1. Was hot Tawi kexpiirt iwich Yeehoowa, un was hot tas iim uf kemuut fer se mache?

 Kheenich Tawi hot kexrip: “Yeehoowa is kroos un hot ale loop fertiint.” (Psal. 145:3) Tawi hot Yeehoowa keliipt un tes weeche hot eyer tee keloopt “in te kemaynt“. (Psal. 22:22; 40:5) Sicher, liipst tuu Yeehoowa aach un nëmst aan Tawi sayn wërter: “Tuu solst keloopt sin, oo Yeehoowa, te Kot fon unser fater Israël, fer imer.“ (1 Kro. 29:10-13)

2. (a) Wii khene mer Yeehoowa loope? (b) Was fer xwiirichkheet mache etliche priiter mit? Un was wole mer uns erinere?

² Hayt se taache, khene mer Yeehoowa liipe wën mer teel mache in te fersamlunge. Awer fer etliche priiter is tas net laycht. Tii wole teel mache, awer mise mit etwas xlimes um keen: angst. Was khene se mache fer ti angst iwer khome? Was fer foerxlache khene uns helfe uf muutiche komentaare kepe? Eep mer tiise frooche antworte, wole mer uns erinere fier wichtiche motiiwe fer teel mache in te fersamlunge.

3-5. (a) Soo wiis in Hepreeyer 13:15 saat, warom komentaare kepe? (b) Meechte se ale komentaare kepe mise in ti selwich aat? Lee aus.

³ Meyer al hon ti eere fer Yeehoowa loope. (Psal. 119:108) Unser komentaare sin teel fon unser “opfer fon loop”, un nimant khan tiise opfer uf unser plats mache. (Lees Hepreeyer 13:15.) Awer ferlangt Yeehoowa fon uns ale ti selwiche sorte opfer, orer komentaare? Nee!

⁴ Yeehoowa wees tas mer unerxiitliche umxteente un apiliteete hon un tee kept weyert tsu te opfer woo yeete eene mache khan. Tenk aan ti sorte opfer woo Yeehoowa fon ti israeliiter aan kenom hot. Etliche khonte een xoof orer tsiiche pok opfer. Awer, wën te israeliiter aarm waar, khont tee “tswaay turtel taupe orer tswaay yunge taupe” opfere. Un, wën tee khont soo kaar net ti feechel opfere, hat Yeehoowa tas “tseente teel fon een ëfa fon fayne meel” aan kenom. (Lew. 5:7, 11) Tas meel waar tas pilichste opfer. Awer Yeehoowa hot weyert kep tsu tiise opfer wën te israeliiter “fayn meel” kep hot.

⁵ Yeehoowa, unser liipe Kot, hot sich net keënert. Wën mer komentaare kepe, waart Kot net tas mer soo kuut xpreche wii Apolo orer wii Phaul. (Aph. 18:24; 26:28) Yeehoowa wil nuer tas mer unser pestes kepe. Eriner tich fon te witfraa woo tswaay kleene nikele kep hot. Yeehoowa hat se keliipt wayl tii tas peste kep hot woo se khont. (Luk. 21:1-4)

6. (a) Soo wiis in Hepreeyer 10:24, 25 xteet, wii xpiire mer uns wën mer ti anere sayn komentaare heere? (b) Wii khanst tuu petanklich sin weeche tiise komentaare?

⁶ Torich unser komentaare tuun mer eene te anere uf muute. (Lees Hepreeyer 10:24, 25.) Meyer al heere kërn unerxiitliche komentaare. Meyer fraye uns iwich ti keweenliche un ufrichtiche antworte fon te khiner un wën mer heere yemant xpreche iwich etwas nayes woo er raus kefun hot. Anere, wuner uns wën se sich ‘koraaj nëme’ fer een komentaar kepe, opwool se xay sin orer sin unser xprooch noch am lërne. (1 Tes. 2:2) Wii khene mer tsayche tas mer petanklich sin weeche iire aanxtrengung? Noo ti fersamlung khene mer tanke iire ufmuutiche komentaar. Orer meyer khene selepst komentaare kepe. Soo wëre net nuer meyer uf kemuut, awer aach ti anere. (Rom. 1:11, 12)

7. Warom is es kuut fer uns komentaare kepe?

⁷ Komentaare kepe is kuut fer uns selepst. (Isa. 48:17) Wii soo? Eyerst, wën mer wole een antwort kepe, sin mer mee motiwiirt fer ti fersamlung kuut foer perayte. Tan, wën mer uns kuut perayte, ferxteen mer Kotes Wort fiil peser. Un soo peser wii mer sayn Wort ferxteen, peser khene mer aan wëne was mer lërne. Tsweete, ti fersamlunge kefale uns peser wën mer teel mache. Trite, wayl mer mise uns aan xtrenge fer een komentaar kepe, erinere mer uns fer een lang tsayt ti phunkte woo mer triwer kexproch hon.

8-9. (a) Soo wiis in Malakias 3:16 xteet, was mënst tuu wii Yeehoowa sich xpiirt wën mer antworte kepe? (b) Un was is fer etliche xweer?

