1. Yehowa hte seng nna Dawi gara hku hkamsha ai kun? Dai gaw hpa galaw na matu shi hpe shadut ya wa ai kun?

“YEHOWA gaw galu kaba nga ai rai nna, Nachying shakawn ging ai wa, rai nga ai” nga nna hkawhkam Dawi ka wa ai. (Shk 145:3) Shi gaw Yehowa hpe tsawra ai. Dai tsawra myit gaw, “hpawng shingra kaang e” Karai Kasang hpe shakawn na matu shi hpe shadut ya wa ai. (Shk 22:22; 40:5) Yehowa hpe nang tsawra ai majaw, Dawi tsun wa ai ndai ga hpe myit hkrum na re: “Anhte a Wa, Israela Karai Kasang Yehowa e, nang gaw htani htana prat dingsa, a nga n ga law.”​—⁠1 Hl 29:10-13.

2. (a) Yehowa hpe anhte gara hku shakawn lu ai kun? (b) Hpunau nauna nkau gaw gara yak ai lam hpe hkrum nga ai kun? Hpa lam hpe shawng hkaja na kun?

² Dai ni aten hta, Yehowa hpe shakawn lu ai lam langai gaw, Hkristan zuphpawng ni hta mahtai jaw ai hku nna re. Raitim, hpunau nauna nkau gaw mahtai jaw na matu yak nga ai. Zuphpawng ni hta shanhte mahtai jaw mayu tim, hkrit ai myit gaw pat hkum da nga ai. Hkrit ai myit hpe gara hku tawt lai lu na kun? N-gun lu shangun ai mahtai ni jaw lu hkra, gara tatut re ai lam ni gaw anhte hpe karum ya lu na kun? Dai ga san ni a mahtai hpe n htai shi yang, zuphpawng ni hta hpa majaw mahtai jaw ra ai hte seng ai madung lam mali hpe shawng nnan hkaja yu ga.

3-5. (a) Hebre 13:15 hta tsun da ai hte maren zuphpawng ni hta hpa majaw mahtai jaw ai kun? (b) Anhte yawng a mahtai gaw bung ra ai kun? Sang lang dan u.

³ Yehowa gaw, shi hpe shakawn na matu anhte yawng hpe ahkaw ahkang jaw da ai. (Shk 119:108) Zuphpawng ni hta anhte jaw ai mahtai ni gaw, “shakawn kungdawn hkungga” langai rai nna, kadai mung anhte a malai hkungga n  nawng ya lu ai. (Hebre 13:15 hpe hti u.) Yehowa gaw anhte langai hpra hpe bung ai hkungga (sh) mahtai hpe jaw na matu hpyi shawn da ai kun? N hpyi shawn ai.

⁴ Anhte langai hpra a atsam hte masa lam ni n bung ai hpe Yehowa chye ai. Anhte dang lu ai daram jaw ai hpe shi grai manu shadan ya ai. Israela ni kaw nna shi hkap la ai shagu hkungga hpe myit yu ga. Israela nkau gaw, sagu (sh) bainam hpe hkungga nawng lu ai. Raitim, matsan ai Israela ni gaw, “hkrudu lahkawng shing n rai ura lahkawng” hpe hkungga nawng mai ai. Lama na Israela marai langai gaw, hkrudu lahkawng hpe pyi hkungga n lu nawng yang, “mani ai shadung pawng lahkawng” hpe Yehowa hkap la ai. (Jaw 5:7, 11, JCLB) Muk shadung gaw, manu n hpu tim, “mani ai shadung” rai yang hkungga hku nna Yehowa manu shadan ai.

⁵ Matsan dum chye ai Karai Kasang gaw, dai ni du hkra dai hku sha naw myit ai. Anhte mahtai jaw ai shaloi, ga grai chye shaga ai Apolo hte Pawlu ni zawn, chye htai na matu n hpyi shawn ai. (Kas 18:24; 26:28) Anhte dang lu ai daram kaja htum mahtai jaw ai hpe, shi ra sharawng ai. Magri dingsen lap lahkawng sha alu bang ai gaida jan hpe bai myit yu u. Shi dang lu ai kaja htum hpe shi jaw ai majaw, Yehowa shi hpe manu shadan wa ai.​—⁠Luk 21:1-4.

