អត្ថបទសិក្សា ២
ចូរសរសើរព្រះយេហូវ៉ាក្នុងក្រុមជំនុំ
«ទូលបង្គំនឹងសរសើរដំកើងទ្រង់នៅកណ្ដាលពួកជំនុំ»។—ទំនុក. ២២:២២
ចម្រៀងលេខ៥៩ សូមសរសើរព្រះយ៉ាជាមួយនឹងខ្ញុំ
សេចក្ដីសង្ខេប *
១. តើដាវីឌមានអារម្មណ៍យ៉ាងណាចំពោះព្រះយេហូវ៉ា ហើយតើនេះបានជំរុញចិត្តគាត់ឲ្យធ្វើអ្វី?
ស្តេចដាវីឌបានសរសេរថា៖ «ព្រះយេហូវ៉ាទ្រង់ធំប្រសើរ គឺគួរសរសើរយ៉ាងក្រៃលែង»។ (ទំនុក. ១៤៥:៣) គាត់ស្រឡាញ់ព្រះយេហូវ៉ា ហើយសេចក្ដីស្រឡាញ់នោះបានជំរុញចិត្តគាត់ឲ្យសរសើរព្រះ«នៅកណ្ដាលពួកជំនុំ»។ (ទំនុក. ២២:២២; ៤០:៥) អ្នកច្បាស់ជាស្រឡាញ់ព្រះយេហូវ៉ា ហើយយល់ស្របនឹងពាក្យរបស់ដាវីឌ ដែលថា៖ «ឱព្រះយេហូវ៉ា ជាព្រះនៃអ៊ីស្រាអែល ឰយុកោយើងរាល់គ្នាអើយ សូមឲ្យទ្រង់បានព្រះពរ[ឬ«លើកតម្កើង»]នៅអស់កល្បជានិច្ច»។—១រប. ២៩:១០-១៣; ខ.ស.
២. (ក) តើយើងអាចសរសើរព្រះយេហូវ៉ាតាមរបៀបណា? (ខ) តើបងប្អូនខ្លះមានការពិបាកអ្វី ហើយតើយើងនឹងពិចារណាអំពីអ្វី?
២ សព្វថ្ងៃនេះ របៀបមួយដែលយើងអាចសរសើរតម្កើងព្រះយេហូវ៉ាគឺដោយឆ្លើយនៅកិច្ចប្រជុំ។ ប៉ុន្តែ បងប្អូនរបស់យើងខ្លះប្រឈមមុខនឹងការពិបាកមួយ។ ពួកគេចង់ឆ្លើយនៅកិច្ចប្រជុំ តែដោយសារការភ័យខ្លាច ពួកគេមិនបានធ្វើដូច្នេះទេ។ តើពួកគេអាចយកឈ្នះការភ័យខ្លាចនោះយ៉ាងដូចម្ដេច? តើយោបល់អ្វីខ្លះអាចជួយយើងទាំងអស់គ្នាឲ្យចេះឆ្លើយចម្លើយដែលលើកទឹកចិត្ត? មុនយើងឆ្លើយសំណួរទាំងនេះ សូមយើងពិចារណាអំពីមូលហេតុសំខាន់បួនដែលយើងឆ្លើយនៅកិច្ចប្រជុំ។
មូលហេតុយើងឆ្លើយនៅកិច្ចប្រជុំ
៣-៥. (ក) យោងទៅតាមហេប្រឺ ១៣:១៥ ហេតុអ្វីយើងឆ្លើយនៅកិច្ចប្រជុំ? (ខ) តើយើងទាំងអស់គ្នាត្រូវមានចម្លើយដូចៗគ្នាឬទេ? សូមពន្យល់។
៣ ព្រះយេហូវ៉ាផ្ដល់ឯកសិទ្ធិឲ្យយើងទាំងអស់គ្នាសរសើរលោក។ (ទំនុក. ១១៩:១០៨) ចម្លើយរបស់យើងនៅកិច្ចប្រជុំគឺជាផ្នែកនៃ«សេចក្ដីសរសើរជាគ្រឿងបូជា»របស់យើង ហើយគ្មានអ្នកណាអាចជូនគ្រឿងបូជានេះជំនួសយើងបានឡើយ។ (សូមអាន ហេប្រឺ ១៣:១៥) តើព្រះយេហូវ៉ាតម្រូវឲ្យយើងម្នាក់ៗជូនគ្រឿងបូជាដូចគ្នា ឬមានចម្លើយដូចៗគ្នាឬទេ? មិនមែនទេ!
