1. Ifa meefien Tafit usun Jiowa, iwe met a amwékútú le féri?

KING TAFIT a makkeei: “Ewe Samol mi Lapalap a tekia, aramas meinisin repwe fokun mwareiti i.” (Kölf. 145:3) A tongei Jiowa, me an na tong a amwékútú an epwe mwareiti i “lein ewe mwichen aramas” are mwichefel. (Kölf. 22:22; 40:5) Ese mwáál ka tongei Jiowa me tipeeú ngeni alon Tafit keei: “Üpwe mwareituk, ai Samol mi Lapalap, en än äm we lewo Jakop we Kot tori feilfeilachök.”​—1 Kron. 29:10-13.

2. (a) Ifa usun sia tongeni mwareiti Jiowa? (b) Ifa ewe weires chómmóng ra kúna, me met sipwele enniwili?

² Eú alen ach sipwe mwareiti Jiowa lón ei fansoun, ina ach uwawu meefiach lón ach kewe mwich. Iwe nge, a weires ngeni chómmóng pwiich kewe ar repwe féri ena. Ra mochen uwawu meefier lón ach kewe mwich nge ra niw. Ifa usun repwe pworacho ngeni ar niw? Ikkefa ekkóch mettóch ra tongeni álisikich meinisin le uwawu ekkewe memmeef mi apéchékkúla aramas? Mwen ach sipwe pélúweni ekkena kapas eis, sipwe akkomw enniwili ekkewe rúáánú popun mi lamot sia kan uwawu meefiach lón ach kewe mwich.

3-5. (a) Me ren Ipru 13:15, met popun sia uwawu meefiach lón ach kewe mwich? (b) Itá epwe chék taitap meinisin ekkewe sókkun memmeef sia eániir? Áweweei.

³ Jiowa a ngenikich meinisin ewe wis mi aúchea ach sipwe mwareiti i. (Kölf. 119:108, Testament Mi Fö) Meefiach kewe lón ach kewe mwich, iir kinikinin ach “asor ngeni” me mwareiti, nge ese pwal wor emén a tongeni eáni ena asor fán itach. (Álleani Ipru 13:15.) Nge itá Jiowa a allúkú pwe emén me emén kich  epwe chék taitap ach kewe asor, are meefiach? Aapw, ese!

⁴ Jiowa a silei pwe a sókkofesen tufichich me nónnómuch, me a fókkun aúcheani ekkewe asor sia tongeni eáni ngeni. Ekieki usun án chón Israel kewe sókkun asor Jiowa a etiwer. Ekkóch chón Israel ra tongeni eáni asor emén siip are siike. Nge emén mi wéúngaw neman epwe eáni asor “ruoman lisom ika ruoman apansüsün lisom.” Nge ika a mémmóng me ren emén chón Israel ekkena rúúemén machchang, iwe Jiowa a etiwa “ruu paun pilawa mi amas o mürina.” (Lif. 5:7, 11) Ewe pilawa mi amás ese kón mémmóng, nge Jiowa a chúen aúcheani ena asor ika pwe ena sókkun ‘pilawa mi amas a mürina.’

⁵ Lón ei fansoun a pwal ina usun meefien ach we Kot mi kirekiréch. Lupwen sia uwawu meefiach, Jiowa ese pwal ekieki pwe kich meinisin sipwe angangéch le fós usun Apollos, are angéch le achchúngú letipen aramas usun chék Paulus. (Föf. 18:24; 26:28) Met Jiowa a mochen, ina ach sipwe achocho le uwawu meefiach úkúkún ach tufich. Chechchemeni ewe fefin mi má seni pwúlúwan, ewe a asor rúúeféú moni kisikis. Jiowa a aúcheani pokiten a fangóló úkúkún an tongeni.​—Luk. 21:1-4.

6. (a) Me ren Ipru 10:24, 25, ifa usun ach rong meefien ekkewe ekkóch a tongeni achchúngú letipach? (b) Ifa usun kopwe pwári óm kilisou ren meefien ekkewe ekkóch mi apéchékkúlok?

⁶ Sia apéchékkúlafengenikich ren meefiach kewe. (Álleani Ipru 10:24, 25.) Kich meinisin sia pwapwaiti le rong sókkopaten memmeef lón ach kewe mwich. Sia sani meefien emén semirit mi chék mwoch nge a pop seni letipan. A pwal chúng letipach ren ach rong meseiken emén le apasa an kerán silei eú pwóróus mi enlet. Sia pwal ingeiti chókkewe mi “pwora” le uwawu meefier, inaamwo ika ra nisássáw are ra kerán káé fósun fénúach we. (1 Tes. 2:2) Ifa usun sipwe pwáraatá ach kilisou ren ar achocho? Sia tongeni kilisou ngeniir sárin ewe mwich ren ar memmeef mi apéchékkúlakich. Pwal eú alen ach pwári ach kilisou, ina ren ach pwisin uwawu meefiach. Iwe ika ina, sise chék kúna apéchékkúl lón ach kewe mwich nge sia pwal apéchékkúla ekkewe ekkóch.​—Rom 1:11, 12.

