1. Le Davida wādi umwene Yehova namani, ne kino kyāmutonwene alonge bika?

MULOPWE DAVIDA wālembele amba: “Yehova i mukatampe kadi mufwaninwe kutendelwa kutabuka.” (Ñim. 145:3) Wādi usenswe Yehova, kadi buno buswe bwāmutonwene amutendele “mu bukata mwa kipwilo.” (Ñim. 22:22; 40:5) Na bubine, nobe usenswe Yehova kadi witabije binenwa bya Davida bya amba: “A Yehova Leza wa Isalela tata wetu, utendelwe nyeke ne nyekeke.”—1 Bi. 29:10-13.

2. (a) Le i muswelo’ka otubwanya kutendela Yehova? (b) Le bamo badi na makambakano’ka, ne i bika byotusa kubandaula?

² Dyalelo, kulondolola ku kupwila kwa bwine Kidishitu i muswelo umo otutendelanga Yehova. Inoko, batutu ne bakaka bavule badi na makambakano. Basakanga kulondolola ku kupwila, ino moyo webakwata. Le babwanya kunekenya uno moyo namani? Ne i madingi’ka a kamweno abwanya kwitukwasha batwe bonso tulete malondololo akankamika? Kumeso kwa kulondolola bino bipangujo, tubandaulei’ko bidi bubinga buná bukatampe botulondolwelanga ku kupwila.

3-5. (a) Mungya Bahebelu 13:15, mwanda waka tulondololanga ku kupwila? (b) Le tufwaninwe batwe bonso kuleta malondololo a muswelo umo? Shintulula.

³ Yehova i mwitupe batwe bonso dyese dya kumutendela. (Ñim. 119:108) Malondololo otulondolola ku kupwila abadilwa mu “kitapwa kya mitendelo,” kadi i kutupu muntu ubwanya kulambula kino kitapwa pa kyetu kyaba. (Tanga Bahebelu 13:15.) Le Yehova witulombanga batwe bonso kitapwa nansha malondololo a muswelo umo? Mhm, ke amopo!

 ⁴ Yehova uyukile amba tudi na bwino kadi mu ngikadilo mishileshile, ne kadi usangelanga bininge bitapwa byotumulambula mungya bukomo bwetu. Langulukila bidi pa miswelo ya bitapwa bya bene Isalela byawāitabije. Bene Isalela bamo bādi babwanya kulambula kana ka mukōko nansha mbuji. Ino bene Isalela balanda bādi bakokeja kulambula “tukutyikutyi tubidi nansha bibondya bya bankunda bibidi.” Kadi shi mwine Isalela wākomenwa kulambula toni tubidi, Yehova wāitabije alambule “kipindi kimo kya pa bipindi dikumi bya efa wa bukula bupēla.” (Levi 5:7, 11) Bukula kebwādipo na bei, inoko Yehova wādi usangela kino kitapwa, shi i kya “bukula bupēla.”

⁵ Leza wetu muyampe kashintyilepo ne dyalelo. Kitatyi kyotulondolola, kasakengapo batwe bonso twikale bantu bayuke’byo kunena pamo bwa Apolosa nansha banekenya bantu pamo bwa Polo. (Bil. 18:24; 26:28) Kisaka’tu Yehova i tulete malondololo mayampe—mungya bukomo bwetu. Vuluka mukaji wa kishala wālambwile tubityele tubidi. Wādi mulēme ku meso a Yehova mwanda wālambwile mwendele bukomo bwandi.—Luka 21:1-4.

6. (a) Mungya Bahebelu 10:24, 25, le malondololo otwivwana abwanya kwitukwasha namani? (b) Le i muswelo’ka obwanya kufwija’ko pa malondololo akukankamika?

⁶ Twikankamikanga batwe bene na bene na malondololo etu. (Tanga Bahebelu 10:24, 25.) Batwe bonso tusangelanga kwivwana malondololo meshileshile ku kupwila. Tusangelanga binenwa bipēla kadi byampikwa budimbidimbi bya mwana mutyetye. Tuteñwanga palondolola na nsangaji muntu wayukile bubine panopano. Kadi tusangelanga boba ‘batakamene na bukankamane’ kulondolola, nansha shi badi na bumvu kadi nansha shi bakishilula kwifunda ludimi. (1 Ts. 2:2; kunshi kwa dyani) Le tukafwija’ko namani pa bukomo bobalonga? Pa kupwa kupwila, tubwanya kwibafwija’ko pa mwanda wa malondololo abo akankamika. Muswelo mukwabo wa kufwija’ko i batwe netu kulondolola. Nabya ketukakankamikwapo’nka batwe ku kupwila, ino netu tukakankamika bakwetu.—Loma 1:11, 12.