៤ ព្រះយេហូវ៉ាដឹងថាយើងមានស្ថានភាពនិងសមត្ថភាពខុសៗគ្នា ហើយលោកឲ្យតម្លៃយ៉ាងខ្លាំងចំពោះគ្រឿងបូជាដែលយើងជូនលោក។ សូមគិតអំពីគ្រឿងបូជាផ្សេងៗដែលលោកព្រមទទួលពីជនជាតិអ៊ីស្រាអែល។ ជនជាតិអ៊ីស្រាអែលខ្លះអាចជូនពពែឬកូនចៀមជាគ្រឿងបូជា។ ប៉ុន្តែ ជនជាតិអ៊ីស្រាអែលដែលក្រីក្រអាចជូន«លលក២ឬព្រាបជំទើរ២» ហើយបើជនជាតិអ៊ីស្រាអែលណាដែលគ្មានលទ្ធភាពជូនសត្វស្លាបពីរ ព្រះយេហូវ៉ាព្រមទទួល«ម្សៅយ៉ាងម៉ដ្ដ១ខ្ញឹង»។ (លេវី. ៥:៧, ១១) ម្សៅមានតម្លៃថោកជាង ប៉ុន្តែព្រះយេហូវ៉ានៅតែឲ្យតម្លៃចំពោះគ្រឿងបូជានោះ ឲ្យតែនោះជា«ម្សៅយ៉ាងម៉ដ្ដ»។
៥ ព្រះដ៏សប្បុរសរបស់យើងនៅតែមានទស្សនៈដូចគ្នានៅសព្វថ្ងៃនេះ។ ពេលយើងឆ្លើយ លោកមិនតម្រូវឲ្យយើងទាំងអស់គ្នាប៉ិនប្រសប់ក្នុងការនិយាយដូចអាប៉ូឡុស ឬចេះនិយាយវែកញែកដូចប៉ូលទេ។ (សកម្ម. ១៨:២៤; ២៦:២៨) ព្រះយេហូវ៉ាចង់ឲ្យយើងឆ្លើយអស់ពីសមត្ថភាព។ សូមចាំអំពីស្ត្រីមេម៉ាយដែលជូនកាក់តូចពីរ។ គាត់មានតម្លៃចំពោះព្រះយេហូវ៉ា ដោយសារគាត់បានឲ្យអស់ពីសមត្ថភាពរបស់គាត់។—លូក. ២១:១-៤
ការឆ្លើយធ្វើឲ្យយើងនិងអ្នកដែលស្ដាប់ទទួលប្រយោជន៍ (សូមមើលវគ្គ៦-៧) *
៦. (ក) យោងទៅតាមហេប្រឺ ១០:២៤, ២៥ តើចម្លើយរបស់អ្នកឯទៀតមានឥទ្ធិពលយ៉ាងណាមកលើយើង? (ខ) តើអ្នកអាចបង្ហាញថាអ្នកឲ្យតម្លៃចំពោះចម្លើយដែលបានលើកទឹកចិត្តអ្នកតាមរបៀបណា?
៦ យើងលើកទឹកចិត្តគ្នាទៅវិញទៅមកតាមរយៈចម្លើយរបស់យើង។ (សូមអាន ហេប្រឺ ១០:២៤, ២៥) យើងទាំងអស់គ្នាចូលចិត្តស្ដាប់ចម្លើយផ្សេងៗនៅកិច្ចប្រជុំ។ ជាឧទាហរណ៍ យើងសប្បាយស្ដាប់ចម្លើយដ៏សាមញ្ញនិងស្មោះអស់ពីចិត្តរបស់កូនក្មេង។ យើងទទួលការលើកទឹកចិត្ត ពេលឮបងប្អូនឆ្លើយដោយរំភើបចិត្ត ដោយសារគាត់ទើបតែបានរកឃើញចំណុចថ្មីសម្រាប់គាត់។ ម្យ៉ាងទៀត យើងកោតស្ងើចពួកអ្នកដែល«បានតាំងចិត្តក្លាហាន»ដើម្បីឆ្លើយ ទោះជាពួកគេជាមនុស្សអៀនខ្មាស ឬកំពុងរៀនភាសារបស់យើងក្ដី។ (១ថែ. ២:២) តើយើងអាចបង្ហាញយ៉ាងដូចម្ដេចថាយើងឲ្យតម្លៃចំពោះការខំព្យាយាមរបស់ពួកគេ? របៀបមួយគឺក្រោយពីកិច្ចប្រជុំ យើងអាចអរគុណពួកគេចំពោះចម្លើយដ៏គួរឲ្យលើកទឹកចិត្ត។ របៀបមួយទៀត គឺដោយរួមចំណែកឆ្លើយនៅកិច្ចប្រជុំ។ យ៉ាងនេះ យើងមិនគ្រាន់តែទទួលការលើកទឹកចិត្តនៅកិច្ចប្រជុំប៉ុណ្ណោះទេ ប៉ុន្តែយើងក៏ផ្ដល់ការលើកទឹកចិត្តដល់អ្នកឯទៀតដែរ។—រ៉ូម ១:១១, ១២
៧. តើយើងទទួលប្រយោជន៍យ៉ាងណាពេលយើងឆ្លើយ?
