1. Aweyi o Davidi kamona mu kuma kia Yave? Ediadi diamfila mu vanga nkia diambu?

DAVIDI WA NTINU wasoneka vo: “Nene o Yave, yo kembelwa kikilu.” (Nku. 145:3) Davidi wazolanga Yave, o zola kwaku kwamfila mu sanisina Nzambi “vana vena nkutakani.” (Nku. 22:22; 40:5) Ka lukatikisu ko vo ongeye mpe ozolanga Yave yo kwikila muna mvovo mia Davidi vo: ‘Okembelwa, e Yave wa Nzambi a Isaele wa se dieto yakwele mvu.’—1 Tus. 29:10-13.

2. (a) Aweyi tulenda sanisina Yave? (b) Nkia mpasi akaka benuananga zau? Nkia mambu tubadika?

² O unu, imosi muna mpila tusanisinanga Yave, i vana e mvutu muna tukutakanu tweto twa Kikristu. Kansi, kuna kwa mpangi zayingi diampasi dikalanga mu vana e mvutu. Bekalanga ye tima dia vana e mvutu muna tukutakanu, kansi wonga bemonanga. Aweyi balenda sundila o wonga wau? Nkia mambu malenda kutusadisa mu vana mvutu za lukasakeso? Vitila twavana e mvutu za yuvu yayi, yambula twateka badika kuma yá yamfunu ikutufilanga mu vana e mvutu muna tukutakanu.

3-5. (a) Mun’owu wa sono kia Ayibere 13:15, ekuma tuvaninanga e mvutu muna tukutakanu? (b) Nga divavanga vo e mvutu zeto zakalanga mpila mosi? Sasila.

³ Yave okutuvananga e lau dia kunsanisina. (Nku. 119:108) E mvutu zeto muna tukutakanu i dimosi muna ‘lukau lweto lwa lusanisinu.’ Ke vena muntu ko olenda wo vanga vana fulu kieto. (Tanga Ayibere 13:15.) Nga Yave ovavanga vo tukau tweto yovo e mvutu zeto zakalanga mpila mosi? Ve.

 ⁴ Yave ozeye wo vo e ngangu ye mambu ma zingu kieto maswaswana. Oyangalelanga kikilu konso lukau luna tulendanga kumvana. Yindula e mpila tukau katambulanga kwa Aneyisaele. Akaka muna Aneyisaele balendanga vana mwan’a meme yovo nkombo. Kansi, awana bakala vo asukami, bavananga “mbwela zole yovo nsweswe miole mia mayembe.” Kansi, avo Nyisaele kalendele vana nuni zole ko, Yave watambulwilanga ‘tini kiekumi kia efa kia mfumfu yambote.’ (Fuka 5:7, 11) E mfumfu ke yafwanga ntalu yayingi ko, kansi avo e ‘mfumfu yambote’ Yave watambulwilanga yo.

⁵ O Nzambi a nkenda i diau mpe kemonanga o unu. Vava tuvananga e mvutu, Nzambi kevavanga ko vo yeto awonso twakala mpovi zambote nze Apolo yovo kwikidisa wantu nze Paulu. (Mav. 18:24; 26:28) Yave ozolele vo twavananga e mvutu zambote mun’owu wa tezo kieto. Sungamena nkento ansona ona wavana lukau lwa mpata miole. Wamfunu kikilu kakala vana meso ma Yave kadi wavana yawonso kakala yau muna zingu kiandi.—Luka 21:1-4.

6. (a) Mun’owu wa sono kia Ayibere 10:24, 25, aweyi e mvutu za mpangi zikutukasakeselanga? (b) Aweyi olenda songela luyangalalu muna mvutu za lukasakeso bevananga ampangi?

