1. Nemene la mekuna i Davita göi Iehova, nge nemene la hna upi nyidrëti troa kuca?

HNEI Davita Joxu hna cinyihan, ka hape: “Atraqate Iehova, nge troa nyipi atrun.” (Sal. 145:3) Davita a hnimi Iehova. Celë hi ka upi nyidrë troa atrunyi Akötresie “nyipine la icasikeu.” (Sal. 22:22; 40:5) Atraqatre fe la ihnimi së koi Iehova, matre caasi hi la mekuna së me Davita, lo kola hape: “Oleti koi enëtilai Iehova Akötesi Isaraela xötapane i anganyihunie, qan’ ekö palua uti hë epine palua.”—1 A. l. ite jo. 29:10-13.

2. (a) Nemene la aqane tro sa atrunyi Iehova? (b) Nemene la jol hna cile kow hnene la itre xaa trejin, nge nemene la hne së hna troa ce wang?

² Ame enehila, easa atrunyi Iehova ngöne la easa isa hamë mekun ngöne la hna icasikeu. Ngo tha ka hmaloi kö kowe la itre xaa trejin. Nyudreni a pi troa hane qeje mekun, ngo xoue nyudren. Nemene la aqane tro nyudreni a triji xou? Nemene la itre eamo ka troa xatua së, matre tha tro kö sa xou troa hane hamë mekun? Qëmekene troa sa la itre hnying celë, tro sa pane ce wang la foa lao ewekë ka amamane la enyipiewekëne la troa hamë mekun ngöne la itre icasikeu.

3-5. (a) Tune la hna qaja ngöne Heberu 13:15, pine nemene matre easa hamë mekun ngöne la hna icasikeu? (b) Hapeu, casi hi la aqane troa eköthe la itre mekun, hna kapa hnei Iehova? Qejepengöne jë.

³ Hnei Iehova hna aijijë së asë troa atrunyi Nyidrë. (Sal. 119:108) Ame la easa hamë mekun ngöne la hna icasikeu, easë hi lai a hamëne la “huje ne atrunyi Akötesie.” Nge isa qanyi së kö kuca. (E jë la Heberu 13:15.) Hapeu, caasi hi la aqane troa eköthe la itre mekun, hna kapa hnei Iehova? Ohea!

 ⁴ Atre hnyawa hi Iehova laka, isapengöne kö la itre hne së hna atrein me aqane mele së. Iehova a wangatrune la itre huuje hne së hna tro fë koi Nyidrë. Pane mekune jë la nöjei pengöne huuje hna tro fë ekö hnei angetre Isaraela, nge hna kapa hnei Iehova. Ame la itre xaa atre Isaraela, tre, ijiji angatre hi troa huujë arenio maine gootr. Ngo ame la itre ka puafala, tre, angatr a tro fë “lue piny, nge kete loi lue nekö i meketë.” Maine tha ijiji palaha troa tro fë la itre huuje cili, Iehova a kapa la “ca omera falawa.” (Lev. 5:7, 11) Ngacama tha ka tru thupene kö ekö la farine, ngo ketre huuje lai hna kapa hnei Iehova. Ngo loi e troa “falawa ka loi.”

⁵ Tha saze kö la mekuna i Akötresie enehila. Tha ka nyipiewekë kö koi Iehova troa eköthe hnyawa la itre mekuna së, tui Apolo ekö ka atreine cainöj me Paulo ka atreine ithanata kowe la itre atr. (Itre hu. 18:24; 26:28) Ame la hnei Iehova hna ajan, tre, tro sa hamë mekun qa kuhu hni së, nge itre hne së hna atrein. Pane mekune jë së lo sine föe ka kuiëne ekö la lue mani ka co. Ka tru eahlo koi Iehova, pine laka hnei eahlo hna hamëne la hnei eahlo hna hetreny.—Luka 21:1-4.

6. (a) Tune la hna qaja ngöne Heberu 10:24, 25, nemene la thangane la itre mekun hna hamën? (b) Nemene la aqane tro sa amamane la hni ne ole së kowe la itre mekun hna hamën?

