1. ¿Ja ma nuu e David a e Jehová, ñe pje go tsjaa?

 E REY DAVID go dyopjꞹ: “E Jehová me na nojo, ngekʼua ni jyodʼꞹ ra unꞹji na punkjꞹ alabanza” (Sal. 145:3). Angeze me mi sʼiya e Jehová, ngekʼua me go nee go unꞹ alabanza “ko yo dyaja kjuarma kja congregación” (Sal. 22:22; 40:5). Xo akjasgojmenu me ri sʼiyajme e Jehová i ri kjijñijme ja ba ngijñi e David: “Me na notsʼꞹge, me na jontetsʼꞹ texe yo paʼa, o, Jehová, i Kjimige in tata e Israel”​(1 Crón. 29:10-​13).

2. a) ¿Pje ra kjaji ngekʼua ra jñetsʼe ke ri sʼiyaji e Jehová? b) ¿Ja ga søøji janzi kjuarma, ñe pje ra nujidya?

² Yo padya søø ra unꞹji alabanza e Jehová ma ra unꞹji dʼa comentario kja jmurkjimi. Na punkjꞹ kjuarma mi neeji ro unꞹji dʼa comentario, i dya søø go tsjaajikʼo, me mi su̱ji. ¿Pje søø ra tsjaaji ngekʼua dya kja ra su̱ji? ¿Pje søø ra mbøxkꞹji ngekʼua kʼo ra manji ra mbøsʼꞹ kʼo bʼꞹnji kja jmurkjimi? Otrʼꞹ, ra nuji nziyo razón pjekja ri unꞹji comentario kja yo jmurkjimi.

3-5. a) Kʼua ja nzi ga mama kja Hebreos 13:15, ¿pjekja ri unꞹji comentario kja yo reunión? b) ¿Jarga pa̱rgøji ke e Jehová dya øtrʼkꞹji kʼꞹ texezꞹji ra manji comentario nzakjaa yo dyaja?

³ E Jehová nee ke texe ra sʼiyaji (Sal. 119:108). Ma ri unꞹji dʼa comentario kja jmurkjimi chenjui ma ri unꞹji dʼa “sacrificio de alabanza”, i dya kjo søø ra tsjakøjikʼo (xørꞹ Hebreos 13:15). ¿Nee e Jehová ke texezꞹji ra manji yo comentario nzakjaa yo dyaja? Iyo.

⁴ E Jehová pa̱køji nzi nazꞹji kʼo ri pɇsʼiji i ñe kʼo søø ra kjaaji, i me mⱥjⱥ ma pje kʼo søø ra unꞹji. Ra mbeñeji kʼo sacrificio kʼo mi unꞹji e Jehová kʼo israelita. Kʼo mi pɇsʼiji na punkjꞹ merio, mi jyodʼꞹ ro unꞹji dʼa tsʼime o dʼa tsʼichiba, i kʼo dya mi pɇsʼiji na punkjꞹ, mi søø ro unꞹji “yeje bilo o yeje mbaro” i ma dya mi søø ro unꞹji kʼo yeje trjasʼꞹꞹ, mi søø ro unꞹji “dʼa décimo de efá de flor de arina” (ke nee ra mama yeje litro de arina ñeje dʼa nde taza) (Lev. 5:​7, 11). Zø kʼe arina dya nrra ma mizhi, e Jehová me mi nuu na jookʼo, ma mi nge “arina kʼo me ma joo”.

⁵ E Mizhokjimi xi kjijñi akjanu yo padya. Ma ri unꞹji dʼa comentario, angeze pa̱ra̱ kʼo søø ra mangøji i dya tebʼe ke ra kjaaji o ra ñaji nzakjaa yo dyaja, nzakjaa e Apolo ñe e Pablo mi jingua (Hech. 18:24; 26:28). kʼo nee angeze nge ke ra unꞹji​texe kʼo me na joo. Ra mbeñeji kʼe dʼa nʼanxu, ke dya kja mi ñeje o xira, dya mi pɇsʼi na punkjꞹ merio i go unꞹtrjo yeje tsʼimoneda i e Jehová go nuu me na jokʼo nange mi ngextjo kʼo mi pɇsʼi​(Luc. 21:​1-4).

