1. ¿Davidʼra kʼãrẽta sentibasi Jeowa kʼarea akʉza maʉ̃ba kʼãrẽta ozesi?

 NOKʼO Davidʼba bʉsi: «Jeowara yi zroma akʉza iyi ʉ̃rʉbʉrʉ ibia bedʼeaibara» (Sal. 145:3). Davidʼba Jeowaʼa mejãcha kãgaba ibia bedʼeabasi Jeowa ʉ̃rʉ kongregasion nãã (Sal. 22:22; 40:5). Dayirãba Jeowata kãgapanʉ baera Davidʼba jarada kĩrãkʼa abarika krĩchapanʉ: «Ewari jõmaʉ̃nẽ bʉ ʉ̃rʉ ibia bedʼeadaidebʉa, Jeowa, dayira zeze Israel, Daizeze ʉ̃rʉ» (1 Crón. 29:10-13).

2. (1) ¿Sãwũãbʉde Jeowa ʉ̃rʉ ibia bedʼeaseabʉ? (2) ¿Mebẽrã mejãchaʉta kʼãrẽta berabaribʉ akʉza kʼãrẽta kʼawuadai?

² Ãba yi jʉrebarima wãpanʉne Jeowa ʉ̃rʉ ibia bedʼeapanʉ juwa ʉ̃ta wuabʉde. Mamina ʉ̃kʉrʉ mebẽrãitara zare ãyi juwa ʉ̃ta wuakĩrãpanʉmina. ¿Kʼãrẽba kʼarebaseabʉ perabia yi edebi ẽ baita? akʉza ¿kʼãrẽba kʼarebaseabʉ juwa ʉ̃ta wuabʉrʉde komentario bia diaita? Naʉ̃ bedʼea panʉi nãã, nãã kʼawuadayi nekʼãrẽ kimare ãba yi jʉrebaride kʼãrẽa komentario diapanʉta.

3-5. (1) Hebreos 13:15​ba jarabʉdebara, ¿kʼãrẽa juwa ʉ̃ta wuapanʉ ãba yi jʉrebarimaera? (2) ¿Kʼãrẽa kʼawuapanʉ Jeowabara jʉ̃ã ẽãta jõmaʉ̃ba komentario abarika omarẽãra?

³ Jeowabara dayirã iduaribibʉrʉ iyi ʉ̃rʉ ibia bedʼeaita (Sal. 119:108). Dayirãba komentario diabʉrʉdera Jeowa sakripisio diabʉ kĩrãkʼabʉ, mawũã dayirãbarira miõba dia ẽ maʉ̃ra (akʉra Hebreos 13:15). ¿Jeowabara jarabʉka wuabemaraba obʉ kĩrãkʼa abarika komentario diadamarẽã? Mawũã ẽ.

⁴ Jeowabara kʼawuabʉ dayirã aba abaka awuarabʉta, maʉ̃ kʼarea iyara bia akʉbʉ dayirãba sakripisio diabʉra. Krĩchadadrʉ israelitaraba sakripisio diabadata. Ãya platata erbasibʉrʉ diabasi korderota, mawũã ẽ bʉrʉ kabritota. Yi kʼãrẽ neẽ badabara diabasi «tortola ũme mawũã ẽ bʉrʉ pũsĩra wũãwũãta ũme». Mamina maʉ̃ta diabe ẽ basibʉrʉ diaseabasi arinata (Lev. 5:7, 11). Maʉ̃ arina wikaʉbaribasimina, Daizezebara bia akʉbasi maʉ̃ sakripisiora, mamina maʉ̃ arinara arina biabaibarabasi.

⁵ Daizezera idibasidu abarika krĩchabʉ. Dayirãba komentario diabʉrʉde iya krĩchabʉ dayirã sãwũã sentibʉ ʉ̃rʉ. Apolosʼra bia bedʼeabasi, Pablo bedʼeara jõmaʉ̃ba ĩjãpanasi, mamina Jeowabara jʉ̃ã ẽ dayirãba maʉ̃rane kĩrãkʼa abarika odamarẽã (Hech. 18:24; 26:28). Iyara kãgabʉ dayirãba obʉra bia odamarẽã. Kĩrãbedadrʉ pẽdraba moneda ũme diadata, Jeowaba maʉ̃ra biʼia akʉsi, iya jõma erbʉta diasi baera (Luc. 21:1-4).

