1. Kuchi Ndawichi te akwivwa hali Yehova, nawa yika chino chamutwalile kulinga?

MWANANGANA NDAWICHI kasonekene ngwenyi: “Yehova iye munene; chatamba kumuhalisa chinji.” (Samu 145:3) Iye te kakuzanga Yehova, chocho zango yilimutwala hanga ahalise Zambi “hakachi ka chikungulwila.” (Samu 22:22; 40:5) Kwamba pundu, yena wakuzanga Yehova nawa unatayiza maliji wano a Ndawichi ngwenyi: “Nufumane, Yehova Zambi ya kalamba ketu Izalele ndo ku miaka yeswe ya mutolo.”—1 Sango 29:10-13.

2. (a) Kuchi mutuhasa kuhalisa Yehova? (b) Ukalu uka amwe akupwa nawo, nawa yika mutushimutwina?

² Musono, jila yimwe yize twakuhalishilamo Yehova yili kuhana makumbululo muze tuli ha kukunguluka chetu. Chipwe chocho, chino chakupwa chikalu kuli amwe mandumbu. Ayo kakuzanga kukumbulula, alioze woma wakwakwika kuchilinga. Mba kuchi ayo mahasa kukumba woma? Yika muyihasa kutukwasa mba tuhane makumbululo a utakamiso? Shimbu kanda tukumbulula yihula yino, chitangu tushimutwinenu yikuma yiwana yize yakutulingisa mba tuhane makumbululo ha kukunguluka.

3-5. (a) Ngwe chize A-Hepreu 13:15 unalumbununa, mumu liaka twakuhana makumbululo muze tuli ha kukunguluka? (b) Shina yetweswe twatamba kuhana makumbululo alifwa? Lumbununa.

³ Tulieswe Yehova hanatwehe chiwape cha kumuhalisa. (Samu 119:108) Makumbululo waze twakuhana ha kukunguluka kapwa “chitapo cha uhaliso,” kashika kukushi niumwe yoze mahasa kutuhanyina chitapo chacho. (Tanga A-Hepreu 13:15.) Shina Yehova  kakutwita hanga tuhane yitapo yimuwika, chekwamba kuhana makumbululo alifwa? Ka, hi chocho ko!

⁴ Yehova kananyingika ngwenyi tukwete uhashi ni mwono walisa, kashika iye akulemesa chinji yitapo yize mutuhasa kumwaha. Achinyonga ha mutapu wa yitapo yize iye te akutayiza kuli A-Izalele. Amwe A-Izalele te kakwete uhashi wakulambula panga hanji pembe. Alioze Ka-Izalele yoze te chiswale, iye mahasa kulambula “tutele aali hanji ana-a-membe aali.” Nawa nyi Ka-Izalele kahashile kuhana tujila aali, Yehova te kakutayiza “chihanda chimuwika cha ku kumi lia yihanda ya efa ya wunga wafufunuka.” (Levi 5:7, 11) Chipwe ngwe wunga te ukwete ndando yikehe, nihindu Yehova te kakuwahilila ni chitapu chacho, ha kumona mutu mahana “wunga wafufunuka.”

⁵ Zambi yetu wa zango ni musono che akwivwa. Muze twakukumbulula ha kukunguluka, iye keshi kutwita hanga tulongoloke ngwe Apolu hanji tukununune ngwe Paulu. (Yili. 18:24; 26:28) Yehova kanazange wika hanga tukumbulule kulita ni uhashi wetu. Iwuluka tuliwa yoze wahanyine tumbongo twaali tukehe-tukehe. Iye kapwile mulemu kumeso ja Yehova mumu kahanyine yeswe yize te alinayo.—Luka 21:1-4.

6. (a) Kulita ni A-Hepreu 10:24, 25, kuchi makumbululo waze twakwivwa mahasa kukwata hali yetu? (b) Kuchi muhasa kusolola usakwililo we ha makumbululo waze akukutakamisa?

⁶ Muze tunahane makumbululo tunalikolweza umwe ni mukwo. (Tanga A-Hepreu 10:24, 25.) Muze tuli ha kukunguluka, tulieswe twakuzanga kupanjika makumbululo alisa. Twakuzanga kwivwa makumbululo a twanuke. Twakuwana utakamiso ha kwivwa umwe mahana kumbululo hakutwala ku yize alilongesanga. Nawa twakukomoka waze akwete ‘hamu’ lia kuhana kumbululo, chipwe ngwe kakwivwa sonyi hanji kanalilongesa limi lietu. (1 Tesa. 2:2) Mba kuchi mutuhasa kwaasakwilila ha tachi jize akusa? Mutuhasa kwaachichimieka ha makumbululo jo a utakamiso muze kukunguluka muchihwa. Ni yetu nawa, nyi twakumbulula mutusolola ngwetu tunasakwilila ha makumbululo jo. Hachino, hi yetu wika ko matakamisa alioze ni yetu mututakamisa akwetu.—Roma 1:11, 12.

