1. David wewilemo dhavi mwaha wa Yehova, ejoya yamuttukulele okosa nni?

MWENE DAVID ohileba: ‘Yehova munddimuwa, ddinfwanyela ottittimihiwa.’ (Masal. 145:3) David wannimukwela Yehova noona wannimuttittimiha ‘mmuttegoni.’ (Masal. 22:22; 40:5) Mohaganyedha, weyo txino onomukwela Yehova nanda onorumeela mazu alogile David: ‘Nabuya Mulugu wa nikolo nehu Izrayel, muttittimihiwe okala-n’okala-wene.’—1 Map. 29:10-13.

2. (a) Ninamuttittimihe dhavi Yehova? (b) Makattamiho gani angumanana attu ena nanda elobo gani enfwanyela iyo wubuwela?

² Masaka abano, wakula mmulogoni mukalelo mwina wa omuttittimiha Yehova. Mbwenye ejoya elobo enarutxa abali eena. Awene anofuna wi avahe dhowakula dhawa mbwenye anogurumela. Anakose eni wi awodhe okwaranya wovawa? Marhe gani anawodhe wapamgarhaza ofiyedha owodha wakula? Nihinatti wakula mavuzo aba, ndoweni nubuwele ttarho ttaru dhinanikamihedhe owodha wakula mmatugumanoni.

3-5. (a) Ninga mutapuleliwani va Ahebreu 13:15, iyo ninvahedha nni dhowakula mmatugumanoni mwehu? (b) Ninologosiwa wila dhowakula dhehu dhikalege dholigana? Katapulela.

³ Yehova onivaha iyo notene gari ya omuttittimiha. (Masal. 119:108) Dhowakula dhehu dhinokosa mpaddi wa “mukutho womuthithimihana,” kawo muttu mwina onwodha onikosela ottiya iyo nanya. (Kengesa Ahebreu 13:15.)  Koddi Yehova onologosa mukutto obu, obe onokoka wi dhowakula dhehu dhikalege dholigana? Nne kahiyo mwenemo!

⁴ Yehova onoziwa wi iyo nili attu ottiyana, mikalelo na ewodhelo yeho dhittiyana, iyene onovaha ttima mukutto obe guru enkosa muttu. Kobuwela wi nsaka na ana Izrayel Yehova wanrumela mikutto dhottiyana. Attu ena ampereka mwana-nibila obe saboko. Mbwenye ayelegi apereka “kangayiwa bili.” Akala muttu mwina kawodha okaana kangayiwa Yehova wanrumela “kilu bili dha othu.” (Onam. 5:7, 11) Ottu kuwana muttengo munddimuwa mbwenye Yehova wanttittimiha mukutto wa ana Izrayel wa ‘ottu woteleya.’

⁵ Yehova Mulugu wehu kasadduwile. Nigavahaga dhowakula dhehu, iyene kannilogosa wi nilogege s’ohiddoddoma ninga Apolo na murumiwi Paulo. (Mer. 18:24; 26:28) Elobo enlogosa Yehova ja wakula wehu—ninga munwodhela iyo. Kamubuwele mamukwela ovahile korowa bili dhotowa ttima. Yezu wannimukwela vaddiddi mamukwela oddule wamuyelegi sabwani iyene wavahile ejile yaniye.—Lk. 21:1-4.

6. (a) Nivuru na Ahebreu 10:24, 25, ninoniha dhavi wi dhinakula iyo dhinonipatta vina dhinowapatta akwihu? (b) Onatanalele dhavi dhowakuladha?

