1. Dawudi mwayowa athi oku Yehova, kandi eki mukyaleka iniakolhaki?

OMWAMI DAWUDI mwahandika athi: “Omwami Mukulhu ni mukulhu, atholere eripipwa kutsibu.” (Esy. 145:3) Abya anzire Yehova, kandi olhwanzo olho mulhwaleka iniapipa Nyamuhanga “omw’ihindana” ly’abalikyabo. (Esy. 22:22; 40:5) Ahathe erithika-thika, wanzire Yehova kandi wukalighirana n’ebinywe bya Dawudi bino: “Iwe Mwami Mukulhu, Nyamuhanga wa Israeli thatha wethu, wupipawe kera na kera.”​—1 Emy. 29:10-13.

2. (a) Thwangapipa thuthi Yehova? (b) Ni bitsibu byahi ebya bandi bawithe, kandi ni byahi ebya thukendi yibukya?

² Munabwire, enzira nguma y’eripipiramu Yehova ly’erisubirya omwa mihindano. Aliwe, balikyethu bangyi kibakalire. Bananzire erisubirya, aliwe obuba bukabakakiraya. Banga rwanisya bathi obuba obo? Kandi ni menge wahi awanga thuwathikya ithwe bosi erisubirya ebikahimba? Thuthe thwasubirya ebibulyo ebyo, thuthatsuka eriyibukya esyonzumwa ini ngulhu-ngulhu esikaleka ithwasubirya okwa mihindano.

3-5. (a) Ngoku kiri omwa Abaebrania 13:15, busana naki thukasubiraya okwa mihindano? (b) Mbwino erisubirya lyethu litholere iryasosana? Soborera.

³ Ithwe bosi Yehova abirithuha olhusunzo lhw’erimupipa. (Esy. 119:108) Ithwe erisubirya okwa mihindano ni kighuma ky’okwa “eripipa lyethu ng’obuhere,” kandi sihali oyuwanga thuherayo obuhere obo. (Soma Abaebrania 13:15.) Mbwino Yehova akasaba obuli mughuma w’okw’ithwe y’obuhere kutse erisubirya ebisosene? Eyihi!

 ⁴ Yehova anasi ku sithuwithe amaaka n’emibere eyisosene, kandi akasima kutsibu obuhere obo thukathoka erimuha. Thalengekania okwa miringo y’erihayo eyo aby’akaligha erilhua omwa Baisraeli. Abandi Baisraeli ibanganahayo ekyana ky’embuli kutse embene. Aliwe Omuisraeli omwera inianganahayo “ehithungulha hibiri, kutse ehyana hibiri hy’ehirikuku.” Kandi okwa Muisraeli oyuthe wangathoka ehinyonyi hibiri, Yehova iniakaligha “ekighuma ky’omw’ikumi ky’ekithiri ky’eyisyano y’enzelele.” (Law. 5:7, 11) Eyisyano iyolhobire ebbeyi, aliwe Yehova iniakasima obuhere obo, ekikulhu yibye “yisyano y’enzelele,” kutse eyisyano eyuwene.

⁵ Namunabwire Nyamuhanga wethu w’olhukeri kwa kine athya. Thukasubirya, syalithusaba athi ithwe bosi thubye mbuyi nga Apolo kutse nga Paulo oyuwabya akaleka abandu ibaligha. (Emib. 18:24; 19:8) Ekya Yehova akayithagha ly’erisubirya ndeke ngoku thwangathoka. Wibuke omukwakali oyuwahayo ehinusu hibiri buyira. Oku Yehova abya w’obughuli kundi mwahayo ndeke ngoku angathoka.​—Lk. 21:1-4.

6. (a) Erikwamana na Abaebrania 10:24, 25, erisubirya eryo thukowa likathuhambako lithi? (b) Wangakangania wuthi ku wukasima erisubirya erikakuhimba?

