1. Jehovah he aa tlaiin David nih zeitindah a intuar, mah nih zei tuah awkah dah a forh?

SIANGPAHRANG David nih hitin a ṭial: “BAWIPA cu a lian a nganmi a si, fakpi in thangṭhat awk a si.” (Salm 145:3) Jehovah a dawtnak nih “pumhnak ah” thangṭhat dingin David kha a forh. (Salm 22:22; 40:5) Nang zong Jehovah kha na dawt caah David chimmi mah bia hi na hna a tla ve ko lai: “Maw BAWIPA, kan pu Israel i Pathian, nangmah cu zungzal thluangthluan in thangṭhat na si ko.”—1 Chan. 29:10-13.

2. (a) Jehovah kha zeitindah kan thangṭhat khawh? (b) Unau cheukhat cu zei zuamcawhnak dah an ton, zei kong dah kan i ruah hna lai?

² Tuchan ah Jehovah kan thangṭhat khawhnak lamkhat cu Khrihfabu pumhnak ah a phi kan peknak thawngin a si. Asinain unau tampi cu a phi pek awkah an i harh. Mah cu ṭihnak an ngeih caah an i cungcangmi a si men lai. Ṭihnak an ngeihmi kha zeitindah an tei khawh? Hman awk a tlakmi zei ruahnak cheuhnak nih dah thazaang a pemi a phi pek awkah a kan bawmh khawh? Mah kong kan i ruah hlanah pumhnak ah a phi pek a biapitnak a ruang pali kha i ruah hmasa hna u sih.

3-5. (a) Hebru 13:15 ningin zeicah pumhnak ah a phi kan pek? (b) A phi kan pekmi cu kan dihlak in aa khat lai maw? Fianter.

³ Jehovah nih kan dihlak in amah thangṭhat khawhnak tinvo sung a kan pek. (Salm 119:108) Pumhnak ah a phi kan pekmi cu Pathian sinah “thangṭhat . . . raithawinak” kan pekmi  a si i mah kha ahohmanh nih kan caah a kan pekpiak kho lo. (Hebru 13:15 rel.) Jehovah nih pakhat cio kan sinin aa khatmi raithawinak asiloah a phi pek awkah a kan hal maw? A kan hal lo.

⁴ Jehovah nih kan thiamnak le kan sining aa danmi kha a hngalh. Cucaah kan si khawh tawk in raithawinak kan pekmi kha a sunsak tuk. Israel mi sinin Jehovah nih a cohlanmi raithawinak phun kha ruathmanh. Israel mi cheukhat nih cun tuu asiloah meheh kha an pek khawh. Asinain a si a fakmi nih “ṭhuro pahnih siseh, laileng no pahnih siseh” an pek khawh. Va pahnih hmanh an pek khawh lo ahcun “changvut dip ephah cheuhra cheukhat” zong kha Jehovah nih a cohlan. (Lev. 5:7, 11) Changvut cu a man a tlawm bikmi a si ko nain a ṭhami “changvut” a si ahcun Jehovah nih mah raithawinak kha a sunsak tuk ṭhiamṭhiam.

⁵ Tuchan zongah cutin a si rih. A phi kan pek tikah biachim a thiammi Apollo bantuk asiloah hmualngei tein a chim thiammi Paul bantuk si awkah Jehovah nih a kan hal lo. (Lam. 18:24; 26:28) Kan si khawh tawk tein a phi kan pekmi kha a duh. Phaisa sen pahnih thawhlawm a pemi nuhmei nu kong kha i cinken. A si khawh chungin a ṭha bikmi a pek caah nuhmei nu kha Jehovah nih a sunsak tuk.—Luka 21:1-4.

6. (a) Hebru 10:24, 25 ningin a phi an pekmi nih zeitindah ṭhatnak a kan pek? (b) Thazaang a pemi a phi an pekmi na sunsak kha zeitindah na langhter khawh?