7. Le tumwenanga’mo namani kitatyi kyotulondolola?

⁷ Tumwenanga’mo batwe bene kitatyi kyotulondolola. (Isa. 48:17) Namani?  Dibajinji, shi tudi na kitungo kya kulondolola, twielelanga’ko kuteakanya kupwila biyampe. Shi twiteakanya biyampe, twivwanijanga senene Kinenwa kya Leza. Kadi shi twivwanija senene, tubwanya kwingidija byobya byotwifunda. Dya bubidi, tukasangela kupwila bininge mwanda tunenanga mu mīsambo. Dya busatu, byobilomba kulonga bukomo pa kulondolola, divule dine tuvulukanga myanda yotwalondolwele ku kupwila nansha shi ke papite kitatyi kilampe.

8-9. (a) Le Yehova wiivwananga namani pa malondololo etu? (b) Le i makambakano’ka abwanya kwikala na bantu bamo?

⁸ Tusangajanga Yehova kitatyi kyotulombola lwitabijo lwetu. Tubwanya kukulupila’mba Yehova witwivwananga ne kusangela bininge bukomo botulonga bwa kulondolola ku kupwila. (Tanga Malaki 3:16.) Ulombolanga kusangela kwandi na kwitwesela potulonga bukomo bukatampe bwa kumusangaja.—Mal. 3:10.

⁹ Na bubine, tudi na bubinga bwendele’mo bwa kulondolwela ku kupwila. Inoko, bamo babwanya kwivwana moyo wa kwela kuboko mūlu. Shi nobe wivwananga moyo, kokatyumukwa mutyima. Twisambilei’ko bidi pa misoñanya imoimo, bimfwa bityetye, ne madingi amo a kamweno a mu Bible abwanya kwitukwasha batwe bonso tulonge bukomo bwa kulondolola bininge ku kupwila.

10. (a) Le bavule motudi badi na moyo wa bika? (b) Mwanda waka kwikala na moyo wa kulondolola i kilomboji kiyampe?

¹⁰ Le mutyima ukulēmanga kitatyi kyonso kyosaka kwela kuboko mūlu mwanda wa kulondolola? Shi i amo, nabya kudipo bunka. Bubine i buno amba, bavule motudi bevwananga kamoyo kitatyi kyobalondolola. Pa kunekenya uno moyo, ufwaninwe bidi kujingulula kine kilengeja moyo obe. Le udi na moyo wa kwilwa byobya byowadi usaka kunena nansha wa kunena bya bubela? Le uselanga mutyima kūlu amba malondololo obe keakekalapo mayampe na a bakwenu? Na bubine, uno  moyo ubwanya kwikala bu kilomboji kiyampe. Ao ulombolanga’mba wi mwityepeje kadi umwene amba bakwenu i bakupite. Yehova usenswe ino ngikadila. (Ñim. 138:6; Fid. 2:3) Inoko, Yehova ukusakila umutendele ne kukankamika batutu ne bakaka ku kupwila. (1 Ts. 5:11) Aye ukusenswe kadi ukakupa bukankamane bosakilwa.

11. Le i bivulujo’ka bya mu Bisonekwa bibwanya kwitukwasha?

¹¹ Tulangulukilei’ko bidi pa bivulujo bimobimo bya mu Bisonekwa. Bible unena’mba batwe bonso tulubanga mu byotunena ne mu muswelo otwibinena. (Yak. 3:2) Yehova kasakengapo twikale babwaninine, kadi nansha ke batutu ne bakaka bene. (Ñim. 103:12-14) Abo babadilwa mu kisaka kyetu kya ku mushipiditu, kadi betusenswe. (Mako 10:29, 30; Yoa. 13:35) Bevwanije amba kyaba kimo ketulondololangapo bine byotwadi tusaka kulondolola.

12-13. Le kimfwa kya Nehemia ne kya Yona kitufundija bika?