6. a) Kʼuajanzi ga mama kja Hebreos 10:24, 25, ¿pje søø ra kjogꞹzꞹji ma ra ⱥrⱥji yo comentario ke unꞹji yo dyaja ma ri jmurꞹji? b) ¿Pje søø ra kjaaji ngekʼua ra jñetsʼe ke ri nuji ke me na mubi yo comentario ke unꞹji yo dyaja kjuarma?

⁶ Kʼo ri mangøji ma ri unꞹji dʼa comentario, me ti pøtka pjøsteji (Xørꞹ Hebreos 10:24, 25). Texezꞹji ri nuji na joo yo nandyo comentario. Nzakja me ri to̱jiaji ma ri ⱥrⱥji dʼa comentario ke go unꞹ dʼa tsʼitrʼi o dʼa tsʼixutrʼi. Nzakja me ri søøji na joo ma ri ⱥrⱥji dʼa kjuarma ke unꞹ dʼa comentario ke kja go meya. I xo ri nuji na joo ma kjo kʼo mi tseje o kja na pjechi na idioma zø chikileje kʼo bo mama (1 Tes. 2:2). ¿Pje ra kjaaji ngekʼua ra unꞹji nguenda ke me na joo kʼo na kjaaji? kʼo ra kjaaji, ra unꞹji pøjø i ra xiji ke me na joo kʼe comentario ke bo mama i ñe me go mbøxkꞹjikʼo. Xo ñe ma ra unꞹgoji dʼa comentario. Akjanu dya ngextjo ke ra mbøxkꞹji, xo ra pjøsʼꞹji yo dyaja​(Rom. 1:​11, 12).

7. ¿Ja ga mbøxkꞹji ma ri unꞹji comentario nu ja ri jmurꞹji?

⁷ Ma ra manji comentario me pjøxkꞹji (Is. 48:17). ¿Ja ga mbøxkꞹji? Daja, ma ri nee ra pasʼꞹji in dyɇɇ, ra xampaji na joo texe kʼo ra nuji kja nu jmurkjimi, mazi ra meyaji na joo kʼo mama nu Jñakjimi i ra nee ra kjaaji kʼo mama. Yeje, akjanu mazi ra mbøxkꞹji kʼo ra nuji kja nu jmurkjimi, akjanu mazi ra pøtka pjøsteji kja nu jmurkjimi. I jñii, ma ra manji dʼa comentario mazi ni jyodʼꞹ ra xampaji na joo, i kʼo ra manji mazi ra ngejme kja in pjeñeji.

8-9. a) Kʼuajanzi ga mama kja Malaquías 3:16, ¿ja gi kjijñige ke nuu e Jehová ma ri unꞹji comentario nu ja ri jmurꞹji? b) Zø nge ga kjanu, ¿ja ga søøji kʼo dyaja kjuarma?

⁸ E Mizhokjimi Jehová nee ke ra mangøji kʼo bʼꞹbʼꞹ kja i mꞹbʼꞹji. Akjanu ri pa̱rgøji ke angeze ⱥtkⱥgoji i mi na mubi ga nuu ma ri unkʼøji comentario kja ne jmurkjimi (Xørꞹ Malaquías 3:​16). Ma nutsʼkʼe ri matrʼꞹ e Jehová ja ga mama angeze, ri mⱥjⱥ ñe ra mbøxkʼꞹ angeze​(Mal. 3:​10).

⁹ Zø ya gi pa̱ra̱ ke na joo ke ra unꞹji comentario, bʼꞹbʼꞹ kʼo su̱ji, dya nee ra pasʼꞹji o dyɇɇ. Ma ngetsʼkʼe ga kjanu, dya gi su̱u̱. Ra nuji kʼo jitsiji nu o Jñaa e Yose kʼo go tsjaji o mbɇpji e Jehová mi jingua, ñeje ra nuji kʼo ra mbøxkꞹji ngekʼua søø ra unꞹji comentario.

10. a) Na punkjꞹzgøji, ¿ja rga søøgøji? b) ¿Pjenga søø ra manji ke ma ri su̱ji ke ra unꞹji comentario bʼꞹma na jokʼo?

