1. ¿Mbaʼépa David oñandu vaʼekue Jehováre, ha mbaʼépa ojapo upe haguére?

RRÉI David oskrivi vaʼekue: “Jehová ningo ndaijojahái, haʼe omerese ojeadora chupe” (Sal. 145:3). David ohayhu kuri Jehovápe ha upéva omomýi chupe ombotuicha hag̃ua Ñandejárape pe “kongregasión apytépe” (Sal. 22:22; 40:5). Katuete ningo nde rehayhu avei Jehovápe ha eipota ojejapo la heʼi vaʼekue David: “Toñemombaʼeguasu koʼág̃a ha opa árare Israel Jára, ñande ru Jehovápe” (1 Crón. 29:10-13).

2. a) ¿Mbaʼéichapa ikatu ñambotuicha Jehovápe? b) ¿Mbaʼépa heta ermáno ha ermána ombohovái, ha mbaʼe rehepa ñañeʼẽta?

² Koʼág̃arupi avei ñande ñambotuicha Jehovápe ñakomenta jave rreunionhápe. Péro heta ermáno ha ermánape ijetuʼu ojapo hag̃ua upéva. Haʼekuéra okomentase rreunionhápe, péro okyhyjégui ndaikatúi ojapo upéva. ¿Mbaʼépa ojapo vaʼerã hikuái anive hag̃ua okyhyje? ¿Mbaʼe konséhopa enterovévape ñanepytyvõ jajapo hag̃ua komentário oporomokyreʼỹva? Ñambohovái mboyve koʼã porandu, jahecha raẽta 4 mbaʼe ohechaukáva mbaʼérepa ñande ñakomenta rreunionhápe.

3-5. a) Ohechaukaháicha Hebreos 13:15, ¿mbaʼérepa ñakomenta rreunionhápe? b) ¿Mbaʼérepa jaʼekuaa Jehová nohaʼarõiha ñandehegui ñakomenta peteĩchapa? Emyesakã.

³ Jehová omeʼẽ entérope pe oportunida omombaʼeguasu hag̃ua chupe (Sal. 119:108). Ñakomenta jave rreunionhápe haʼete ñameʼẽva “peteĩ sakrifísio Ñandejárape”, ha jaikuaaháicha, upéva ndaikatúi ótro ojapo ñande rehehápe (elee Hebreos 13:15). ¿Mbaʼépa nde repensa? ¿Ojerurénepa Jehová káda únope el mísmo sakrifísio, térã komentário? Nahániri, haʼe ningo ndojapomoʼãi upéva.

 ⁴ Jehová oikuaa porã ñande ndahaʼeiha peteĩchapa, oĩ ikatupyryvéva ha oĩ avei isituasión idiferénteva. Haʼe omombaʼeterei umi sakrifísio ñameʼẽva chupe. Epensamína mbaʼeichagua sakrifísiopa haʼe oasepta vaʼekue umi israelítagui. Oĩ kuri ikatúva oikuaveʼẽ peteĩ ovecha raʼy térã peteĩ kavara. Umi imboriahúva katu omeʼẽ vaʼekue “mokõi tortóla térã mokõi palóma raʼy”. Péro umi ndaikatúiva omeʼẽ ni upéva, ikatu omeʼẽ “arína iporãva una décima de efá” (Lev. 5:7, 11). Pe arína varatovéramo jepe, Jehová ndorrechasái upéva, haʼéma guive pe “arína iporãva”.

⁵ Ñandejára ñanderayhuetéva, koʼag̃aite peve osegi opensa upéicha. Ñakomenta jave rreunionhápe, haʼe nohaʼarõi ñaneñeʼẽkuaa Apolos ojapo haguéicha, ni ñaporokonvensekuaa Pábloicha (Hech. 18:24; 26:28). Jehová oipota ñañehaʼãmbaite jajapo hag̃ua umi komentário iporãva omeʼẽha peve ñande kapasida. ¿Ñanemanduʼápa pe viúda omeʼẽ vaʼekuére mokõi monedaʼi saʼieterei ovaléva? Jehová omombaʼeterei vaʼekue chupe pórke omeʼẽ la iporãvéva orekóva (Luc. 21:1-4).

