1. Unsay pagbati ni David kang Jehova, ug nagtukmod ni niya sa paghimo sa unsa?

SI Haring David misulat: “Si Jehova dako ug takos gayod nga pagadayegon.” (Sal. 145:3) Nahigugma siya kang Jehova, ug ang maong gugma nagpalihok niya sa pagdayeg sa Diyos “sa taliwala sa kongregasyon.” (Sal. 22:22; 40:5) Segurado, kamo nahigugma kang Jehova ug mouyon sa giingon ni David: “Dalayegon ikaw, Oh Jehova nga Diyos sa Israel nga among amahan, gikan sa panahong walay tino hangtod gayod sa panahong walay tino.”​—1 Cron. 29:10-13.

2. (a) Unsaon nato pagdayeg si Jehova? (b) Unsay nakapugong sa pipila sa pagkomento, ug unsay atong hisgotan?

² Karon, ang usa ka paagi nga madayeg nato si Jehova maoy pinaagi sa pagkomento panahon sa tigom. Hinunoa, may nakapugong sa pipila sa pagkomento. Gusto nilang motubag, pero mahadlok sila. Unsay ilang buhaton aron dili mahadlok? Unsang praktikal nga mga sugyot ang makatabang nato aron makahatag tag makapadasig nga mga komento? Sa dili pa nato nâ tubagon, hisgotan una nato ang upat ka pangunang hinungdan kon nganong mokomento ta sa mga tigom.

3-5. (a) Base sa Hebreohanon 13:15, nganong mokomento ta? (b) Kinahanglan bang parehas tang tanan ug kalidad sa komento? Ipatin-aw.

³ Si Jehova naghatag natong tanan ug pribilehiyo sa pagdayeg kaniya. (Sal. 119:108) Ang atong mga komento maoy bahin sa atong “halad sa pagdayeg,” ug dili puwedeng ang uban maoy motanyag ana para nato. (Basaha ang Hebreohanon  13:15.) Nag-ingon ba si Jehova nga kinahanglang parehas tag kalidad sa halad, o komento? Wala gayod!

⁴ Nahibalo si Jehova nga managlahi tag katakos ug kahimtang, ug gipabilhan niya pag-ayo ang atong mga sakripisyo. Konsideraha ang klase sa mga halad nga iyang giuyonan. May mga Israelinhon nga makahalad ug karnero o kanding. Apan ang usa ka pobreng Israelinhon motanyag tingalig “duha ka tukmo o duha ka piso sa salampati.” Ug kon dunay dili makaarang sa pagpalit ug duha ka langgam, modawat si Jehova ug “ikanapulo sa usa ka ephah sa pinong harina.” (Lev. 5:7, 11) Mas barato ang harina, pero gipabilhan gihapon kana ni Jehova, basta kini maoy “pinong harina.”

⁵ Mao gihapon nay gibati karon sa atong mahigugmaong Diyos. Dihang mokomento ta, dili siya magdahom nga sama ta ka larino ni Apolos o ka maayong mangombinsir sama ni Pablo. (Buhat 18:24; 26:28) Gusto ni Jehova nga ihatag nato ang kinamaayohang komento​—kutob sa maarangan. Hinumdomi ang babayeng balo nga mihulog ug duha ka gagmayng sensilyo. Bililhon siya kang Jehova kay gihatag niya ang iyang kinamaayohan.​—Lucas 21:1-4.

6. (a) Sumala sa Hebreohanon 10:24, 25, unsay epekto sa mga komento nga atong madunggan? (b) Unsaon ninyo pagpakita nga giapresyar ninyo ang makapadasig nga mga komento?