¹⁰ ¿Gi su̱ge ma gi nee ri pasʼꞹ in dyɇɇ kja nu jmurkjimi? Ma gi søøge ga kjanu, dya ngextrjotsʼꞹge gi søø akjanu. Na punkjꞹ kʼo ri søøgøji akjanu xo ri su̱gøjme ma ri unꞹjme dʼa comentario. Ma nrre ga kjatsʼkʼe nu, ni jyodʼꞹ ri pa̱rge pjekja i søøge akjanu. ¿Nge kʼꞹ gi su̱ge ke dya søø ri jñaa o ri mama kʼꞹ dya ga kjuana? ¿Gi su̱ge ma dya ri unꞹ dʼa comentario nzakja yo dyaja? Ma gi su̱ge ri unꞹ comentario bʼꞹma na jokʼo, akjanu jñetsʼe ke dya gi jñeʼestjo, i ke i kjapꞹ xenda ni mubi yo dyaja kjuarmaji ke na ngetsʼkʼe. E Jehová me sʼiya yo dya chala (Sal. 138:6; Filip. 2:3). Angeze nee ke ri matrʼꞹ i ri pøtki pjøsteji yo kjuarma kʼo paa kja jmurkjimi (1 Tes. 5:​11). Angeze me netsʼe ngekʼua ra dyakꞹ zɇzhi i dya kja ri su̱u̱.

11. ¿Pje ma texto kʼꞹ junsʼꞹ kja ne Biblia søø ra mbøxkꞹji?

¹¹ Ra nuji pje mama nu o Jñaa e Mizhokjimi. Nu Jñaa e Yose mbʼentsji ke dya ra mbedye na joo texe kʼo ri nee ra manji (Sant. 3:2). E Jehová dya tebʼe ke ra mbedye na joo texe kʼo ri negøji, i xo ñe in kjuarmaji (Sal. 103:12-​14). Yo in kjuarmagoji ngeji nzakja in pjamiliagoji, nezgøji nzakja e Mizhokjimi (Mar. 10:29, 30; Juan 13:35). Pa̱ra̱ji ke dya pedye na joo kʼo jñaa kʼo ri nee ra mangøji.

12-13. ¿Pje ri pjechiji kʼo go kjogꞹ e Nehemías ñe e Jonás?

¹² Ra nuji kja nu o Jñaa e Mizhokjimi yo ejemplo ke ra mbøxkꞹji ngekʼo dya ra su̱ji. Ra pjꞹrꞹji ko e Nehemías, mi pɇpji ko dʼa rey. Ma o mba̱ra̱ e Nehemías ke kʼo muralla ñe kʼo ngoxtrʼi a ma juagꞹji, nukʼo me go sichʼi o mꞹbʼꞹ (Neh. 1:​1-4). Ra kjijñiji jaba søʼø e Nehemías. Ma kʼe rey o dyønꞹ, ¿pjekja jñetsʼe i jmii ke me gi søxi?. Ante ke ro nrrꞹrꞹ, e Nehemías dabadiji o dyøtꞹ e Jehová ke ro mbøsʼꞹ. Akjanu kʼe rey me go mbøsʼꞹ o jñiñi e Mizhokjimi (Neh. 2:​1-8). Kʼo go tsjaa e Nehemías jitskøji ke ante ke ra trjꞹrꞹji dʼa trʼønꞹ, ra øtꞹji e Tsʼitajensʼe ke ra mbøxkꞹji. Xo ra kjijñiji kʼo go kjogꞹ ko e Jonás. Ma e Jehová go dyøtꞹ ke ro ma zopjꞹ kʼo ntee a Nínive, me go pizhi, ngekʼua nandyo jñiñi bo ma (Jon. 1:​1-3). E Mizhokjimi go mbøsʼꞹ ro tsjaa kʼo bi xipji, e Jonás bo xipji kʼo mi jyodʼꞹ ro tsjaa kʼo Ninivita, nukʼo go mbøsʼꞹ na punkjꞹ kʼo ntee a Nínive (Jon. 3:​5-​10). Kʼo go tsjaa e Jonás jitskøji ke e Jehová ra mbøxkꞹji ma ri su̱goji ra kjaaji kʼo nee angeze. Nangeje yo in kjuarmaji dya ga kjaaji nzakja kʼo Ninivita, ¿eko ja̱a̱?