6. (1) Hebreos 10:24, 25​ba jarabʉdebara, ¿dayirãra sãwũã kʼarebabʉ ãba yi jʉrebarimae komentario diabʉdadera? (2) ¿Sãwũã ũdubiseabʉ bia akʉbʉta mebẽrãba komentario diabʉra?

⁶ Komentario diabʉde yiya so zarea diabʉ (akʉra Hebreos 10:24, 25). Jõmaʉ̃ba ũrĩkĩrã ãba yi jʉrebaride komentario diabʉrʉde. Bari jaradaita, ũrĩkĩrã wũãwũãraba komentario diabʉdade, adewara ũrĩkĩrãne mebẽã abaʉba komentario diabʉrʉde iya nekʼãrẽ kʼawuada ʉ̃rʉ, jipade yibia mebẽã perabʉba komentario diabʉrʉde, mawũã ẽ bʉrʉ mebẽã dayirã bedʼea kʼawuanʉmʉba komentario diabʉrʉde (1 Tes. 2:2). ¿Sãwũã ũdubiseapanʉ bia akʉbʉta ãya obʉra? Nããra, biga diaibara iya komentario diada kʼarea akʉza jaraibara iya komentario diadaba dayirãʼa so zarea diasita. Yi ũmeta, dayirãba komentario diabʉde maʉ̃ta obʉbʉrʉ awururabida so zareata diaseabʉ (Rom. 1:11, 12).

7. ¿Dayirãra sãwũã kʼarebabʉ komentario diabʉba?

⁷ Komentaiba nebiata ũdubʉ (Is. 48:17). ¿Sãwũã? Nããra, dayirãta ãba yi jʉrebarimae juwa ʉ̃ta wuakĩrãbʉbʉrʉ, deda nãã estudiayi akʉza maʉ̃ba kʼarebayi Daizeze Bedʼea audre ũrĩta, adewara ojʉ̃drʉyi dayirãba kʼawuadata. Yi ũmeta, ãba yi jʉrebarimae wãbʉrʉde audre sobiabayi kʼawuadai baera kʼãrẽ ʉ̃rʉ bedʼeaita mama. Yi ũbeata, komentario diaita zarea oibara, maʉ̃ kʼarea mesera kĩrãdua ẽ bayi dayirãba jarabʉra.

8, 9. (1) Malaquías 3:​16​ba jarabʉdebara, ¿Jeowabara sãwũã akʉbʉ dayirãba zarea obʉde komentario diaita? (2) Mawũãsidu ʉ̃kʉrʉ ẽbẽrarãra, ¿sãwũã sentiseabʉ?

⁸ Jeowabara kãgabʉ dayirãba ĩjãbʉta jaramarẽã. Dayirãba wãrĩnu ĩjãseabʉ Jeowabara ũrĩbʉta akʉza bia akʉbʉta dayirãba kʼãwũã zarea obʉ kʼarea juwa ʉ̃ta wuaita ãba yi jʉrebarimae (akʉra Malaquías 3:16). Jeowabara bia akʉbʉ dayirãba komentario diabʉra, maʉ̃ba dayirã nebiata diabʉ (Mal. 3:10).

⁹ Bʉ kʼarea komentario diaira, mawũãsidu ʉ̃kʉrʉra perabʉ juwa ʉ̃ta wuaita, bʉta mawũãbʉbʉrʉ, sopʉarãra. Atia akʉdayi ũrãgʼarata akʉza yizara dayirã kʼarebaseabʉta juwa ʉ̃ta wuaita komentario diaita.

10. (1) ¿Ʉ̃kʉrʉra sãwũã sentibʉ komentario diaidera? (2) ¿Kʼãrẽa jaraseapanʉ yibiata perabʉbʉrʉ komentario diaita?