6. a) Heʼiháicha Hebreos 10:24, 25, ¿mbaʼéichapa ikatu ñanepytyvõ umi komentário ñahendúva? b) ¿Mbaʼépa ikatu jajapo jahechauka hag̃ua ñamombaʼeha umi komentário ñanemokyreʼỹva?

⁶ Ñañomokyreʼỹ ñane komentário rupive (elee Hebreos 10:24, 25). Ajépa igustoite ñahendu rreunionhápe diferénte komentário. Koʼýte jaguerohory umi mitã okomenta jave sensillomi ha ipyʼaite guive. Ñanembopyʼarory ñahendu jave peteĩ ermáno vyʼápe omombeʼuha peteĩ mbaʼe pyahu oaprende vaʼekue. Avei jaguerohory umi oñehaʼãvape ipyʼaguasu okomenta hag̃ua, hiʼotĩramo jepe térã oimérõ oaprende ramo hína ñane idióma (1 Tes. 2:2). ¿Mbaʼépa ikatu jajapo jahechauka hag̃ua ñamombaʼeha la ojapóva hikuái? Rreunión rire ikatu jaagradese chupekuéra ñanemokyreʼỹ haguére la ikomentário. Péro ndahaʼéi upévante la ikatúva jajapo. Ñande voi ikatu ñakomenta rreunionhápe. Péicha ndahaʼemoʼãi ñandénte la ñanekyreʼỹtava ótro okomenta jave, síno ñande avei ikatúta ñaporomokyreʼỹ (Rom. 1:11, 12).

7. ¿Mbaʼérepa ou porã ñandéve ñakomenta jave?

⁷ Ñandéve voi ou porã ñakomenta jave (Is. 48:17). ¿Mbaʼérepa jaʼekuaa upeichaha?  Primero, jadesidíramo ñakomentataha, ñanekyreʼỹta jajeprepara porãve hag̃ua rreunionrã. Jajeprepara porãvo katu, ñantende porãve Ñandejára Ñeʼẽ, ha hesakãvévo ñandéve umi mbaʼe jastudiáva, jajapo porãvéta la ñaaprendéva. Segundo, igustovéta ñandéve umi rreunión pórke ikatúta japartisipa porãve. Ha tercero, ñañehaʼã rupi ñakomenta hag̃ua, upe rire ñanemanduʼa areve umi mbaʼe jaʼe vaʼekuégui.

8, 9. a) Ohechaukaháicha Malaquías 3:16, ¿mbaʼéichapa nde repensa Jehová oñeñanduha rekomenta jave? b) ¿Mbaʼéichapa oĩ oñeñandúva sapyʼánte?

⁸ Ñakomenta jave jahechauka jajeroviaha Jehováre ha upéva ombovyʼa chupe. Jehová ningo ohendu ñakomenta jave rreunionhápe, ha omombaʼeterei ñañehaʼã haguére jajapo upéva (elee Malaquías 3:16). Haʼe ñanevendesi ñañehaʼã jave ñambovyʼa chupe, péicha ohechauka oguerohoryha la jajapóva (Mal. 3:10).

⁹ Jahechaháicha, oĩ heta mbaʼe ñanemomýiva ñakomenta hag̃ua rreunionhápe. Upéicharõ jepe, ikatu oĩ gueteri okyhyjéva omopuʼã hag̃ua ipo okomenta hag̃ua. Oiméramo nde reñeñandu péicha, ani reñedesanima. Jahechamína unos kuánto téxto bíblico, ehémplo ha konsého ñanepytyvõtava ñakomentave hag̃ua rreunionhápe.

10. a) ¿Mbaʼérepa heta oĩ okyhyjéva okomentáta jave? b) ¿Mbaʼérepa jaʼekuaa sapyʼánte ndaivaiguasuiha jakyhyje ñakomenta hag̃ua?

