1. Anni i matageno ni David meyannung kani Jehova, anna anni i kingnguana megafu tatun?

NITURA ni Patul David: “I YAFU ay kuruga makapangngua; i dakal nga kedayaw ay mekunnay sa.” (Sal. 145:3) Iddedduna si Jehova, anna yatun nga aya i namaguyu sa tapenu dayawan i Dios ‘ta pattaraddayan na wawwagi.’ (Sal. 22:22; 40:5) Siguradu nga ayatammu si Jehova anna umanugu ka ta kinagi ni David: “Medayaw ka nakuan, O Jehova nga Dios na Israel nga yamami, ta mannanayun.”​—1 Cro. 29:10-13.

2. (a) Kunnasi tam medayaw si Jehova? (b) Ngatta marigatan i karuan nga makkomento, anna anni i gigiammuattam?

² Sangawe, i tadday nga makua tam tapenu dayawan si Jehova ay gukaban na pakkomento ta study ira. Ngem, egga i karuan nga wawwaragi nga marigatan tatun. Kayàda i makkomento ta study ira, ngem fugaddan ira na assidda. Kunnasida labanan yatun? Anni ira nga suhestion i makoffun nittam ngamin tapenu makapakkomento tu makapagaram? Nige tam tabbagan danatun, gigiammuattam labbi i appa nga importante nga rason nu ngatta makkomento ittam ta study ira.

3-5. (a) Gitta na neyesplika ta Hebreo 13:15, ngatta makkomento ittam ta study ira? (b) Mawag kari nga para-parehu i klase na komento tam? Iyesplika.

³ Niddan ittam ngamin ni Jehova tu pribilehio nga dayawan yayya. (Sal. 119:108) Parte na “sakrifisio na paddaya-rayaw” i komento tam ira ta study, anna awan tu tanakuan nga makesakrifisio tatun para nittam. (Bibbigan i Hebreo  13:15.) Ikiddaw kari ni Jehova i parehu nga sakrifisio, onu komento, ta kada tadday nittam? Ari!

⁴ Ammu ni Jehova nga nadduruma i abilidad anna sirkumstansia tam, anna talaga tagibaloranna i sakrifisio tam ira para sa. Nonopan i klase na sakrifisio na Israelita ira. Nawayya na karuan nga Israelita nga mangitavvung tu karneru onu kanzing. Ngem danuri pobre nga Israelita ay nangitavvung tu “tanga-paris nga paloma onu dua nga pichon.” Nu ari makatavvung i tadday nga Israelita tu dua nga mammanu, alawatan ni Jehova i “pakkamafulu na tanga-efa na makasta nga arina.” (Lev. 5:7, 11) Mas mappo laman i arina, ngem appresian lagapa ni Jehova yatun nga sakrifisio, basta “makasta nga arina” yatun.

⁵ Kunnatun lagapa i mataga-tageno na masippo nga Dios tam ta maddaggun. Nu makkomento ittam, arianna ekspektan nga sittam ngamin ay kagitta ni Apolos nga mapia i agguvovugna onu gitta ni Pablo nga makakumbinsi. (King. 18:24; 19:8) I kayà laman ni Jehova ay iyawa tam i kapianan nga komento tam​—base ta mawayya tam. Daddamman nga dua nga sentabo laman i nisakrifisio na balu nga babay. Ngem tinagibalor lagapa yayya ni Jehova megafu ta niyawana i adde na mawayyana.​—Luc. 21:1-4.

6. (a) Segun ta Hebreo 10:24, 25, anni i efekto nittam na komento ira nga maginna tam? (b) Kunnasim mepasingan i appresasiommu ta tabbag ira nga namagaram nikaw?