¹² Langulukila pa bimfwa bimobimo bya mu Bible bibwanya kukukwasha unekenye moyo obe. Vuluka Nehemia. Wādi wingila mu kipango kya mulopwe mukomo. Nehemia wāivwene bulanda pa kwivwana’mba mumbu ne bibelo bya Yelusalema i bitūtwe. (Neh. 1:1-4) Langa’po bidi mwawāivwanine moyo pāmunenene mulopwe alombole kine kyakādipo usangedile! Nehemia wālombēle kiponka na ponka kupwa wamulondolola. Mulopwe nandi, wālonga bintu bivule mwanda wa kukwasha bantu ba Leza. (Neh. 2:1-8) Kadi langulukila ne padi Yona. Kitatyi kyāmunenene Yehova ende akasapwile bekadi ba Nineva, Yona wāzakele bininge, kānyemena kungi. (Yona 1:1-3) Ino na bukwashi bwa Yehova, Yona wāvuije mwingilo wandi. Kadi binenwa byaānenene byākweshe bininge bantu ba Nineva. (Yona 3:5-10) Kimfwa kya Nehemia kitufundija’mba, kulombela kumeso kwa kulondolola i kwa kamweno. Kadi kimfwa kya Yona nakyo kitufundija’mba, Yehova ubwanya kwitukwasha tumwingidile nansha shi tudi na moyo mukatampe namani. Ino, le kudi kipwilo kibwanya kulenga moyo pamo bwa bene Nineva?

¹³ Le i madingi’ka a kamweno abwanya kukukwasha ulete malondololo akankamika ku kupwila? Twisambilei’ko bidi pa madingi matyetye.

14. Mwanda waka tufwaninwe kuteakanya kupwila biyampe, ne i kitatyi’ka kyotubwanya kuteakanya?

¹⁴ Teakanya kupwila ko-konso. Shi walwile’ko kuteakanya biyampe, ukekulupila bininge pa kulondolola. (Nki. 21:5) Na bubine batwe bonso ketudipo na mpangiko ya muswelo umo. Eloise, mukaji wa kishala wa myaka 80 ne musubu, ushilulanga kuteakanya Kifundwa kya Kiteba kya Mulami ku ngalwilo kwa yenga. Unena’mba, “Nsangelanga bininge kupwila shi ne mwifunde kumeso kwa kitatyi.” Joy, wingila kaji ka nshikije-dyuba, i mwitūdile’ko kitatyi  kya kwifunda Kiteba kya Mulami mu Dya Mposo. Unena’mba, “Nsangelanga myanda poikidi mu ñeni.” Ike, mukulumpe muvudilwe bya kulonga kadi pania unena’mba, “Monanga’mba i biyampe kwifunda bityebitye mu bula bwa yenga pa kyaba kya kwifunda musunsa umo mu kitatyi kilampe.”

15. Le i muswelo’ka obwanya kuteakanya kupwila biyampe?

¹⁵ Le kuteakanya kupwila biyampe kulomba bika ne bika? Ponso powifunda shilula na kulomba Yehova akupe mushipiditu ujila. (Luka 11:13; 1 Yo. 5:14) Kupwa wilamije’ko minite mityetye ya kutala biyampe myanda yowifunda. Bandaula mutwe wa mwanda, tumitwe twa myanda, bifwatulo, ne tupango twa bufundiji. Powifunda musango ne musango, tanga bisonekwa bivule bitelelwe’mo shi bibwanika. Langulukila pa myanda’ya, ne kuta mutyima bininge pa myanda yosaka kukalondolola. Shi witeakanye biyampe, ukamwena’mo bininge kadi ukapēlelwa kulondolola.—2 Ko. 9:6.

16. Le i bingidilwa’ka byodi nabyo, ne wibingidijanga namani?

¹⁶ Shi bibwanika, ingidija bingidilwa bidi pa Entelenete bya mu ludimi loyukile. Yehova, kupityila ku bulongolodi wandi, i mwitupe bingidilwa bya pa Entelenete bitukwasha tuteakanye kupwila. Mpangiko ya JW Library^® itukwashanga tutentwile mabuku a kwifunda mu bingidilwa bya busendwe. Kupwa tubwanya kwifunda—kutanga nansha kuteja myanda’ya—kitatyi kyo-kyonso nansha shi tudi kwepi. Bamo bengidijanga bino bingidilwa mwanda wa kwifunda kitatyi kyobakōkolokwa ku kaji, ku masomo nansha pobadi mu lwendo. Watchtower Library ne Watchtower KIBĪKO PA ENTELENETE bikwashanga bininge pa kukimba myanda idi mu kifundwa yosaka kwivwanija biyampe.