⁶ A phi peknak in pakhat le pakhat kha tha kan i pe. (Hebru 10:24, 25 rel.) Pumhnak ah a phi a phunphun an pekmi kan theihmi kha kan sunsak tuk. Ngakchia pakhat nih a sawhsawh tein le lungtak tein a pekmi kan theih tikah kan i nuam tuk. Cun pakhatkhat nih an hngalhmi biatak kong an chim tik zongah kan tha a um tuk. An ning a zah bu asiloah kan holh an cawnka lawng a si bu hmanhin ‘ralṭha’ tein a phi a pemi hna kha kan sunsak tuk hna. (1 Thes. 2:2) An i zuamnak kan sunsak kha zeitindah kan langhter khawh? Pumh a dih tikah an sinah lawmhnak bia kan chim khawh. Cun kan lawmh khawh hnanak a dang lamkhat cu kanmah theng a phi kan pek venak thawngin a si. Cuticun pumhnak ah kanmah lawng nih  thazaang hmuh si loin kanmah zong nih kan pek khawh ve hna.—Rom 1:11, 12.

7. A phi kan pek tikah zeitindah ṭhatnak kan hmuh?

⁷ A phi kan pek tikah kanmah theng ṭhatnak kan hmu. (Isa. 48:17) Zeitin in dah? Pakhatnak ah, a phi pek ding in hmuitinh kan ngeih ahcun pumhnak ca ṭha tein i timhtuah awkah a kan forh lai. Ṭha tein kan i timhtuah tikah Pathian Bia kha kan hun hngalhthiam chinchin lai. Ṭha deuh in kan hun hngalhthiam tikah mah kha kan nunnak ah ṭha tein kan hman thiam lai. Pahnihnak ah, a phi peknak ah kan i tel ve caah pumhnak ah kan i nuam deuh lai. Pathumnak ah, kan pekmi a phi kha pumh a dih hnupi tiang kan i cinken.

8-9. (a) Malakhi 3:16 ningin a phi kan pekmi he aa tlaiin Jehovah nih zeitindah a hmuh? (b) Mi cheukhat nih zeidah an ṭih?

⁸ Kan zumhnak kong kan chim tikah Jehovah lung kan lawmhter. Pumhnak ah a phi pekmi kha Jehovah nih a ngaih i a sunsak tuk ti kha kan zumh khawh. (Malakhi 3:16 rel.) Jehovah nih kan i zuamnak cungah thluachuah a kan peknak thawngin a kan sunsaknak kha a langhter.—Mal. 3:10.

⁹ Pumhnak ah a phi pek awkah a ruang ṭha hna kan ngei. Asinain cheukhat cu kut thlir ding kha an ṭih men lai. Cutin na si ve ahcun na lung dong hlah. Pumhnak ah a phi tam deuh in pek khawh awkah a kan bawmmi Baibal phunglam, hmuhtonnak cheukhat le tuah khawhning lam cheukhat hna kha i ruah hna u sih.

10. (a) Kan dihlak in zei bantuk ṭihphannak dah kan ngeih? (b) A phi pek awkah ṭihnak na ngeihmi cu zei a ṭhami ziaza na ngeih dah a si?

¹⁰ A phi pek awkah kut thlir ding na ruah tik hmanhah ṭihnak na ngei maw? Cutin na si ahcun nangmah lawng na si lo. A tak ti ahcun kan dihlak in a phi kan pek tikah ṭihnak tlawmpal cu kan ngei cio ko. Mah ṭihnak na ngeihmi kha tei khawh awkah na ṭihnak a ruang kha na hngalh a hau. Chim na duhmi a kong na philh lai kha asiloah a hmaan loin  na chim sual lai kha na phang maw? Na pekmi a phi cu midang bantukin a ṭha lai lo tiah na phang maw? A tak ti ahcun mah ṭihphannak hna cu a ṭhami an si. Mah nih aa toidormi na si le midang kha keimah nakin an ṭha deuh tiah na hmuh hna kha a langhter. Jehovah nih mah ziaza hna kha a sunsak. (Salm 138:6; Fil. 2:3) Asinain Jehovah nih pumhnak ah nangmah nih rak ka thangṭhat ve sehlaw unau pawl zong tha pe ve hna seh ti aan duh. (1 Thes. 5:11) Jehovah nih aan dawt tuk i na herhmi ralṭhatnak zong aan pek lai.

11. Baibal ruahnak cheuhnak nih zeitindah a kan bawmh khawh?

¹¹ Baibal ruahnak cheuhnak cheukhat kha ruathmanh. Kan bia chimmi le kan chimning ah a palh lomi ahohmanh kan um lo tiah Baibal nih a ti. (Jeim 3:2) Jehovah nih kan sinin tlinnak aa ruahchan lo bantukin unau pawl zong nih an i ruahchan ve lo. (Salm 103:12-14) Annih cu thlaraulei kan chungkhar an si i a kan dawtu an si. (Mar. 10:29, 30; Johan 13:35) Ṭha tein kan phit khawh lo caan hmanhah an hngalhthiam.