¹⁰ ¿Juwa ʉ̃ta wuabʉrʉdera bʉra peradogoka? Bʉta abapai mawũãbʉ ẽ. Dayirã jõmaʉ̃ta perabʉ juwa ʉ̃ta wuabʉrʉdera. Mamina bʉta jipa perabʉbʉrʉ, mawũã juwa ʉ̃ta wuai kʼarea akʉza komentario dia ẽ bʉrʉ, jʉrʉibara kʼãrẽa mawũãbʉta. ¿Krĩchabʉ baera bʉta juwa ʉ̃ta wuabʉrʉde jõma kĩrãdua totoita? ¿Kĩchabʉ baera komentario wuabemarane kĩrãkʼa bia jara ẽ bai baera? Mawũã berabaribʉbʉrʉ, maʉ̃ba ũdubiseabʉ eda krĩchabʉta akʉza krĩchabʉ wuabemarãra audre yizromata bʉira. Jeowabara kãga yi ẽbẽra eda krĩchabʉra (Sal. 138:6; Filip. 2:3). Mamina iyara kãga so zarea diadamarẽã mebẽrã ãba yi jʉrebarimaebida (1 Tes. 5:11). Jeowaba bʉra kãga, maʉ̃ba diayi zarea bʉa nesidabʉta.

11. ¿Kʼãrẽ Daizeze Bedʼeadebemaba kʼarebaseabʉ dayirãra?

¹¹ Akʉdaya Daizeze Bedʼeaba kʼãrẽ jarabʉta. Daizeze Bedʼeaba jarabʉ dayirã jõmaʉ̃ta aña bedʼeabarita (Sant. 3:2). Jeowabara jʉ̃ã ẽ dayirãba jõma aripe omarẽãra, abarika dayirã mebẽrãba jʉ̃ã ẽ kĩrãkʼa dayirãba aripe omarẽã (Sal. 103:12-14). Ãyira dayirã mebẽrã kĩrãkʼabʉ akʉza kãga dayirãta (Mar. 10:29, 30; Juan 13:35). Ãyara kʼawuabʉ dayirã bedʼeabʉrʉdera daya krĩchabada kĩrãkʼa bedʼea ẽãta.

12, 13. Nehemías akʉza Jonás yizaba, ¿kʼãrẽta jaradiabʉ?

¹² Akʉdadrʉ Daizeze Bedʼeade ʉ̃kʉrʉ nebʉrabʉta. Maʉ̃ba dayirã sãwũã kʼarebaseabʉta perabʉ ãĩ bʉeita. Yi nããranebemara Nehemías, iyira nokʼo deda trajabasi. Iya ũrĩside Jerusalénʼnebema murota akʉza puerta ãrĩsita, mejãcha sopʉabasi (Neh. 1:​1-4). Krĩchadadrʉ Nehemías sãwũã mejãcha pera sentibasita nokʼoba widiside iyi kʼãrẽa sopʉabʉta. Nehemíasba naʉ̃ bedʼea panʉi nãã mesera yiwidʼisi. Iya mawũã odadeba nokʼobara mejãcha kʼarebasi Daizeze pʉwʉrʉra (Neh. 2:​1-8). Nehemías yizaba ũdubibʉ kʼãrẽa yibiata panʉi nãã yiwidʼita. Akʉdaya Jonás yizata. Jeowaba jaraside Nínive pʉwʉrʉeda wãmarẽã, iyira pera kʼãrãpe o jãpe wãsi (Jon. 1:​1-3). Mamina Jeowa kʼarebaba iyara aripe osi akʉza mejãcha kʼarebasi ẽbẽrarã mamabema pʉwʉrʉrata (Jon. 3:​5-​10). Jonás yizaba ũdubibʉ Jeowabara dayirãra kʼarebabʉta iya kãgabʉ oita dayirã mejãcha perabʉmina. Dayirã mebẽrãba dayirãra mejãcha perabi ẽ Nínivita ewaridebada kĩrãkʼa ¿bʉmabida?

¹³ ¿Kʼãrẽ ũrãgʼaba kʼarebaseabʉ komentario diaita mawũã dayirã mebẽrã so zarea diaita? Akʉdaya ʉ̃kʉrʉta.