¹³ ¿Pje ra mbøxkꞹji ngekʼua ra unꞹji comentario? Ra nuji kʼo ra mbøxkꞹji ma ra manji comentario.

14. a) ¿Pjekja ra xampaji na joo ante ke ra jmurꞹji? b) ¿Jingua ra xampaji yo ra xørꞹji kja reunión?

¹⁴ Ma bʼɇzhi janzi paa ke ra jmurꞹji otrʼꞹ ra xampaji. Ra jodʼꞹji nu jyadʼꞹ texe yo paa ngekʼua ra xampaji na joo, akjanu dya ra su̱ji ma ra unꞹji dʼa comentario (Prov. 21:5). Texe ri nandyo rga xampaji. Eloise, ke a nʼanxu, mi ɇdyi 80 kjɇɇ, eñe xampa nrreze ma nrromingo ko Nu Atalaya. Angeze mama: “Mi ti mⱥjⱥ ma ri xampa ja nzi paa ante ke ra jmurꞹjme ”. Dʼa kju̱ʼu̱ ke ni chju̱u̱ Joy, pɇpji texe yo ngoʼo i xampa Nu Atalaya ma b’ɇxtrjo dʼa paa ke ra maa kja reunión, angeze mama ke ga kjanu dya ra jyombeñema. E Ike, ke otrʼꞹ axoñiji pɇsʼi na punkjꞹ bʼɇpji i ngeje precursor, mama: “Nutsʼkʼo ri xampago texe yo paa chikileje”.

15. ¿Pje søø ra kjaaji ngekʼua ra xampaji na joo ma ra mojo kja dʼa reunión?

¹⁵ ¿Pje søø ra kjaaji ngekʼua ra xampaji na joo ma ra mojo kja dʼa jmurkjimi? Kʼo otrʼꞹ ra kjaaji, ra øtꞹji e Jehová ke ra dyakøji in zɇzhkjimi (Luc. 11:13; 1 Juan 5:​14). Nakʼua, ra nuji nu tema i ra kjijñiji na joo pje nee ra xitsʼiji ñe jarga mbøxkꞹjiyo. Ñe ra nuji yo subtema ke xo ri xiji yo subtítulo, ra nuji yo foto kʼo kuatrʼꞹnu i ñe yo recuadro. Nakʼua ra pjꞹrꞹji ra xørꞹji texe yo párrafo ñe xo ra jodʼꞹji texe kʼo texto kʼo ra søø i ra zopjꞹji. Xo ra Kjijñiji na joo texe kʼo mamanu, mazi ra kjaapꞹji nguenda kʼo jñaa kʼo ra nee ra manji ma ra unꞹji dʼa comentario. Ma ra kjaji texeyo, ra mbøxkꞹji ngekʼua ra neeji ra unꞹji yo comentario​(2 Cor. 9:6).

16. ¿Pje ma herramienta gi pɇsʼige, ñe ja ga mbøxkʼꞹkʼo?

¹⁶ Ra kjaapji nguenda yo erramienta electrónica yo ri pɇsigøji. Nge e Jehová ke pjøsʼꞹ nu organización ngekʼua dʼakʼꞹji yo erramienta electrónica, nujyo pjøxkꞹji ra xampaji na joo. Kja ne aplicación JW Library^® søø ra sobʼꞹji kja in teléfono o kja tableta yo artículo de estudio, akjanu søø ra​xampaji na joo. I søø ra xørꞹji o­ra ⱥrⱥji,​nzakja ma ja nrre ri bʼꞹbʼꞹji o ma jenrre ri poji kja in bʼɇpjiji, bʼꞹbʼꞹ kʼo xampaji ma soyaji dʼa nrrajme kja bʼɇpji o kja ngunxørꞹ. Xo ñe nu programa Watchtower Library i nu sitio BIBLIOTECA EN LÍNEA Watchtower™, pjøxkꞹji ra xampaji na joo, ñe ra tøtrʼꞹji kʼo ri nee ra pa̱ra̱ji.

17. a) ¿Pjekja me na joo ra xampaji na punkjꞹ comentario? b)  ¿Pje ro pjechiji ma ro jandaji nu video Hazte amigo de Jehová​:Prepara bien tu comentario?