12-13. Nehemiah le Jonah sinin zeidah kan cawn khawh?

¹² Ṭihnak na ngeihmi tei khawh awkah aan bawm khomi Baibal kong cheukhat kha ruathmanh. Nehemiah kong kha ruathmanh. Ṭhawnnak a ngei ngaimi siangpahrang sinah rian a ṭuanmi a si. Nehemiah cu Jerusalem vanpang le hauka a rawhnak kong a theih tikah a ngaih a chia ngaingai. (Neh. 1:1-4) Siangpahrang pa nih zeicah na hmai a chiat tiah a hal tikah zeitluk in dah a thin a phan lai ti khi na mitthlam ah cuanter hmanh. Nehemiah cu thla a cam colh i a phi a pek. Mah tikah siangpahrang nih Pathian miphun kha bawmhnak tampi a pek hna. (Neh. 2:1-8) Jonah kong zong kha ruathmanh. Jehovah nih Nineveh khua mi hna sin bia chim dingin a thlah tikah a ṭih tuk i kaa dang leiah a zam. (Jonah 1:1-3) Asinain Jehovah bawmhnak thawngin Nineveh khua ah a kal ṭhan i Jehovah bia kha a va thanh. A thanhmi bia nih Nineveh khua mi hna caah ṭhatnak tampi a chuahter. (Jonah 3:5-10) A phi pek hlanah thlacam a biapitnak kong kha Nehemiah sinin kan cawn. Zeitluk in ṭihnak kan ngeih hmanhah Jehovah nih a rian ṭuan dingin a kan bawmh ti kha Jonah sinin kan cawn. Pumhnak i a phi pek cu Nineveh khua ah biaceihnak kong thanhnak in cun a har deuh hnga maw?

¹³ Pumhnak ah a phi pek awkah zei ruahnak cheuhnak nih dah a kan bawmh khawh? Ruahnak cheuhnak tlawmpal kha i ruah hna u sih.

14. Zeicah pumhnak caah ṭha tein kan i timhtuah awk a si, zeitik ah dah cutin kan tuah khawh?

¹⁴ Pumhnak pakhat cio caah i timtuah. A phi pek dingin hmuitinh kan chiah i ṭha tein kan i timtuah ahcun mahle mah zumhnak kan  ngei deuh lai. (Ptb. 21:5) Pumhnak ca i timhtuahnak he aa tlaiin pakhat le pakhat kan i dang cio ko lai. Kum 80 leng a simi nuhmei Eloise cu Vennak Innsang cawnnak kha zarh a thawknak ah aa tim. “Kaa timhtuah chung tikah pumhnak ah kaa nuam deuh” tiah a ti. Vawlei lei rian ah caantling in a ṭuanmi Joy nih zarhte ni ah Vennak Innsang hlathlai dingin caan a khiah. “Zarhpi ni lai te ah ka hlathlai caah kaa cinken khawh deuh” tiah a ti. Hmaikal zong a ṭuan i a rian a tammi Khirhfa upa Ike nih “voikhat ah tampi in hlathlai nakin zarh khat chungah tlawmpal tete hlathlai cu ka caah a ṭha deuh” tiah a ti.

15. Pumhnak caah zeitindah ṭha tein naa timhtuah khawh?

¹⁵ Pumhnak ca ṭha tein i timtuahnak ah zei dah aa tel? Hlathlainak na tuah hlanah thlacamnak in Jehovah sinah thiang thlarau bawmhnak hal. (Luka 11:13; 1 Johan 5:14) Cun i cawn khawhmi hna kha a caan pe in ruat. Biatlangpi, biatlangte, hmanthlak le rinli kulh hna kha hlathlai. Catlangbu pakhat kip cio na hlathlai tikah a si khawh ahcun cherhchanmi Baibal caang vialte kha rel. A konglam hna kha ṭha tein ruat law a phi pek na duhmi kong kha a hleiin lungthin pe. Ṭha tein naa timtuah ahcun ṭhatnak na hmu deuhdeuh lai i a phi pek awkah naa fawih deuh lai.—2 Kor. 9:6.