⁸ Meyer mache Yeehoowa froo wën mer iwich unser klaape xpreche. Sicher, Yeehoowa heert wën mer een komentaar kepe un tee kept fiil weyert tsu unser aanxtrengung. (Lees Malakias 3:16.) Wën mer uns aan xtrenge fer Yeehoowa kefale, tuut tee uns seechne. (Mal. 3:10)

⁹ Tas is aarich kuut teel mache in te fersamlunge. Awer toch noch, hon etliche angst fer ti hant aan heepe. Wëns tuu tich soo xpiirst, kep net uf. Meyer tuun yets uner suuche etliche Piipel tekste, tswaay payxpiile fon frier un foerxlache woo uns helfe khene fer mee komentaare kepe in te fersamlunge.

10. (a) Was fer angst xpiire fiil fon uns? (b) Warom khan es een kuute tsayche sin angst hon fer een komentaar kepe?

¹⁰ Fiil xpiire sich ëngstlich nuer am tenke fer ti hant heepe fer een antwort kepe. Wëns tich soo aan is, sicher pist tuu net te eensiche. Ti meyerste fon uns xpiire sich een pisye engstlich fer een antwort kepe. Awer, fer tas iwerkhome, must tuu ti motiiw fon tiise propleem raus kriin. Meechts tuu angst hon tas tuu teest ferkese was tuu saan wolst orer teest etwas ferkheertes saan? Orer tenkst tuu tas tayne komentaar net soo kuut weyer wii ti anere priiter sayne? Fer ti woerheet saan, soo tenke khan een kuute tsayche sin. Tas tsaycht tas tuu teemuutich pist un tas tuu ti anere kreeser aan siist wiis tuu. (Psal. 138:6; Fili. 2:3) Awer Yeehoowa wil aach tas tuu iim loope solst un tayne priiter uf muute in te fersamlung. (1 Tes. 5:11) Yeehoowa liipt tich un wërt tich ti koraaj kepe woos tuu prauchst.

11. Was fer Piipel tekste khene uns helfe?

¹¹ Kuk etliche tekste. Ti Piipel saat tas mer al etwas ferkheertes saan orer in een ferkheert aat was saan. (Tya. 3:2) Yeehoowa un aach unser priiter waarte net tas mer perfekt sole sin. (Psal. 103:12-14) Ti priiter sin toch unser familye un liipe uns. (Mar. 10:29, 30; Yoo. 13:35) Tii ferxteen wën als mool unser komentaar net kraat soo is wii mer kepleent hon.

12-13. Was lërne mer fom Neemias un Yoonas sayn payxpiile?

¹² Etliche piiplixe payxpiile khene tich helfe tayn angst iwerkhome. Tsum payxpiil, tenk aan Neemias. Tee hot een mechtiche kheenich ketiint. Neemias waar traurich wayl tee wust tas ti mauer un ti toore fon Yeruusalem in xtike laye teete. (Nee. 1:1-4) Tenk mool aan ti angst woo tee kexpiirt hot wii te kheenich tëm kefroot hot warom tee traurich weyer! Neemias hot klaych tsu Yeehoowa kepeet un keantwort. Tsum ën, waar te kheenich een kroos hilef fer Kot sayn folek. (Nee. 2:1-8) Tenk aach aan Yoonas. Wii Yeehoowa ferlangt hot tas tee selt mit te niniwiiter xpreche keen, Yoonas hot soo een kroos angst kriit tas tee aus keris is. (Yoo. 1:1-3) Awer, mit Yeehoowa sayn hilef, khont tee fer tas folek in Niiniwe preetiche. Un sayn wërter hon kroos unerxiit kemacht fer tiise xtat. (Yoo. 3:5-10) Was lërne mer fon tiise payxpiile? Fon Neemias lërne mer tas es wichtich is peete eep mer een komentaar kepe. Un fon Yoonas lërne mer tas Yeehoowa uns helfe khan iim tiine, ale tëm mer kroos angst hon. Wën mer uns noo tenke een antwort kepe in te fersamlunge is fiil laychte wii in Niiniwe preetiche, kel?

¹³ Was fer foerxlache khene tich helfe uf muutiche komentaare in ti fersamlunge kepe? Wole mer etliche siin.

14. Warom mise mer uns fer ti fersamlunge kuut perayte, un wën khene mer tas mache?

¹⁴ Peray tich foer fer yeete fersamlung. Wëns tuu een tsayt tich lost fer tich kuut perayte, finst tuu tas laychte een komentaar kepe. (Xpr. 21:5) Yeete persoon hot sayn rotiin. Eloise, een witfraa fon unkefeer 80 yoer, perayt te Wachthorm klaych am aanfang fon te woch. Tii saat: “Ich hon mee nuts fon ti fersamlung wën ich se een tsayt foer raus perayte.” Joy, een xwester woo te kanse taach xaft, lost sich een tsayt samstaachs fer te Wachthorm xtutiire. Tii saat: “Ich hon te sache kërn friix in te ketanke.” Ike, een elteste woo aach pyoneer is, saat: “Fer mich is peser khortse tsayte torich ti woch xtutiire wii ales uf mool.”