⁶ Nilibihanege na dhowakula dhehu. (Kengesa Ahebreu 10:24, 25.) Iyo ninoziveliwa vaddiddi wiwa dhowakula dhottiyana-ttiyana omatugumanoni. Jowagalaliha wiwa yowakula eng’onovi ya mwana. Vina enoddiginya murima wiwa yowakula ya muttu-ddi-muttu, mwaha wa ebaribari esunziliye. Ottiya ejuwenevi ninomusiba oddule ‘onivilibihedha’ ovaha yowakula, masiki akalaga muttu wowova obe onsunza elogelo yehu. (1 Tes. 2:2) Ninatamalele dhavi ovilibihedha wawa? Matugumano agagoma nidhowe namutamalele mwaha wa yowakula yaye enilibihile. Mukalelo mwina bwa iyo vina ovaha yowakula. Nigakosa dhahene ottiya olibihiwavi iyo vina ninowalibiha attu ena.—Rom. 1:11, 12.

7. Mareliho gani anfwanya iyo na dhowakula dhehu?

⁷ Iyo nanya ninopurelamo na dhowakula dhehu. (Iza. 48:17) Na mukalelo gani?  Yoroma, akala nihikaana efunelo ya ovaha yowakula ninokosa guru yosasanyedha deretu matugumano. Venevo vankosa iyo guru yosasanyedha deretu, ninononelamo pama Nzu na Mulugu. Niganonelamo pama Nzu na Mulugu ninowodha ottiddihedha mabasa esile dhinsunza iyo. Yanawili, Akala ninokosa mpaddi wa matugumano, ninoziveliwa. Yan’eraru, vowi enofuneya okosa guru wi muttu avahe yowakula, ninowodha wubuwela dhowakula dhehu mwa mudhidhi mwinjene.

8-9. (a) Mowiwanana na nivuru na Malakiya 3:16, ogavaha yowakula yawo Yehova onkala dhavi? (b) Makattamiho gani angumanana attu enjene?

⁸ Dhowakula dha nroromelo nehu dhinomwagalaliha Yehova. Kaninaganyedha wi mudhidhi onakula iyo mmatugumanoni Yehova ononivuruwana vina onolibiha guru enkosa iyo. (Kengesa Malakiya 3:16.) Iyene ononiruriha ttangwi ya guru enimukosela iyo.—Mal. 3:10.

⁹ Mohaganyedha iyo nihikana sabwa dhinjene dhinnittukulela wakula mmatugumanoni. Mbwenye attu ena anowova ovenyiha mono. Akala weyo vina onowova, kuwobane. Ndoweni noone enloga Malebo vina dhotagiha dha nsaka na mundduni dhinanikamihedhe iyo notene wakula venjene mmatugumanoni.

10. (a) Wova gani onnipatta iyo notene? (b) Wova ovaha yowakula ekalile dhavi enzinddiyelo yaderetu?

¹⁰ Weyo onogurumela ogafunaga ovenyiha mono wi wakule? Akala eli dhawene, kaziwa wi kuli weka. Ebaribariya jawi attu owinjiva wa iyo anoroma wova agafunaga wakula. Mbwenye wi owodhe okwaranya, enofuneya ozinddiyela makattamiho awo. Onova wi onadduwale enfuniwe wakula obe wi onaloge elobo yokwa? Obe onona ninga yowakula yawo kikalile ogaladdaniha na dhowakula dha abali ena? Mwebaribari ozuzuma oko ezinddiyelo yaderetu. Enlagiha wi onoviyeviha  vina onowawona attu ena ninga anddimuwa opitta weyo. Yehova onowakwela attu oviyeviha. (Masal. 138:6; Fil. 2:3) Mbwenye Yehova onfuna wi omuttittimihe vina walibihe abalawo omatugumanoni. (1 Tes. 5:11) Yehova onoukwela, iyene onele oukamihedha oliba murima.

11. Malebo gani ananikamihedhe?

¹¹ Koona dhotagiya dha mbibiliani. Bibilia onloga wi iyo notene ninokwakwattuwa na mazu ehu vina malogelo ehu. (Tia. 3:2) Yehova na abalihu kanjedhela wi nikale attu oligana. (Masal. 103:12-14) Abali bamudhehu omuyani vina anonikwela. (Mk. 10:29, 30; Jo. 13:35) Awene anoziwa wi dhowakula dhehu omattugumanoni kadhinbudduwa ninga mwafunelehu.

12-13. Ninsunzavo eni na nipadduwo na Jona vina na Nehemiya?