7. Kuchi twakuyuka muze twakuhana makumbululo ha kukunguluka?

⁷ Yetwene twakuyuka muze mutuhana kumbululo ha kukunguluka. (Iza. 48:17) Mu mulali uka? Chitangu, nyi tunazange kukumbulula  ha kukunguluka, twatamba kululieka kanawa kukunguluka chacho. Muze mutulilulieka kanawa, mutunyingika kanawa Liji lia Zambi. Nyi twanyingika kanawa yize tunalilongesa muchipwa chashi kuyikaula ku mwono wetu. Chamuchiali, mutuzanga chinji kukunguluka chacho mumu yetweswe mutusa tachi hanga tuhanjike. Chamuchitatu, amu chakufupiwa kusa tachi mba tukumbulule, chino chakutukwasa hanga tununge ni kwiwuluka makumbululo waze twahananga ha kukunguluka.

8-9. (a) Kulita ni Malakia 3:16 kuchi Yehova akwivwa hakutwala ku makumbululo jetu? (b) Woma waka amwe mahasa kwivwa?

⁸ Twakuhalisa Yehova muze mutuhanjika hakutwala ku ufulielo wetu. Mutuhasa kupwa ni shindakenyo ngwetu, Yehova kakutupanjika nawa kakuwahilila chinji ha tachi jize twakusa hanga tukumbulule muze tuli ha kukunguluka. (Tanga Malakia 3:16.) Iye kakutusolwela zango lienyi ha kutuwahisa muze mutusa tachi hanga tumuvwise kuwaha.—Mala. 3:10.

⁹ Pundu lume, tukwete yikuma yipema yize twakukumbulwila muze tuli ha kukunguluka. Chipwe chocho, amwe mahasa kwivwa woma wa kuzundula kwoko. Nyi che wakwivwa, kanda uhonga. Tutalenu yimwe yiyulo ya Mbimbiliya, yilweza, ni yikuma yize muyitukwasa tulieswe hanga tupwe ni kukumbulula chinji ha kukunguluka.

10. (a) Woma uka yetweswe twakwivwa? (b) Kwivwa woma wa kukumbulula yika muchihasa kusolola?

¹⁰ Shina wakwivwa chifunyenye mujimo muze unambe kuzundula kwoko hanga ukumbulule? Nyi che wakwivwa kuushi ukawe. Umwenemwene uli ngwo, anji a kuli yetu twakwivwa ndambu ya woma muze tunahane kumbululo. Mba ukumbe woma uze wakwivwa ha kukumbulula, watamba kunyingika yize yakukuvwisa woma wacho. Shina wakwivwa woma ngwe muvulama yize unambe kuhanjika nyi wakulivwa ngwe yize muhanjika yili yipi? Kutala wakulipikala ngwe kumbululo lize muhana kulichi kupema ngwe lia akwenu? Kwamba umwenemwene woma wacho uli upema. Mumu unasolola ngwo wakulikehesa nawa wakumona akwenu ngwe kanakuhiane. Yehova kakuzanga  chinji mutu yoze wa kulikehesa. (Samu 138:6; Fwili. 2:3) Alioze Yehova kanazange nawa hanga umuhalise ni kukolweza mandumbu je ha kukunguluka. (1 Tesa. 5:11) Iye kakukuzanga nawa makwaha hamu lize unafupiwa.

11. Yisoneko yika muyihasa kutukwasa?

¹¹ Tuhengwolenu yimwe Yisoneko yize muyitukwasa. Mbimbiliya yinambe ngwo, tulieswe twakutalinga ha yize mutuhanjika ni chize mutuyihanjika. (Tia. 3:2) Yehova keshi kushimbwila hanga tupwe atu angunu, chipwe mandumbu jetu keshi kuchilinga. (Samu 103:12-14) Ayo kali mandumbu jetu amu ufulielo, nawa kakutuzanga chinji. (Marku 10:29, 30; Yoa. 13:35) Ayo kananyingika ngwo ha mashimbu amwe twakuhana makumbululo waze kutwanyongene.

12-13. Yika twalilongesa ha chilweza cha Nehemia ni cha Yona?

