1. Ka meha lasandirubei Dawidi luagu Heowá ani ka ladügübei ladüga lasandiragun lungua ítara?

ABÜRÜHATI urúei Dawidi: “Wéiriguti Aburemei ani gadünati lun lalawahóuniwa” (Sal. 145:3). Hínsiñeti meha Heowá lun Dawidi ani ínchaha lumuti ínsiñeni ligía lun lalawahani ‘lidan damuriguaü’ (Sal. 22:22; 40:5). Chóuruti hínsiñe lan giñe Heowá woun ani úaratiwa luma dimurei le lariñagubei Dawidi: “Alawahóua ban Heowá Lubungiute Ísüraeli le wáguchi lun súnwandan” (1 Kro. 29:10, TNM, 11-13).

2. a) Ida luba gayara lan walawahani Heowá? b) Ka asuseredubei houn fiu íbirigu ani kaba wakutiha?

² Aban lídangiñe igaburi lun walawahani Heowá uguñe weyu, lau wíchugun óunabagülei lidan adamuridaguni. Añahein íbirigu hénrenguti houn. Busentiña yebe hadügüni, gama lumoun, manigitiña. Ida luba hagidaruni anufudei le? Ka gayaraabei líderaguniwa lun wíchugun óunabagülei le ruti dǘgüdaguaü? Lubaragiñe wóunabuni álügüdahani le, akutiha wamá gádürü resun súdiniti lun warihini ka lan uéigiñe wíchiga óunabagülei lidan burí adamuridaguni.

3-5. a) Según Ebüréu 13:15, ka uagu wíchiga óunabagülei lidan adamuridaguni? b) Ida liña wasubudiruni mamuriahan lan Heowá lun wíchugun ligiaméme luwuyeri óunabagülei?

³ Ru laali Heowá lubuidun chansi woun lun walawahani (Sal. 119:108). Óunabagülei le wíchugubei ligía aban lídangiñe “adagaragüdüni” le wadügübei lau walawahani ani úati ni aban lun ladügüni adagaragüdüni le waweidügü (aliiha huméi Ebüréu 13:15). Amuriahati san Heowá wama lun sun lan wagía  mosu lan wadügüni ligiaméme luwuyeri adagaragüdüni, lidan amu dimurei, lun wíchuguni ligiaméme óunabagülei? Uá.

⁴ Subudi lumuti Heowá ámuñegueinarügü lan liyara kada aban wádangiñe luma ámuñegueinarügü lan le gádantiwa ani gebegiti áfaaguni le gayara wabéi adüga lun. Samina wamá luagu luwuyeri adagaragüdüni le unbei lánhara hámagiñe ísüraelina. Ha meha gaseinsunbaña, dagagüdatiña aban mudún o aban gábara. Ánhañati ha gudemebaña, gayaraati meha hadagaragüdün “biama wagugua o biama lan harahüñü unhun”. Anhein úa lubéi meha luma gürigia lun ladagaragüdün bián dunuru, lunti meha lanügün kéiburi “gádürü líburu dimí fulúaru to tubuidun-agei” lun Heowá (Fad. 5:7, 11). Íbini fulúaru lan maseruntimaboun, anhein meha tubuidun-agei lubéi, gebegiti meha adagaragüdüni ligía lun Heowá.

⁵ Ligiamémegili lisaminan Wabungiute uguñe weyu. Dan le wíchuguni wóunabagüle, magurabunti saragu ani magurabunti giñe buídutimabei lan óunabagülei le lunbei wíchuguni kei meha ligaburi layanuhan Apolosu o kei Pábulu (Adü. 18:24; 19:8). Amuriaharügüti wama lun wáfaagun lun wadügüni buidu. Haritagua wamá tuagu würi to hilaali tani weiriei to íchuguboun bián gáwanaü. Gúndaati meha Heowá tau ladüga ru tani sun le túmabei tidoun gafu (Luk. 21:1-4).

6. a) Según Ebüréu 10:24, 25, ka buiti wasagarubei lídangiñe óunabagülei le waganbubei lidan adamuridaguni? b) Ida luba harufuduni gebegi lan óunabagülei le híchugubei íbirigu hun?

⁶ Rútiwa gurasu wámagua lau óunabagülei le wíchugubei (aliiha huméi Ebüréu 10:24, 25). Sun wagía hínsiñeti woun waganbun ámuñegueinarügü óunabagülei lidan adamuridaguni. Kei hénpulu, hínsiñeti woun waganbuni lubuidun óunabagülei le híchugubei irahüñü tídangiñe sun hanigi. Gúndaatiwa dan le hafuranguagüdüni íbirigu lau ubebeni inarüni le hafurendeirubei. Gúndaatiwa hau ha íchugubaña aban óunabagülei, íbini haburi hamá o hagumeseruña lan afurendeirei iñeñein le wayanuhabei (1 Tesa. 2:2). Ida luba warufuduni gunda wamá luagu áfaaguni le hadügübei? Gayaraati weteingiruniña lárigiñe adamuridaguni luagu óunabagülei le híchugubei ani ru hamá gurasu woun. Ábanya katei le gayaraabei wadügüni wíchugun óunabagülei. Ítarati, weresibiruba gurasu ru wagíame (Rom. 1:11, 12).