16. Zei hriamnam hna dah na hman khawh, zeitindah na hman khawh?

¹⁶ A si khawh ahcun nan holh in a ummi electronic thilri hna kha hmang. Jehovah nih bupi hmangin pumhnak ca i timhtuahnak ah a kan bawmmi electronic hriamnam hna a kan pek. JW Library^® app ah a ummi hlathlai dingmi cauk hna kha kan phone asiloah kan tablet ah download tuah khawh a si. Zeitik caan paoh le khoika hmun paohah hlathlainak tuah khawh asiloah rel khawh le ngaih khawh a si. Mi cheukhat nih rianṭuannak ah asiloah sianginn ah chuncaw ei caan asiloah khualtlawn pah hna in hlathlainak tuahnak caah mah hriamnam hna kha an hman. Vennak Innsang Library le Vennak Innsang ONLINE LIBRARY^™ ah hngalh na duhmi a kong hna kha fawi tein hlathlai khawh a si.

17. (a) A phi tampi i timhlamh cu zeicah a ṭhat? (b) Jehovah Hawikom Si—A Phi Pek Awkah I Timtuah timi video in zeidah na cawn khawh?

¹⁷ A phi tampi in i tim. Zeicah? Na kut na thlir fatin te an in hal lai lo caah a si. Midang zong nih an kut an thlir ve lai i a tlaitu nih nan lak in pakhat kha aan thim hna lai. A caan te ah pumhnak a dih khawh nakhnga a tlaitu nih a phi an pekmi kha ri a khiah a hau men lai. Cucaah a phi an hal lo tikah na thin hung hlah asiloah na lung dong hlah. A phi tampi naa timh a si ahcun a phi pek khawhnak caanṭha tampi na ngei ko lai. Baibal relnak zongin a  phi na pek khawh. Asinain na si khawh ahcun nangmah holh tein a phi pek khawh awkah i timtuah. *

18. Zeicah tawi tein a phi pek awk a si?

¹⁸ Tawi tein a phi pe. Thazaang a pe bikmi a phi cu a tawi i a sawhsawh te a simi kha a si. Cucaah tawi tein a phi pek awkah i tim. Second 30 hrawng pek dingin i tim. (Ptb. 10:19; 15:23) A phi na peknak kum tampi a si cang hmanhah tawi tein a phi na pek zungzalnak thawngin zohchunh awk ṭha na chiah khawh. A kong tampi kha saupi na pek ahcun midang nih nangmah bantukin a phi kan pe kho lai lo tiah an ruah lai i a phi pek an ṭih lai. Asinain tawi tein a phi na pek ahcun pumhnak ah mi tampi i tel awkah a caan a um lai. A hleiin a hmasa bik ah auh na si ahcun a sawhsawh tein le biahalnak he aa tlaimi a phi te lawng kha pe. Catlangbu ah aa telmi a kong vialte kha chim hlah. Catlangbu i a bik in langhtermi a kong an pek dih hnuah a dang kong hna kha na pek khawh.—“ Zeitindah A Phi Ka Pek Khawh?” timi rinli kulh ah zoh.

19. A tlaitu nih zeitindah aan bawmh khawh, asinain zeidah na tuah a herh lai?

¹⁹ A phi pek naa timhnak catlangbu kha a tlaitu kha hngalhter. Pumhnak thawk hlanah a tlaitu kha na chimh chung khawh. Pek na duhmi catlangbu a phanh tikah a tlaitu nih aan hmuh khawh nakhnga na kut kha sangpi in thlir colh.

20. Khrihfabu pumhnak cu hawikom pawl he rawl i hrawm he zeitindah aa lawh?

²⁰ Khrihfabu pumhnak kha hawikom ṭha pawl he rawl eiṭi bantukin hmu. Unau cheukhat nih rawl i hrawm awkah an i sawm i ei awk tlawmpal in rak i timtuah ve tiah an in ti hei ti u sih. Zeitindah na tuah lai? Na hna a hnawk pah ko lai nain mikip nih an duh hngami pakhatkhat kha timhtuah na duh ko lai. Inn-ngeitu a simi Jehovah nih pumhnak ah a ṭha bikmi rawl hna kha cabuai khat in a kan hunh. (Salm 23:5; Matt. 24:45) Kan si khawh tawk in a ṭha bikmi laksawng sawhsawh te kan pekmi kha Jehovah nih a sunsak tuk. Cucaah ṭha tein i timtuah law zalong tein a phi pe. Mah tikah Jehovah cabuai ah a ummi lawng ei si loin midang zong na dangh khawh ve hna lai.