⁶ Mapasikattam i kataggi-tadday nu makkomento ittam. (Bibbigan i Hebreo 10:24, 25.) Kakayà tam ngamin ginnan i nadduruma nga komento ta study tam ira. Kegganas ginnan i simple anna sinsero nga komento na abbarabbing. Kuruga mapagaram ittam nu egga i makkomento meyannung ta kinakurug nga baguna laman nga nagigiammu. Appresiattam gapa danuri ‘pinasikadda i nonoda’ tapenu makapakkomento, maski minappasirang onu baguda pagalaman nagigiammu i lengguahe tam. (1 Tes. 2:2) Kunnasi tam ipasingan i appresasiottam ta appursigida? Gukaban na pappabalo tam nira ta makapagaram nga komentoda kabalin na study. I tadday paga ay gukaban na pakkomento tam mismu. Nu kunnatun ari laman nga makalawa ittam tu pamagaram ta study tam ira, nu ari, makeyawa ittam gapa.​—Roma 1:11, 12.

7. Kunnasi ittam mabenefisiowan nu makkomento ittam?

 ⁷ Mabbenefisio ittam nu makkomento ittam. (Isa. 48:17) Kunnasi? Ollu, nu gakkag tam i makkomento, mas egga i rasottam tapenu mapprepara tu mapia ta study. Nu mapprepara ittam tu mapia, mas maponag i pakalippawa tam ta Biblia. I resultana, mas meyaplika tam i gannug ira nga nagigiammu tam. Mekadua, siguradu nga mas magayayya ittam ta study nu makipartisipa ittam ta paggigiammu. Mekatallu, gafu ta napprepara ittam tu mapia, kanayuttam nga meraddamman i punto ira nga nikomento tam.

8-9. (a) Segun ta Malakias 3:16, anni i matageno ni Jehova ta pakkomento tam? (b) Anni lagapa i paganassingan na karuan?

⁸ Mapagayayya tam si Jehova nu ikagi tam i pangurug tam. Makasiguradu ittam nga gigginnan ittam ni Jehova anna talaga tagibaloranna i appursigi tam nga makkomento ta study ira. (Bibbigan i Malakias 3:16.) Ipasinganna i appresasionna gukaban na pamendision nittam nu kuattam i adde na mawayya tam tapenu dayawan yayya.​—Mal. 3:10.

⁹ Manawag nga aru i rasottam tapenu makkomento ta study ira. Ngem, maganassing lagapa i karuan nga itayag i limada. Nu kunnatun i matageno mu, ari nakuan makkafi i nono mu. Ikonsidera tam i karuan nga prinsipio na Biblia, ehemplo, anna karuan nga suhestion nga makoffun nittam ngamin tapenu makapakkomento ta study ira.

10. (a) Anni i paganassingan na aru nittam? (b) Nu maganassikka nga makkomento, anni i awayyana nga egga nikaw nga kualidad?

¹⁰ Fermi kari i nerbios mu kada kayà mu nga itayag i limam tapenu makkomento? Nu kunnatun, ari ka magitetadday. Kakuruganna, makatageno tu assing i aru nittam nu makkomento. Tapenu malabanammu i assing nga mangifugag nikaw nga makkomento, mawag mu ammuan i rason nu ngatta maganassikka. Maganassikka kari nga makattamammu i kagiammu onu mali i tabbag mu? Mavurukka kari nga i komentom ay ari tu kunnari kakasta gitta na komento na tanakuan?  Kakuruganna, positibo nga seniales danatun nga assing. Ipasingan natun nga minappakalinno ka anna imammatammu i tanakuan nga mas atannang nikaw. Kakayà ni Jehova danuri minappakalinno. (Sal. 138:6; Fil. 2:3) Ngem kayà gapa ni Jehova nga dayawammu yayya anna pagarammammu i wawwaragim ta study ira. (1 Tes. 5:11) Iddukan naka yari tu iyawana i sikan na nono nga kawagammu.

11. Anni nga tabarang ta Katurakan i makoffun nittam?

¹¹ Ikonsidera i karuan nga tabarang ta Katurakan. Kagian na Biblia nga makaliwa ittam ngamin ta kakkagian anna ta pangikagi tam. (Sant. 3:2) Ari ekspektan ni Jehova nga perfekto ittam, maski na wawwaragi tam. (Sal. 103:12-14) Ira i espiritual nga familia tam, anna iddedduda ittam. (Mar. 10:29, 30; Juan 13:35) Malippawada nga nu mittan tanakuan i makagi tam ta kayà tam nga ikagi.