6. (a) Hebre 10:24, 25 hta tsun da ai hte maren anhte na lu ai mahtai ni gaw anhte hpe gara hku akyu shabyin ya ai kun? (b) Nang hpe n-gun lu shangun ai mahtai hte seng nna chyeju dum ai lam gara hku madun na kun?

⁶ Mahtai jaw ai hku nna shada da n-gun jaw hkat lu ai. (Hebre 10:24, 25 hpe hti u.) Zuphpawng ni hta, na la lu ai mahtai amyu myu hpe anhte grai ra sharawng ai. Chye na loi ai ga hte mahtai jaw ai ma kasha a mahtai hpe pyi anhte ra sharawng ai. Masha nnan langai gaw, teng man ai hte seng nna myit rawt let mahtai jaw ai nsen hpe anhte na yang, grai kabu ga ai. Kaya chye ai marai langai (sh) anhte a amyu ga hpe nnan sharin nga ai marai langai gaw, “nden marai” hte mahtai jaw ai hpe anhte grai madat mayu ga ai. (1Ht 2:2, JCLB) Shanhte a shakut shaja ai hpe chyeju dum ai lam gara hku madun na kun? Zuphpawng ngut ai hpang, shanhte jaw ai n-gun lu hpa mahtai hte seng nna, chyeju dum ai lam tsun dan mai ai. Anhte nan mung mahtai jaw ai hku nna madun mai ai. Dai hku nna, zuphpawng ni hta anhte n-gun lu la ai sha n-ga, anhte mung masha ni hpe n-gun jaw lu na re.​—⁠Rom 1:11, 12.

7. Anhte mahtai jaw yang, gara akyu ni lu la na kun?

 ⁷ Anhte mahtai jaw yang anhte nan mung akyu lu la ai. (Esa 48:17) Gara hku nna kun? Langai, mahtai jaw na ngu myit da yang, zuphpawng a matu atsawm hkyen lajang da na re. Anhte atsawm hkyen lajang ai nga yang, Karai Mungga hte seng nna grau chye na wa na re. Grau chye na wa yang, sharin la ai lam ni hpe grau nna tatut hkan sa lu na re. Lahkawng, bawngban ai lamang hta anhte mung shang lawm lu ai majaw, zuphpawng lung ai hpe grau sharawng wa na re. Masum, mahtai jaw na matu hkyen lajang da ai majaw, aten grai na mat yang pyi matsing nga na re.

8-9. (a) Malahki 3:16 hta mu lu ai hte maren anhte jaw ai mahtai ni hte seng nna Yehowa gara hku hkamsha ai kun? (b) Hpunau nauna nkau gaw hpa hpe myit tsang nga ai kun?

⁸ Anhte a makam masham hpe tsun dan yang Yehowa kabu ai. Zuphpawng ni hta mahtai jaw na matu anhte shakut shaja ai hpe, Yehowa manu shadan nna madat nga ai. (Malahki 3:16 hpe hti u.) Yehowa gaw, shi a myit shapyaw ya na matu anhte shakut shaja ai shaloi, shaman chyeju jaw ai hku nna chyeju dum ai lam madun ai.​—⁠Mal 3:10.

⁹ Zuphpawng ni hta mahtai jaw ging ai hpe anhte asan sha chye wa sai. Raitim, nkau gaw lata sharawt na matu naw myit tsang nga na re. Dai hku byin nga yang, myit hkum daw u. Zuphpawng ni hta grau nna mahtai jaw lu hkra karum ya lu ai Chyum Laika npawt tara ni, ga shadawn nkau mi hte tatut re ai lam nkau mi hpe hkaja yu ga.

10. (a) Anhte law malawng gaw hpa hpe hkrit tsang ai kun? (b) Dai zawn hkrit tsang ai myit nga ai gaw, gara atsam ningja nga ai hpe madun ai kun?