៧ យើងទទួលប្រយោជន៍ពេលយើងឆ្លើយនៅកិច្ចប្រជុំ។ (អេ. ៤៨:១៧) តើតាមរបៀបណា? ទី១ បើយើងមានគោលដៅឆ្លើយ នោះជំរុញចិត្តយើងឲ្យរៀបចំយ៉ាងល្អសម្រាប់កិច្ចប្រជុំ។ ពេលយើងរៀបចំល្អ យើងយល់បណ្ដាំរបស់ព្រះបានជ្រាលជ្រៅជាង។ កាលដែលយើងកាន់តែយល់ នោះយើងកាន់តែអាចធ្វើតាមអ្វីដែលយើងបានរៀន។ ទី២ ដោយសារយើងរួមចំណែកឆ្លើយក្នុងកិច្ចប្រជុំ យើងទំនងជានឹងចូលចិត្តកិច្ចប្រជុំនោះជាង។ ទី៣ ពេលយើងព្យាយាមឆ្លើយ យើងច្រើនតែចាំចំណុចដែលយើងបានលើកឡើងនោះយូរជាង។
៨-៩. (ក) តើអ្នកយល់យ៉ាងណាពីម៉ាឡាគី ៣:១៦អំពីអារម្មណ៍របស់ព្រះយេហូវ៉ាចំពោះចម្លើយរបស់យើង? (ខ) តើអ្នកខ្លះនៅតែមានការពិបាកអ្វី?
៨ ព្រះយេហូវ៉ាពេញចិត្តពេលយើងនិយាយអំពីជំនឿរបស់យើង។ យើងអាចប្រាកដថាព្រះយេហូវ៉ាស្ដាប់ចម្លើយរបស់យើង ហើយឲ្យតម្លៃយ៉ាងខ្លាំងចំពោះការខំព្យាយាមរបស់យើងដើម្បីឆ្លើយនៅកិច្ចប្រជុំ។ (សូមអាន ម៉ាឡាគី ៣:១៦) លោកបង្ហាញថាលោកឲ្យតម្លៃចំពោះការខំព្យាយាមរបស់យើង ដោយឲ្យពរយើងពេលយើងខំអស់ពីសមត្ថភាពដើម្បីធ្វើឲ្យលោកពេញចិត្ត។—ម៉ាឡ. ៣:១០
៩ ដូច្នេះយើងឃើញច្បាស់ថា មានមូលហេតុល្អឲ្យយើងឆ្លើយនៅកិច្ចប្រជុំ។ ប៉ុន្តែ អ្នកខ្លះនៅតែភ័យខ្លាចក្នុងការលើកដៃឆ្លើយ។ បើអ្នកមានអារម្មណ៍បែបនោះ សូមកុំធ្លាក់ទឹកចិត្តឡើយ។ សូមយើងពិចារណាអំពីគោលការណ៍មួយចំនួនពីគម្ពីរ គំរូ និងយោបល់ខ្លះៗដែលអាចជួយយើងទាំងអស់គ្នាឲ្យព្យាយាមឆ្លើយច្រើនជាងនៅកិច្ចប្រជុំ។
ការយកឈ្នះអារម្មណ៍ភ័យខ្លាច
១០. (ក) តើបងប្អូនជាច្រើនមានការភ័យខ្លាចអ្វី? (ខ) ហេតុអ្វីការមានអារម្មណ៍ភ័យខ្លាចអាចជាអ្វីល្អ?