14. (1) ¿Kʼãrẽa ãba yi jʉrebarima wãi naena deda bia estudiaibara? (2) ¿Sõbede estudiaseabʉ?

¹⁴ Ãba yi jʉrebarima wãi nãã deda nãã estudiara. Ãba yi jʉrebarima wãi nãã audre komentariota diakĩrãñi (Prov. 21:5). Mamina kĩrãbedaibara dayirã jõmaʉ̃ta awuarabʉta. Bari jaradaita, Eloise, iyira pẽdra akʉza 80 poagabʉ, iya Jarakabʉ kartara semana jʉ̃drʉbʉrʉdeba estudia jʉ̃drʉbʉ. Iya jarabʉ: «Mʉ̃ara audre nebiata ũdubʉ ãba yi jʉrebarima wãi naena estudiabʉbʉrʉ». Mebẽã iyi trʉ̃ra Joyʼra, iyira trajabʉ ewari jõmaʉ̃nẽ, iya karta Jarakabʉ estudiabʉ ãba yi jʉrebarima ewari aba waekʉde. Mebẽã Ike, iyira zõrãrã kongregasionebema akʉza nekʼãrẽ mejãcha oibara, adewara yi nãã edebari. Iya jarabʉ: «Mʉ̃itara yibia wika wikaʉde estudiaita, ewari abaʉde jõma estudiai kaude».

15. ¿Sãwũã bia deda estudiabʉ ãba yi jʉrebarima wãi nãã?

¹⁵ Ãba yi jʉrebarima wãi naenara ¿sãwũã bia estudiaseabʉ? Nããra, widibara Jeowa jaure zareata (Luc. 11:13; 1 Juan 5:14). Maʉ̃re, krĩchaibara daya kʼãrẽ ʉ̃rʉ akʉita, nããra akʉra yi trʉ̃ta, yi subtitulora trʉ̃ta, yi potorata akʉza yi rekuadrorata. Maʉ̃re akʉibara yi parraporata akʉza yi testorata yi daya akʉseabʉta. Maʉ̃ tẽã, maʉ̃ ʉ̃rʉ krĩchaibara. Adewara akʉibara maʉ̃ne daya kʼãrẽ ʉ̃rʉ komentario diakĩrãbʉta. Ãba yi jʉrebarima wãi nãã deda bia estudiabʉbʉrʉ nebiata ũduyi akʉza zare ẽ bayi komentario diaita (2 Cor. 9:6).

16. ¿Kʼãrẽta zokʼaseabʉ audre bia estudiaita akʉza sãwũã zokʼabʉ bʉara maʉ̃ra?

¹⁶ Zokʼara bʉa nekʼãrẽ erbʉra Daizeze ʉ̃rʉ kʼawuaita. Jeowabara dayirãra iyi organizasioneba nekʼãrẽ bio diabʉ, mawũã dayirãta estudiadamarẽã biʼia. JW Library^® aplikasionba kʼarebaseabʉ ʉ̃tʉ zebita kartara dayirã teleponone mawũã ẽ bʉrʉ tablede. Mawũã dayirã estudiaseabʉ akʉza ũrĩseabʉ daya kãgabʉ ewaride. Ʉ̃kʉrʉba mawũã aplikasionʼra zokʼabʉ ãyi baribʉde, trajode, eskuelade, mawũã ẽ bʉrʉ ode wãne. Akʉza audre badu bedʼea ʉ̃rʉ kʼawuakĩrãbʉbʉrʉ naʉ̃rata zokʼaseabʉ Watchtower Library akʉza Watchtower KARTARARABɄ INTERNETʼNE.

17. (1) ¿Kʼãrẽa yibia bʼai komentario bio jʉrʉira? (2) ¿Kʼãrẽta kʼawuasi naʉ̃ bideodera Wũãwũã Jeowa kʼawabara: Biʼia estudiara komentario diaita?