¹⁰ Mahtai jaw na matu lata sharawt shagu nang hkrit nga ai kun? Nang chyu sha dai hku byin nga ai n re. Anhte law malawng gaw, mahtai jaw ai shaloi hkrit ai myit nga ga ai. Hkrit ai myit hpe awng dang lu na matu, nang hpe hkrit shangun ai gaw hpa re ai hpe shawng chye da ra ai. Nang tsun mayu ai hpe tsun na matu malap mat na hpe tsang nga ai kun? Shut ai hku tsun hkrup na hpe tsang nga ai kun? Kaga ni jaw ai kaja ai mahtai zawn n lu jaw na hpe tsang nga ai kun? Dai zawn myit tsang ai gaw, kaja ai kumla rai nga ai. Dai hku byin ai gaw, nang hta shagrit shanem ai myit nga nna  kaga ni hpe tinang hta grau ai ngu mu mada ai lam madun nga ai re. Dai atsam ningja hpe Yehowa grai manu shadan ai. (Shk 138:6; Hpl 2:3) Yehowa gaw, zuphpawng ni hta shi hpe shakawn shagrau shangun mayu ai. Hpunau nauna shada n-gun jaw hkat na matu mung shi ra sharawng ai. (1 Ht 5:11) Yehowa gaw nang hpe tsawra nna, nang hta ra nga ai nden marai hpe jaw na re.

11. Gara Chyum daw ni gaw anhte hpe karum ya ai kun?

¹¹ Anhte hpe karum ya lu ai Chyum daw nkau mi hpe myit yu ga. Anhte yawng gaw, tsun shaga ai lam hta shut chye ai nga nna Chyum Laika hta tsun da ai. (Yak 3:2) Yehowa gaw anhte hkum tsup na matu n myit mada ai zawn, anhte mung hpunau nauna ni hpe n myit mada ging ai. (Shk 103:12-14) Shanhte gaw anhte a hpunau nauna ni re ai majaw anhte hpe tsawra ai. (Mrk 10:29, 30; Yhn 13:35) Kalang lang anhte mahtai jaw ai shaloi, anhte tsun mayu ai gaw amyu mi, tsun dat ai gaw amyu mi re ai hpe shanhte chye na ya ai.

12-13. Nehemia hte Yona a mabyin ni kaw nna anhte hpa sharin la lu ai kun?

¹² Nang hkrit tsang ai hpe awng dang lu na matu, karum ya ai Chyum Laika kaw nna ga shadawn nkau mi hpe myit yu ga. Nehemia gaw, ahkaw ahkang kaba ai hkawhkam kaw amu gun nga ai. Shi grai yawn hkyen nga ai. Yerusalem kaw nna mare bunghku ni hte chyinghka ni hten run nga ai shiga na ai majaw re. (Neh 1:1-4) Hkawhkam wa gaw, shi yawn hkyen nga ai lam hpe tsun dan shangun ai shaloi, shi kade daram hkrit tsang mat na hpe shingran yu u. Nehemia gaw alawan akyu hpyi dat nna byin nga ai lam hpe tsun dan ai. Hkawhkam wa gaw, Karai a masha ni hpe karum ya wa ai. (Neh 2:1-8) Yona a lam hpe mung myit yu ga. Ninewe masha ni hpe sadi jaw ga Yehowa sa tsun shangun ai shaloi, Yona grai hkrit ai majaw, kaga shara de hprawng mat wa ai. (Yon 1:1-3) Raitim, Yehowa karum ya ai majaw, Yona gaw Ninewe masha ni hpe atsawm hkaw tsun lu wa ai. Shi tsun ai ga ni gaw Ninewe masha ni a matu grai akyu nga ai. (Yon 3:5-10) Mahtai n jaw shi yang, akyu hpyi ai gaw grai ahkyak ai lam hpe Nehemia kaw nna anhte sharin la lu ai. Anhte kade daram hkrit tsang tim, Yehowa karum shingtau ai lam hte magam lit hpe awng dang lu ai lam, Yona kaw nna sharin la lu ai. Nawku hpung kaw mahtai jaw ai gaw, Ninewe masha ni hpe tara jeyang ai shiga sa tsun ai daram yak ai kun?

