1. Ka David té ka rèsanti pou Jéova, é ka sa pousé-y a fè ?

WA DAVID ékri : « Jéova gran é sé li ki plis mérité yo ba-y louwanj » (Sòm 145:3). I té enmé Jéova, é sé pousa i té ka ba-y louwanj « anmitan a lasanblé-la » (Sòm 22:22 ; 40:5). Sèten kè vou osi ou enmé Jéova é ou dakò èvè pawòl a David lè i di : « O Jéova, Dyé a Izrayèl ki pap’an nou, fò-yo ba-w louwanj, pou touttan ! » (1 Kron. 29:10-13).

2. a) Kijan nou pé ba Jéova louwanj ? b) Ki difikilté sèwten adan nou ka rankontré, é dè ki biten nou ké palé adan awtik-lasa ?

² Jòdijou, on mannyè nou ka ba Jéova louwanj sé lè nou ka bay komantè lè nou réinyon. Men ni sèwten frè é sè ki ni on gwo pwoblèm. Yo vlé pawtisipé, men lapè ka bloké-yo. Ka yo pé fè pou rivé about a pwoblèm-lasa ? Ki konsèy itil pé édé nouchak a bay dé komantè ki ka ankourajé lézòt ? Avan nou réponn a sé kèsyon-lasa, an-nou ègzaminé kat rézon enpòwtan nou ni dè bay komantè lè nou réinyon.

3-5. a) Dapré sa Ébré 13:15 ka èspliké, poukwa nou ka bay komantè lè nou réinyon ? b) Èskè toutmoun oblijé bay menmjan dè répons-la ? Bay on ti èsplikasyon.

³ Jéova ka onoré-nou lè i ka pèwmèt-nou ba-y louwanj (Sòm 119:108). Sé komantè-la nou ka bay adan réinyon an nou ka fè pati dè « sakrifis a louwanj » kè nou ka bay, é ponmoun pé pa fè sa an plas an nou (li Ébré 13:15). Èskè Jéova ka mandé toutmoun fè menm jan dè sakrifis-la, oben bay menm jan dè komantè-la ? Ditoupa !

 ⁴ Jéova sav byen kè noutout pa ni menm kapasité, é kè nou pa adan menm sitiyasyon-la, men i ka ba sé sakrifis-la nou ka ofè-y la onlo valè. Sonjé ki kalté sakrifis sé Izraélit-la té pé ba Jéova. Ni sa ki té pé ofè on timouton oben on kabrit. Men on maléré té pé bay « dé toutrèl oben dé jenn pijon ». É si sé bèt-lasa té two chè pou-y toujou, Jéova té dakò pou i té bay tibwen adan on bon kalité farin (Lév. 5: 7, 11). Farin-la té mwen chè ki sé zozyo-la, men Jéova té ka aprésyé sakrifis-lasa onlo, dépi sété on bon kalité farin.

⁵ A épòk an nou, Bondyé an nou ki plen bonté toujou ka vwè léchòz menmjan la. Lè nou ka fè on komantè, Jéova pa’a mandé-noutout palé byen kon Apolòs. I pa’a mandé-noutout fè kon Pòl nonplis, ki té sav ba moun prèv pou menné-yo a kwè sa i té ka di (Akt 18:24 ; 26:28). Tousa i ka swété, sé kè nou bay sa nou ni dè méyè. Sonjé ti vèv-la ki té ofè dé ti pyès monné. Pou Jéova, madanm-lasa té ni onlo valè pas i té ka bay tousa i té pé bay (Lik 21:1-4).

6. a) Sèlon Ébré 10:24 é 25, ki éfé komantè a lézòt ni asi-w ? b) Kijan ou pé montré rèkonésans a-w lè ou ka tann dé répons ki ka ankourajé-w ?

⁶ Lè nou ka bay komantè, yonn ka ankourajé lòt (li Ébré 10:24, 25). Noutout ka aprésyé dè tann diféran sòt dè komantè adan réinyon an nou. Nou byen enmé tann on timoun lè i ka fè on komantè tou senp ki ka sòti an fon a tchè a-y. Sa ka touché-nou lè nou ka tann on moun ki kontan palé dè on bèl vérité kè i sòti dékouvè an Bib-la. É nou fyèw lèwvwè dé moun, magré yo timid oben kè yo sòti koumansé aprann lang an nou, ka pran kouraj a yo a dé men pou yo réponn (1 Tés. 2:2). Ka nou pé fè pou montré-yo kè nou ka aprésyé éfò a yo ? Apré réinyon fin, nou pé di-yo mèsi pou komantè a yo ki ka ankourajé-nou. Men noumenm osi pé fè éfò pou pawtisipé. Konsa, nou pé ké kontanté-nou dè rèsèvwa ankourajman, men nou ké ankourajé lézòt osi (Wom. 1:11, 12).