¹² Kuli yimwe yilweza ya Mbimbiliya yize muyihasa kukukwasa hanga ukumbe woma uze wakwivwa. Chitangu chili cha Nehemia. Iye te kakalakala ku zuwo lia mwanangana. Nehemia kevwile yinyengo mumu kamulwezele ngwo, yipanga ni mapito a Yerusaleme te hanapuzuka. (Nehe. 1:1-4) Achinyonga chifunyenye chize evwile muze mwanangana amuhulile hanga alumbunune mumu liaka te ananenganyana! Kawashi-washi Nehemia yalemba hanga ahase kumukumbulula. Hachino mwanangana yakwasa chinji atu ja Zambi. (Nehe. 2:1-8) Chamuchiali chili cha Yona. Muze Yehova amwichile hanga aye ni kwambujola kuli A-Ninive, Yona kevwile woma, chocho yachinyina kweka. (Yona 1:1-3) Alioze ni ukwaso wa Yehova, Yona yaya ni kwambujola ku Ninive. Nawa maliji waze iye ahanjikile kakwashile chinji A-Ninive kulinga yuma yipema. (Yona 3:5-10) Yika twalilongesa ha yilweza yino yaali? Hakutwala kuli Nehemia, twalilongesa ulemu wa kulemba mba tukumbulule. Hali Yona, twalilongesa ngwetu Yehova mahasa kutukwasa hanga tumulingile chipwe ngwe mutwivwa woma weswawo. Kwamba umwenemwene chili chashi kukumbulula mu chikungulwila kuhiana kwambujola sango ja upatwilo kuli A-Ninive.

¹³ Yika muyihasa kutukwasa mba tuhane makumbululo a utakamiso ha kukunguluka? Tutalenu yikuma yimwe yize muyitukwasa kuchilinga.

14. Mumu liaka twatamba kululieka kanawa kukunguluka chetu, nawa ha shimbu lika mutuhasa kuchilinga?

¹⁴ Lulieka hita kukunguluka. Nyi wapwa ni katalilo mupema ni kulilulieka kanawa, mwopwa ni hamu lia kukumbulula. (Yishi. 21:5) Tunanyingika ngwetu yetweswe kutushi mwono umuwika. Eloise, tuliwa yoze uli ni miaka 80, kakuputuka kululieka longeso lia Kaposhi wa Kutalila ha kuputuka cha poso. Iye yamba ngwenyi: “Nakuwahilila ha kukunguluka nyi nalianga kululieka kukunguluka chacho.” Joy, yoze ukwete mulimo wa ku musunya wa shimbu lieswe, hanase shimbu ha hita Sambata hanga alulieke longeso lia Kaposhi wa Kutalila. Iye yamba ngwenyi: “Chakupwa chashi kuli yami kwiwuluka yuma nyi nguchililongesayo, kashika nakulilulieka muze hikwasala  shimbu likehe lia kuya ku kukunguluka.” Ike, umwe mukulwana wa mu chikungulwila nawa pionelu yamba ngwenyi: “Kuli yami chakupwa chashi kululieka longeso lia Kaposhi wa Kutalila hakehe-hakehe mukachi ka poso.”

15. Kuchi muhasa kululieka kanawa kukunguluka?

¹⁵ Kululieka kanawa kukunguluka yika chakufupiwa? Ku uputukilo wa hita longeso eta spiritu yisandu kuli Yehova. (Luka 11:13; 1 Yoa. 5:14) Hachino, sako yimwe minutu hanga unyonge ha yize mulilongesa. Nyonga kanawa ha mutwe wa longeso, mitwe yikehe-yiheke, yizulie ni mishete ya malongeso. Muze unalilongesa hita paragrafu, nyi muchilita tanga yisoneko yeswe yize anatongolaho. Pukuna ha sango jize unalilongesa, lihulikile ha yikuma yize unazange kukumbulula ha kukunguluka. Nyi walilulieka kanawa, muyuka chinji nawa muchipwa chashi kukumbulula ha kukunguluka.—2 Kori. 9:6.

16. Yikwata yika ulinayo, nawa kuchi muhasa kuyizachisa?

¹⁶ Nyi uli ni uhashi, zachisa mikanda ya ha internet yize yili mu limi wakuhanjika kanawa. Kupalikila mu ululikiso wenyi, Yehova kanatwehe yikwata yize muyitukwasa ha kululieka kukunguluka. Aplicativo JW Library^® yakutukwasa hanga tuse mikanda ya kulilongesa mu telefone hanji tablet. Hachino mutuhasa kulilongesa hanji kutanga chipwe ngwetu kupanjika malongeso ha ola ni chihela cheswacho mutuzanga. Amwe kakuzachisa JW Library hanga alilongese ha ola ya kulia ku mulimo hanji ku shikola chipwe muze ali mu wenyi. Utulikilo wa mikanda Biblioteca da Torre de Vigia ni UTULIKILO WA MIKANDA^™ ha Internet yakutukwasa hanga tuhengwole kanawa yikuma ya longeso lize tunazange kunyingika kanawa.