⁶ Ame la easa hamë mekun, tre, easa ithuecatrekeu. (E jë la Heberu 10:24, 25.) Easa wangatrune la nöjei mekune hna hamëne ngöne la hna icasikeu. Ka tru koi së la itre hnaewekë hna hamën pine laka, ka hmaloi troa trotrohnine hnene la itre nekönatr nge ka nyipici itre ej. Ame la easa drenge la kola hamë mekun hnene la ketre trejin memine la aqane qejepengöne angeice la nyipici hna xötrei inin, tre, kola ithuecatre koi së. Easa haine la itre ka ‘catre’ hamë mekun, ngacama itre ka lapa pe hi maine itre ka xötrei inine la qene hlapa së. (1 Thes. 2:2) Nemene la aqane tro sa amamane la hni ne ole së kowe la itre trengecatre hnei angatr hna kuca? Ijije hi tro sa olene koi angatr thupene la hna icasikeu. Ketre, loi e tro fe sa hane hamë mekun. Easa kapa la itre ithuecatr ngöne la easa icasikeu nge easë fe a hamë trengecatr.—Rom. 1:11, 12.

7. Nemene la itre eloine la hne së hna hamë mekun?

⁷ Hetre eloine la itre mekun hna hamën. (Is. 48:17) Tune kaa? Ame la hnapan, tre,  maine easa ajane troa hane hamën mekun ngöne la hna icasikeu, nyipiewekë tro sa hnëkë hnyawa. Eje hi laka, maine tro sa hnëkë hnyawa, tro hë sa trotrohnine hnyawa la Wesi Ula i Akötresie. Nge e cili, hmaloi koi së troa trongëne la itre hne së hna inin. Ame la hnaaluen, tre, maine tro sa hane qeje mekun ngöne la icasikeu, tro sa kepe thangane qa ngöne ej. Nge ame la hnaakönin, tre, maine tro sa catre hnëkë hnyawa la itre mekun hne së hna troa qaja, tha tro kö sa thëthëhmine itre ej thupene la icasikeu.

8-9. (a) Thenge la tusi Malaki 3:16, nemene la aqane goeëne Iehova la itre mekun hne së hna hamën? (b) Nemene la hna xouene hnei itre xan?

⁸ Easa amadrinë Iehova ngöne la easa qaja amamane la lapaune së. Atre hnyawa hi së laka, Iehova a dreng la itre mekun hne së hna hamën ngöne la hna icasikeu. Nyidrëti a wangatrune la itre trengecatre hne së hna kuca thatraqane lai. (E jë la Malaki 3:16.) Kola mama lai ngöne la Nyidrëti a amanathithi së. Nge madrine catre Nyidrëti la easa thele troa trongëne la itre hna amekötin.—Mal. 3:10.

⁹ Eje hi, hetre eloine easa qeje mekun ngöne la itre ijine icasikeu. Ngo hetre itre xan ka xou troa hane liim. Maine easë fe la ketre, tha tro pi kö sa kucakuca. Hanawange la itre trepene meköti ne la Tusi Hmitrötr, me itre xaa ceitun me eamo, ka troa xatua së troa hane hamë mekun, ngöne la hna icasikeu.

10. (a) Nemene la hne së hna xouen? (b) Pine nemene matre hetre eloine la xoue së?

¹⁰ Hapeu, hnei epuni fe hna hane xou troa liim ngöne la hna icasikeu? Maine eje hi, tha epuni caasi kö. Ame la easa hane hamë mekun, ke, easa xou. Ngo qëmekene troa thele la aqane troa xomehnöthe la xou, nyipiewekë troa pane atre la kepin matre easa xou. Hapeu, easë kö a xouene troa thëthëhmine la itre mekun nyine troa qaja maine xouene pena troa tria itre ej? Maine jë easa mekun ka hape, nyipiewekë catre kö la itre mekuna i angatr hune la itre së? Hetre eloine la easa xou. Kola amamane laka, hetre hni ne ipië së. Ketre, ka sisitria  catre kö itre xan hu së. Iehova a wangatrune la itre ka hetre hni ne ipië. (Sal. 138:6; Fil. 2:3) Ngo Nyidrëti fe a ajane tro sa atrunyi Nyidrë, me hane hamë ithuecatre kowe la itre trejin ngöne la hna icasikeu. (1 Thes. 5:11) Iehova a hnimi së, nge tro kö Nyidrëti a thue trengecatre koi së.

11. Nemene la itre xaa mekun qa hnine la Tusi Hmitrötr ka troa xatua së?

¹¹ Hanawang la itre xaa mekun qa hnine la Tusi Hmitrötr. Ej a qaja ka hape, itre ka tria asë hi së ngöne la aqane ithanata së. (Iako. 3:2) Atre hnyawa hi Iehova laka, tha ka pexeje kö së, easë me itre trejin me easë e hnine la ekalesia. (Sal. 103:12-14) Itre trejine ka hnimi Iehova me ka hnimi së. (Mar. 10:29, 30; Ioane 13:35) Trotrohnine hi angatr laka, ka tria e itre xaa ijin la itre hne së hna qaja.

12-13. Nemene la hna ini së qa ngöne la itre tulu i Nehemia me Iona?