⁶ Tukasakesanga muntu yo kwandi vava tuvananga e mvutu muna nkutakani. (Tanga Ayibere 10:24, 25.) Yeto awonso tuyangalelanga e mvutu za mpila mu mpila tuwanga muna tukutakanu tweto. Tuyangalelanga mpe wá e mvutu zankufi ye za nsia ntima zina aleke bevananga. Tukasakeswanga kikilu vava o muntu kevovanga ye kiese kiawonso mu kuma kia diambu diamfunu kalongokele. Tusivikanga awana ‘bekalanga yo unkabu’ wa vana e mvutu, kana una vo akwa nsoni yovo ke kolo ko bayantikidi longoka e nding’eto. (1 Tes. 2:2) Aweyi tulenda songela luyangalalu muna ngolo bevanganga? Tulenda kubavutula matondo kuna mfoko a lukutakanu mu kuma kia mvutu zau za lukasakeso. E mpila yankaka tulenda wo vangila i vava yeto mpe tuvananga e mvutu muna tukutakanu. Muna mpila yayi, ke tutambula kaka lukasakeso ko muna tukutakanu, kansi oyeto mpe tukasakesa akaka.—Roma 1:11, 12.

7. Aweyi tuvuilanga e nluta vava tuvananga e mvutu?

 ⁷ Vava tuvananga e mvutu, yeto kibeni mpe tuvuanga e nluta. (Yes. 48:17) Mu nkia mpila? Diantete, avo tukedi ye kani dia vana e mvutu, ediadi dikutufila mu toma kubika malongi ma tukutakanu. Vava tutoma kubamanga, tuvuanga umbakuzi wa Diambu dia Nzambi. Vava umbakuzi weto uwokelanga, diasazu dikalanga mu sadila mana tulongokanga. Diazole, tutoma yangalela lukutakanu avo yeto mpe twavene mvutu. Diatatu, wau vo ngolo divavanga mu vana e mvutu, tusungamenanga mana tuvovele kana nkutu vo lukutakanu lufokokele.

8-9. (a) Mun’owu wa sono kia Malaki 3:16, aweyi Yave kemonanga vava tuvananga e mvutu? (b) Nkia diambu benuananga diau akaka?

⁸ Yave tuyangidikanga vava tuvovelanga oma ma lukwikilu lweto. Tuna ye ziku vo Yave okutuwanga yo yangalela e ngolo tuvanganga mu vana e mvutu muna tukutakanu. (Tanga Malaki 3:16.) Yave okutuyangalelanga yo kutusambula vava tuvanganga e ngolo za kunyangidika.—Mal. 3:10.

⁹ Kieleka, tuvuidi kuma yayingi mu vananga e mvutu muna tukutakanu. Kansi, akaka nanga wonga bemonanga wa zangula o koko. Avo i wau omonanga, kuyoyi ko. Yambula twabadika nkanikinu mia Nkand’a Nzambi, nona ye mambu mankaka malenda kutusadisa mu vana e mvutu muna tukutakanu.

10. (a) Ekuma ayingi muna yeto tumwenanga o wonga? (b) O wonga wa vana e mvutu ekuma dinina sinsu kiambote?

¹⁰ Nga ntim’aku ududilanga vava ozangulanga o koko mu vana e mvutu muna tukutakanu? Avo i wau, kuna ngeye mosi ko. E ziku kia diambu i kiaki: Ayingi muna yeto wonga tumonanga vava tuvananga e mvutu. Muna sunda o wonga, ofwete zaya ntete e kuma omwenanga o wonga. Nga wonga omonanga wa vilakana dina ozolele vova yovo wa  vana e mvutu zina vo ke zaludi ko? Nga oyindulanga vo e mvutu zaku ke zikala zambote ko nze zina wantu akaka bevananga? O wonga ulenda kala sinsu kiambote. O wonga usonganga vo u nlembami ye obadikilanga akaka vo basundidi. Yave oyangalelanga e fu kiaki. (Nku. 138:6; Fili. 2:3) Kansi, Yave ozolanga vo ongeye mpe wansanisina yo kasakesa e mpangi zaku muna tukutakanu. (1 Tes. 5:11) Wau vo Yave okuzolanga, okuvana o unkabu ovuidi o mfunu.

11. Nkia sono ya Nkand’a Nzambi ilenda kutusadisa mu sunda o wonga?

¹¹ Badika yaka sono ya Nkand’a Nzambi. Nkand’a Nzambi uvovanga vo yeto awonso tuvanganga vilwa mu mana tuvovanga ye muna mpila tuvovelanga. (Yak. 3:2) Yave ke vingilanga ko vo twakala wantu alunga. E mpangi zeto mpe ke diau ko bevingilanga kwa yeto. (Nku. 103:12-14) Betoma kutuzolanga kadi yeto awonso tu wan’a ngudi muna mwanda. (Maku 10:29, 30; Yoa. 13:35) Bebakulanga vo ezak’e ntangwa mana tukanini vova ke mau ko tuvovanga.