¹² Bibilia ohikana dhotagiha dhinawukamihedhe okwaranya wova wawo. Katanaalela yotagiha ya Nehemiya. Iyene wali mwimeleli wa vameza va mwene. Nehemiya wankubanya vaddiddi sabwa ya wi wahiwa wila ngome dha Jeruzalemi dhahimala ogujuliwa. (Nem. 1:1-4) Kobuwela ogurumela wattiddiwiye vanvuzele mwene, wi weyo onkubanyela nni dhawene! Nehemiya wahikosa nlobelo nomaguva nanda wahiwodha wakula nivuzona. Yopurelamoya yali yawi mwene oddu wahidha okamihedha nlogo na Mulugu. (Nem. 2:1-8) Kobuwela vina yapadduwile na Jona. Mwalogeli Yehova wi adhowe a’laleye akadda Nínive, Jona wahigurumela vaddiddi nanda wahittawa. (Jon. 1:1-3) Mbwenye na nikamihedho na Yehova, iyene wahiwodha walaleya akadda Nínive. Miselu dhaye dhahidhana masadduwo manddimuwa elabo ejile. (Jon. 3:5-10) Ninsunzavo nni na dhotagiha esi? Mwa mpaddi wa Nehemiya ninsunzavo wi enofuneya olobela nihinatti ovaha yowakula. Mwa epaddi ya Jona ninsunzavo wi Yehova onowodha onikamihedha masiki na wova. Nigobuwela ninofiyedha wona wi olaleya vina wakula mmatugumanoni kurutxiletxe opitta odhowa olaleya o Nínive.

¹³ Dhilobo gani dhinnikamihedha ovaha dhowakula mmulogoni? Ndoweni noone malago mang’onovi.

14. Ninfwanyelela nni osasanyedha deretu matugumano nanda mudhidhi wofwanyelala buvi?

¹⁴ Osasanyedhege matugumano otene. Ogagana wi ovahe yowakula yawo, orome ovisasanyedha deretu, onele owodha ovikuluvela. (Gano  21:5) Iyo notene nikana ottiyana wa osasanyedha dhowakula. Eloise murogora dhahi wa mamukwela ona vyaka ottamagela makumatanu na miraru, onimusasanyedha Mwang’neli waye omaromelo wa sumana. Iyene ohiloga,  “ddinowodha opurelamo deretu matugumano ddigasasanyedha namutanene.” Joy, murogora mwina ona ganyo ya mudhidhi wotene, siku na Sabuddu iyene onotamelavo mudhidhi wa omusasanyedha Mwang’neli. Iyene ohiloga: “Ddinowodha wubuwela ddigasasanyedha matugumanoya ahinatti.” Ike, munddimuwa wa mulogo wa pionero ohiloga: “Miyo ddinziveliwa osunza vang’ono-vang’ono sumana yotene ottiya osunzela vamodhavi.”

15. Onasasanyedhe dhavi matugumano?

¹⁵ Osasanyedha deretu matugumano onkosiwa dhavi? Voroma, ohinatti oroma kakosa nlobelo wa Yehova okumbiraga nikamidho na muya wokoddela. (Lk. 11:13; 1 Jo. 5:14) Ogamala katamela mudhidhi wa wubuwela dhisasanyedhi weyo. Otanaalele mitomadha, ana mutoma, dhotagiha na makani mena. Ogengesaga ddima katamela wengesa malebo anfwanyeyamo. Katanalela dhinengesa weyo, makamaka mutoma onfuna weyo wakula. Ogavisasanyedha mowakwana, onele ononelamo deretu vina wakula kinaurutxe.—2 Kor. 9:6.