17. (a) Mumu liaka chili chipema kululieka makumbululo anji? (b) Yika walilongesa ha chinema Pwako Sepa lia Yehova—Lulieka Kumbululo Lie?

¹⁷ Nyi muchilita, lulieka makumbululo anji ha hita longeso. Mumu liaka? Mumu hanji kechi kukutongola ha hita shimbu muzundula kwoko. Amwe mahasa kuzundula moko jo ha shimbu limuwika ni yena, nawa ndumbu yoze unasongwela mahasa kutongola umwe wa kuli ayo. Mba afunge mashimbu hanga kukunguluka chihwe ha ola yalita, ndumbu yoze unasongwela mahasa kutepulula makumbululo amwe, chekwamba hanji kechi kutongola atu eswe. Kashika kanda wivwa kupiha hanji kunenganyana nyi kaliangile kukutongola hanga ukumbulule. Nyi walulieka makumbululo anji, muhasa kupwa ni uhashi wa kukumbulula ha longeso limwe. Makumbululo waze mululieka, limwe mulihasa kupwa kutanga chisoneko. Alioze nyi muchilita, muhasa nawa kuhana kumbululo hakuzachisa wika maliji je. *

18. Mumu liaka twatamba kuhana makumbululo ni maliji akehe?

 ¹⁸ Hana makumbululo ni maliji akehe. Kanji-kanji makumbululo a utakamiso kapwa waze ali ni maliji akehe nawa ashi. Kashika ejilila kuhana makumbululo ni maliji akehe. Eseka kuhana makumbululo ha mitulo 30 (hanji Segundo). (Yishi. 10:19; 15:23) Nyi waputukile kulu kukumbulula ha kukunguluka, watamba kupwa chilweza chipema ha kukumbulula ni maliji akehe. Nyi wahana makumbululo ni maliji akalu nawa ha minutu yinji, akwenu mahasa kwivwa woma, ni kunyonga ngwo o kechi kuhasa kukumbulula ngwe yena. Chikwo nawa, kukumbulula ni maliji akehe chakukwasa hanga akwenu no akumbulule. Chipi-chipi nyi malianga kukutongola, watamba kuhanjika hakehe ha kukumbulula pundu chihula. Kanda uhanjikila yikuma yeswe yize yili ha paragrafu. Nyi chikuma chilemu ha paragrafu ha chilumbununa, yena muhasa kulumbununa yikuma yize yinasulaho.—Tala mushete “ Yika Munguhasa Kukumbulula?”

19. Kuchi ndumbu yoze masongwela mahasa kukukwasa, alioze yika watamba kulinga?

¹⁹ Lweza ndumbu yoze masongwela ngwo unazange kukumbulula ha paragrafu nganji. Nyi muzanga kuchilinga, watamba kuhanjika ni ndumbu wacho shimbu kukunguluka kanda chiputuka. Muze munuheta ha paragrafu yacho, zundula koko kawashi-washi nawa lise kanawa hanga ndumbu yoze unasongwela ahase kulimona.

20. Kuchi kukunguluka mu chikunguwila chapwa ngwe kulia hamwe ni masepa?

²⁰ Mona kukunguluka ngwe kulia chize unali hamwe ni masepa apema. Achinyonga ngwe masepa amwe amu chikungulwila makusanyika hanga uye no ku chimwe chiwanyino nawa makwita hanga uteleke yimwe. Kuchi muwivwa? Muhasa kulipikala ndambu, chipwe chocho musa tachi hanga uteleke kulia chize akwenu makazanga. Yehova, yoze wakutusanyika ku kukunguluka kakutululiekela kulia chipema. (Samu 23:5; Mateu 24:45) Iye kakuwahilila muze mututwalako yimwe yawana yize mutuhasa kulita ni uhasi wetu. Kashika lilulieke kanawa hanga ukahase kuhana makumbululo anji nyi muchilita. Hachino, yena kuuchi kulia wika yize Yehova aluliekanga, alioze ni yena muneha chawana che chize mulianyina ni mandumbu mu chikungulwila.