⁶ Thukahimbangana omw’isubirya lyethu. (Soma Abaebrania 10:24, 25.) Ithwe bosi thukatsemera eriowa erisubirya muthina-muthina okwa mihindano. Thukatsemera ebinywe ebyolho, ebikalhua okwa muthima w’omwana mulere. Thukahimbawa omundu akasubirya inianatsemire busana n’ekwenene eyo amabana. Kandi thukatsemera abakakanganaya “obulhume-lhume” erisubirya, nomwakine indi bakwire esisoni kutse obundi mubamatsuka erigha omubughe wethu. (1 Tes. 2:2) Thwangasima thuthi akaghalha kabu? Enyuma w’emihindano, thwangana basingya busana n’erisubirya lyabu erikahimba. Nethu erisubirya ni yindi nzira eya thwanga kanganirayamu erisima. Neryo aho ithukendibya ithwamahimbangana okwa mihindano yethu.​—Abar. 1:11, 12.

7. Thukaghasirawa thuthi thukasubirya?

⁷ Thukayighasira thukasubirya. (Isa. 48:17) Thuthi? Eky’erimbere, thwamabya n’ekilhubirirwa ky’erisubirya, kikaleka ithwanza eriyitheghekera ndeke emihindano.  Thwamathegheka ndeke, thukongera eriyitheghererya ndeke Ekinywe kya Nyamuhanga. Kandi thwamayitheghererya ndeke, ithukendi ghendera okwa bya thuk’igha. Ekyakabiri, emihindano iyikendi thulhumira kutsibu kundi muthukasangira muyo. Ekyakasathu, kundi kikayithagha akaghalha erisubirya, kikanguha eryibuka ebya thulyasubirayako enyuma w’emihindano.

8-9. (a) Ngoku kiri omu Malaki 3:16, Yehova akayowa athi okw’isubirya lyethu? (b) Ni kitsibu kyahi ekya bandi banganabya ibakinawithe?

⁸ Thukatsemesaya Yehova thukakania okw’ikirirya lyethu. Thwangana yikethera ngoku Yehova akathuhulikirira n’erisima akaghalha akathukahiraho erisubirya. (Soma Malaki 3:16.) Akakanganaya erisima liwe omw’ithutsumulha thukalengaho kutsibu erimutsemesya.​—Mal. 3:10.

⁹ Omo kwenene, thuwithe nzumwa nyingyi mbuya esyangaleka ithwasubirya omwa mihindano. Nomwabine, abandi bangana sagha erisumba ebyalha. Wamabya ikwa wuli wuthya, isiwahwa amani. Thulebaye emisingyi mirebe ye Biblia, eby’erileberyako bike, n’amenge malebe ebyangana thuwathikya ithwe bosi erilengaho erisubirya kutsibu omwa mihindano.

10. (a) Ni buba bwahi obwa bangyi omw’ithwe bawithe? (b) Busana naki eribya mw’obuba bw’erisubirya bwanganabya ini kaminyikalho akuwene?

¹⁰ Wukanahambawa ekikitsi obuli sumba ebyalha wukanza erisubirya? Kyamabya ikwakiri kithya, siwuli iwuwene. Ekwenene yiri yithi abangyi omw’ithwe thukanakwa engitsi thukasubirya. Ekyanga kuwathikya erirwanisya obuba obu, ly’eriminya ekikabuletha. Mbwino wukasagha wuthi wukendi birirwa ekya wulyanza eribugha kutse wuthi wukendi bugha ekiwire? Mbwino wukasagha wuthi erisubirya lyawu si ryendyuwana ng’ery’abandi? Ibbwanu, obuba obo bwanganabya ini kaminyikalho akuwene. Bukakanganaya ngoku wuyikehirye kandi ku wukalhangira abandi ibakulengire.  Yehova anzire omubere oyu. (Esy. 138:6; Fil. 2:3) Aliwe kandi Yehova anzire iwamupipa n’erihimba balikyethu omwa mihindano. (1 Tes. 5:11) Akwanzire kandi akendi kuha obuthubaha obwa wukayithagha.

11. Ni Masako wahi awanga thuwathikya?

¹¹ Lengekanaya okwa Masako ano. E Biblia yikabugha yithi ithwe bosi thukasobaya omwa bya thukabugha n’omwa mibere thukabibughiramo. (Yak. 3:2) Yehova anasi ku sithuhikene, na balikyethu kuthya. (Esy. 103:12-14) Ni b’okw’ihiika lyethu ly’obunyakirimu, kandi bathwanzire. (Mk. 10:29, 30; Yn. 13:35) Banasi ngoku hakanayira ithuthasubirya ekyonyine-nyine ekyo thulyanza eribugha.

12-13. Eky’erileberyako kya Nehemia na Yona kikathweghesayaki?