12-13. Anni i magigiammu tam ta ehemplo da Nehemias anni Jonas?

¹² Nonopan i karuan nga ehemplo ta Biblia nga makoffun nikaw tapenu labanan i assimmu. Daddamman si Nehemias. Nasserbi yayya ta palasio na makapangngua nga patul. Naddaddam si Nehemias megafu ta nadumugna nga nadaral i pader anna i trangka ira na Jerusalem. (Neh. 1:1-4) Imajinammu ngana laman i nerbios anna assinna turi ta niyavu na patul nu ngatta maddaddam yayya! Insigida nakimallo si Nehemias nigena simibbag. Megafu tatun, dakal i niyuffun na patul ta ili na Dios. (Neh. 2:1-8) Daddamman gapa si Jonas. Turi ta nikiddaw ni Jehova sa nga abisowanna i taga-Nineve, talaga maganassing si Jonas yayya nga nattammang yayya. (Jon. 1:1-3) Ngem gukaban na uffun ni Jehova, minay lagapa si Jonas ta Nineve tapenu layyagayyan ira. Talaga dakal i neyuffun na nilayyagayyana ta taga-Nineve ira. (Jon. 3:5-10) Nagigiammu tam gafu kani Nehemias i importansia na pappakimallo nige tubbag. Magigiammu tam gapa kani Jonas nga uffunan ittam ni Jehova nga masserbi sa maski sobra i anassittam. Anni i mas kananassing? I makkomento ta kongregasion onu i mallayyagayya ta Ninevita ira?

¹³ Anni ira nga suhestion i makoffun tapenu makapakkomento tu makapagaram ta study ira? Ikonsidera tam i karuan.

14. Ngatta mapprepara ittam nakuan tu mapia ta study tam ira, anna anni i kapianan nga tiempo nga kuan yatun?

¹⁴ Mapprepara ta kada study. Nu dati nga mapplano ka anna mapprepara tu mapia, mas makkomfiansa ka ta pakkomento. (Prov. 21:5) Siempre, nadduruma i iskediul tam ta papprepara. I balu nga si Eloise nga magedad tu maturu tu 80 ay mapprepara para ta Paggigiammu tu Passifusifutan ta gafu na ligguan. Kunna, “Mas mabbenefisio ngà ta study nu datì ngana nga ginigiammu yatun.” Si Joy nga full-time i trabahuna, kada Sabadu i iskediulna nga gigiammuan i Passifusifutan. “Kayà ku nga fresko paga ta nono ku i ginigiammù,” kunna. Kunni  Ike nga okupadu nga elder anna payunir, “Para niakan mas kayà ku i maggigiammu ta ababba ira nga periodo na tiempo ta tanga-ligguan imbes nga pittanan yatun.”

15. Kunnasi ittam makapapprepara tu mapia ta study?

¹⁵ Anni i nelagum ta papprepara tu mapia ta study? Igafu i kada paggigiammu gukaban na pakkiddaw kani Jehova tu masanto nga espiritu. (Luc. 11:13; 1 Juan 5:14) Tapus padalanan ta piga minuto i leksion. Gigiammuan i tema, subtitulo, letratu, anna kahon ira. Durante nga gigiammuammu i kada parapo, bibbigan i ngamin nga teksto nu mawayyam. Monag nga pannonopan i informasion anna iddan tu partikular nga atension i punto ira nga kayà mu komentuan. Nu mas preparadu ka, mas mabbenefisio ka anna mas mabi nikaw i makkomento.​—2 Cor. 9:6.

16. Anni ira nga rimienta i puedem usan, anna kunnasim usan danatun?

¹⁶ Nu posible, usan i elektroniko ira nga rimienta ta lengguahe nga ammum. Niddan ittam ni Jehova, gukaban na organisasionna, tu elektroniko ira nga rimienta tapenu moffunan ittam ta papprepara ta study ira. Uffunan ittam na JW Library^® application nga i-download i magigiammu ira nga publikasion ta gadget tam. Tapus puede tam gigiammuan​—bibbigan onu ginnan i material—​ta maski anni nga oras anna maski sitaw. Usan na karuan i JW Library^® application tapenu maggigiammu nu lunch break-da ta trabahu onu ta eskuela onu nu mabbiahe ira. Makoffun gapa i Watchtower Library anna i Watchtower ONLINE LIBRARY^™ para ta mas mabi nga parresearch ta punto ira na leksion nga kayà tam gigiammuan tu mapia.