16. Dhipano gani dhiliwo, nanda onalabihedhe dhavi?

¹⁶ Egawodheya kalabihedha dhipano dhinfwanyeya mmuttittoni. Yehova onolabihedha nikuru naye, wila anivahe dhipano dhinfwanyeya mmuttittoni wila dhinikamihedhe osasanyedha matugumano. Epano modha enkuweliwa JW Library^®, na epano eji enowodheya otitiha manivuru mmuttittoni. Enowodheya osunza—wengesa obe ovuruwana—mudhidhi-mudhidhivi na mburo onfunihu. Ena anolabihedha agadhowaga omabasani, oskola obe agabudduwa wi avume vang’onovi. Na nikamihedho na Watchtower Library na BIBILIOTEKA ONLINE^™, kinrutxa opepesa dhilobo dhinfunihu ononelamo deretu.

17. (a) Ekalele nni yaderetu osasanyedha dhowakula dhinjene? (b) Osunzile nni na vidiyu Okale Marho wa Yehova—Osasanyedhe Yowakula Yawo?

¹⁷ Egawodheya kasasanyedha dhowakula dhinjene. Sabwaya? Txino kunatonyiwe dila yoroma envenyihiwe mono. Attu ena anele ovenyiha mono va nivuzoni nakakene nisasanyedhi weyo. Wila matugumano anaje mudhidhi, nameddiha nsunzona txino onatonya abali ang’onovi wi akule mwari mwa ddima modha-modha. Noona kunyaguleye akala dila yoroma envenyiha weyo mono kunsakuliwa wi wakule. Akala ohisasanyedha deretu ddima dhina onele ovahiwa gari ya wakula. Txino yowakula yawo ja wengesa nlebo na Bibilia. Mbwenye egawodheya osasanyedhege wi wakule na mazu awo. *

18. Ekaleleni yofuneya ovaha dhowakula dhomaguva?

 ¹⁸ Ovahe yowakula yomaguva. Dila dhinjene, dhowakula dhinlibiha kadhingoneletxa. Ovilibihedhe ovaha dhowakula dhokiva vina dhohirutxa. Ovilibedhe wi dhowakula dhawo dhihikwaranye asegundu 30. (Gano 10:19; 15:23) Akala weyo odhile vawale wakulaga mmulogoni—ovilibihedhe ovaha dhowakula dhomaguva. Akala dhowakula dhawo dhinofiya mutala mmodha, oziwe wi attu ena kanawodhe wakula ninga mwafunelani. Ottiya ejo, dhowakula dhomaguva dhinovaha gari ya attu enjene wakula. Akala oromile otonyiwa ddiweyo ovahe yowakula yokiva mowiwanana na makaniya. Kutamele ologa mitoma dhina dha ddimaya. Akala dhowakula dhilebiwe vaddimaniva dhimala ologiwa, weyo ogafuna wakule na moonelo mwina.—Koona kasha “ Ddakule Dhavi?”

19. Nameddiha onaukamihedhe dhavi, elobo gani enfwanyeliwe okosa?

¹⁹ Omwaddele nameddihaya ddima enfuniwe wakula. Ogafuna okosa ejuwene, omwaddele nameddihaya namutanene matugumano ahinatti. Egafiya ddima enfuna weyo wakula, ottukulele mono wawo odhulu, dhawene onele omukamihedha nameddiha owuzinddiyela.

20. Matugumano ansasanyiwa dhavi ninga siyari ya amarho?

²⁰ Matugumano ankala ninga siyari yoriganela ya amarho. Karoma wubuwela dhahi, mukwawo wa mmulogoni wuwaddela wi ohigula dhilobo dhing’onovi wi muje vamodha nanda baukumbirha wi osasanyedhe yojaya eguliye. Weyo ogakule dhavi? Txino weyo ogahova vang’onovi, mbwenye ogasasanyedha dhoja dhigaziveli attu otene, kayo mwenemo? Yehova agasasanyedhaga matugumano, iyene onosasanyedha meza a dhoja dhottiya-ttiyana. (Masal. 23:5; Mt. 24:45) Iyene onowagalala vaddiddi niganvaha dhilobo dhehu dha ttima. Noona enofuneya osasanyedha deretu matugumano vina ovahe dhowakula dhawo. Ogajaga vameza va Yehova kuloga ondana mivaho dhogawela mulogo.