12-13. Adieyi tulongokele muna mbandu a Nekemiya yo Yona?

¹² O yindula e nona ya Nkand’a Nzambi dilenda kusadisa mu sunda o wonga. Sungamena e nona kia Nekemiya. Kuna lûmbu lwa ntinu kasadilanga. Nekemiya wakendalala vava kawá vo e yaka ye mavitu ma Yerusaleme mabangulwa. (Nek. 1:1-4) Yindula o wonga kamona vava o ntinu kamvovesa vo kanzayisa ekuma kakadila wakendalala. Vana vau Nekemiya wasamba, i bosi wavana e mvutu. Muna kuma kiaki, o ntinu wasadisa nkangu a Nzambi mu mpila zayingi. (Nek. 2:1-8) Yindula mpe nona kia Yona. Vava Yave kantuma kwa esi Nineve, Yona wabakama kwa wonga yo tina ku fulu kiankaka. (Yona 1:1-3) Kansi, muna lusadisu lwa Yave, Yona walungisa kiyekwa kiandi. Mana Yona kavova mayangidika esi Nineve. (Yona 3:5-10) E mbandu a Nekemiya itulongele o mfunu wa samba vitila twavana e mvutu. E mbandu a Yona itulongele vo Yave olenda kutusadisa mu kunsadila kana nkutu nkia wonga tulenda kala wau. Muna vova e ludi, ke vena nkutakani ko ilenda kutumwesa wonga lutila esi Nineve.

¹³ Nkia mambu malenda kutusadisa mu vana mvutu za lukasakeso muna tukutakanu? Yambula twabadika maka mambu.

14. Ekuma tufwete toma kubikilanga malongi ma tukutakanu? Nkia ntangwa tulenda wo vanga?

¹⁴ Kubikanga malongi ma konso lukutakanu. Avo otekele kuyisila e kani dia vana e mvutu yo toma kubama, kukala ye wonga ko wa vana e mvutu. (Nga. 21:5) Konso muntu mu yeto una ye ntangwa ye mpil’andi kekubikilanga malongi ma tukutakanu. Mpangi Eloise una vo nkento ansona, una ye 80 lwa mvu, oyantikanga kubika Eyingidilu  dia Longoka kuna lubantiku lwa lumingu. Wavova vo: “Itoma yangalelanga tukutakanu avo ntekele kubama.” Mpangi mosi ankento una ye nkumbu Joy, ona osalanga lumbu kiamvimba, ovaulanga e ntangwa kina kia Sabala mu kubika Eyingidilu. Wavova vo: “Diasazu dikalanga mu sungamena mambu avo ndongokele vitila lukutakanu.” Mpangi Ike una vo nkuluntu ye mviti a nzila wavova vo: “Kuna kwa mono diambote dikalanga mu vaula fintangwa konso lumbu mu longoka, vana fulu kia longoka kaka nkumbu mosi mu kolo kiandá.”

15. Adieyi olenda vanga muna toma kubika malongi ma tukutakanu?

¹⁵ Adieyi olenda vanga muna toma kubika malongi ma tukutakanu? Vitila wayantika longoka, ofwete lombanga mwand’avelela a Yave muna sambu. (Luka 11:13; 1 Yoa. 5:14) I bosi, vaula miniti miakete mu fimpa mambu masina muna longi. Fimpa o ntu a diambu, ntu mia mambu miakete, fwaniswa ye babu. Vava oyantika longoka konso tini, tanga e sono ya Nkand’a Nzambi iyikilu. Badika e mambu mena muna longi, toma sia e sungididi muna mambu mana ozolele vanina e mvutu. Avo otomene kubama, nluta miayingi dikutwasila ye diasazu dikala mu vana e mvutu.—2 Kor. 9:6.