7. Ifa usun sia feiéch seni ach uwawu meefiach?

⁷ Sia pwisin feiéch atun sia uwawu meefiach. (Ais. 48:17) Ifa usun? Akkomw, ika sia ekiekin uwawu meefiach, iwe sipwe fókkun  mochen mmólnéch fán iten ach kewe mwich. Atun sia ammólnaéchú, a lapóló ach weweiti án Kot we Kapas. Me ika a lapóló ach weweiti, pwal ina mecheresilóón ach apwénúetá minne sia káé. Oruuan, eli epwe lapóló ach pwapwaiti ewe mwich pokiten sia kan uwawu meefiach. Aúlúngátin, pokiten sia angang weires le uwawu meefiach, iwe a mecheres ach sipwe chechchemeni ekkewe pwóróus sia uwawu meefiach wóór pwal mwo nge mwirin fitu fansoun.

8-9. (a) Me ren Malakai 3:16, met meefien Jiowa usun ach kewe memmeef? (b) Met eli ekkóch ra chúen pireir le féri?

⁸ Sia apwapwaai Jiowa atun sia pwári ach lúkú lón ach memmeef. Sia tongeni lúkúlúk pwe Jiowa a aúseling ngenikich me a enletin aúcheani ach achocho le memmeef lón ach kewe mwich. (Álleani Malakai 3:16.) A pwári an aúcheani minne sia féri ren an efeiéchúkich atun sia achocho le apwapwaai i.​—Mal. 3:10.

⁹ A mmen ffat ekkewe popun mi fich ach sipwe uwawu meefiach lón ekkewe mwich. Nge, neman ekkóch ra chúen pireir le eitietá péúr. Ika ina meefiom, kosap lichippúng. Sipwe pwóróus wóón ekkóch án Paipel kewe kapasen emmwen, án fitemén leenien áppirú, me ekkóch minen álillis mi tongeni álisi meinisin ar repwe alapaaló ar uwawu meefier lón ach kewe mwich.

10. (a) Met chómmóng me leich sia kan nnér le féri? (b) Ika sia nnér le uwawu meefiach, neman a pwári pwe sia eáni menni napanap?

¹⁰ Ka kan sissinnifféú pwal mwo nge atun ka chék ekiekin eitietá poum le uwawu meefiom? Ika ewer, iwe esap chék en. Ren enletin lape ngenikich sia nnér le uwawu meefiach. Nge me mwen óm kopwe pwákini óm niwokkus, a lamot kopwe mirititi populapen óm niw. Ka kan niw ika kopwe ménúki met ewe itá kopwe erá, are mwáálliló? Ka aúrek ika meefiom esap éch usun meefien ekkewe ekkóch? Ren enletin ese wor ngawen ekkena esin memmeef. A chék pwári pwe ka tipetekison me ka ekieki pwe ekkewe ekkóch ra tekia sonuk. Jiowa a aúcheani tipetekison. (Kölf. 138:6; Fil. 2:3) Nge Jiowa a pwal mochen óm kopwe mwareiti i me apéchékkúla  pwiium kewe Chón Kraist atun mwich. (1 Tes. 5:11) A tongeok me a mochen ngonuk ewe pwora mi lamot ngonuk.

11. Ikkefa ekkóch án Paipel kewe minen áchem epwe tongeni álisikich?

¹¹ Ekieki usun ekkóch án Paipel kewe minen áchem ngenikich. Paipel a apasa pwe kich meinisin sia kan mwáálliló ren met sia apasa me napanapen ach kapas. (Jas. 3:2) Jiowa me pwiich kewe ra silei pwe sise unuséch. (Kölf. 103:12-14) Iir chón ach famili lón Kraist, me ra tongekich. (Mark. 10:29, 30; Joh. 13:35) Ra weweiti pwe fán ekkóch sia mwáálliló lupwen sia uwawu meefiach.

12-13. Met sia káé seni pwóróusen Nehemia me Sona?

