14) Kenca si e, pereksalah judulna, subjudul, gambar, ras kotak. Sanga ipelajarindu tiap paragrap, bacalah ayat-ayat si lit i je. Ukurilah alu mbages, khususna bagin si atendu ikomentarindu. Adi reh jilena persiapenndu, reh buena datndu gunana, janah reh nukahna akapndu mere komentar.​—2 Kor. 9:6.

16. Alat bantu kai si banci sipake, janah uga cara makesa?

¹⁶ Adi banci, gunakenlah alat bantu elektronik si lit bas bahasa si iangkaindu. Enggo ibereken Jahwe alat bantu elektronik arah organisasiNa gelah reh nukahna siakap persiapen. Bas aplikasi JW Library^® banci si-download buku pelajaren. Kenca e, katawari pe janah i japa pe banci sipelajari, sibaca, ntah pe sibegiken. Lit si nggunaken alat e guna persiapen sanga istirahat bas ingan erdahin, sanga i sekolah, ntah pe sanga bas perdalanen. Janah adi sigunaken Watchtower Library ras PERPUSTAKAN ONLINE Sora Ermomo^™, reh nukahna siakap riset janah reh bagesna persiapenta.

17. (a) Engkai maka mehuli adi sipersiapken piga-piga komentar? (b) Kai si banci ipelajarindu arah video Jadi Teman Jahwe—Siapken Komentarndu?

¹⁷ Adi banci, persiapkenlah piga-piga komentar. Engkai? Mungkin labo kari mis kam si isuruh sanga angkatndu tanndu. Banci saja kalak si deban pe radu ngangkat tan ras kam, janah ia si ipilih si mandu. Gelah perpulungen e tepat waktu, mungkin ibatasi si mandu kalak si mereken komentar. Emaka, ula kitik ukurndu adi la mis kam isuruhna sanga tangtangna angkatndu tanndu. Adi lit piga-piga komentar si ipersiapkenndu, reh buena kesempatenndu mere komentar. Salah sada komentar si banci ipersiapkenndu eme mbaca ayat. Tapi adi banci, ban ka lah komentar alu kata-katandu sendiri. *

18. Engkai maka arus singkat komentarta?

¹⁸ Singkat ban komentarta. Biasana, komentar si mpegegehi e singkat  ras sederhana. Emaka singkatlah ban komentarndu. Usahakenlah kira-kira 30 detik saja. (Kua. 10:19; 15:23) Adi nggo ertahun-tahun kam mere komentar bas perpulungen, singkatlah ban komentarndu gelah jadi usihen. Enda penting kel. Adi gedangsa komentarndu, mbiar dungna si deban. La kapna ia ngasup mere komentar bagi komentarndu e. Janah adi singkat komentarndu, reh buena si banci mere komentar perban lit denga waktu. Khususna adi kam si tangtangna isuruh, singkatlah ban jawapenndu si langsung njawap penungkunenna. Ula borongndu sada paragrap e. Kenca nggo ibahas intina, banci ikomentarindu bagin si debanna.​—Nen kotak “ Kai si Banci Kukomentari?”

19. Uga carana gelah banci isampati si mandu kam, tapi kai si arus ilakokenndu?

¹⁹ Kataken man si mandu paragrap si apai atendu ikomentarindu. Adi bage atendu ibanndu, dahilah si mandu sope perpulungen imulai. Sanga isungkun si mandu penungkunen paragrap e, mislah meganjang angkat tanndu gelah banci idahna.

20. Engkai maka banci ikataken perpulungen e bagi acara man ras-ras?

²⁰ Anggaplah perpulungen e bagi acara man ras-ras. Misalna, lit turang seninata ngundang kita ku acara man-man. Ipindona kita maba pangan si deban. Uga tanggapenta? Banci saja lit sitik biarta, tapi sibaba ateta si mehulina gelah kerina kalak banci manca. Bage ka pe, nggo undang Jahwe kita ku perpulungen, janah nggo isikapkenNa melala pangan rohani i je. (Msm. 23:5; Mat. 24:45) Pasti meriah ukurNa ngaloken luahta amin gia sederhana, adi e si mehulina. Emaka mejilelah ban persiapenndu janah rusurlah kam mere komentar. Adi bage, labo kam man saja bas meja Jahwe tapi lit ka si ibagikenndu man turang senina.