១០ តើអ្នកភ័យបុកពោះរាល់ដងពេលអ្នកគិតថាអ្នកចង់លើកដៃឆ្លើយឬទេ? បើដូច្នេះមែន មិនមានតែអ្នកប៉ុណ្ណោះទេដែលមានអារម្មណ៍បែបនេះ។ តាមការពិត យើងភាគច្រើនមានអារម្មណ៍ភ័យខ្លាចមួយកម្រិតពេលយើងលើកដៃឆ្លើយ។ មុនអ្នកអាចយកឈ្នះអារម្មណ៍នោះ អ្នកត្រូវដឹងថាការភ័យខ្លាចរបស់អ្នកមកពីអ្វី។ តើអ្នកខ្លាចថាអ្នកនឹងភ្លេចអ្វីដែលចង់និយាយ ឬថាអ្នកនឹងនិយាយខុសឬទេ? តើអ្នកបារម្ភថាចម្លើយរបស់អ្នកគឺមិនល្អដូចចម្លើយរបស់អ្នកឯទៀតឬទេ? តាមការពិត ការគិតដូច្នេះអាចជាអ្វីដែលល្អ ដោយសារនេះបង្ហាញថាអ្នកមានចិត្តរាបទាប និងចាត់ទុកអ្នកឯទៀតថាប្រសើរជាងខ្លួន។ ព្រះយេហូវ៉ាពេញចិត្តគុណសម្បត្ដិនោះ។ (ទំនុក. ១៣៨:៦; ភី. ២:៣) ប៉ុន្តែ ព្រះយេហូវ៉ាក៏ចង់ឲ្យអ្នកសរសើរលោក និងពង្រឹងកម្លាំងរបស់បងប្អូននៅកិច្ចប្រជុំដែរ។ (១ថែ. ៥:១១) លោកស្រឡាញ់អ្នក ហើយនឹងផ្ដល់ឲ្យអ្នកនូវចិត្តក្លាហានដែលអ្នកត្រូវការ។
១១. តើគោលការណ៍អ្វីខ្លះពីគម្ពីរអាចជួយយើង?
១១ សូមពិចារណាអំពីគោលការណ៍ខ្លះក្នុងគម្ពីរ។ គម្ពីរចែងថាយើងទាំងអស់គ្នាចេះនិយាយខុស ហើយរបៀបដែលយើងនិយាយក៏អាចខុសដែរ។ (យ៉ា. ៣:២) ព្រះយេហូវ៉ាមិនតម្រូវឲ្យយើងធ្វើជាមនុស្សល្អឥតខ្ចោះទេ ហើយបងប្អូនរបស់យើងក៏មិនតម្រូវបែបនោះដែរ។ (ទំនុក. ១០៣:១២-១៤) ពួកគេជាបងប្អូនរួមជំនឿរបស់យើង ហើយពួកគេស្រឡាញ់យើង។ (ម៉ាក. ១០:២៩, ៣០; យ៉ូន. ១៣:៣៥) ពួកគេយល់ថាជួនកាលអ្វីដែលយើងឆ្លើយមិនមែនដូចអ្វីដែលយើងចង់ឆ្លើយទេ។
១២-១៣. តើយើងរៀនអ្វីពីគំរូរបស់នេហេមានិងយ៉ូណាស?
