1. Baka ni asai ati David pasal Jehovah? Nama deka digaga iya?

RAJA DAVID nulis: ‘Jehovah endang besai lalu endang patut dipuji.’ (Mas. 145:3) Iya rinduka Jehovah, lalu nya meransang iya muji Jehovah “ba gempuru” tauka ba eklisia. (Mas. 22:22; 40:5) Kitai mega rinduka Jehovah lalu besetuju enggau jaku David ke madahka: ‘Jehovah Petara aki kami Jakop, awakka Nuan dipuji belama lama iya!’—1 Ban. 29:10-13.

2. (a) Baka ni kitai ulih muji Jehovah? (b) Nama penanggul ke ditapi sekeda bala menyadi Kristian? Nama deka dikerandauka kitai?

² Kemayaharitu, siti chara kitai muji Jehovah iya nya meri saut lebuh begempuru. Sekeda bala menyadi Kristian deka meri saut, tang sida takut. Nama patut digaga sida enggau asai ati ti takut nya? Lalu nama chara ke ulih nulung sida meri saut ti meransang ati? Sebedau nyaut dua iti tanya nya, aram kitai berandauka empat iti kebuah kitai patut meri saut lebuh begempuru.

3-5. (a) Baka ke dipadah ba Hebrew 13:15, nama kebuah kitai meri saut lebuh begempuru? (b) Kati semua kitai patut meri saut ke sebaka? Terangka.

³ Jehovah meri semua kitai peluang muji Iya. (Mas. 119:108) Meri saut nya chara kitai “meri puji” ngagai Jehovah. Nadai orang ulih ngarika kitai nyaut. (Bacha Hebrew 13:15.) Kati Jehovah deka kitai meri puji tauka saut ke sebaka? Enda!

⁴ Jehovah nemu, kitai ngembuan penau sereta penanggul ti enda sama. Tang Iya gaga ati enggau utai ke ulih diberi kitai. Pikirka utai ke diberi orang Israel kelia. Sekeda  ari sida meri seiku bedus tauka seiku kambin. Tang sida ke seranta ulih meri “dua iku burung achang, tauka dua iku burung puna.” Enti sida enda ulih meri dua iku burung, sida ulih meri “satu persepuluh epa tepung ti pemadu manah.” (Lew. 5:7, 11, NW) Tepung nya enda mar. Jehovah nerima pemeri nya seagi-agi iya “tepung ti pemadu manah.”

⁵ Pia mega kemayaharitu. Lebuh kitai meri saut, Jehovah enda ngarapka kitai landik bejaku baka Apollos enggau Paul. (SKR. 18:24; 26:28) Jehovah deka kitai meri saut ke ulih diberi kitai. Peratika seiku indu ke balu sereta seranta. Iya meri dua singkap duit engkeraju. Tang Jehovah gaga ati enggau iya laban iya meri utai ke ulih diberi iya.—Luk. 21:1-4.

6. (a) Nitihka Hebrew 10:24, 25, baka ni asai ati kitai lebuh ninga saut ari bala menyadi Kristian? (b) Baka ni chara nuan nunjukka diri gaga ati enggau saut sida?

⁶ Kitai meransang pangan diri lebuh meri saut. (Bacha Hebrew 10:24, 25.) Semua kitai rindu ninga saut ari bala menyadi Kristian. Kitai gaga ati ninga saut ti pandak ari anak mit. Kitai balat diperansang lebuh ninga orang bekunsika penemu ti baru. Kitai mega gaga enggau “pemerani” sida ke malu sereta ke baru belajarka jaku bukai lebuh sida meri saut. (1 Tes. 2:2) Baka ni chara kitai nunjukka diri gaga ati enggau saut sida ti meransang ati? Kitai nyebut terima kasih ngagai sida pengudah begempuru. Siti agi chara kitai beterima kasih, iya nya kitai empu patut meri saut. Enggau nya semua kitai bela meransang pangan diri.—Rom. 1:11, 12.

7. Nama penguntung ke diulih enti kitai meri saut?

⁷ Kitai empu bulih penguntung lebuh meri saut. (Isa. 48:17) Nama penguntung iya? Kesatu, enti kitai deka nyaut, kitai tentu nyediaka saut. Lebuh kitai nyediaka saut enggau manah, penemu kitai pasal Bup Kudus deka dalam agi. Enti penemu kitai dalam, kitai  ulih nitihka utai ti dipelajar enggau manah. Kedua, kitai rindu begempuru enti kitai bisi meri saut. Ketiga, laban udah bebendar nyediaka saut, kitai deka seruran ingatka batang pekara tauka poin ti udah disebut.

8-9. (a) Baka ke dipadah ba Malaki 3:16, nama runding Jehovah pasal saut ke diberi kitai? (b) Nama penanggul ke engka ditapi sekeda ari kitai?