7. Ki byenfé sa ka pwokiré-nou lè nou ka réponn ?

⁷ Lè nou ka réponn réinyon, sa ka fè-nou dibyen (Iz. 48:17). Ankijan ? On  prèmyé byenfé, sé kè lè nou ka prévwa dè bay on komantè, sa ka ban-nou anvi préparé-nou byen pou réinyon-la. Lè nou byen préparé pou réinyon-la, nou ka vin konprann Labib plibyen. É pi nou ka konprann Labib byen, pi nou ka apliké byen sa i ka di. On dézyèm byenfé, sé kè lè nou ka pawtisipé adan kozé-la, sa ka édé-nou aprésyé chak réinyon plis ankò. É on twazyèm byenfé, sé kè padavwa sa ka mandé éfò pou réponn, byensouvan, nou ka sonjé sé lidé-la nou bay la lontan apré réinyon-la fin.

8-9. a) Dapré sa ki maké adan Malaki 3:16, ka ou ka di Jéova ka rèsanti lè nou ka réponn ? b) Magrésa, ki difikilté désèrten adan nou ka jwenn ?

⁸ Lè nou ka palé dè fwa an nou, nou ka fè Jéova plézi. Nou pé sèten kè Jéova ka kouté-nou é kè i ka aprésyé toubònman tout éfò nou ka fè pou réponn adan sé réinyon-la (li Malaki 3:16). É i ka béni-nou pou montré-nou jan i kontan padavwa nou fè éfò pou fè-y plézi (Mal. 3:10).

⁹ Asiré pa pétèt, nou ni dé bon rézon dè bay komantè lè nou réinyon. Men magrésa, désèrten pé rivé a pè lévé men a yo. Si sé ka a-w, pa dékourajé. An-nou ègzaminé déotwa prensip èvè ègzanp ki an Bib-la. Aprésa, nou ké vwè dé konsèy vréman itil. Tousa ké édé-nou bay plis komantè lè nou réinyon.

10. a) Ka déotwa adan nou pé rivé a pè ? b) Lè ou pè réponn, sé pé on bon biten. Poukwa ?

¹⁰ Ès ou ka santi on boul an lèstonmak a-w chakfwa ou ni lidé lévé men a-w pou bay on komantè ? Si répons-la sé wi, fò-w sav kè a pa-w tousèl sa ka rivé. An réyalité, lamajorité adan nou ka on tijan pè lè nou ka bay on komantè. Pou santiman-lasa pa bloké-w, fò-w chèché a konnèt sa ki ka fè-w pè. Ès sé pè ou pè oubliyé sa ou vlé di ? Ès ou pè bay on répons ki pa bon ? Oben ès ou pè kè komantè a-w pa ni  menm nivo ki ta lézòt ? Lè-w byen gadé, dèyè tout sé pè-lasa pé ni on bon biten. Yo ka montré kè ou sé on moun ki ni imilité é kè pou-w, lézòt ni plis valè ki-w. Jéova enmé kalité-lasa (Sòm 138:6 ; Filip. 2:3). Men i vlé osi kè ou ba-y louwanj é kè ou ankourajé frè é sè a-w lè ou réinyon (1 Tés. 5:11). Jéova enmé-w é i ké ba-w kouraj-la ou bizwen la.

11. Ki prensip biblik ki pé édé-nou ?

¹¹ Réfléchi asi sé prensip-lasa. Labib ka fè-nou sonjé kè noutout ka fè érè, ki sé adan sa nou ka di, ki sé adan jan-la nou ka di-y la (Jak 3:2). Jéova pa ka mandé-nou dè aji kon dé moun pawfè, é frè é sè an nou nonplis (Sòm 103:12-14). Yo sé fanmi an nou, é yo enmé-nou (Mawk 10:29, 30 ; Jan 13:35). Yo sav byen kè défwa, sa nou anvi di pa’a sòti kon nou té’é vlé.