¹² Lengekanaya okwa by’erileberyako bye Biblia ebyanga kuwathikya erirwanisya obuba bwawu. Ibuka Nehemia. Iniakakolera omwa kikali ky’omwami w’amaaka. Nehemia mwabya omwa bulighe kundi iniabiriowa ngoku esyombimbo n’esyongyo sye Yerusalemu syabirisambulhwa. (Neh. 1:1-4) Thalengekania nga mwahambwa ngitsi nyingahi omwami akamubulya ekyalekire iniabya omwa bulighe! Aho n’aho Nehemia mwasaba neryo amabwira omwami. Neryo, omwami mwakolha kutsibu eriwathikya abandu ba Nyamuhanga. (Neh. 2:1-8) Lengekanaya n’oku Yona. Yehova abere akamuthuma okwa bandu be Ninawe, Yona mubaha kutsibu neryo mwathibitha ehandi. (Yona 1:1-3) Aliwe busana n’obuwathikya bwa Yehova, Yona mwayathulira e Ninawe. N’ebinywe ebyo abwira Abanya Ninawe mubyabaghasira kutsibu. (Yona 3:5-10) Nehemia thukamwighirako omughaso w’erisaba thuthe thwasubirya. N’oku Yona thukigha ngoku Yehova akathuwathikaya erimukolera nomuthwangabya ithuwithe buba bungahi. Omo kwenene, erisubirya omwa mihindano iryanabya ng’erithulha omwatsi w’eritswera okwa Abanya Ninawe?

¹³ Ni byahi ebyanga kuwathikya erisubirya ebikahimba okwa mihindano? Thulebaye ebyanga thuwathikya bike.

14. Busana naki thutholere ithwathegheka ndeke emihindano, ekyo thwanga kikolha mughulhu wahi?

¹⁴ Thegheka obuli muhindano. Wamathegheka lhuba kandi ndeke, isiwendi sagha erisubirya. (Emi. 21:5) Ni kwenene, esyondegheka syethu sy’erithegheka emihindano si sisosene. Eloise, omukwakali ow’emyaka 80, akatsuka erithegheka Akaleberyo eyenga yikanatsuka. Akabugha athi, “Ngatsemera ndeke emihindano namasangwa nathegheka lhuba.” Joy, oyuwithe omubiiri owakamuyithaghisaya buthuku bwosi, akahiraho endambi y’erigha Akaleberyo Kyamukagha. Akabugha athi: “Nganza eribya ingan’ibukire omwatsi.” Ike, omusyakulhu oyuwithe bingyi by’erikolha kandi omutemburi, akabugha  athi, “Kikanyuwanira eriyeghesya bike-bike omwa yenga kwilhaba eriyeghesya ebyosi murundi mughuma.”

15. Wanga thegheka wuthi ndeke emihindano?

¹⁵ Erithegheka ndeke emihindano mwamuliki? Obuli yeghesya, tsuka erisaba Yehova y’omulimu wiwe abuyirire. (Lk. 11:13; 1 Yn. 5:14) Neryo kolesaya dakika nyike erilhaba omo mwatsi. Lebaya ndeke omuthwe mukulhu, emithwe emike-mike, ebisasani, n’ehisanduko. Wuk’igha obuli nungu, soma amasako mangyi awakanganibwe ngoku wanga thoka. Ghaniraya oko mwatsi, lebaya ndeke esyonzumwa esyo wanzire erisyasubiryako. Wamathegheka ndeke, wukaghasirawa kutsibu kandi ikyangana kwolhobera erisubirya.​—2 Kor. 9:6.

16. Ni by’erikolesya byahi ebiriho, kandi wukabikolesaya wuthi?

¹⁶ Kyamathokekana, kolesaya ebya thuwitheko ebiri omwa mulingo w’eletroniki ebiri omwa mubughe ogho wasi. Yehova, erilhabira omwa kithunga kiwe, abirithuha eby’eletroniki erithuwathikya erithegheka emihindano. E JW Library^® app yikathuthokesaya erikimirya ebitabu eby’erighiramu okwa byuma byethu by’ekitekinologia. Neryo thwangan’igha​—kutse nibya erisoma kutse erihulikirira omwatsi​—endambi yosi-yosi na hosi-hosi. Abandi bakakolesaya e app eyi eriyeghesya bakalhuhuka omw’ithungyi okwa mubiiri kutse okwa sukuru kutse ibane omwa lhughendo. E Watchtower Library na ERIBIKIRO LY’EBITABU OKWA MUTHAHULHA^™ bikaleka ikyolhoba erisekulya esyonzumwa omw’isomo eryo thwanzire erigha ndeke.