¹² Pane mekune jë fe la itre xaa ceitun e hnine la Tusi Hmitrötr ka troa xatua së troa triji xou. Hanawange la tulu i Nehemia. Hnei angeice hna nyi hlu kowe la ketre joxu ka tru. Kucakuca catre Nehemia, pine laka, hna thuemacanyi angeice laka, hna thë la itre hag me itre thingene qanahage e Ierusalema. (Neh. 1:1-4) Pane mekune jë së laka, Nehemia a xou me hnehengazo. Kola upi angeice hnene la joxu troa qaja la kepin matre angeic a kucakuca! Hnei Nehemia hna canga thith me sa kowe la joxu. E cili, hnene la joxu hna xatuane la nöjei Akötresie. (Neh. 2:1-8) Hanawange fe la tulu i Iona. Hnei Iehova hna upi angeic koi angetre Nineve. Ngo hnei angeice hna xou me kötr a tro Tasesa eë. (Iona 1:1-3) Hnei Iehova hna xatua angeic, matre hnei angeice hna cainöje koi angetre Nineve. Hetre thangane catre la itre hnei angeice hna qaja koi angatr. (Iona 3:5-10) Ame ngöne la tulu i Nehemia, easa öhne laka, qëmekene troa sa la ketre hnying, nyipiewekë troa pane thith. Nge ame ngöne la tulu i Iona, ke, tro kö Iehova a xatua së troa nyihlue i Nyidrë, ngacama tru la xou së. Eje hi, maine ka hmaloi ekö troa tro fë la maca ne iameköti koi angetre Nineve, haawe, tha ka jole kö troa hane hamë mekun.

¹³ Nemene la itre xaa eamo ka troa xatua së troa hane hamë ithuecatr ngöne la hna icasikeu? Hanawange la itre xaa mekun.

14. Pine nemene matre ka nyipiewekë catre troa hnëkë hnyawa la itre icasikeu, nge eu la ijin tro sa kuca?

¹⁴ Loi e troa hnëkëne la itre icasikeu. Maine tro sa ami ijin me hnëkë hnyawa la itre icasikeu së, tha tro hë sa xou troa hane hamë mekun. (Ite edomë 21:5) Nyipici laka, tha ka ceitu kö la itre porogarame së, göne la itre ijin hnëkë icasikeu. Ame Eloise, ketre trejin trejine föe ka 80 lao macatre, ke hnei eahlo hna canga hnëkëne la Ita Ne Thupe i eahlo e mekene wiik. Öni eahlo: “Hetre eloine hnenge hna kapa, qa ngöne la eni a canga hnëkëne la itre icasikeu.” Ketre, tui Joy, ka huliwa ngöne la drai ka pexej, nge ka majemine hnëkëne la Ita Ne Thup e Mecixen.  Öni eahlo: “Maine tro ni a canga hnëkë qëmekene troa icasikeu, tro ni a hnehene hnyawa la itre mekune ka tru.” Ketre, öni Ike, ketre qatre thup ka pionie, “Ame koi ni, ke ka nyipiewekë troa xomi itre hnepe ijin ngöne la wiik, hune la troa xome la caa drai ka pexej.”

15. Nemene la nyine tro sa kuca matre troa hnëkëne hnyawa la itre icasikeu?

¹⁵ Nemene la nyine tro sa kuca matre tro sa hnëkëne hnyawa la itre icasikeu? Qëmekene troa hnëkë, nyipiewekë troa pane thith, matre troa sipone la uati hmitrötre i Akötresie. (Luka 11:13; 1 Ioane 5:14) Thupene lai, pane goeëne jë la ini. Loi e tro fe a goeëne la taane la ini, memine la itre mekune ka tru, me itre ceitun, me itre hna eköhagen. Ame la easa goeëne trongëne la itre paragarafe, ke nyipiewekë tro sa xome la itre xötr. Loi e tro fe sa lapa mekune la itre ithuemacany, me xome la itre mekun hnei së hna ajane troa qaja. Eje hi, maine tro sa hnëkë hnyawa, tro hë sa kepe thangane qa ngöne ej. Nge tha tro hmaca kö sa xou troa hane hamë mekun.—2 Kor. 9:6.