⁶ Madasig nato ang usag usa. (Basaha ang Hebreohanon 10:24, 25.) Kitang tanan malipay nga makadungog ug nagkadaiyang komento diha sa tigom. Malipay ta sa simple, sinserong mga pulong sa usa ka bata. Matandog ta sa madasigong pagkomento sa usa bahin sa kamatuoran nga iyang nakat-onan. Ug makadayeg ta niadtong “nakabaton ug kaisog” sa pagkomento, bisan pag sila maulawon o bag-o pang nagtuon sa atong pinulongan. (1 Tes. 2:2) Unsaon nato pagpakitag apresasyon sa ilang paningkamot? Puwede nato silang pasalamatan sa ilang makapadasig nga komento human sa tigom. Ang laing paagi mao ang pagkomento sab nato. Busa, dili lang kita ang madasig panahon sa tigom kondili makadasig pod ta sa uban.​—Rom. 1:11, 12.

7. Sa unsang paagi makabenepisyo ta dihang mokomento?

 ⁷ Makabenepisyo ta. (Isa. 48:17) Sa unsang paagi? Una, kon magplano tang mokomento, madasig ta nga mangandam pag-ayo para sa tigom. Kon mangandam ta pag-ayo, makabaton tag lawom nga pagsabot sa Pulong sa Diyos. Ug samtang magkalawom ang atong pagsabot, mas sayon ang pagpadapat sa atong nakat-onan. Ikaduha, mas malingaw ta sa tigom kay apil ta sa panaghisgot. Ikatulo, tungod sa paningkamot nga mokomento, sagad dili nato makalimtan ang mga punto.

8-9. (a) Ingon sa gipakita sa Malaquias 3:16, unsay pagbati ni Jehova sa atong mga komento? (b) Unsa pay gikahadlokan sa uban?

⁸ Madayeg nato si Jehova. Makaseguro ta nga si Jehova maminaw nato ug magpabili pag-ayo sa atong paningkamot nga makakomento. (Basaha ang Malaquias 3:16.) Iyang ipakita ang iyang apresasyon pinaagi sa pagpanalangin nato dihang maningkamot ta sa paglipay niya.​—Mal. 3:10.

⁹ Klaro, daghan tag maayong rason sa pagkomento diha sa tigom. Apan, dunay pipila nga mahadlok moisa sa ilang kamot. Kon mao sab nay imong gibati, ayawg kaluya. Konsiderahon nato ang pipila ka prinsipyo sa Bibliya, mga pananglitan, ug praktikal nga mga sugyot nga makatabang nato sa pagkomento pa diha sa tigom.

10. (a) Unsay gikahadlokan sa kadaghanan? (b) Kon mahadlok kang mokomento, unsang maayong hiyas ang posibleng nabatonan nimo?

¹⁰ Kulbaan ka ba matag higayon nga gusto kang mokomento? Kon mao, wala ka mag-inusara. Ang tinuod, kadaghanan nato mobatig kahadlok dihang mokomento. Aron dili ka mapugngan sa imong kahadlok, kinahanglang mahibaloan usa nimo ang hinungdan niini. Mahadlok ka ba nga basig malimtan nimo ang imong gustong isulti o kaha sayop ang imong tubag? Mabalaka ka ba nga ang imong komento dili sama ka maayo sa uban? Sa tinuod lang, posibleng may  maayong hinungdan ang maong kahadlok. Nagpaila nâ nga mapainubsanon ka ug giisip nimo ang uban nga labaw nimo. Gusto ni Jehova ang maong hiyas. (Sal. 138:6; Filip. 2:3) Apan gusto sab niyang dayegon nimo siya ug dasigon nimo ang mga igsoon diha sa tigom. (1 Tes. 5:11) Nahigugma siya nimo ug hatagan ka niya sa kaisog nga imong gikinahanglan.

11. Unsang Kasulatanhong mga pahinumdom ang makatabang nato?

¹¹ Konsideraha ang pipila ka Kasulatanhong mga pahinumdom. Ang Bibliya nag-ingon nga kitang tanan masayop sa pulong ug buhat. (Sant. 3:2) Si Jehova ug ang atong mga igsoon wala magdahom ug kahingpitan kanato. (Sal. 103:12-14) Sila ang atong espirituwal nga pamilya, ug nahigugma sila nato. (Mar. 10:29, 30; Juan 13:35) Nasayod sila nga usahay dili nato masulti ang gusto natong isulti.