17. (a) Ngatta makasta nu aru i nipreparam nga komento? (b) Anni i nagigiammum ta video nga Maging Kaibigan ni Jehova​—Maghanda ng Komento?

¹⁷ Nu posible, mapprepara tu piga ira nga komento ta kada artikulo. Ngatta? Baka ariammu magalan kada itayag mu i limam. Awayyana nga egga kagiddammu nga mangitayag, anna ira i agalan na mangikondukta. Tapenu masiguradu nga mabalin i study ta eksakto nga oras, baka limitan na mangikondukta i bilang na makkomento. Yari tu kammu matakitan onu madismaya nu ari ka nagalan ta gafu na paggigiammu. Nu aru i nipreparam nga komento, mas aru i tiansam nga makatabbag ta paggigiammu. Awayyana nga tadday ta ipreparam nga komento i pabbibbig tu teksto. Ngem nu mawayyam, mapprepara ka gapa nga makkomento ta sarilim nga uvovug. *

18. Ngatta ababba laman nakuan i komento ira?

¹⁸ Makkomento tu ababba. Maruddu nga i pinakamakapagaram ira nga komento ay danuri ababba anna simple. Yayya nga, igakkag mu nga makkomento tu ababba. Puruebammu  nga limitan ta 30 segundo. (Prov. 10:19; 15:23) Nu piga ragun ka ngana nga makkokkomento ta study ira, importante nga mabbalikka tu ehemplo gukaban na pakkomento tu ababba. Nu komplikadu i komentom ira anna apapaddu yatun, baka mappasirang i tanakuan, anna nonopadda nga ariadda mapantayan i abilidad mu nga makkomento. Nu ababba i komento ira, mas aru i makapartisipa ta study. Netallugaring nu sikaw i ollu nga nagalan, mangiyawa tu simple anna direkta nga tabbag ta pakkiavu. Kammu ilavu i ngamin nga punto ta parapo. Kabalin nga napalawan i pinaka-ideya na parapo, puedem ngana komentuan i karuan paga ira nga punto.​—Innan i kahon nga “ Anni i Puedè nga Ikomento?”

19. Kunnasi naka moffunan na mangikondukta, ngem anni nakuan i kuammu?

¹⁹ Ikagi ta mangikondukta i espesipiko nga parapo nga kayà mu komentuan. Nu kayà mu nga kuan yatun, mawag nga aranniammu i mangikondukta nige mamegafu na study. Sonu tiempom ngana nga makkomento ta parapo, insigida nga itayag mu tu mapia i limam tapenu masingan yatun na mangikondukta.

20. Kunnasi nga meyarig i study ta pakkakan kavulu i kokkofun?

²⁰ Imammatan i study nga gittana makan nga passiripotan kavulu i mapia nga kokkofun. Imajinammu nga egga ira kokkofun ta kongregasion nga napplano tapenu mappicnic tapus nikiddoda nikaw nga mangivulu ka ta simple nga makan. Anni i kuammu? Baka mavurukka, ngem magga kuammu i adde na mawayyam tapenu magustuan na ngamin i ivulu mu nga makan. Si Jehova, i Mamisita nittam, ay nangiyawa tu napakaru nga makasta nga ganna-gannug para nittam ta study tam ira. (Sal. 23:5; Mat. 24:45) Magayayya gapa yayya nu mangivulu ittam tu simple nga regalu, i kapianan nga regalu nga meyawa tam. Yayya nga, mapprepara tu mapia anna makkomento adde ta posible. Nu kunnatun, ariammu laman kuman ta lamesa ni Jehova, nu ari, mangiyawa ka paga tu regalu nga ibillem ta kongregasion.