⁸ Kitai ngagaka ati Jehovah lebuh meri saut. Jehovah tentu ningaka saut ke diberi kitai lebuh begempuru. Iya beterima kasih laban kitai udah bebendar meri saut. (Bacha Malaki 3:16.) Kena mandangka terima kasih, Iya merekatka kitai laban kitai udah bebendar ngagaka ati Iya.—Mal. 3:10.

⁹ Nyadi, kitai bisi kebuah deka meri saut lebuh begempuru. Tang sekeda ari kitai engka takut ngangkatka jari. Anang nejuka nya ngasuh nuan takut. Aram kitai beratika sekeda prinsip Bup Kudus, beberapa iti chunto, sereta sekeda chara ke ulih nulung semua kitai suah agi nyaut.

10. (a) Nama utai ke ngasuh kitai takut deka meri saut? (b) Enti nuan takut meri saut, nama kualiti manah ke dikembuan nuan?

¹⁰ Kati nuan berasai takut deka meri saut lebuh begempuru? Mayuh ari kitai berasai baka nya. Ngambika ulih mutarka asai ati ti takut, uji pikirka utai ke ngasuh nuan takut. Kati nya ketegal nuan takut nuan enda ingatka utai ti deka disebut? Kati nya ketegal nuan takut meri saut ti salah? Tauka kati nya ketegal nuan ngumbai saut nuan enda chukup manah? Ngembuan asai ati ke baka nya enda ngawa. Nya nunjukka nuan baruh ati sereta ngumbai orang bukai pama agi ari nuan. Jehovah rinduka kualiti ke baka nya. (Mas. 138:6; Plp. 2:3) Tang Jehovah deka nuan muji Iya sereta meransang  bala menyadi Kristian lebuh begempuru. (1 Tes. 5:11) Iya sayauka nuan, nya alai Iya deka meri nuan pemerani.

11. Nama jaku ari Bup Kudus ke ulih nulung kitai?

¹¹ Bup Kudus bisi madahka, utai ti disebut enggau chara kitai nyebut utai nya, nemu salah. (Jas. 3:2) Nya alai, Jehovah enggau bala menyadi Kristian enda ngarapka kitai sempurna. (Mas. 103:12-14) Sida baka ruang bilik kitai, lalu sida sayauka kitai. (Mrk. 10:29, 30; Jhn. 13:35) Sida nemu, kadang-kadang utai ke disebut kitai ukai utai ti dirunding kitai.

12-13. Nama ulih dipelajarka kitai ari teladan Nehemiah enggau Jonah?

¹² Peratika sekeda chunto ba Bup Kudus. Nehemiah gawa ba istana. Iya tusah ati ninga pasal dinding kuta enggau pintu nengeri Jerusalem rusak. (Neh. 1:1-4) Uji gambarka, iya tentu berasai takut lebuh raja nanyaka kebuah iya tusah ati! Nehemiah besampi lalu udah nya madahka utai ti dikedekaka iya. Pengudah raja ningaka saut iya, raja nya nulung nembiak Petara. Ari teladan Nehemiah kitai belajar, endang manah enti kitai besampi dulu sebedau nyaut siti-siti tanya. Pikirka mega pasal Jonah. Iya balat takut lebuh Jehovah ngasuh iya nginjil ngagai orang Nineweh. Iya rari ngagai endur bukai. (Jon. 1:1-3) Taja pia, Jehovah nulung iya bejalaika pengawa iya. Ketegal nya, pesan ke dibai Jonah nyelamatka orang Nineweh. (Jon. 3:5-10) Ari teladan Jonah kitai belajar, Jehovah deka nulung kitai gawa ke Iya taja pan kitai ngembuan asai ati ti balat takut. Enti dibanding enggau nusui pesan Jehovah ngagai orang Nineweh, meri saut lebuh begempuru tentu senang agi.

¹³ Nama chara ke ulih nulung nuan meri saut ti meransang ati lebuh begempuru? Aram kitai berandauka sekeda chara nya.

14. Nama kebuah kitai patut nyediaka saut enggau manah? Ni maya kitai nyediaka saut?

¹⁴ Nyediaka saut. Enti udah nyediaka saut enggau manah, nuan tentu berani agi deka nyaut. (J-lam. 21:5) Endang amat, jadual tauka awak alai semua kitai nyediaka saut enda sama. Eloise, seiku indu balu ke beumur lebih ari 80 taun, berengkah belajarka Menara Jaga ba pun minggu. Ku iya madahka: “Aku rindu agi begempuru enti udah tumu nyediaka saut.” Joy, ke gawa sekular apus hari madahka: “Aku senang agi ingat enti aku belajar sehari sebedau begempuru.” Junior, seiku tuai gempuru ke kisuk sereta mega nyadi pengerintis madahka, “Sepemanjai minggu, aku rindu agi belajar  beberapa minit aja, ari ke belajar bejam-jam.”