7. Ida liña lahuudun woun wíchugun óunabagülei?

⁷ Huuti woun dan le wíchuguni wóunabagüle (Isa. 48:17). Ida? Furumiñe, ánhawa áfaagua lun wiñuruni wáhabu, waranseruba  buidu lubá adamuridaguni, gunfuranda waboun Lererun Bungiu buidu ani buídutimabei wadügüni le wafurendeirubei. Libiaman, másiñati wasagarubatima lan buiti lídangiñe adamuridaguni ladüga gafanranbadiwa lan lidan. Ani le lǘrüwan, kei mégeiwa lubéi áfaaguni dan le líchugun gürigia óunabagülei, ligía lerederuntimaba lubéi le wariñagubei wachüguagun.

8, 9. a) Según Malakíasi 3:16, lidan hisaminan, ida liña larihini Heowá áfaaguni le wadügübei lun wíchugun óunabagülei lidan adamuridaguni? b) Lau sun lira, ida liña hasandiragun fiu íbirigu houngua?

⁸ Hínsiñeti lun Heowá larihiniwa ayanuha luagu wafiñen. Gayaraati wachoururuni aganba lániwa ani gebegiti áfaaguni le wadügübei lun lau wíchugun óunabagülei lidan adamuridaguni (aliiha huméi Malakíasi 3:16). Ani arufuda lumuti Heowá hínsiñe lan áfaaguni le wadügübei lun lau labiniruniwa (Mal. 3:10).

⁹ Ligíati, furanguti anihein lan burí resun lun wíchuguni wóunabagüle. Íbini ítara, másiñati añaheingua lan íbirigu hanufudetiña hiñuruni háhabu. Anhein ítara liña lubéi hasandiragun hungua, mábürühala harüna. Wakutihaba saragu adundehani luma sügǘ tídangiñeti Bíbülia ani wakutihaba giñe fiu adundehani le lunbei líderaguniwa lun waganwoundagüdüni wóunabagüle lidan adamuridaguni.

10. a) Ka wasandirubei saragu wádangiñe? b) Ka uagu wariñaga buidu lan wasandirun anufudei dan le wíchiga lan óunabagülei?

¹⁰ Ma aba tádühan hanigi sagü hasaminarun hiñuruni húhabu lun híchugun óunabagülei lidan adamuridaguni? Anhein ítara liña lubéi, mámarügüñadün huguya asandiragua hungua ítara. Le linarün katei, saragu wádangiñe aba tádühan wanigi sagü wíchiga lan óunabagülei. Gama lumoun, anhein anufudei lubéi adügübei lun hasandiragun hungua ítara, lunti hasubudiruni ka lan uéigiñe hanufude hubéi. Ladüga san hasaminarun habulieidubei lan le lunbei hariñaguni o luéi hariñagun amu katei? Nidiheritün san míchugunbadün lan aban óunabagülei le buiti kei híchuguni ha híbiri? Le linarün katei, maribanti hasandiragun hungua ítara, lugundun larufuduña lira ǘnabugu humá ani buidu lan hanügüniña amu gürigia. Hínsiñeti ǘnabuguni lun Heowá (Sal. 138:6; Fili. 2:3). Busenti  giñe lun walawahani luma lun wíchugun gurasu houn wíbirigu lidan adamuridaguni (1 Tesa. 5:11). Hínsiñetün lun Heowá ani líchugubei ganigi le hemegeirubei hun.

11. Ka adundehani tídangiñeti Bíbülia gayaraabei líderaguniwa?

¹¹ Ariha wamá fiu adundehani tídangiñeti Bíbülia. Haritaguagüda tumutiwa Lererun Bungiu luagu sun lan wagía charatiwa dan le wayanuhan (Sant. 3:2). Magurabunti Heowá macharabadiwa lan ni wíbirigu (Sal. 103:12-14). Wíbirigu hagía ani hínsiñetiwa houn (Mar. 10:29, 30; Huan 13:35). Gunfuranda hamuti anihein lan dan mariñagun wamani katei kei aubei wabusenra.

12, 13. Ka larufudahabei lani Neemíasi luma Honasi hénpulu woun?