¹² Ekieki pwóróusen ekkóch aramas lón Paipel epwe tongeni álisuk le pworacho ngeni óm niwokkus. Chechchemeni Nehemia. A angang lón imwen emén king mi watte manan. Nehemia a letipechou pokiten a rongorong pwe tittin Jerusalem me asamalapan kewe ra chúen tatiw. (Ne. 1:1-4) Anchangei sissinnifféún Nehemia lupwen ewe king a ereni an epwe áweweei popun a wówóón letipechou! Mwittir chék Nehemia a iótek, mwirin a pélúweni ewe king. Iwe, ewe king a awora watteen álillis fán iten néún Kot kewe aramas. (Ne. 2:1-8) Pwal och, ekieki usun Sona. Lupwen Jiowa a ereni an epwe afalafal ngeni chón Ninifa, a fókkun niwokkus, iwe a sú ngeni eú leeni mi towau seni Ninifa. (Sona 1:1-3) Nge ren án Jiowa álillis, Sona a apwénúetá wisan we. Minne Sona a apasa ngeni chón Ninifa a fókkun álisiir. (Sona 3:5-10) Sia káé seni Nehemia lamoten ach sipwe iótek mwen ach sipwe memmeef wóón och mettóch. Me sia káé seni Sona pwe Jiowa a tongeni álisikich lón ach niwokkus mi lap le apwénúetá wisach. Nge itá a wor eú mwichefel iir mi kon eniwokkus usun chék eniwokkusun ekkewe chón Ninifa?

¹³ Ikkefa ekkóch mettóch epwe tongeni álisikich pwe meefiach lón ach kewe mwich epwe apéchékkúla ekkewe ekkóch? Sipwe nengeni ekkóch kapasen pesepes.

14. Pwata a lamot ach sipwe ammólnaéchú ekkewe mwich, me ineet atun sipwe tongeni ammólnatá?

¹⁴ Ammólnatá fán iten ach kewe mwich meinisin. Lupwen ka akkóta óm fansoun me ammólnaéchú ekkewe mwich, iwe kopwe alúkúlúk lón óm uwawu meefiom. (SalF. 21:5) Pwúngún a sókkofesen kókkótun manawen emén me emén. Áwewe chék, Eloise emén fefin 80 ierin mi má seni pwúlúwan, a kan poputá le ammólnatá ewe Káéén Leenien Mas lepoputáán ewe wiik. A erá: “Ua kon pwapwaiti ekkewe mwich ika ua fen ammólnatá me mwan.” Joy emén mi angangen moni full-time, a akkóta pwe iteiten Ammól epwe kan ammólnatá ewe Leenien Mas. A erá: “Ua sani pwe ewe lesenin káé epwe chék minefé lón ekieki.” Emén mwán mi ásimaw itan Ike, a chómmóng an angang nge pwal i emén pioneer. A erá: “Me rei a fen éch ngeniei ai upwe káé ewe lesen ekis me ekis lón unusen ewe wiik lap seni ai áwesaaló chék fán eú.”

15. Ifa usun ka tongeni ammólnaéchú ekkewe mwich?

 ¹⁵ Met a kapachelong lón ach ammólnaéchú ekkewe mwich? Poputááni óm káé ren óm tingorei Jiowa an epwe fang ngonuk an we manaman mi fel. (Luk. 11:13; 1 Joh. 5:14) Mwirin, ren fitu minich cheki unusen ewe lesen ren óm etittina ewe itelap, ekkewe itelap kisikis, sasing, me ekkewe pwórun asukul. Mwirin, atun ka káé eú me eú ekkewe parakraf, álleani ekkewe wokisin lón ren úkúkún óm tongeni. Ekilonei ewe pwóróus, nge ákkáeúin ekkewe ka mochen memmeef wóór. Échúlóón napanapen óm ammólnatá, epwe pwal ina lapólóón feiéchum me mecheresilóón óm kopwe tongeni uwawu meefiom.​—2 Kor. 9:6.

16. Ikkefa ekkewe minen álillis mi kawor ngonuk, me ifa usun ka kan ákkáeá?

¹⁶ Ika mi tufich, áeá ekkewe minen álillis wóón computer are mechá mi kawor lón eú fós ka silei. Jiowa a fen awora me ren an we mwicheich ekkewe minen álillis wóón computer are mechá pwe epwe álisikich lón ach ammólnatá ekkewe mwich. Ewe JW Library^® app a atufichikich le kapiinawu wóón néúch kewe mechá ekkewe puk sipwe káé. Iwe mwirin, ese lifilifil ia sia nóm ie me ineet atun sia filatá, sia tongeni káé are mwaren álleani are aúseling ngeni ach lesenin káé. Ekkóch ra néúnéú ewe JW Library app lón ar káé atun aséséén leolowas lón ar sukul are leenien angang, are atun ra sái. Ewe Watchtower Library me ewe Watchtower ONLINE LIBRARY^™ a fókkun ámecheresaaló ach kúttafichi pwal ekkóch pwóróus usun ach lesen.