16. Nemene la itre jiane hna hnëkëne koi së, nge nemene la aqane troa tro sa huliwane itre ej?

¹⁶ Ijije hi tro sa amë e hnine la itre tablete maine mobilis, la itre jiane huliwa ngöne la qene hlapa hne së hna atreine ithanatan. Hnei Iehova hna aijijëne la organizasio i Nyidrë, troa eköthe amë me hnëkëne la itre jiane huliwa ka troa xatua së, matre troa hnëkëne la itre icasikeu. Hetrenyi la application, hna hape, JW Library^® ka aijijë së troa télécharger la itre itusi ngöne tablete maine mobilis. E cili, ijije hi tro sa e me hnëkë, ngöne la nöjei hawa maine pena ngöne la nöjei götrane hne së hna tro kow. Nyimutre la itre ka xome la application JW Library^®, matre troa inine la Tusi Hmitrötr ngöne la itre ijin mano ngöne la hna huliwa maine pena ngöne la hnaini maine ngöne la kola ihamë. Jëne la Watchtower Library (CD-ROM) memine la götrane hna hape, HNË AMI ITUS ngöne la site së, hmaloi hë koi së troa ithel ngöne la easa ini tusi caas.

17. (a) Pine nemene matre loi e tro sa hnëkëne la nyimu mekun? (b) Nemene la itre ini hne së hna xom qa ngöne la video, Nyi Sinee i Iehova Jë—Hnëkëne Jë La Nyine Tro Hmunë a Sa?

¹⁷ Troa hnëkëne la nyimu mekun. Pine nemen? Maine jë, tha tro kö a upi epuni troa sa ngöne la epuni a liim. Maine jë, alanyimu la itre ka liim, matre kola troa iëne hnene la trejin. Nyipiewekë tro la trejin a iëne la itre ka sa, matre troa metrötrëne la traem. Haawe, e tha öhnyi së kö hnei nyidrë, tha tro kö sa wesitr maine kucakuca pena. Loi e tro sa hnëkë nyimu mekun, matre troa sa e thupen. Ketre, ijije hi tro sa e la ketre xötr. Ngo loi e tro sa qeje mekun, ngöne la sipu aqane qaja së, tha tro kö sa e gufan. *

18. Pine nemene matre ka lolo e tha qea menu kö la itre mekun hna hamën?

 ¹⁸ Tha tro kö a qea la itre mekune hna hamën. Ame la itre mekun ka ithuecatr, tre, kolo itre mekun ka co hi me ka hmaloi troa trotrohnin. Haawe, loi e tro sa qaja hi la ka ijij, ngöne la easa hamë mekun. Maine jë, tro hi a 30 secondes. (Ite edomë 10:19; 15:23) Maine ekö hë së hamë mekun ngöne la itre icasikeu, loi e tro sa amamai tulu me qaja hi la ka ijij. Maine tro sa qaja la nyimu mekun me aqean, tro hë la itre trejin a cile troa sa. Tro hë angatr a mekun laka, thatreine kö angatr troa qeje mekun tui së. Ketre, maine tro sa qaja hi la ka ijij, tro lai a aijijëne la itre xan tro fe a hane hamë mekun. Maine easë la ka pane sa, loi e troa hmaloi troa trotrohnine la mekun, me sa mekötine la hnying. The qaja asë kö la itre mekun hna hamëne hnene la paragaraf. Thupene la hna sa mekötine la hnying, ijije hi tro sa isa qaja la itre xaa mekun.—Wange ju la hna eköhagen hna hape, “ Itre Mekun Nyine Troa Hamën”

19. Nemene la aqane tro la trejin a xatua së, ngo nemene la nyine tro sa pane kuca?

¹⁹ Troa qaja kowe la trejin, la paragarafe hne së hna pi hane hamë mekun. Loi e tro sa tro troa wange la trejine qëmekene troa nyiqane la icasikeu. Ame hë la kola ase e la paragaraf, canga liime jë, matre troa öhnyi së hnene la trejin.

20. Pine nemene matre ceitune hi la itre ijine icasikeu memine la easa ce xeni memine la itre sinee së?

²⁰ Loi e tro sa goeëne la itre ijine icasikeu, ceitu me easa ce xeni memine la itre sinee së. Pane mekune jë laka, kola hë epun troa ce xen memine la itre trejin ne la ekalesia me sipo epuni troa hnëkë xen. Nemene la hnei epuni hna troa kuca? Maine jë, tro epuni a nango xou, ngo ame pe, epuni kö a kuca la hnei epuni hna atrein matre troa kuci xeni hnyawa. Iehova a hnëkë xeni ka lolo koi së ngöne la itre icasikeu. (Sal. 23:5; Mat. 24:45) Nge madrine catre Nyidrëti la easa traqa fë la ka ijij. Haawe, hnëkë hnyawa jë, nge catre jë hamë mekun. Tha easë hmekuje kö lai a xeni ngöne la laulau i Iehova, ngo easë fe a nyi ahnahna kowe la ekalesia.