¹² Akutiha wamá fiu hénpulu tídangiñeti Bíbülia le lunbei líderaguniwa lun manufudedun wamá. Gumese wamá lúmagiñe Neemíasi, le eseriwidubei lúbiñe aban urúei gabafuti. Dan le laganbubei luagu günrinwagua lan lubarieirun luma lubenari Herusalén, aba lírudun (Neem. 1:1-4). Gayaraati wasaminarun luagu tádühan lanigi dan le lamuriahabei urúei luma lun lafuranguagüdüni lun ka lan uagu hiru lubéi. Lubaragiñe lóunabuni Neemíasi urúei, aba ladügün aban furíei lau lóufudagun. Seremei furíei ligía, íderagua lumutiña urúei lumutuniña Bungiu saragu (Neem. 2:1-8). Arufudahati lani Neemíasi hénpulu woun súdini lan lun wafurieidun lubaragiñe wóunabun. Samina wamá giñe luagu le asuseredubei lun Honasi. Dan le lamuriahanbei Heowá luma lun lidin ayanuha hama níniwena, aba lalouchun darí lun lanurahan lidoun amu fulasu (Hon. 1:1-3). Gama lumoun, lau lídehan Heowá, ñǘdünti Honasi íchigei uganu ani barüti buiti houn lílana uburugu ligía (Hon. 3:5-10). Arufudahati lani Honasi hénpulu woun, gayara lan líderaguniwa Heowá eseriwida lun meberesenga anhein hanufude wabéi. Manufudetiwa hawéi wíbirigu kei hamuga wanufudedun hawéi níniwena, adián?

¹³ Ka ariñahani gayaraabei líderaguniwa lun wíchugun óunabagülei le gayaraabei líchugun gurasu houn wíbirigu? Ariha wamá fiu lídangiñe.

14. a) Ka uagu lunti lubéi waranserun buidu lubá adamuridaguni? b) Ka weyu buídutimabei woun lun waranserun lubá adamuridaguni?

¹⁴ Aranse wamá lun sun adamuridaguni. Buídutimabei wasandiragun woungua lun wíchugun óunabagülei ánhawa aransera buidu lubá adamuridaguni (Ari. 21:5). Furanguti ámuñegueinarügü lan weyu waranserun lubá adamuridaguni. Gumesetu aban íbiri gíritu Eloise, to hilaali tani weiriei ani kei burí 80 irumu tau, aturiahoun Garüdia Awisahatu kéiburi leindi o luagu biama. Ariñagatu: “Buídutimati nasandiragun nungua lidan adamuridaguni dan le aturiahagiñe nan”. Ariñagatu aban íbiri gíritu Joy, to nadagimeinboun lidan dan dayarüti, aturiaha tanu Garüdia Awisahatu aban weyu lubaragiñe adamuridaguni ladüga ménrenguntimabei lan tun taritaguni le taturiahabei. Ike, aban wéiyaali lidan afiñeni, súnwandan beresegu lan ani leseriwiduña kei prekursoru, ariñagati: “Ariha naali le lan buídutimabei nun naturiahan murusunraü sagü  weyu, mama lun naturiahani arütíkulu súngubei lidan aban”.

15. Ida luba waranserun buidu lubá adamuridaguni?

¹⁵ Ida luba waranserun buidu lubá adamuridaguni? Le lunbei wadügüni furumiñe, wamuriahan sífiri sandu luma Heowá (Luk. 11:13; 1 Huan 5:14). Lárigiñe, direi wamá fiu minutu lun wasaminarun luagu sun lila arütíkulu. Akutiha waméi liri arütíkulu, subtítulu, iyawaü o dibuhu luma burí rekuáduru. Lárigiñe, akutiha waméi kada párafu ani aliiha waméi sun bérusu le wayara. Samina wamá luagu ariñahani, lau wetenirun buidu lun le uágubei busén wamá wayanuha. Éibutima waranserun buidu, lahuudatimaba ariñahani ligía woun ani ménrenguntimabei wíchugun óunabagülei (2 Ko. 9:6).

16. Ka ídemuei húmabei ani ida liña hayusuruni?

¹⁶ Yusu waméi burí ídemuei le tídanbei wani konputadora o gágamuru, anhein anihein lubéi wama. Rúhali Heowá tuéigiñe lóundarun saragu ídemuei woun lun líderaguniwa lun waranserun lubá adamuridaguni. Gayaraati warariragüdün agumeiraguagüdüni lánina aturiahani lídangiñe JW Library^® lidoun wagagamurun o tidoun wani konputadora. Ítara luba gayara lan waturiahani ariñahani, waliihani o waganbahani, dan le busén wamá o ñein lumuti wabusenra. Añahein yusu hamuti JW Library lun haturiahan lidan lóurate hemeraagun lidan hawadigimari o leskuelarugu o dan le haweiyasuhan. Luagu amu oubaü, adügati programa Watchtower Library luma páhina LÍBURU-AGEI LIDAN INTERNET Watchtower^™ lun ménrenguntima lan waturiahan somu ariñahani buidu.