១២ សូមពិចារណាអំពីគំរូខ្លះក្នុងគម្ពីរដែលអាចជួយអ្នកឲ្យយកឈ្នះអារម្មណ៍ភ័យខ្លាច។ សូមគិតអំពីនេហេមា។ គាត់បម្រើនៅក្នុងវាំងរបស់ស្តេចដ៏មានអំណាច។ នេហេមាពិបាកចិត្ត ដោយសារគាត់បានឮថាកំពែងនិងទ្វារក្រុងយេរូសាឡិមបានបាក់បែក។ (នេហ. ១:១-៤) សូមគិតទៅមើលថាគាត់ប្រហែលជាភ័យបុកពោះយ៉ាងណាពេលស្តេចនោះសុំឲ្យគាត់ប្រាប់អំពីមូលហេតុដែលគាត់មានទឹកមុខព្រួយ! នេហេមាបានអធិដ្ឋានភ្លាមៗ រួចគាត់បានប្រាប់ស្តេចអំពីសំណូមពររបស់គាត់។ រួចមក ស្តេចនោះបានធ្វើអ្វីៗជាច្រើនដើម្បីជួយរាស្ត្ររបស់ព្រះ។ (នេហ. ២:១-៨) សូមគិតដែរអំពីគំរូរបស់យ៉ូណាស។ ពេលព្រះយេហូវ៉ាបានសុំគាត់ឲ្យផ្សព្វផ្សាយដល់បណ្ដាជននៅក្រុងនីនីវេ យ៉ូណាសភ័យខ្លាចជាខ្លាំង ហើយគាត់បានរត់ទៅទិសដៅផ្ទុយពីក្រុងនោះ។ (យ៉ូណ. ១:១-៣) ប៉ុន្តែ ដោយមានជំនួយពីព្រះយេហូវ៉ា យ៉ូណាសបានបំពេញភារកិច្ចរបស់គាត់ ហើយដំណឹងដែលគាត់បានប្រកាសមានឥទ្ធិពលល្អដល់អ្នកក្រុងនីនីវេ។ (យ៉ូណ. ៣:៥-១០) តាមរយៈគំរូរបស់នេហេមា យើងរៀនថាគឺសំខាន់ឲ្យយើងអធិដ្ឋានមុននឹងឆ្លើយ។ ម្យ៉ាងទៀត តាមរយៈគំរូរបស់យ៉ូណាស យើងរៀនថាព្រះយេហូវ៉ាអាចជួយយើងឲ្យបម្រើលោក ទោះជាយើងមានការភ័យខ្លាចខ្លាំងយ៉ាងណាក្ដី។ សូមគិតទៅមើល តើមានក្រុមជំនុំណាដែលគួរឲ្យខ្លាចដូចអ្នកក្រុងនីនីវេឬទេ?
១៣ តើយោបល់អ្វីខ្លះអាចជួយអ្នកឲ្យចេះឆ្លើយចម្លើយដែលលើកទឹកចិត្តក្រុមជំនុំ? សូមយើងពិចារណាយោបល់មួយចំនួន។
១៤. ហេតុអ្វីយើងគួររៀបចំយ៉ាងល្អសម្រាប់កិច្ចប្រជុំ ហើយតើយើងអាចធ្វើដូច្នេះនៅពេលណា?
១៤ សូមរៀបចំសម្រាប់កិច្ចប្រជុំនីមួយៗ។ ពេលអ្នកមានកាលវិភាគច្បាស់លាស់និងរៀបចំយ៉ាងល្អ អ្នកនឹងមានទំនុកចិត្តជាងពេលអ្នកលើកដៃឆ្លើយ។ (សុភ. ២១:៥) យើងមានកាលវិភាគខុសៗគ្នា។ ជាឧទាហរណ៍ រៀងរាល់សប្ដាហ៍បងអិលឡាវីសដែលជាស្ត្រីមេម៉ាយម្នាក់ដែលមានអាយុ៨០ឆ្នាំជាង ចាប់ផ្ដើមរៀបចំសម្រាប់ការសិក្សាទស្សនាវដ្ដីប៉មយាមនៅដើមសប្ដាហ៍។ គាត់និយាយថា៖ «ខ្ញុំចូលចិត្តកិច្ចប្រជុំជាង បើខ្ញុំសិក្សាទុកជាមុន»។ បងស្រីជយដែលជាអ្នកធ្វើការពេញពេល លៃទុកពេលរាល់ថ្ងៃសៅរ៍ដើម្បីសិក្សាទស្សនាវដ្ដីប៉មយាម។ គាត់និយាយថា៖ «ខ្ញុំគិតថាបើខ្ញុំរៀបចំទស្សនាវដ្ដីមិនយូរមុនកិច្ចប្រជុំ គឺស្រួលឲ្យខ្ញុំចាំព័ត៌មានទាំងនោះជាង»។ បងប្រុសអែកដែលជាអ្នកត្រួសត្រាយនិងជាអ្នកចាស់ទុំដ៏រវល់ម្នាក់ និយាយថា៖ «ចំពោះខ្ញុំគឺល្អបំផុតឲ្យខ្ញុំសិក្សាសម្រាប់រយៈពេលខ្លីៗប៉ុន្មានដងក្នុងមួយសប្ដាហ៍ ជាជាងសិក្សាម្ដងទាំងអស់»។
១៥. តើអ្នកអាចរៀបចំល្អសម្រាប់កិច្ចប្រជុំតាមរបៀបណា?