16. Nkia salanganu tuna yau? Aweyi osadilanga e salanganu yayi?

¹⁶ Avo dilendakana, sadila e nkanda mina muna nding’aku muna JW Library. Yave osadilanga nkubik’andi mu kutuvana e nkanda muna nzil’eto ya internete mikutusadisanga mu toma kubika malongi ma tukutakanu. E JW Library^® ikutusadisanga mu bandula e nkanda mia longoka muna telefone yovo tablet. Muna mpila yayi, tulenda mo tanga yo wá malongi mama konso ntangwa yovo fulu twina. Akaka besadilanga e aplicativo yayi mu longoka muna ntangw’a vunda kuna salu, kuna sikola yovo ekolo bena muna nkangalu. Diasazu dikalanga mu vavulula mambu tuzolele toma bakula muna longi vava tusadilanga e Biblioteca da Torre de Vigia ye LUNDILU DIA NKANDA^™ muna nzil’eto ya internete.

17. (a) Ekuma dinina diambote mu kubika mvutu zayingi? (b) Adieyi walongoka muna video Kala Nkundi a Yave—Kubika e Nkomena Zaku?

¹⁷ Avo dilendakana, kubikanga mvutu zayingi muna konso longi. Ekuma? Kadi ke ntangwa zawonso ko ozangula o koko bekusola. Dilenda kala vo akaka mpe bezangula o moko nkumbu mosi yo ngeye. O mfidi a longi mosi kaka kesola. Muna fokola lukutakanu mu ola yasikidiswa, o mfidi olenda sikidisa lutangu lwa wantu bevana e mvutu muna tini yankaka ya longi. Muna kuma kiaki, kufungi makasi ko yovo yoya avo kusolelo ko kuna lubantiku lwa longi. Avo okubikidi mvutu zayingi, okala ye malau mayingi mu vana e mvutu. Zimosi muna mvutu olenda vana i tanga  sono kia Nkand’a Nzambi. Kansi avo dilendakana, olenda mpe kubika e mvutu muna mvovo mia ngeye kibeni. *

18. Ekuma dinina diambote mu vana e mvutu zankufi?

¹⁸ Vana mvutu zankufi. Nkumbu miayingi, e mvutu zankufi ye zakiá zau zitoma kasakesanga o wantu. Muna kuma kiaki, vananga e mvutu zankufi. Teza zo kufika mu segundu 30. (Ngana 10:19; 15:23) Avo se mvu miayingi ovananga e mvutu muna tukutakanu, zaya wo vo mbebe yampwena una yau, i sia vo, songa mbandu ambote muna vana mvutu zankufi. Avo ovene mvutu zandá, akaka balenda mona wonga yo yindula vo ke bafwana ko mu vana mvutu nze ngeye. E mvutu zankufi zivananga e ntangwa kwa akaka mu vana e mvutu muna lukutakanu. Avo ngeye i muntu antete osolelo, vana mvutu zankufi za kiuvu kiyuvuilu. Kuvovi mawonso ko mena muna tini. Avo e mbut’a diambu muna tini disasilu kala, olenda kwaku yika mambu mankaka mena muna tini.—Tala e babu “ Nkia Mambu Ndenda Vovela?”

19. Aweyi o mfidi a longi kalenda kusadisila? Adieyi ofwete vanga?

¹⁹ Zayisa kwa mfidi a longi e tini kina ozolele vanina e mvutu. Avo i diau ozolele vanga, mokena yo mfidi a longi vitila lukutakanu lwayantika. Vava nulwaka vana tini kina ozolele vanina e mvutu, zangula o koko mu nzaki kimana o mfidi kamona.

20. Aweyi o lukutakanu lwinina nze madia odianga kumosi ye akundi?

²⁰ Badikilanga tukutakanu nze ngeye odianga vamosi ye akundi. Yindula vo akundi aku muna nkutakani bakubikidi e lambu yo kulomba vo watwasa lekwa kia dia. Aweyi omona? Nanga otokana fioti. Kansi, ovanga mawonso olenda mu nata lekwa kina wantu awonso beyangalela. O Yave ona okutubokelanga muna tukutakanu, okutuyadilanga meza mazala ye madia mambote. (Nku. 23:5; Mat. 24:45) Yave oyangalalanga vava tutwasanga kana nkutu tukau twakete. Muna kuma kiaki, toma kubamanga yo vana e mvutu kuna mvevo wawonso. Muna mpila yayi, kudila kaka va meza ma Yave ko, kansi otwasa mpe lukau muna nkutakani.