12-13. Ka ègzanp a Néémi é Jonas ka aprann-nou ?

¹² An-nou réfléchi si déotwa ègzanp ki an Bib-la ki pé édé-nou pa lésé lapè pran lanmen asi nou. Sonjé Néémi. I té sèwvitè a on wa ki té ni onlo pouvwa. I té tris pas i aprann kè ki miray ki pòt a Jérizalèm té krazé (Néém. 1:1-4). Imajiné gwo boul-la i dwèt santi an lèstonmak a-y lè wa-la mandé-y poukisa i té anpenn konsa ! Néémi priyé onfwa-onfwa é aprésa i réponn wa-la. Anfinaldikont, wa-la ba pèp a Bondyé on bèl pal (Néém. 2:1-8). É ka nou ké di dè Jonas ? Lè Jéova voyé-y palé ba moun Niniv, i té tèlman pè kè i chapé kò a-y adan lòt sans-la (Jonas 1:1-3). Men Jéova édé-y é grasa èd-lasa i ay Niniv é i préché ba sé moun-la. É sa i di-yo fè-yo dibyen toubònman (Jonas 3:5-10). Ègzanp a Néémi ka aprann-nou kijan sa enpòwtan pou nou dè priyé avan nou bay on komantè. Ègzanp a Jonas, li, ka aprann-nou kè Jéova pé édé-nou sèvi-y kèlkèswa fòs a pè-la nou ni la. É franchman, ou ka di ni on lasanblé ki pé ka fè moun pè kon sé Ninivit-la ?

¹³ Pou bay komantè ki ka ankourajé lézòt lè-w réinyon, ki konsèy itil ki pé édé-w ? An-nou vwè déotwa ansanm.

14. Poukwa fò-nou préparé réinyon an nou byen, é a ki moman pou nou fè sa ?

¹⁴ Préparé-w pou chak réinyon. Si ou ka prévwa on moman pou préparé-w byen, ou ké pli sèten dè-w lè ou ké ka fè on komantè (Pwov. 21:5). Sé vré kè pou préparé réinyon an nou, noutout pa ni menm pwogram-la. Éloïse, on vèv ki ni pliski 80 lanné, ka koumansé préparé Tou dè Gad a-y dépi an débi a simenn-la. Mi sa i ka di : « An ka konprann sé réinyon-la pli byen lè an ka étidyé sa nou kay vwè lontan alavans. » Joy, ki ka travay aplentan, ka pran on tan lé sanmdi pou étidyé awtik a Tou dè Gad la. Mi sa i ka di : « An enmé lè sé lidé-la frèch an tèt an mwen. » On  ansyen non a-y sé Ike ki byen okipé é ki pyonyé ka di : « An pisimé étidyé on timoman plizyè fwa an simenn-la, olyé an étidyé onlo onsèl kou. »

15. Ka pou-w fè pou préparé réinyon a-w byen ?

¹⁵ Ka pou-w fè pou préparé réinyon a-w byen ? Chakfwa ou kay étidyé, koumansé pa mandé Jéova lèspri sen a-y (Lik 11:13 ; 1 Jan 5:14). Aprésa, pran kèlkè minit pou vwè dè kibiten awtik-la ka palé. Pousa, analizé tit-la, sé soutit-la, sé imaj-la é sé karé-la. Aprésa, pannan ou ka étidyé chak sé paragraf-la, li on maksimòm dè vèwsé adan séla yo ka pwopozé-w la. Réfléchi byen asi sé lidé-la, siwtou séla ou té’é swété itilizé adan répons a-w. Pi ou ké préparé-w byen, pi sa ké fè-w dibyen, é pétèt ou ké pi alèz pou-w réponn (2 Kor. 9:6).

16. Ki zouti ou ni a dispozisyon a-w, é kijan ou ka sèvi èvè yo ?

¹⁶ Si sa posib, sèvi èvè sé zouti élèktronik la ki disponib adan on lang ou konnèt. Jéova ka sèvi èvè òwganizasyon a-y pou ban-nou zouti élèktronik ki ka édé-nou préparé sé réinyon-la. Grasa JW Library^®, nou pé téléchawjé piblikasyon ki fèt pou étidyé anlè pòwtab an nou oben anlè tablèt an nou. Konsa apré, kèlkanswa moman-la é koté-la nou yé la, nou pé étidyé-yo, é si sa pa posib, omwen nou pé toujou li-yo oben kouté-yo. Ni sa ki ka sèvi èvè JW Library^® pou étidyé pannan pòz a midi a yo, ki sé lè yo lékòl, ki sé lè yo ka travay. Ni dòt ankò ka pwofité pannan yo an chimen. Anplisdisa, grasa Watchtower Library é BIBLIYOTÈK ANLÈ ENTÈWNÈT a Lawatchtower, si nou vlé rantré an nannan a on lidé, sa vréman fasil.

