1. Ki mannyer David ti santi anver Zeova e ki sa ti motiv li pour fer?

LERWA DAVID ti ekri: “[Zeova] i gran; i merit ganny tou louanz.” (Ps. 145:3) David ti kontan Zeova e sa ti motiv li pour loue Bondye “devan lasanble.” (Ps. 22:22; 40:5) San dout, ou osi ou kontan Zeova e ou dakor avek parol David: “[Zeova] nou loue ou, Bondye nou zanset Izrael, pour touzour!”​—1 Kron. 29:10-13.

2. (a) Ki mannyer nou kapab loue Zeova? (b) Ki difikilte serten i fer fas avek e kwa ki nou pou egzaminen?

² Ozordi, nou loue Zeova par fer komanter dan renyon nou kongregasyon. Par kont, en kantite frer ek ser i vwar li difisil pour reponn. Zot anvi partisipe pandan renyon, me zot per. Ki zot kapab fer pour sirmont zot lafreyer? Ki bann led pratik ki kapab ed zot donn bann larepons ki ankourazan? Avan nou reponn sa bann kestyon, nou pou egzamin kat rezon enportan akoz nou reponn dan renyon.

3-5. (a) Dapre Ebre 13:15, akoz nou fer komanter dan renyon? (b) Eski nou tou nou devret donn menm kalite komanter? Eksplike.

³ Zeova in donn nou tou sa privilez pour loue li. (Ps. 119:108) Nou bann komanter dan renyon i “loue Bondye” e i form parti en “sakrifis ki nou pe ofer Bondye avek nou labous.” Personn pa kapab fer sa pour nou. (Lir Ebre 13:15.) Eski Zeova i ekspekte menm  sakrifis oubyen komanter avek sakenn de nou? Non, pa ditou!

⁴ Zeova i konnen ki nou annan diferan abilite ek sirkonstans, me i vreman apresye bann sakrifis ki nou kapab ofer li. Mazin bann diferan kalite sakrifis ki bann Izraelit ti kapab ofer Zeova. Serten Izraelit ti kapab ofer en mouton oubyen en kabri. Me bann ki ti pov ti kapab ofer “de tourtrel oubyen de pizon.” Si en Izraelit ti napa sa mwayen pour ofer de zwazo, Zeova ti aksepte “en dizyenm mezir lafarin meyer kalite.” (Lev. 5:7, 11) Lafarin ti pli bon marse, me Zeova ti apresye sa sakrifis si zot ti ofer en bon kalite lafarin.

⁵ Nou Bondye lanmour i ankor santi parey ozordi. Kan nou reponn, i pa ekspekte ki nou tou nou koz byen parey Apolos oubyen koz avek konviksyon parey Pol. (Akt 18:24; 26:28) Zeova i zis anvi ki nou donn li nou meyer e i pa ekspekte ki nou fer plis ki sa ki nou kapab. Rapel sa vev ki ti donn sa de pti sou. I ti annan valer dan lizye Zeova akoz i ti donn tou sa ki i ti kapab.​—Lik 21:1-4.

6. (a) Dapre Ebre 10:24, 25, ki mannyer nou benefisye avek larepons ki nou tande dan renyon? (b) Ki mannyer ou kapab montre lapresyasyon pour bann larepons ki ankouraz ou?

⁶ Nou larepons i ankouraz kanmarad. (Lir Ebre 10:24, 25.) Nou tou nou kontan pour tann bann diferan larepons dan renyon. Nou apresye en larepons ki senp e senser ki en pti zanfan i fer. Nou ganny ankouraze par leksitasyon ki nou tande dan lavwa en dimoun ki pe fer komanter lo en lenformasyon ki i fek aprann. Nou osi admir sa bann ki pran “kouraz” pour donn en larepons, menm si zot kanmi oubyen zot fek konmans aprann nou langaz. (1 Tesa. 2:2, not.) Ki mannyer nou kapab montre lapresyasyon pour zot zefor? Apre renyon, nou kapab remersye zot pour zot komanter ankourazan. Nou osi kapab fer en komanter. Koumsa, nou pa zis ganny lankourazman dan renyon me nou osi donn lankourazman.​—Rom. 1:11, 12.

7. Ki mannyer nou benefisye ler nou fer komanter?

⁷ Nou menm ki benefisye ler nou fer komanter. (Iza. 48:17) Ki mannyer?  Premyerman si nou anvi donn en komanter, nou pou pli motive pour prepar byen pour renyon. Ler nou prepar byen, nou konpran pli byen Parol Bondye e alor nou pou kapab aplik sa ki nou aprann pli byen. Dezyenmman, nou pou pli apresye renyon akoz nou pe partisipe. Trwazyenmman, vi ki i demann zefor pour reponn, nou souvan rapel pli byen bann pwen ki nou’n fer komanter lo la, menm apre ki renyon in fini.

8-9. (a) Parey Malaki 3:16 i montre ki mannyer ou krwar Zeova i santi ler nou reponn dan renyon? (b) Ki difikilte serten i ankor pe rankontre?