១៥ តើការរៀបចំយ៉ាងល្អសម្រាប់កិច្ចប្រជុំរួមបញ្ចូលអ្វីខ្លះ? មុនចាប់ផ្ដើមសិក្សា សូមសុំព្រះយេហូវ៉ាផ្ដល់សកម្មពលបរិសុទ្ធឲ្យអ្នក។ (លូក. ១១:១៣; ១យ៉ូន. ៥:១៤) រួចមក សូមចំណាយពេលប៉ុន្មាននាទីដើម្បីពិចារណាអំពីចំណងជើងអត្ថបទ ចំណងជើងតូច រូបភាព និងប្រអប់ដែលមានក្នុងអត្ថបទ រួមទាំងសំណួររៀនសារឡើងវិញ។ កាលដែលអ្នកសិក្សាវគ្គនីមួយៗ សូមអានខគម្ពីរឲ្យបានច្រើនបំផុតដែលមានក្នុងវគ្គនោះ។ សូមរំពឹងគិតអំពីព័ត៌មានទាំងនោះ ដោយផ្ដោតអារម្មណ៍ជាពិសេសទៅលើចំណុចដែលអ្នកចង់ឆ្លើយ។ កាលដែលអ្នករៀបចំកាន់តែល្អ អ្នកនឹងកាន់តែទទួលប្រយោជន៍ ហើយអ្នកនឹងស្រួលឆ្លើយជាង។—២កូ. ៩:៦
១៦. តើអង្គការរបស់យើងបានផ្ដល់អ្វីខ្លះឲ្យយើង ហើយតើអ្នកប្រើវាយ៉ាងដូចម្ដេច?
១៦ បើអាចធ្វើបាន សូមប្រើកម្មវិធីផ្សេងៗតាមគ្រឿងអេឡិចត្រូនិកជាភាសារបស់អ្នក។ តាមរយៈអង្គការរបស់លោក ព្រះយេហូវ៉ាបានឲ្យយើងអ្វីផ្សេងៗដែលយើងអាចប្រើតាមគ្រឿងអេឡិចត្រូនិកដើម្បីរៀបចំសម្រាប់កិច្ចប្រជុំ។ យើងអាចថតចម្លងសៀវភៅសិក្សាក្នុងគ្រឿងអេឡិចត្រូនិកតាមកម្មវិធីJWបណ្ណាល័យ។ យ៉ាងនេះ យើងអាចសិក្សា ឬយ៉ាងហោចណាស់អាន ឬក៏ស្ដាប់ព័ត៌មាននោះនៅពេលណានិងកន្លែងណាក៏បាន។ បងប្អូនខ្លះប្រើកម្មវិធីនេះដើម្បីសិក្សាពេលសម្រាកថ្ងៃត្រង់នៅកន្លែងធ្វើការឬនៅសាលា ឬពេលធ្វើដំណើរ។ កម្មវិធីបណ្ណាល័យអ៊ីនធឺណិតរបស់ប៉មយាម ជួយយើងឲ្យស្រួលស្រាវជ្រាវចំណុចដែលយើងចង់សិក្សាថែមទៀតក្នុងមេរៀននោះ។
តើតាមធម្មតាអ្នករៀបចំកិច្ចប្រជុំនៅពេលណា? (សូមមើលវគ្គ១៤-១៦) *
១៧. (ក) ហេតុអ្វីគឺជាការល្អឲ្យយើងរៀបចំចម្លើយលើសពីមួយឬពីរ? (ខ) តើអ្នកបានរៀនអ្វីពីវីដេអូចូរធ្វើជាមិត្តសម្លាញ់ព្រះយេហូវ៉ា ចូររៀបចំចម្លើយសម្រាប់កិច្ចប្រជុំ?