¹⁷ Mi na joo ra xampaji na punkjꞹ comentario nzi daja yo artículo. ¿Pjekjaa? Dya ngextrjozgøji ri neji ra unꞹji dʼa comentario ma ri pasʼꞹji in dyɇɇ. Xo kʼo dyaja pasʼꞹ o dyɇji i nee ra unꞹji comentario, ngekʼua dya søø ra dyakꞹji texe yo comentario, ma jerguakjanu me ro mezhe rgua nguarꞹ nu reunión. Dya ra ꞹdʼꞹji ni ra søxiji ma dya ra søø ra dyakji yo otrʼꞹ comentario. Ma ra xampaji na punkjꞹ comentario, bʼꞹma søø ra dyakji dʼa comentario. Søø ra pasʼꞹji in dyɇɇ ngekʼua ra xørꞹji dʼa texto bíblico. Xo søø ra xampaji na joo dʼa párrafo, i ra mantsʼɇji kʼo ro meyaji. b

18. ¿Pjekja na joo ke ra unꞹji comentario ke dya ra mezhe na punkjꞹ?

¹⁸ Ra unꞹji comentario ke dya ra mezhe na punkjꞹ. Nu comentario ke dya mezhe nge kʼo mazi pjøxkꞹjikʼo. Ngekʼua na joo ke ra unꞹji comentario ke ra mezhetrjo 30 segundos (Prov. 10:19; 15:23). Ni jyodʼꞹ ke yo kjuarma ke a me mezhe ke poji kja jmurkjimi ra tsjapji nguenda ke dya ra mezhe na punkjꞹ​in comentario. Ma ra unꞹji dʼa comentario ke me ra mezhe na punkjꞹ minuto, kʼo dyaja dya kja ra nee ra pasʼꞹji o dyɇji, ra ngiñiji ke dya søø ra nrrꞹrꞹji nzakja yo kjuarma. Ma dya ra mezheji kja yo comentario, yo dyaja kjuarma xo søø ra unꞹji comentario. Ma dakʼꞹji nu otrʼꞹ comentario kja dʼa párrafo dya ra manji texe kʼo bʼꞹbʼꞹnu, ngekʼua kʼo dyaja xo søø ra manji dʼa jñaa ke junsʼꞹnu, ngekʼua søø ra manji dʼatrjo punto​(Ra jandaji nu recuadro “ ¿Pje søø ra mangø kja in comentario?”).

19. ¿Jarga mbøxkꞹji nu kjuarma kʼꞹ kjaa yo trʼønꞹ, i pje ni jyodʼꞹ ra kjaagoji?

¹⁹ Ra xiji kʼe kjuarma ke kjaa yo trʼønꞹ kja nu Atalaya ke ri negøji ra unꞹji na comentario kja daja parrafo. Ma ri nee ra kjaji akjanu, ni jyodʼꞹ otrʼꞹ ra ñaji ko nu kjuarma ma dya bʼe pjꞹrꞹ nu jmurkjimi. Ma ra sⱥtrʼⱥji kja kʼe parrafo dʼabadiji ra pasʼꞹji na jensʼe in dyɇji, ngekʼua ra jñanrra na joo.

20. ¿Ja ga chjenjui nu jmurkjimi ko dʼa jñonꞹ ke ri ziji ko yo ri joji?

²⁰ Yo jmurkjimi chjenjui nzakja dʼa jñona ke ri ziji ko yo ri joji. Ma janzi kjuarma mbitazꞹji ra ma ziji barbacoa, i øtrʼkꞹji ra tunꞹji kʼo xi bʼɇzhi nzakja nu limo, nu ndenxꞹ, nu iʼi o nu kjꞹꞹ, dya kja nrre na punkjꞹ kʼo ra tunꞹji. Akjanu Kja yo jmurkjimi, kʼꞹ mbitazꞹji ngeje e Jehová, angeze a jñusʼꞹ kja na mexa na punkjꞹ jñonꞹ ke me na kijmi (Sal. 23:5; Mat. 24:45). Angeze nee ke ra unꞹji zø ri chikileje. Ngekʼua ni jyodʼꞹ ra xampaji na joo kʼo ri nee ra manji. Akjanu dya ngextjo ke ra ziji kja in mexa e Jehová, xo ra pjøsʼꞹji kʼo dyaja ra tsjaji akjanu.