17. (a) Mwanda waka i biyampe kuteakanya malondololo mavule? (b) Le i ñeni’ka yoboila ku video inena’mba Ikala Mulunda na Yehova—Teakanya Kilondololwa Kyobe?

¹⁷ Shi bibwanika, teakanya malondololo mavule ku kifundwa ne kifundwa. Mwanda waka? Mwanda kebabwanyapo kukupa ponso poela kuboko mūlu. Kadi kudi bakwabo bakela maboko mūlu mu kitatyi kimo kyonka, ne kadi mwendeji ubwanya kupa’po umo. Pa kusaka’mba kupwila kupwe pa kitatyi kitungilwe, mwendeji ubwanya kutyepeja bantu ba kulondolola pa myanda imoimo. Nanshi kokafītwa nansha kutyumukwa mutyima shi kebakupelepo ku ngalwilo kwa kifundwa. Shi wi muteakanye malondololo mavule, ukekala na mikenga mingi ya kulondolola. Ubwanya kuteakanya kutanga kisonekwa. Inoko shi bibwanika, teakanya ne kulondolola mu byobe bishima. *

18. Mwanda waka i biyampe kuleta malondololo mēpi?

 ¹⁸ Leta malondololo mēpi. Divule dine, malondololo akankamika bininge i oa mēpi kadi apēla. Nanshi witungile kitungo kya kuleta nyeke malondololo mēpi. Longa bukomo bwa kulondolola mu kintu kya masekonde 30. (Nki. 10:19; 15:23) Shi ulondololanga kala ku kupwila mu bula bwa myaka mivule, udi na mwingilo mukatampe—kushiya kimfwa kiyampe kya kuleta nyeke malondololo mēpi. Shi uleta malondololo makutakane alonga minite mivule, bakwenu babwanya kuzakala, kebalanga’mba kebabwanyapo kufikila pa bwino bobe bwa kulondolola. Kadi, malondololo mēpi apanga bavule mukenga wa kulondolola ku kupwila. Nakampata shi abe ye obabadikila kupa, leta malondololo apēla kadi alondolwedidila kipangujo. Kokasaka kupwa myanda yonso idi mu musango. Shi abapu kwisambila pa myanda mikatampe idi mu musango, ubwanya kulondolola pa myanda mikwabo.—Tala kapango kanena’mba “ Le Mbwanya Kulondolola pa Bika?”

19. Le mwendeji ubwanya kukukwasha namani, ino i bika byofwaninwe kulonga?

¹⁹ Yukija mwendeji amba usa kulondolola mu musango kampanda. Shi usaka kulonga namino, ufwaninwe kulombola mwendeji kumeso kwa kupwila kushilula. Shi ke kitatyi kya kulondolola mu musango’wa, ela kuboko mūlu bukidibukidi, kadi tulula’ko bininge mwanda wa mwendeji ekumone.

20. Le kupwila kwa pa kipwilo kudingakene namani na kudya pamo na balunda?

²⁰ Mona kupwila kwa pa kipwilo pamo bwa byakudya byodya na balunda bayampe. Langa’po bidi shi balunda nobe mu kipwilo abakwite mudye nabo byakudya, ino abakunena uteakanye’ko twakudya tutyetye. Le ukalonga namani? Padi ubwanya kuzumbija mutyima bityetye, ino ukalonga bukomo bwa kusela kintu kikasangela bantu bonso. Yehova, mufikilwa wetu, nandi i mwituteakenye meza mayule bintu biyampe ku kupwila. (Ñim. 23:5; Mat. 24:45) Kadi usangalanga shi tusela kakyabuntu, mwendele bukomo bwetu. Nanshi witeakanye biyampe ne kulondolola bininge mwendele bukomo bobe. Nabya kukadipo’tu enka ku meza a Yehova, ino ukaleta ne kyabuntu kya kwiabila na kipwilo.