12-13. Unsay atong makat-onan kang Nehemias ug Jonas?

¹² Hunahunaa sab ang mga pananglitan sa Bibliya nga makatabang nimo aron dili ka mapugngan sa imong kahadlok. Hinumdomi si Nehemias. Nag-alagad siya sa palasyo sa usa ka gamhanang hari. Naguol si Nehemias kay nahibaloan niya nga guba gihapon ang paril ug ganghaan sa Jerusalem. (Neh. 1:1-4) Hunahunaa ang kakulba nga iyang gibati dihang gipasulti siya sa hari sa hinungdan sa iyang kaguol! Si Nehemias miampo dayon ug mitubag. Ingong sanong, gitabangan pag-ayo sa hari ang katawhan sa Diyos. (Neh. 2:1-8) Hunahunaa sab si Jonas. Dihang gisugo siya ni Jehova nga pasidan-an ang mga taga-Nineve, nahadlok pag-ayo si Jonas maong miadto siya sa laing direksiyon. (Jon. 1:1-3) Apan sa tabang ni Jehova, milampos si Jonas sa iyang asaynment. Ug ang iyang gisulti nakahatag ug kaayohan sa mga taga-Nineve. (Jon. 3:5-10) Atong nakat-onan kang Nehemias ang kahinungdanon sa pag-ampo sa dili pa motubag. Ug nakat-onan nato kang Jonas nga si Jehova motabang nato nga makaalagad niya bisag mobati tag grabeng kahadlok. Sa tinuoray lang, may kongregasyon ba karon nga sama ka makahahadlok sa mga taga-Nineve?

¹³ Unsang praktikal nga mga sugyot ang makatabang nimo aron makahatag ug makapadasig nga komento diha sa tigom? Atong konsiderahon ang pipila.

14. Nganong kinahanglan tang mangandam pag-ayo sa tigom, ug kanus-a tingali nato nâ himoon?

¹⁴ Pangandam sa matag tigom. Kon magplano ka ug mangandam pag-ayo, mas may kompiyansa kang mokomento. (Prov. 21:5) Siyempre, dili ta parehas ug eskedyul. Si Eloise, usa ka biyuda nga kapig 80 anyos, mangandam sa Pagtuon sa Bantayanang Torre sa sinugdan sa semana. Siya miingon: “Mas malingaw ko sa tigom kon abante kong magtuon.” Si Joy, nga  full-time ang trabaho, magtuon sa Bantayanang Torre matag Sabado. Miingon siya: “Gusto nakong presko pa sa akong hunahuna ang akong gitun-an.” Si Ike, usa ka puliking ansiyano nga payunir sab, miingon: “Para nako, mas epektibo nga anam-anamon ug tuon ang materyal imbes tib-on.”

15. Unsaon nimo pagpangandam pag-ayo sa tigom?

¹⁵ Sa unsang paagi makapangandam pag-ayo sa tigom? Sugdi ang matag pagtuon pinaagi sa pagpangayo sa balaang espiritu ni Jehova. (Luc. 11:13; 1 Juan 5:14) Dayon paggahin ug pipila ka minuto sa pag-analisar sa ulohan, sub-ulohan, ilustrasyon, ug sa kahon. Dihang tun-an nimo ang matag parapo, basaha ang tanang gisitar nga teksto kon mahimo. Pamalandonga ang impormasyon, nga maghatag ug pagtagad sa mga punto nga gusto nimong komentohan. Kon mangandam ka pag-ayo, mas makabenepisyo ka ug mas sayon na para nimo ang pagkomento.​—2 Cor. 9:6.