15. Nama utai bukai ke patut digaga ngambika ulih nyaut enggau manah?

¹⁵ Nama utai bukai ke patut digaga ngambika ulih nyaut enggau manah? Sebedau berengkah belajar, nuan ulih minta roh kudus ari Jehovah. (Luk. 11:13; 1 Jhn. 5:14) Udah nya, peda artikel nya enggau ngelansa. Peratika tajuk, anak tajuk, sempama, sereta kutak ke bisi ba artikel nya. Bacha ayat Bup Kudus ba tiap iti genteran. Belematika utai ti dikerandau sereta poin ke deka disebut. Enti nuan nyediaka saut enggau manah, nuan deka bulih mayuh agi penguntung sereta senang agi deka nyaut.—2 Kor. 9:6.

16. Nama perengka ke ulih dikena nuan belajar? Nama guna tiap iti perengka nya?

¹⁶ Enti ulih, kena meh utai ti disedia nengah perengka elektronik ke bisi dalam bansa jaku nuan. Jehovah udah nyediaka utai tu nengah gerempung Iya. Tu nulung kitai nyediaka saut. Nengah aplikasi JW Library^®, kitai ulih download litaricha ke dikena belajar ngagai telefon binching tauka tablet. Kitai ulih macha tauka ningaka litaricha nya ba sebarang maya sereta sebarang alai. Kita ulih belajarka litaricha ngena aplikasi nya lebuh belelak ba endur gawa, ba sekula, tauka lebuh ngena perengka pengangkut. Perengka baka Watchtower Library enggau Watchtower ONLINE LIBRARY^™ ulih nulung kitai senang agi mansik poin ke deka ditemu kitai enggau mayuh agi.

17. (a) Nama kebuah nya manah enti nyediaka beberapa iti saut? (b) Nama dipelajarka nuan ari video Nyadi Pangan Jehovah—Sediaka Saut Nuan?

¹⁷ Enti ulih, sediaka beberapa iti saut. Nama kebuah? Engka nama nuan enda dikangau enti nuan baru ngangkatka jari sama enggau orang bukai. Orang ke ngiring pengawa belajar deka nentuka gempuru abis ba maya ti ditetapka. Nyadi iya semina ulih ngangau beberapa iku aja orang meri saut. Nya alai enti nuan enda dikangau, anang tusah ati. Enti nuan nyediaka beberapa iti saut, nuan bisi peluang dikangau meri saut. Nuan mega ulih macha ayat Bup Kudus. Enti ulih, beri saut ngena leka jaku diri empu. *

18. Nama kebuah meri saut ti pandak?

¹⁸ Beri saut ti pandak. Saut ti pandak meransang ati. Enti ulih, beri saut dalam kandang 30 sikin. (J-lam. 10:19; 15:23)  Mayuh agi orang bisi peluang nyaut enti saut ke diberi nya pandak. Enti nuan nya orang ke udah lama enggau begempuru, nuan ulih nyadi teladan ti manah. Nuan ulih meri saut ti pandak. Enti saut nuan kelalu panjai, orang bukai takut deka meri saut laban ngumbai diri enda ulih nyaut baka nuan. Pia mega, enti nuan nya orang ti keterubah dikangau, semina meri saut ngagai utai ti ditanya aja. Anang nyebut semua poin ba genteran. Enti semua poin ba genteran udah abis disebut, nuan ulih nyebut poin ke bukai.—Peda kutak “ Nama Utai ke Ulih Disaut Aku?”

19. Enti nuan deka nyaut siti-siti genteran, nama patut digaga nuan?

¹⁹ Padahka bagi genteran ke deka disaut nuan ngagai menyadi ke ngiring. Enti nuan deka ngena chara tu, sebedau begempuru, nuan patut madah ngagai menyadi ke ngiring. Lebuh datai ba genteran ke deka disaut, jampat-jampat meh ngangkatka jari enggau tinggi ngambika ulih dipeda iya.

20. Nama kebuah begempuru ulih disempamaka baka makai begulai?

²⁰ Begempuru ulih disempamaka baka makai begulai enggau bala pangan. Uji gambarka, sekeda bala pangan ba eklisia deka manggang. Sida ngasuh nuan nyediaka mimit pemakai. Nama deka digaga nuan? Taja pan mimit irau, nuan enggau naka ulih nyediaka pemakai ti nyamai, ngambika ulih dikunsi enggau semua orang. Pia mega lebuh begempuru, Jehovah udah nyediaka mayuh pemakai ke ulih ngeringka pengarap kitai. (Mas. 23:5; Mat. 24:45) Iya gaga ati enti kitai mai pemeri. Nya alai kitai patut nyediaka saut lalu enggau naka ulih meri saut. Enggau tu, kitai deka meransang diri empu sereta orang bukai ba eklisia.