17. a) Ka uagu buidu lubéi lun haranserun saragu óunabagülei? b) Ka hafurendeirubei lídangiñe bidéu Lumadabá Heowá: Aransebei le lunbei bariñaguni lidan adamuridaguni buidu?

¹⁷ Anhein gayara, aranseha wamá saragu óunabagülei lidan kada arütíkulu. Ka uagu? Mámaba súnwandan dan le wiñuruni wáhabu lichugúba lan chansi woun lun wóunabun. Gayaraati giñe aba lan hiñuruni amu íbirigu háhabu úara wama ani mama wagía anuadirúbei. Másiñati siñabei lan líchugun íbiri le alidihabalin taturiahóun Garüdia Awisahatu chansi houn sun ha iñurubalin háhabu lun hóunabun, lun másügürün lan luéi dan le íchugubei lun. Ligíati, magañida wamá mábürühan ligíame warüna dan le michugún lan chansi woun lun wóunabun lidan burí furumiñeti párafu. Ánhawa aransera saragu óunabagülei, líchugubatima chansi woun lun wóunabun. Gayaraati wiñuruni wáhabu lun waliihan somu bérusu tídangiñe Bíbülia dan le lamuriahóun wama. Gama lumoun, anhein gayara, aranseha wamá fiu dimurei lau wererun guánarügü. *

18. Ka uagu lunti lubéi chati lan óunabagülei le wíchugubei lidan adamuridaguni?

¹⁸ Mibelá wariñagun lidan wóunabagüle.  Liibe-agei dan, óunabagülei le chátiti ligíatima íchugubei gurasu. Ligíati, ru wamá óunagülei le aduraruti kéiburi darandi segundu (Ari. 10:19; 15:23). Súdiniti lun híchugun íbirigu ha barühañabaña saragu irumu íchiga óunabagülei lidan adamuridaguni, aban hénpulu buiti. Ánhaña íchiga óunabagülei le aduraruti saragu minutu ani hénrenguti gunfurandawa lan, gayaraati ladügün katei le lun manigi hamá amu lun hiñuruni háhabu, lau hasaminarun siñabei lan hóunabun kei íbirigu hagía. Luagu amu oubaü, dan le chati lan óunabagülei, gachansintiña saragu íbirigu lun hóunabun. Anhein ichugúa chansi woun lun wíchuguni furumiñeti óunabagülei le lídanbei párafu, buídutimati lun wíchugun aban óunabagülei le furanguti ani buidu ligíame laganbún sin wariñaguni sun le lídanbei párafu. Dan le ounabúali lan párafu, gayaraati wariñagun amu katei (ariha huméi rekuáduru “ Ka gayaraabei nariñaguni lidan nóunabagüle?”).

19. Ida liña gayara lan líderaguniwa íbiri le alidihabalin taturiahóun Garüdia Awisahatu, gama lumoun, ka lunbei wadügüni furumiñe?

¹⁹ Ariñaga humá lun íbiri le alidihabalin taturiahóun Garüdia Awisahatu busén humá hóunabun lidan ítaga párafu. Anhein busén hubéi hadügüni, ayanuha humá luma íbiri ligía saragu dan lubaragiñe lagumeserun adamuridaguni. Danme hachülürün lidoun párafu ligía, iñura huméi húhabu furese ani iñu lan hiñuruni lun larihinün íbiri ligía.

20. Ida liña genegegua lan adamuridaguni luma dan le weigin hama wamadagu?

²⁰ Ítara liña adamuridaguni kei dan le beigin hama bumadagu. Ánhawa hamisurahan fiu íbirigu eiga ani agurabúati lun wanügün somu katei le ménrengunti laransehóun, kaba wadüga? Háfuga tádühan wanigi furumiñe, gama lumoun, chóuruti wadügübei lan sun wayaraati lun wanügün somu katei le hínsiñeti houn saragu. Heowá agunbirahabadiwa lidoun adamuridaguni ani aranseeli aban dábula buin lau katei buíduburiti woun (Sal. 23:5; Mat. 24:45). Hínsiñeti lun lun wanügün somu katei le ménrengunti laransehóun, le buídutimabei wámagiñe. Ligíati, aranse wamá buidu ani adüga waméi sun wayaraati lun wóunabun lidan adamuridaguni. Ítarati, mámarügüba wagía asagara buiti lídangiñe lidabulan Heowá, wídehaba giñe lun hasagarun amu buiti lídangiñe.