¹⁷ Bʉa oseabʉbʉrʉ komentario bio jʉrʉda jaraita. ¿Kʼãrẽa yibia mawũã oira? Dayirãba juwa ʉ̃ta wuabʉde, ãya edaʉde jida ẽ baseabʉ dayirã, mawũã mebẽãba awuruta jidasi baera. Akʉza kĩrãbedaibara mebẽãba ẽbẽrarãta mejãcha jidara, ewarita berabariseabʉ. Maʉ̃ kʼarea mejãcha krĩcha zroma orãra akʉza sopʉarãra nããbemarane komentario diada ẽ basibʉrʉ. Komentario oita bio jʉrʉbʉbʉrʉ, mejãcha juwa ʉ̃ta wuaseabʉ akʉza juwa ʉ̃ta wãseabʉ testo leita akʉza bʉa oseabʉbʉrʉ bʉ krĩchaba komentario diaseabʉ. b

18. ¿Komentario diabʉrʉde kʼãrẽa mejãcha bedʼea ẽ baibara?

¹⁸ Daya komentario diabʉrʉdera drazoa ba ẽ baibara. Dayirãta komentario diabʉrʉde mejãcha bedʼea ẽ bʉrʉ kʼarebayi mebẽrã so zarea diaita. Akʉza komentario diabʉrʉde 30 segundobaibara (Prov. 10:19; 15:23). Yi dããrabata Daizeze odebʉba yiza biata diaibara komentario diabʉrʉde mejãcha bedʼea ẽ baita. Komentario diabʉde mejãcha bedʼeabʉbʉrʉ akʉza maʉ̃ta zareabʉrʉ ũrĩta, mebẽrãitara zare bayi komentario diaita, krĩchabʉ baera, maʉ̃ra mebẽrã nekĩrãkʼa obe ẽãta. Mawũẽra mebẽãta wika bedʼeabʉbʉrʉ wuabemarabida erbayi ewari ãyi bedʼeaita. Parrapo jʉ̃drʉbʉrʉde nãã bedʼeabʉbʉrʉ wika bedʼeaibara akʉza wuabemaraba ũrĩne. Akʉza parrapoba jarabʉta jõma jararãra. Naʉ̃ parrapo bedʼeadebemata panʉsidabʉrʉ, awuru bedʼea maʉ̃ parrapodebemata jaraseabʉ (akʉra rekuadro « ¿Kʼãrẽ ʉ̃rʉ bedʼeaseabʉ bʉa komentario diabʉrʉde?»).

19. Yi jaradiabʉbara, ¿sãwũã kʼarebaseabʉ dayirãra mamina dayirãbara kʼãrẽta oibara?

¹⁹ Yi jaradiabʉʼa jaraidua bʉa saʉ̃ komentariota diakĩrãbʉta. Bʉa maʉ̃ta okĩrãbʉbʉrʉ ãba yi jʉrei nãã, mebẽãʉ̃me bedʼeara bʉ parrapo jaraimae juwa ʉ̃ta wuara mesera, mawũã iya ũdumarẽã.

20. ¿Kʼãrẽne abaraikabʉ ãba yi jʉrebarita, yiko koiʉ̃mera neũdukʼawurabawara?

²⁰ Ãba yi jʉrebarirabʉ dayi neũdukʼawuarabawara yiko ko wãi kĩrãkʼa. Dayirã mebẽrãba trʉ̃ra ãyi deda jʉ̃ẽmarẽã, mamina jarara yikota edemarẽã, ¿kãrẽta oi dayirãra? Maʉ̃ kʼarea peraseabʉ, mamina edeseabʉ yiko jõmaʉ̃ba kokĩrãta. Maʉ̃ kĩrãkʼa Jeowaba dayirãra trʉ̃bʉ ãba yi jʉrebarima akʉza iya nekʼãrẽ nebiata mejãcha diabʉ (Sal. 23:5; Mat. 24:45). Akʉza iyara kãgabʉ dayirãba nekʼãrẽ baduta diadamarẽã wikabida. Maʉ̃ kʼarea deda biʼia estudiadaibara akʉza zarea oibara komentario diaita, maʉ̃ta odara bari Jeowa ʉ̃rʉ kʼawuada ẽ bayi, awuarabʉrʉ kʼarebayi wuabemarabida Jeowa ʉ̃rʉ kʼawuadamarẽã.