15. Wii khanst tuu tich foer perayte fer ti fersamlunge?

¹⁵ Wii is ti pest aat fer sich perayte fer ti fersamlunge? Peet fer Yeehoowa un ferlang sayn hayliche kayst fer yeete xtuutyum. (Luk. 11:13; 1 Yo. 5:14) Tan, nëm tich phaar minute fer tenke am thitel un uner thitel, aan ti pilter un ti frooche am ën fom artikel. Fersuuch, in yeete apsats, soo fiil tekste leese wii mechlich. Tenk aan was tuu leest, haupstseechlich aan ti antworte woos tuu kepe wilst. Soo fiil peser wiis tuu tich foer peraytst, mee nuts khanst tuu hon un is laychte fer antworte kepe. (2 Kor. 9:6)

16. Was fer hilfe hon mer fer se xtutiire, un wii penutst tuu tas?

¹⁶ Wëns meechlich is, penuts ti eletroonixe feramente. Yeehoowa kept uns, torich sayn orkanisatsyoon, eletroonixe feramente woo uns helfe ti sache fer ti fersamlunge xtutiire. Mim aplikatiw JW Library^®, khene mer download mache fon puplikatsyoone im tablet orer selulaar. Tan khene mer ti fersamlunge perayte in yeete xtun un plats woo mer sin — orer weenichst te sache leese orer horiche. Etliche mache tas wën se ufm weech sin fer xafe keen, orer in ti xuul keen, orer wëns friixtik is. Wën mer te Watchtower Library un ONLINE PIPLYOTEEK^™ fon Torre de Vigia penutse, is es fiil laychte uner suuche ti phunkt woo mer ferxteen wole.

17. (a) Warom is es kuut mee wii een antwort foer perayte? (b) Was host tuu kelërnt fom wiiteo “Wërt Yeehoowa sayn froynt— Prepare seu comentário”?

¹⁷ Wëns meechlich is, peray mee wii eene komentaar. Warom? Wayl im xtant wërst tuu net keruuf tas eyerste mool woos tuu ti hant heepst. Anere wëre aach iire hant heepe fer ti selwich frooch antworte un te xtuutyum fiire khan tii ruufe. Fer te xtuutyum net ferxpeete, ruuft im xtant te fiire nuer een phaar layte fer te apsats antworte. Soo, kep net uf un ayer tich net wëns tuu net klaych keruuf wërts. Wëns tuu mee antworte perayt host, host tuu mee oportuniteet fer keruuft wëre. Een fon tayn komentaare khan sin een tekst leese. Awer, wëns keet, peray tich foer fer een antwort kepe mit tayn aychne wërter. *

18. Warom is es kuut khortse antworte kepe?

¹⁸ Kep khortse antworte. Ti peste komentaare sin oft khorts un keweenlich. Tan, xtreng tich aan fer tas mache un fersuuch net mee wii 30 sekunte penutse fer tayn komentaar. (Xpr. 10:19; 15:23) Wëns tuu xon fer een lang tsayt teel machst in te fersamlung, is es wichtich tas tuu khortse antworte kepst fer een kuut payxpiil sin. Wayl wëns tuu lange komentaare kepst, khene ti anere tenke tas se khente nii soo kuut antworte wiis tuu. Un noch, khortse komentaare kepe oportuniteet fer anere aach teel mache. Wëns tuu te eyerst keruuft wërst, kep een keweenlich un tirëkt antwort. Xprech net iwich ale phunkt fom apsats. Noo tëm woo ti antwort iwich ti haupst itee kep is, khanst tuu komentaare kepe iwich ti anere phunkte. (Kuk te khast “ Was khan ich saan?”.)

19. Wii khan te xtuutyum fiirer tich helfe, awer was must tuu mache?

¹⁹ Saa tëm xtuutyum fiirer te apsats woos tuu antworte wilst. Wëns tuu tas mache wilst, xprech mim fiirer eep ti fersamlung aan keet. Wën ti frooch kemacht wërt, heep xnel tayn hant kans hooch, soo khan te fiirer tich siin.

20. Warom sin ti fersamlunge wii wën mer mit fraaynte ese tuun?

²⁰ Ti fersamlunge sin wii ese mit fraaynte. Xtel tich mool foer, etliche priiter fon te kemaynt mache eene xuraske un ferlange tas tuu solst etwas mit pringe. Was teest tuu mache? Fiilaycht weyer es tich pisye ëngstlich aan, awer sicher teest tuu etwas perayte woo se al kërn ese teete. Yeehoowa laat uns in fer ti fersamlunge, un tee tuut foer perayte een tix fol mit kuut tings. (Psal. 23:5; Mat. 24:45) Tee frayt sich wën mer etwas kleenes pringe, tas peste woo mer kepe khene. Tan perayt tich kuut foer un mach teel soo oft wiis tuu khanst. Soo, est tuu net nuer fon Yeehoowa sayne tix awer pringst aach etwas fer teele mit te kemaynt.