¹⁰ ¿Ndépa ndepyʼa pererepa jepi repensa haguénte voi rehupitaha nde po rekomenta hag̃ua? Oiméramo péicha, ani repensa ndévente ojehuha upéva. Amo ipahápe ningo heta oĩ okyhyjéva jepi okomentáta jave. Embohovái hag̃ua ko provléma, iporãta eikuaa raẽ mbaʼépa la nemongyhyjéva. ¿Rekyhyjépa nderesaráirõ g̃uarã la erétavagui, térã ekyhyje rejavýrõ g̃uarã la rrespuésta? ¿Ejepyʼapýpa epensa rupi ne komentário naiporãmoʼãiha umi ótro komentárioicha? Añetehápe ndaivaiguasúi hína rekyhyje, pórke upéva ikatu ohechauka neumildeha ha epensaha umi ótro tuichaveha ndehegui. Jehová oguerohoryeterei umichagua persónape  (Sal. 138:6; Filip. 2:3). Péro haʼe oipota avei embotuicha chupe ha emokyreʼỹ ne ermanokuérape rreunionhápe (1 Tes. 5:11). Jehová nderayhu ha nembopyʼaguasúta rekomenta hag̃ua.

11. ¿Mbaʼe téxto bíblicopa ikatu ñanepytyvõ?

¹¹ Jahechamína unos kuánto téxto bíblico. La Biblia heʼi enterovéva jajavyha la jaʼévape ha avei jaʼe lájape (Sant. 3:2). Jehová nohaʼarõi voi perfeksión ñandehegui, ha ñane ermanokuéra nohaʼarõi avei upéva (Sal. 103:12-14). Haʼekuéra ningo ñane família ha ñanderayhu (Mar. 10:29, 30; Juan 13:35). Ñane ermanokuéra oikuaa voi ñakomenta jave, sapyʼánte nosẽmoʼãiha ñandéve ñandegustahaichaite.

12, 13. ¿Mbaʼépa ñaaprende Nehemías ha Jonás ehémplogui?

¹² Epensamína umi ehémplo oĩvare la Bíbliape, upéva nepytyvõta ani hag̃ua rekyhyje. Umíva apytépe oĩ Nehemías ehémplo. Haʼe oservi vaʼekue peteĩ rréi omanda guasúva palásiope. Nehemías ndovyʼái kuri pórke ohendu Jerusalén murálla ha hokẽnguéra hoʼapa hague (Neh. 1:1-4). Oime vaʼerã Nehemías ipyʼa pererepa raʼe pe rréi oporandúrõ guare chupe mbaʼérepa oñeñandu vaiete. Haʼe pyaʼe oñemboʼe Jehovápe orresponde mboyve pe rréipe. Amo ipahápe pe rréi tuichaiterei oipytyvõ Ñandejára puévlope (Neh. 2:1-8). Epensamína avei Jonás rehe. Jehová ojerure kuri chupe oraha hag̃ua peteĩ mensáhe Nínivepe, péro haʼe okyhyjeterei ha osẽ oho ótro ladoite (Jon. 1:1-3). Upéi Jehová oipytyvõ chupe okumpli hag̃ua iñasignasión. Umi mbaʼe Jonás heʼi vaʼekue umi ninivítape, tuichaiterei oipytyvõ chupekuéra (Jon. 3:5-10). ¿Mbaʼépa ñaaprende koʼã ehémplogui? Nehemíasgui ñaaprende iñimportanteha ñañemboʼe ñarresponde mboyve. Ha Jonásgui katu ñaaprende Jehová ikatuha ñanepytyvõ jaservi hag̃ua chupe jakyhyjetereíramo jepe. Sapyʼánte ikatu jakyhyje ñakomenta hag̃ua, péro ndaipóri kongregasión ikatúva ñanemongyhyje Nínive oporomongyhyje haguéicha.

¹³ ¿Mbaʼe konséhopa nepytyvõta ikatu hag̃uáicha ne komentário oporomokyreʼỹ? Jahechamína unas kuánta suherénsia.

14. ¿Mbaʼérepa jajeprepara porã vaʼerã rreunionrã, ha mbaʼe moméntopepa ikatu jajapo upéva?