¹³ Zuphpawng ni hta n-gun lu shangun ai mahtai jaw na matu, gara lam ni gaw nang hpe karum ya na kun? Hpaji jaw ga nkau mi hpe hkaja yu ga.

14. Zuphpawng ni a matu hpa majaw atsawm hkaja ging ai kun? Gara aten ni hta galaw mai ai kun?

¹⁴ Zuphpawng langai hpra a matu tau hkrau hkyen lajang u. Zuphpawng ni a matu tau hkrau atsawm hkyen lajang da yang, mahtai jaw na matu tinang hkum tinang kam ai myit grau nga wa na re. (Gsh 21:5) Zuphpawng a matu hkyen lajang ai lam gaw langai hte langai bung na n re. Asak 80 jan sai gaida jan Alawi gaw, Sin Langchyi  hkaja sumhpa hpe bat nnan hpang ai shaloi, hkyen lajang ai. Shi ndai hku tsun ai: “Tau hkrau nna hkyen lajang da yang, zuphpawng ni hta grau pyaw ai.” Kanbau bungli hpe aten hpring galaw ai nauna Joi gaw, Sin Langchyi hkaja sumhpa hpe kru ya shani hta hkaja na matu aten masat da ai. “Zuphpawng hte ni ai aten hta hkaja yang, ngai grau matsing ai” nga nna shi tsun ai. Amu grai law ai ningshawng myitsu salang Ike ndai hku tsun ai: “Aten law law jaw nna kalang ta ngut hkra hkaja na malai, loi loi hkaja mat ai gaw ngai na matu grau kaja ai.”

15. Zuphpawng a matu gara hku atsawm hkyen lajang mai ai kun?

¹⁵ Zuphpawng a matu atsawm hkyen lajang ai hta hpa ni lawm ai kun? Hkaja ai lamang garai n hpang shi yang, chyoi pra ai wenyi lu na matu galoi mung akyu hpyi u. (Luk 11:13; 1 Yhn 5:14) Dai hpang, hkaja na lam a madung ga baw, ga baw kaji, sumla ni hte madung ga san ni hpe aten loi la nna shawng yu u. Laika pang langai hpra hpe hkaja ai shaloi, matsun da ai Chyum daw ni hpe dang lu ai daram law law hti u. Dai hta lawm ai lam ni hpe atsawm myit sawn sumru u. Nang mahtai jaw mayu ai lam hpe myit maju jung u. Atsawm hkyen lajang da magang, grau akyu lu magang re. Mahtai jaw ai shaloi mung grau loi wa na re.​—⁠2 Ko 9:6.

16. Nang hpa hkingrai ni lu mai ai kun? Dai hpe gara hku akyu jashawn na kun?

¹⁶ Byin mai na nga yang, na a amyu ga hte lajang da ya ai electronic hkingrai ni hpe akyu jashawn u. Zuphpawng a matu hkyen lajang ai shaloi, anhte hpe karum ya na electronic hkingrai ni hpe Yehowa gaw shi a uhpung hku nna hkyen lajang da ya ai. Electronic jak rai ni hta JW Library^® app hpe akyu jashawn nna, hkaja na laili laika ni hpe download mai galaw ai. Dai hku galaw da yang, gara aten, gara shara kaw raitim, hti mai ai, madat mai ai, hkaja mai ai. Masha nkau gaw dai hkingrai hpe akyu jashawn nna, jawng hta, bungli hta, shani kaang hkring sa ai aten (sh) bu hkawm ai aten hta hkaja ma ai. Sin Langchyi Laika Dum hte Sin Langchyi ONLINE LAIKA DUM^™ hta, anhte hkaja mayu ai lam hpe atsawm chye lu hkra aloi sha mai tam ai.

17. (a) Mahtai law law hpe hkyen lajang da ai gaw hpa majaw kaja ai kun? (b) Yehowa A Jinghku Byin U​—⁠Mahtai Hpe Shajin U ngu ai video kaw nna hpa sharin la lu ai kun?