១៧ បើអាចធ្វើបាន សូមរៀបចំចម្លើយលើសពីមួយឬពីរសម្រាប់មេរៀននីមួយៗ។ ហេតុអ្វី? ពីព្រោះពេលអ្នកលើកដៃឆ្លើយ អ្នកប្រហែលជាមិនតែងតែបានត្រូវហៅទេ។ អ្នកឯទៀតទំនងជានឹងលើកដៃនៅពេលដំណាលគ្នាដែរ ហើយអ្នកដឹកនាំប្រហែលជានឹងជ្រើសរើសពួកគេ។ ដើម្បីឲ្យកិច្ចប្រជុំបញ្ចប់ទាន់ពេល អ្នកដឹកនាំប្រហែលជាត្រូវកំណត់ចំនួនអ្នកឆ្លើយចំណុចនីមួយៗ។ ដូច្នេះ សូមកុំទើសចិត្តឬធ្លាក់ទឹកចិត្ត បើគាត់មិនហៅអ្នកក្នុងផ្នែកដំបូងនៃការសិក្សានោះ។ បើអ្នករៀបចំចម្លើយលើសពីមួយឬពីរ អ្នកនឹងមានឱកាសឆ្លើយច្រើនជាង។ ចម្លើយមួយដែលអ្នកអាចរៀបចំគឺដោយអានបទគម្ពីរ។ ប៉ុន្តែ បើអ្នកអាចធ្វើបាន សូមរៀបចំចម្លើយដែលចេញពីចិត្ត *។
១៨. ហេតុអ្វីយើងគួរឆ្លើយខ្លី?
១៨ សូមឆ្លើយចម្លើយខ្លី។ ជាទូទៅ ចម្លើយដែលលើកទឹកចិត្តខ្លាំងបំផុតគឺចម្លើយខ្លីនិងសាមញ្ញ។ ដូច្នេះ សូមព្យាយាមឆ្លើយខ្លី។ សូមព្យាយាមកំណត់ចម្លើយរបស់អ្នកប្រហែល៣០វិនាទី។ (សុភ. ១០:១៩; ១៥:២៣) បើអ្នកធ្លាប់ឆ្លើយនៅកិច្ចប្រជុំអស់ជាច្រើនឆ្នាំមកហើយ គឺសំខាន់ឲ្យអ្នកទុកគំរូល្អដោយឆ្លើយខ្លី។ បើអ្នកឆ្លើយស្មុគស្មាញអស់ប៉ុន្មាននាទី អ្នកឯទៀតប្រហែលជាមិនហ៊ានឆ្លើយ ដោយសារពួកគេគិតថាពួកគេមិនអាចឆ្លើយល្អដូចអ្នកទេ។ ម្យ៉ាងទៀត ការឆ្លើយខ្លីផ្ដល់ឱកាសឲ្យមនុស្សច្រើនជាងរួមចំណែកក្នុងកិច្ចប្រជុំ។ ជាពិសេស បើអ្នកបានត្រូវហៅនៅដើមដំបូង សូមឆ្លើយសាមញ្ញនិងចំៗទៅនឹងសំណួរ។ សូមកុំព្យាយាមឆ្លើយចំណុចទាំងអស់ក្នុងវគ្គឡើយ។ បន្ទាប់ពីចំណុចសំខាន់ក្នុងវគ្គបានត្រូវពិគ្រោះរួចហើយ អ្នកអាចឆ្លើយចំណុចបន្ថែមទៀត(សូមមើលប្រអប់ដែលមានចំណងជើងថា « តើខ្ញុំអាចឆ្លើយយ៉ាងណា?»)។
១៩. តើអ្នកដឹកនាំអាចជួយអ្នកយ៉ាងដូចម្ដេច ប៉ុន្តែតើអ្នកត្រូវធ្វើអ្វី?
១៩ អ្នកអាចប្រាប់អ្នកដឹកនាំថាអ្នកចង់ឆ្លើយនៅវគ្គណាមួយ។ បើអ្នកចង់ធ្វើដូច្នេះ អ្នកគួរទៅប្រាប់អ្នកដឹកនាំជាមុនសិន មុនកិច្ចប្រជុំចាប់ផ្ដើម។ ពេលដល់វគ្គដែលអ្នកចង់ឆ្លើយ សូមលើកដៃឲ្យលឿន ហើយខ្ពស់ល្មមដើម្បីឲ្យអ្នកដឹកនាំអាចឃើញ។
២០. តើកិច្ចប្រជុំប្រៀបដូចជាការជួបជុំបរិភោគអាហារជាមួយនឹងមិត្តភក្ដិយ៉ាងដូចម្ដេច?