16. Unsang mga himan ang puwede nimong gamiton, ug unsaon nimo nâ paggamit?

¹⁶ Kon posible, paggamit ug elektronikong mga himan diha sa pinulongan nga imong nahibaloan. Si Jehova, pinaagi sa iyang organisasyon, nagtagana natog elektronikong mga himan nga makatabang nato sa pagpangandam sa tigom. Pinaagi sa JW Library^® app maka-download ta sa mga tun-anan diha sa atong mga gadyet. Dayon makatuon ta​—o kaha makabasa o makapaminaw sa artikulo—​bisan asa ug bisan kanus-a. Ang uban mogamit niini nga himan sa pagtuon panahon sa tingpaniudto diha sa trabahoan o eskwelahan o samtang magbiyahe. Pinaagi sa Watchtower Library ug sa Watchtower ONLINE NGA LIBRARYA^™ mas sayon ang pagpangitag mga punto diha sa leksiyon nga gusto natong tun-ag dugang.

17. (a) Nganong maayong mag-andam ug ubay-ubayng komento? (b) Unsay imong nakat-onan sa video nga Mahimong Higala ni Jehova—Pag-andam ug Komento?

¹⁷ Kon posible, pag-andam ug ubay-ubayng komento. Ngano? Kay dili sa tanang panahon nga matawag dayon ka. Tingali duna kay kadungan inig-isa nimo sa kamot, ug ang tigdumala mopilig usa lang kaninyo. Aron dili molapas sa oras ang tigom, tingali pipila lang ang pakomentohon sa usa ka punto. Busa ayawg kaluya o kahiubos kon dili dayon ka matawag. Kon ubay-ubayng komento ang imong andamon, mas daghan kag kahigayonan nga makatubag. Usa sa puwede nimong andamon mao ang pagbasag teksto. Apan kon makaya nimo, pag-andam sab ug komento gamit ang imong kaugalingong mga pulong. *

18. Nganong kinahanglang mubo ang mga komento?

 ¹⁸ Paghatag ug mubong komento. Sagad, ang labing makapadasig nga komento mubo lang ug simple. Busa, paningkamoti nga mubo lang ang imong tubag. Sulayi nga dili ni molapas ug 30 segundos. (Prov. 10:19; 15:23) Kon dugay na kang tigkomento sa tigom, importanteng magpakita kag maayong panig-ingnan pinaagi sa paghatag ug mubong komento. Kon komplikado ug taas ang imong komento, basig makulbaan ang uban, nga maghunahunang dili sila makakomento sama nimo. Dugang pa, kon mubo ang imong tubag, mas daghan ang makakomento. Kon ikaw ang unang gitawag, paghatag ug simple, direktang tubag sa pangutana. Ayawg hutda ang tanang punto. Human mahisgoti ang pangunang punto, mahimo nimong komentohan ang ubang punto.​—Tan-awa ang kahong “ Unsay Puwede Nakong Ikomento?”

19. Sa unsang paagi makatabang nimo ang tigdumala, pero unsay kinahanglan nimong buhaton?

¹⁹ Pahibaloa ang tigdumala nga mokomento ka sa usa ka parapo. Kon mao nay imong gusto, kinahanglang duolon nimo ang tigdumala sa dili pa magsugod ang tigom. Kon panahon na nga motubag ka, iisag maayo ang imong kamot aron makita sa tigdumala.

20. Nganong ang tigom samag salosalo kauban sa mga higala?

²⁰ Isipa ang tigom ingong usa ka salosalo kauban sa suod nga mga higala. Ibutang ta nga may pipila ka igsoon sa kongregasyon nga nagplanog tapoktapok ug gihangyo ka sa pagdalag simpleng pagkaon, unsay imong buhaton? Basig mabalaka ka, pero maningkamot gyod ka nga ang imong dad-on magustohan sa tanan. Si Jehova, ang Tagbalay, nag-andam ug lamesa nga puno sa maayong mga butang alang kanato panahon sa tigom. (Sal. 23:5; Mat. 24:45) Ug malipay siya kon magdala tag simpleng regalo, nga maoy atong kinamaayohan. Busa pangandam pag-ayo, ug komento kutob sa imong mahimo. Dayon wala lang ka mokaon sa lamesa ni Jehova, kondili nagdala sab kag regalo para sa kongregasyon.