17. (a) Busana naki kyuwene erithegheka eby’erisubirya bingyi? (b) Ni byahi ebyo w’igha omwa vidiyo Wubye Munywani wa Nyamuhanga​—Thegheka Ebya Wanga Subirya?

¹⁷ Kyamathokekana, thegheka eby’erisubirya bingyi. Busana naki? Kundi mughulhu wosi si wendi sombolhwa obuli sumba ebyalha. Abandi bangana sumba ebyalha nawu wukasumba, n’oyukasondolha anganasombolha omughuma w’okw’inywe. Erithoka erighunzira emihindano okwa buthuku, oyukasondolha anganathwamu erisombolha bake okwa kitsweka kirebe. Neryo isi wahithana kutse erihwa amani wamathendi sombolhwa okw’inatsuka. Wamathegheka eby’erisubirya bingyi, iwukendi bana ehighisa hinene ehy’erisubirya. Omwa by’erisubirya wangana thegheka erisoma erisako. Kandi wamathoka, thegheka erisubirya omwa binywe byawu. *

18. Busana naki iwasubirya omwa bikuhi?

¹⁸ Subiraya omwa bikuhi. Mughulhu mungyi, erisubirya erikahimba likabya omwa bikuhi kandi eryolhobire. Neryo lengaho erisubirya omwa bikuhi. Lengesaya erisubirya hakiri omwa syosekendi 30. (Emi. 10:19;  15:23) Wamabya iwamabirighunza myaka mingyi iwune musubirya omwa mihindano, wuwithe mubiiri munene ow’erikolha​—eribya ky’erileberyako ekyuwene eky’eribera erisubirya omwa bikuhi. Wamabya iwukasubirya biri-biri, abandi ibanganasagha, ibalengekania bathi sibangathoka erisubirya ng’iwe. Kandi, erisubirya omwa bikuhi kikaleka abangyi ibathoka erisangira omwa mihindano. Wamatsuka erisombolhwa, subirya omwa binywe ebyolhobire, kandi ngoku ekibulyo kiryabulhaya. Isiwasubiraya esyonzumwa syosi esiri omwa nungu. Enzumwa ngulhu omwa nungu yamabirikanibwako, wangana subirya okwa sindi nzumwa.​—Lebaya akasanduku “ Ngasubiraye Okuki?”

19. Oyukasondolha angakuwathikya athi, aliwe ni kyahi ekya wutholere iwakolha?

¹⁹ Manyisaya oyukasondolha ngoku wanzire erisubirya okwa nungu nyirebe. Wamathwamu erikolha eki, wutholere iwasangwa wabwira oyukendi sondolha, emihindano yithe yatsuka. Obuthuku bw’erisubirya okwa nungu eyo bukahika, sangwa wasumba ebyalha byawu kandi ndeke nuku oyukasondolha angakulhangira.

20. Emihindano y’ekithunga yiri yithi ng’ebyalya ebya mukalira haghuma n’abanywani?

²⁰ Lhangira emihindano y’ekithunga ng’ebyalya ebya mukalira haghuma n’abanywani bawu abuwene. Thathera akasasani abanywani omwa kithunga ibabakukokya okw’iyitsemesya n’erikubwira bathi wunalethe ehyalya hike. Iwukendi kolhaki? Iwangana yibulha-bulha, aliwe iwukendianza eriletha akandu akuwene ak’obuli mundu angananza. Yehova, Oyukathukokaya, abirithutheghekera ebindu bingyi ebyuwene okwa mihindano yethu. (Esy. 23:5; Mt. 24:45) Kandi akatsema thukaletha akahembo kake, akuwene akathwanga thoka. Neryo thegheka ndeke n’erisangira omwa mihindano ngoku wanga thoka. Neryo isiwendi kwama ky’erirya okwa bya Yehova abirithegheka lisa aliwe nawu iwukendibya iwabiriletha akahembo ako wangaghabana n’abandi omwa kithunga.