¹⁴ Jajeprepara porã rreunionrã. Emoĩramo peteĩ óra ejeprepara porã hag̃ua rreunionrã, ndepyʼaguasuvéta ekomenta hag̃ua (Prov. 21:5). Péro jaikuaaháicha entéronte jareko diferénte aktivida. Eloise ningo peteĩ viúda orekóva mas de 80 áño. Haʼe ostudia rrevísta Ñemañaha oñepyrũre voi pe semána. Eloise heʼi: “Voi reheve ajepreparáramo igustove chéve umi rreunión”. Peteĩ ermána hérava Joy ha ombaʼapóva tódo el día, oaparta sabadokue ostudia hag̃ua irrevísta. Haʼe heʼi: “Igústo chéve pórke péicha chemanduʼa porã pe estúdiore”. Peteĩ ansiáno hérava Ike heta hembiapo, ha oservi avei kómo prekursór. Haʼe heʼi: “Ahechakuaa okonveniveha chéve astudiárõ michĩ  mimi pe semána aja ajapo rangue upéva una vetépe”.

15. ¿Mbaʼépa ikatu rejapo rejeprepara porã hag̃ua rreunionrã?

¹⁵ ¿Mbaʼéichapa ikatu rejeprepara porã rreunionrã? Eñepyrũ mboyve restudia, iporãta rejeruréramo Jehovápe ijespíritu sánto (Luc. 11:13; 1 Juan 5:14). Upéi ikatu remaña pe títulore, umi suvtítulo, umi taʼangáre ha avei umi rrekuádro oĩvare. Upéva nepytyvõta reikuaa hag̃ua mbaʼe rehepa oñeñeʼẽta upe artíkulope. Eleévo umi párrafo, eñehaʼã avei elee umi téxto bíblico oĩva pype. Iporãta avei ejepyʼamongetáramo pe informasión releévare, ha ejesarekove umi mbaʼe rekomentasévare rreunionhápe. Añetehápe ideprovechoitereíta ndéve rejeprepara porãramo rreunionrã, ha avei ifasilvéta ndéve rekomenta hag̃ua (2 Cor. 9:6).

16. ¿Mbaʼeichagua erramiéntapa jareko jajeprepara hag̃ua rreunionrã, ha mbaʼéichapa nde reipuru umíva?

¹⁶ Eñehaʼã eipuru umi erramiénta elektrónika jarekóva. Jehová ojevale iñorganisasiónre omeʼẽ hag̃ua ñandéve hetaiterei erramiénta ñanepytyvõva jajeprepara hag̃ua rreunionrã. Por ehémplo, ikatu reipuru pe aplikasión JW Library^® remboguejy hag̃ua nde selulár térã távletpe umi puvlikasión ojepurúva rreunionhápe. Péicha ifasilvéta ndéve restudia hag̃ua oimehápe ha pe óra opyta porãvehápe ndéve. Ha oiméramo jepe restudiáta ótro moméntope, ikatútama relee térã rehendu pe informasión. Oĩ algúno oipurúva ko aplikasión ostudia hag̃ua opytuʼu aja itravahohápe, rrekréo aja eskuélape térã koléhiope, ỹrõ katu oviaha jave. Ótra erramiénta jarekóva haʼe pe Watchtower Library, ha avei pe VIVLIOTÉKA OĨVA INTERNÉTPE Watchtower^™. Umíva ñanepytyvõ ñainvestiga porãve hag̃ua umi mbaʼe jastudiáva.

17. a) ¿Mbaʼérepa iporãvéta repreparáramo heta komentário? b) ¿Mbaʼépa ikatu reaprende pe vidéo héravagui Eikókena Jehová amígoramo: Eprepara ne komentariorã?