17. (a) Pwata a múrinné óm kopwe ammólnatá fitu óm memmeef? (b) Met ka káé seni ewe video Become Jehovah’s Friend​—Prepare Your Comment?

¹⁷ Ika mi tufich, ammólnatá fitu meefiom lón eú me eú lesen. Pwata? Pún saminne ewe chón emmweni ewe káé epwe tongeni kéruk iteiten óm eitietá poum. Ese mwáál, mi pwal wor ekkóch repwe eitietá péúr lón ewe atun ka ekiekin memmeef, me ewe chón emmweni ewe káé epwe tongeni kéri emén me leir. Ewe chón emmwen neman epwe chék kéri fitemén ar repwe memmeef wóón eú pwóróus pwe ete kon luló ewe fansoun káé. Ina popun, kosap lichippúng are letipengaw ika ese kéruk lepoputáán ewe káé. Ika ka ammólnatá fitu memmeef, iwe kopwe tongeni uwawu meefiom wóón pwal ekkóch pwóróus lón ewe lesen. Neman eú me lein óm kewe memmeef ka ammólnatá, ina óm álleani eú wokisin seni Paipel. Nge ika mi tufich ngonuk, ka pwal tongeni ammólnatá le uwawu meefiom lón pwisin óm kapas. *

18. Pwata epwe chék mwoch ach memmeef?

¹⁸ Ammwocha óm memmeef. Fán chómmóng, ekkewe memmeef mi kon apéchékkúl,  ra mwoch me mecheres ach sipwe weweitiir. Ina popun achocho le chék ammwocha óm kewe memmeef. Sótun aúkú meefiom an epwe chék 30 seken. (SalF. 10:19; 15:23) Ika ka fen ukkuwawu meefiom lón mwich ren fite ier, iwe a mmen lamot óm kopwe isetiw leenien áppirú mi múrinné ren an esap kon ttam meefiom. Ika óm memmeef a kon tichik me a fitu minich ttaman, iwe ekkewe ekkóch repwe meefi pwe meefier esap akkarap ngeni échún meefiom. Pwal och, ika sia ammwocha ach memmeef iwe epwe pwal wor fansoun án ekkewe ekkóch repwe pwal uwawu meefier lón ewe mwich. Ika ka akkomw le uwawu meefiom, iwe kopwe chék ammwocha meefiom me epwe pélú ewe kapas eis ren. Kosap sótun memmeef wóón meinisin ekkewe pwóróus lón ewe parakraf. Mwirin án emén pélúweni ewe menlapen pwóróus lón ewe parakraf, ka tongeni memmeef wóón ekkewe ekkóch pwóróus.​—Ppii ewe pwóór “ Met Ua Tongeni Memmeef Wóón?”

19. Ifa usun ewe chón emmweni ewe mwich a tongeni álisuk, nge met wisom?

¹⁹ Ereni ewe mi emmweni ewe mwich menni parakraf ka mochen memmeef wóón. Ika ka filatá le féri ena, mi lamot kopwe fós ngeni mwaren fitu minich mwen poputáán ewe mwich. Lupwen a tori ewe fansoun kopwe memmeef wóón ewe parakraf, mwittir áwenecharaatá poum pwe ewe chón emmweni ewe mwich epwe tongeni kúna.

20. Ifa usun eú ach kewe mwich a usun chék eú ach mwéngéfengen me chiechiach kewe?

²⁰ Ach kewe mwich ra usun chék eú ach mwéngéfengen me chiechiach kewe. Anchangei pwe ekkóch chón ewe mwichefel ra akkóta eú kapwich, me ra tingoreok óm kopwe ammólnatá ekis osom mwéngé. Iwe, met kopwe féri? Neman kopwe ekis pireir, nge ese mwáál kopwe achocho úkúkún óm tongeni le uwei met epwe apwapwaai chienom kewe. Jiowa, i ewe mi etiwakich, me a awora eú chepelin mwéngé mi masou ren chómmóng mettóch mi múrinné atun ach kewe mwich. (Kölf. 23:5; Mat. 24:45) Me a pwapwa lupwen sia ammólnatá ekis ach liffang úkúkún ach tongeni. Iwe kopwe ammólnatáéchú me achocho le uwawu meefiom. Ika ka féri ena, iwe kopwe pwapwaiti le mwéngé seni án Jiowa we cheepel, nge kopwe pwal pwisin uwei óm liffang ngeni chón ewe mwichefel.