⁸ Nou fer plezir Zeova ler nou koz lo nou lafwa. Nou kapab asire ki Zeova i ekout nou e ki i vreman apresye zefor ki nou fer pour fer komanter dan renyon. (Lir Malaki 3:16.) I apresye e beni nou zefor ler nou esey nou mye pour fer li plezir.​—Mal. 3:10.

⁹ Alor, nou annan bann bon rezon pour fer komanter dan renyon. Kantmenm sa, serten i kapab per pour lev zot lanmen. Si ou santi ou koumsa, pa dekouraze. Annou egzamin bann prensip Labib, legzanp ek led pratik ki kapab ed nou tou pour fer plis komanter dan renyon.

10. (a) Akoz bokou nou nou per pour reponn? (b) Akoz sa lafreyer ki ou annan pour reponn i kapab en bon siny?

¹⁰ Eski ou per sak fwa ou mazin lev ou lanmen pour reponn? Si sa i leka, ou pa tousel. Bokou nou i per pour fer komanter. Par kont, ou bezwen konnen akoz ou per pour ou kapab sirmont ou lafreyer. Eski ou per ki ou pou oubliy sa ki ou anvi dir oubyen ki ou pou dir en keksoz mal? Eski ou enkyet ki ou komanter pa pou sitan bon parey pour lezot? Anfet, sa lafreyer i kapab en bon siny. I montre ki ou annan limilite e ki ou vwar lezot pli siperyer ki ou. Zeova i kontan dimoun  ki annan limilite. (Ps. 138:6, NWT; Fili. 2:3) Osi, Zeova i anvi ki ou loue li e ankouraz ou bann frer ek ser dan renyon. (1 Tesa. 5: 11) I kontan ou e i pou donn ou sa kouraz ki ou bezwen.

11. Ki rapel dan Labib ki kapab ed nou?

¹¹ Annou egzamin detrwa rapel ki dan Labib. Labib i dir ki nou tou nou fer fot dan sa ki nou dir e dan lafason ki nou dir li. (Zak 3:2) Zeova e osi nou bann frer ek ser pa ekspekte ki nou parfe. (Ps. 103:12-14) Zot nou fanmir spirityel e zot kontan nou. (Mark 10:29, 30; Zan 13:35) Zot konpran ki parfwa nou larepons pa sorti parey nou ti ava anvi.

12-13. Ki nou aprann atraver legzanp Neemya ek Zonas?

¹² Reflesi lo serten legzanp dan Labib ki kapab ed ou sirmont ou lafreyer. Mazin Neemya. I ti servi dan lakour en lerwa pwisan. Neemya ti tris akoz i ti’n tande ki bann miray ek baro Zerizalenm ti’n ganny detrir. (Nee. 1:1-4) Zis mazinen ki mannyer Neemya ti’n kapab per ler lerwa ti’n demann li pour eksplike akoz i tris! Vitman, Neemya ti priye e donn en larepons avek lerwa. Apre, lerwa ti ed pep Bondye en kantite. (Nee. 2:1-8) Mazin Zonas osi. Ler Zeova ti demann li pour koz avek bann zabitan Niniv, i ti sitan per ki i ti sov dan lot direksyon. (Zon. 1:1-3) Me avek led Zeova, Zonas ti kapab al pres avek bann dimoun Niniv e sa ti fer bokou dibyen sa bann dimoun. (Zon. 3:5-10) Nou aprann lenportans pour priye avan nou reponn, atraver legzanp Neemya. Avek legzanp Zonas, nou osi aprann ki Zeova i kapab ed nou pour servi li menm si nou vreman per. Dapre ou, eski bann dimoun dan ou kongregasyon i pli fer per ki bann zabitan Niniv?

¹³ Ki led pratik ki kapab ed ou donn bann larepons ankourazan dan renyon? Annou vwar detrwa sizesyon.

14. Akoz nou merit prepar byen pour renyon e kan nou kapab fer li?

¹⁴ Prepar pour sak renyon. Ler ou plàn e prepar byen davans, ou pou pli konfidan pour fer komanter. (Prov. 21:5) Byensir, nou tou nou annan diferan progranm pour prepar renyon. Eloise, en vev dan son 80 an, i konmans prepar Letid Latour Veyer o konmansman lasemenn. I dir, “Mon pli apresye renyon letan mon prepar byen davans.” Joy, ki travay a plen tan, i met letan dekote dan Sanmdi pour prepar Letid Latour Veyer. I dir, “Sa i fer li pli fasil pour mwan rapel sa lartik.” Ike, en ansyen ki vreman okipe e ki osi en pionye, i dir, “Mon vwar li pli meyer pour prepar dan diferan moman pandan lasemenn dan plas prepar tou en sel zour.”