¹⁷ Ikatúramo, reprepara vaʼerã heta komentário. ¿Mbaʼérepa iporãta rejapóramo upéva? Ikatu hína noñemeʼẽi ndéve peteĩ komentário pórke upe moméntope ótro ohupi la ipo ha oñemeʼẽ chupe okomenta hag̃ua. Sapyʼánte avei pe konduktór ndaikatúi omeʼẽ hetápe okomenta hag̃ua ikatu hag̃uáicha pe rreunión opa órape. Upévare ani ndepochy ni eñedesanima oimérõ noñemeʼẽi ndéve rekomenta hag̃ua oñepyrũvo oñehesaʼỹijo pe artíkulo. Péro repreparáramo heta komentário, erekóta hetave oportunida repartisipa hag̃ua. Ikatu por ehémplo rejeprepara relee hag̃ua peteĩ téxto bíblico, péro ikatúramo, eprepara vaʼerã peteĩ komentário ne ñeʼẽtépe voi. *

18. ¿Mbaʼérepa iporãta mbykymínte rekomentáramo?

 ¹⁸ Mbykymínte ekomenta. Hetave vése umi komentário mbykýva ha isensíllova la ñanemokyreʼỹvéva. Upévare rekomenta jave reñehaʼã vaʼerã ani rehasa 30 segúndo (Prov. 10:19; 15:23). Oiméramo nde heta áñorema rekomenta rreunionhápe, iñimportánte nde voi remoĩramo ehémplo iporãva rekomentávo mbykymínte. ¿Mbaʼépa oikóta ipukuetereíramo la ne komentário? Ikatu umi ermáno noñanimavéima ohupi ipo oimoʼãgui ndaikatumoʼãiha okomenta ndéicha. Umi komentário ipukúramo, saʼive ermáno ikatúta opartisipa pe rreuniónpe. Upévare iporã entéro ñañehaʼã ñakomenta sensillomi ha hesakuaitépe, koʼýte oñemeʼẽramo ñandéve pe primer komentário peteĩ párrafope. Ani rekomenta kompléto pe informasión oĩva umi párrafope, upéva rangue iporãvéta rekomenta raẽ pe púnto iñimportantevéva, péicha ótro ikatúta okomenta umi púnto oĩvéva pe párrafope (ehecha pe rrekuádro hérava “ ¿Mbaʼépa ikatu akomenta?”).

19. ¿Mbaʼéichapa pe okondusíva ikatu nepytyvõ, péro mbaʼépa iporãta nde rejapo upearã?

¹⁹ Ere pe okondusívape mbaʼe párrafopepa rekomentase. Redesidíramo rejapotaha upéva, voi porã reñeʼẽ vaʼerã pe okondusívandi oñepyrũ mboyve pe rreunión. Ha og̃uahẽvo pe moménto oñekomenta hag̃ua upe párrafope, pyaʼe ehupi la nde po ha ehupi yvate porã ikatu hag̃uáicha pe ermáno nderecha.

20. ¿Mbaʼéicha rupípa ikatu ñakompara umi rreunión ku ñañeinvitarõguáicha peteĩ karurã?

²⁰ Ñaime jave rreunionhápe, haʼete ñañembyatýva ñane amigokuérandi jakarupa hag̃ua oñondive. Epensamína reñeinvitaha peteĩ karuhápe ha entéro orahaha peteĩ mbaʼe ojeʼu hag̃ua. Ndéve ojeʼe eraha hag̃ua avei algúna kósa ekomparti hag̃ua hendivekuéra. Péicha jave ikatu rejepyʼapy, péro reñehaʼãmbaitéta eraha peteĩ mbaʼe entérope ogustátava. Ñaime jave rreunionhápe, Jehová ñaneinvita hógape ha omeʼẽ ñandéve tembiʼu peteĩ mesa renyhẽte (Sal. 23:5; Mat. 24:45). Upévare Jehová katuete ovyʼáta jaguerúramo álgo isensíllova péro pe iporãvéva ikatúva ñameʼẽ. Upévare iporãta rejeprepara porãramo rreunionrã ha eñehaʼã ekomenta meme. Upéicha ikatúta eju eguapy Jehová mesápe rekaru hag̃ua, ha avei haʼetéta ku eguerúva peteĩ mbaʼe ikatúva ekomparti ermanokuérandi.