¹⁷ Byin mai yang, hkaja na lam langai hpra a matu mahtai law law hpe hkyen lajang da u. Hpa majaw kun? Nang lata sharawt ai shaloi, shaga hkrum yang she shaga hkrum na. Kaga ni mung nang hte maren lata sharawt na re ai majaw, woi awn ai hpunau gaw lata nna shaga na re. Zuphpawng hpe aten hkrak ngut ra na re majaw, hkaja ai lam a daw nkau hta mahtai law law jaw shangun na n re. Hkaja lamang nnan hpang ai aten hta, nang hpe n shaga yang myit hkum daw u. Mahtai law law hpe nang hkyen lajang da yang, bawng ban nga ai laman mahtai jaw lu ai ahkaw ahkang grau lu na re. Mahtai ni hpe hkyen lajang  ai hta nang galaw mai ai lam langai gaw, Chyum daw ni hpe hti da ai hku nna re. Ngut nna, mahtai ni hpe ga shaga ai zawn htai lu hkra hkyen lajang da mai ai. *

18. Mahtai hpe kadun dawk hpa majaw jaw ra ai kun?

¹⁸ Mahtai hpe kadun dawk jaw u. Kadun dawk rai nna asan sha re ai mahtai law malawng gaw, n-gun lu shangun ai. Dai majaw kadun dawk mahtai jaw u. Sekkan 30 laman ngut hkra htai na matu shakut u. (Gsh 10:19; 15:23) Nang gaw, zuphpawng ni hta mahtai jaw nga ai shaning hku na sai nga yang, mahtai ni hpe kadun dawk jaw ai hku nna kasi kaja madun mai ai. Lam law law hpe kalang ta mahtai jaw na nga yang, kaga ni gaw nang zawn mahtai n lu jaw na hpe myit tsang wa chye ai. Ngut nna, kadun dawk mahtai jaw ai gaw, masha law law grau nna zuphpawng hta shang lawm lu hkra karum ya ai. Laksan hku nna, nang gaw shawng nnan shaga hkrum yang, ga san a mahtai hpe ding tawk htai u. Laika pang hta lawm ai lam yawng hpe hkum tsun. Laika pang hta lawm ai madung lam hpe hkaja ngut ai hpang hta gaw, kaga lam ni hpe nang mahtai mai jaw ai.​—⁠“ Gara Hku Mahtai Jaw Na Kun?” ngu ai lawk hpe yu u.

19. Woi awn ai hpunau gaw nang hpe karum ya lu hkra nang hpa galaw ra ai kun?

¹⁹ Nang mahtai jaw mayu ai laika pang hpe woi awn ai hpunau hpe tau hkrau tsun da u. Nang dai hku galaw mayu ai nga yang, zuphpawng garai n hpang shi yang, woi awn ai hpunau wa hpe sa tsun da ging ai. Nang mahtai jaw mayu ai laika pang du wa yang, woi awn ai hpunau mu lu hkra lata hpe alawan sharawt u.

20. Nawku zuphpawng gaw manang ni hte lu sha garan sha ai hte gara hku bung ai kun?

²⁰ Nawku hpung zuphpawng ni gaw, kaja ai manang ni hte lu sha garan sha nga ai hte bung ai ngu mu mada u. Nawku hpung kaw na manang nkau mi hte lu sha arau sha na matu lamang nga nna, nang hpe mung shahpa lama ma la sa na matu tsun ai ngu saga. Nang gara hku galaw na kun? Loi mi gaw myit tsang na re. Raitim, masha yawng ra sharawng ai lama ma hpe nang la sa na re. Yehowa gaw anhte a Nta Madu rai nna, shi gaw zuphpawng ni hku nna kaja ai shahpa ni hpe, sha ku hta atsawm hkyen lajang da ya ai. (Shk 23:5; Mat 24:45) Anhte jaw ai kumhpa gaw kaji tim, kaja htum rai yang, shi grai kabu ai. Dai majaw, nang mahtai hpe atsawm hkyen lajang nna, wanglu wanglang mahtai mai jaw ai. Dai gaw, Yehowa a sha ku kaw nna nang sha ai sha n ga, nawku hpung hpe kumhpa garan jaw na matu la sa wa ai hte bung ai.