15. Ki mannyer ou kapab prepar byen pour renyon?

 ¹⁵ Ki i enplike pour prepar byen pour renyon? Toultan priy Zeova pour demann li son lespri sen avan ou konmans prepare. (Lik 11:13; 1 Zan 5:14) Apre, pran detrwa minit pour pas lo sa lartik. Analiz son tit, soutit, portre ek tou bann bwat. Anmezir ki ou etidye sak paragraf, si i posib, lir tou bann verse ki’n ganny mansyonnen. Medit lo sa lenformasyon, konsantre lo bann pwen ki ou ti a kontan reponn. Pli ou prepar byen, pli ou pou benefisye e i pou pli fasil pour ou fer komanter.​—2 Kor. 9:6.

16. Ki kalite zouti ki nou annan e ki mannyer ou kapab servi zot?

¹⁶ Si i posib, servi bann zouti elektronik dan en langaz ki ou konpran. Atraver son lorganizasyon, Zeova in donn nou bann zouti elektronik pour ed nou prepar pour renyon. JW Library^® i ed nou pour download bann piblikasyon ki nou pou etidye lo nou lekipman elektronik. Apre nou kapab etidye, lir oubyen ekout sa piblikasyon nenport ki ler ek landrwa. I annan ki servi JW Library^® pour prepare pandan poz midi kot zot travay, kot lekol ouswa letan zot pe vwayaze. Watchtower BIBLIOTEK LO ENTERNET ek Watchtower Library i fer li vreman fasil pour fer resers lo bann pwen dan sa leson ki nou ti pou kontan etidye pli profon.

17. (a) Akoz i byen pour prepar plizyer larepons? (b) Ki ou’n aprann atraver sa video Vin zanmi Zeova​—Prepar ou larepons?

¹⁷ Si i posib, prepar plizyer komanter pour sak leson. Akoz? Pa toultan ki ou pou ganny demande pour reponn kan ou lev ou lanmen. Lezot pou osi lev zot lanmen a sa menm moman e sa ki pe kondwir letid i kapab swazir en lot dimoun pour reponn. Pour fer sir ki renyon i fini aler, i pa pou kapab les tou dimoun fer komanter. Alor, pa bezwen ofanse oubyen dekouraze si ou pa ganny sans reponn premye fwa ki ou lev ou lanmen. Si ou prepar plizyer komanter, ou pou annan plis loportinite pour partisipe pli tar. Ou osi kapab lir en verse Labib, sa osi i en larepons. Me si ou kapab, esey prepar en larepons an servan ou prop mo. *

18. Akoz i neseser pour fer larepons ki kourt?

¹⁸ Fer bann komanter kourt. Souvan, en larepons ki kourt e senp i sa larepons pli ankourazan. Alor, fer li ou lobzektif pour gard ou larepons kourt. Esey fer en komanter pa plis ki 30 segonn.  (Prov. 10:19; 15:23) Si i fer plizyer lannen ki ou pe reponn dan renyon, i enportan ki ou kit en bon legzanp par donn larepons ki kourt. Si ou larepons i konplike e i dire pour plizyer minit, lezot i kapab per pour reponn e krwar ki zot pa pou kapab donn larepons parey ou fer. An plis, ler nou donn bann larepons ki kourt, sa i fer ki plis dimoun i kapab partisipe dan renyon, sirtou si ou’n ganny demande pour reponn premye. Donn en larepons senp, ki reponn sa kestyon direkteman. Pa bezwen esey kouver tou lenformasyon dan sa paragraf. Apre ki sa pwen enportan in ganny diskite dan sa paragraf, ou kapab fer en komanter siplemanter.​—Vwar sa bwat “ Ki larepons mon kapab donnen?”

19. Ki mannyer sa dimoun ki kondwir sa renyon i kapab ed ou e ki ou devret fer?

¹⁹ Dir sa ansyen ki kondwir sa renyon ki paragraf ou ti a kontan reponn. Si ou swazir pour fer sa, ou devret koz avek sa ansyen avan renyon i konmanse. Konman i ariv lo sa paragraf ki ou’n prepar larepons, lev ou lanmen anler vitman e byen o pour ki sa ansyen i vwar ou.

20. Ki mannyer renyon i parey en repa ki nou pran avek nou zanmi?

²⁰ Bann renyon i parey en repa ki nou pe pran avek bann bon zanmi. Fer konmsi detrwa zanmi dan kongregasyon pe organiz en barbekyou e zot demann ou pour prepar en keksoz ki senp. Ki ou ti pou fer? Kekfwa, ou ti pou en pe per me ou ti pou fer tou sa ki ou kapab pour prepar byen e anmenn en keksoz ki tou dimoun ti pou apresye. Zeova ki envit nou dan renyon, i prepar en repa ki ranpli avek bann bon keksoz. (Ps. 23:5; Mat. 24:45) I apresye ler nou donn nou meyer e prepar en kado ki senp. Alor prepar byen e partisip pli souvan ki ou kapab. Koumsa ou pa pou zis manz lo latab Zeova me ou pou osi anmenn en kado pour partaz avek kongregasyon.