២០ សូមចាត់ទុកកិច្ចប្រជុំដូចជាការបរិភោគអាហារជុំគ្នាជាមួយនឹងមិត្តសម្លាញ់។ សូមស្រមៃគិតថាមិត្តភក្ដិខ្លះក្នុងក្រុមជំនុំបានអញ្ជើញអ្នកឲ្យបរិភោគអាហារជាមួយនឹងពួកគេ ហើយបានសុំអ្នកឲ្យរៀបចំម្ហូបអាហារបន្ដិចបន្តួច តើអ្នកនឹងធ្វើយ៉ាងណា? អ្នកប្រហែលជាបារម្ភតិចតួចដែរ ប៉ុន្តែអ្នកទំនងជានឹងខំអស់ពីសមត្ថភាពដើម្បីយកអ្វីដែលនឹងធ្វើឲ្យបងប្អូនទាំងអស់គ្នាសប្បាយ។ ព្រះយេហូវ៉ាដែលជាអ្នករៀបចំកិច្ចប្រជុំ បានរៀបចំអ្វីល្អៗជាច្រើនសម្រាប់យើងនៅកម្មវិធីនោះ។ (ទំនុក. ២៣:៥; ម៉ាថ. ២៤:៤៥) ម្យ៉ាងទៀត លោកពេញចិត្តពេលដែលយើងយកអំណោយដ៏ល្អបំផុតតាមសមត្ថភាពរបស់យើង ទោះជានោះជាអំណោយដ៏សាមញ្ញក្ដី។ ដូច្នេះ សូមរៀបចំឲ្យបានល្អ ហើយរួមចំណែកឆ្លើយឲ្យបានច្រើនតាមដែលអ្នកអាចធ្វើបាន។ យ៉ាងនេះ អ្នកនឹងមិនគ្រាន់តែបរិភោគឆ្អែតនៅតុរបស់ព្រះយេហូវ៉ាប៉ុណ្ណោះទេ ប៉ុន្តែអ្នកក៏នឹងយកអំណោយមួយចែកដល់ក្រុមជំនុំដែរ។
ចម្រៀងលេខ២ នាមលោកគឺយេហូវ៉ា
^ វគ្គ 5 ដូចដាវីឌដែលជាអ្នកតែងទំនុកតម្កើង យើងទាំងអស់គ្នាស្រឡាញ់ព្រះយេហូវ៉ានិងចង់សរសើរលោក។ ពេលដែលយើងប្រជុំគ្នាជាមួយនឹងបងប្អូនក្នុងក្រុមជំនុំរបស់យើងសម្រាប់ការគោរពប្រណិប័តន៍ យើងមានឱកាសដ៏ពិសេសដើម្បីបង្ហាញសេចក្ដីស្រឡាញ់ដែលយើងមានចំពោះព្រះ។ ប៉ុន្តែ ចំពោះបងប្អូនខ្លះការលើកដៃឆ្លើយនៅកិច្ចប្រជុំគឺមិនស្រួលទេ។ បើអ្នកមានបញ្ហានេះដែរ អត្ថបទនេះនឹងជួយអ្នកឲ្យយល់អំពីមូលហេតុដែលអ្នកភ័យខ្លាច ហើយជួយអ្នកឲ្យយកឈ្នះអារម្មណ៍នោះ។
^ វគ្គ 17 សូមចូលគេហទំព័រjw.org/kmហើយមើលវីដេអូចូរធ្វើជាមិត្តសម្លាញ់ព្រះយេហូវ៉ា ចូររៀបចំចម្លើយសម្រាប់កិច្ចប្រជុំ។ សូមចុច«សេចក្ដីបង្រៀនក្នុងគម្ពីរ» ▸ «កុមារ»។
^ វគ្គ 63 ការពណ៌នាអំពីរូបភាព: សមាជិកក្រុមជំនុំសប្បាយរួមចំណែកក្នុងការសិក្សាទស្សនាវដ្ដីប៉មយាម។
^ វគ្គ 65 ការពណ៌នាអំពីរូបភាព: នេះជាសមាជិកខ្លះក្នុងក្រុមជំនុំដែលបានរួមចំណែកក្នុងការសិក្សាទស្សនាវដ្ដីប៉មយាមនៅរូបភាពមុន។ ទោះជាពួកគេម្នាក់ៗមានស្ថានភាពខុសៗគ្នាក្ដី ពួកគេលៃទុកពេលដើម្បីរៀបចំសម្រាប់កិច្ចប្រជុំ។