17. a) Poukwa sa byen dè préparé plizyè répons ? b) Ka vidéo-lasa Deviens l’ami de Jéhovah : Prépare ta réponse aprann-vou ?

¹⁷ Si ou pé, préparé plizyè répons pou chak réinyon. Poukwa ? Pas a pa chakfwa ou ké lévé men a-w yo ké ba-w réponn. Douté-w byen kè ni dòt moun ki ké lévé men a yo anmenmtan ki-w, é frè-la ki ka kondui étid-la pé rivé a chwazi yonn adan yo. Anplisdisa, pou réinyon-la fin a lè, i ké pétèt oblijé diminyé asi kantité komantè moun ké bay pou désèrten kèsyon. Alò, pa kòlè é pa dékourajé si i pa ba-w réponn an koumansman a étid-la. Si ou préparé plizyè répons, ou ké ni plis okazyon pawtisipé. Pa ègzanp, ou pé préparé lèkti a on vèwsé. Men si ou pé, préparé-w osi pou bay on komantè évè mo a-w ki ta-w *.

18. Poukwa fò-nou bay komantè ki toukout ?

¹⁸ Bay komantè ki toukout. Byensouvan,  sé komantè-la ki pli ankourajan la ka toukout é yo ka tou senp. Alò, fè on éfò pou komantè a-w pa dépasé 30 sègond (Pwov. 10:19 ; 15:23). Si sa ka fè plizyè lanné ou ka réponn lasal, sa enpòwtan kè ou bay lègzanp an domenn-lasa. Si ou ka fè komantè ki konpliké é ki ka diré plizyè minit, sa pé jenné lézòt, é yo pé rivé a kwè kè yo pé’é pé bay répons ki menm nivo ki ta-w. Anplis, lè sé komantè-la kout, plis moun pé pawtisipé adan réinyon-la. Lè sé-w prèmyé yo chwazi pou réponn, bay on komantè tou senp é ki ka réponn dirèktèman a kèsyon-la. Pa éséyé palé dè tout sé lidé-la ki an paragraf-la. Lè yo fin palé dè lidé prensipal la, a moman-lasa, ou pé fè on komantè si ondòt lidé (gadé karé-la «  Plizyè fason ou pé pawtisipé »).

19. Ka ou pé mandé frè-la ki ka kondui étid-la, men ka pou-w fè adan ka-lasa ?

¹⁹ Fè fré-la ki ka kondui étid-la sav kè ou té’é byen vlé réponn adan tèl ou tèl paragraf. Si ou désidé fè sa, palé ba-y lontan avan réinyon-la koumansé. Lè lè-la ka rivé pou-w réponn, lévé men a-w vitman é byen ho, konsa i ké pé vwè-y.

20. An ki sans nou pé di kè on réinyon krétyèn sé tibwen kon on rèpa antrè bon zanmi ?

²⁰ Lè nou kay adan on réinyon krétyèn, sé tibwen konsi nou té kay adan on rèpa antrè bon zanmi. Imajiné kè déotwa zanmi a lasanblé lokal a-w ka envité-w adan on ti michwi é kè yo ka mandé-w dè préparé on ti biten. Kijan ou ké réyaji ? Pétèt sa ké istrésé-w tibwen, men sèten ou ké fè tousa ou pé pou menné on biten kè toutmoun ké aprésyé. Adan sé réinyon-la, Jéova ka mété douvan nou on tab plen èvè onpakèt bon biten (Sòm 23:5 ; Mat. 24:45). É i ka kontan lè nou ka pòté on ti kado tou senp, lè nou ka bay sa nou ni dè méyè. Alò, préparé réinyon a-w byen é fè tousa ou pé pou pawtisipé. Konsa, non sèlman ou ké manjé asi tab a Jéova, men anplisdisa ou ké pòté on kado kè ou ké pé pawtajé èvè lasanblé-la.