1. Ewi wãween kar eñjake eo an Devid kõn Jeova, im ta eo men in ear kõm̦akũti ñan kõm̦m̦ane?

KIIÑ DEVID ear je: “Irooj eutiej, im jen kanooj nõbar e.” (Sam 145:3, UBS) Devid ear yokwe Jeova, im yokwe in an ear kõm̦akũti ñan nõbar E ‘ibwiljin jarin armej ro.’ (Sam 22:22; 40:5) Ejjel̦o̦k pere bwe kwõj yokwe Jeova im kwõj bar errã ippãn naan kein an Devid ke ear ba: “Ren nõbar Kwe, O Jeova, Anij in Israel, jemem, ñan indeeo im indeeo.”​—1 Kr. 29:10-13.

2. (1) Ewi wãween ad nõbar Jeova? (2) Ta eo epen an jet kõm̦m̦ane, im ta eo jenaaj etale ilo katak in?

² Juon wãween jej nõbar Jeova ilo raan kein ej ilo ad uwaak ilo iien kweilo̦k ko. Bõtab elõñ ro jeid im jatid rej kile bwe elukkuun pen men in ñan er. Rekõn̦aan uwaak ilo iien kweilo̦k ak remijak. Ewi wãween bwe ren jol̦o̦k aer mijak? Im ta wãween ko remaroñ jipañ kõj aolep bwe jen maroñ kwal̦o̦k uwaak ko rekõketak? M̦okta jãn ad uwaaki kajjitõk kein, jen etale emãn un ko raorõk unin ad aikuj uwaak ilo iien kweilo̦k.

3-5. (1) Ekkar ñan Hibru 13:15, etke jej uwaak ilo iien kweilo̦k? (2) Ej aikuj ke juon wõt kain ad uwaak? Jouj im kõmel̦el̦e.

³ Jeova ear letok jeraam̦m̦an eo ñan kõj aolep bwe jen nõbare. (Sam 119:108, UBS) Uwaak ko ad ilo iien kweilo̦k rej m̦õttan “menin katok” ko jej lil̦o̦k ñan nõbar Jeova, im ejjel̦o̦k juon emaroñ kõm̦m̦ane men in ñan kõj. (Riit Hibru 13:15, UBS.) Jeova ej ke jiroñ kõj bwe en juon wõt kain menin katok ak uwaak ko jej lil̦o̦k ñane? Ejjab!

⁴ Jeova ejel̦ã bwe eoktak maroñ ko ad im wãween ko ippãd  jãn doon, im ej lukkuun kaorõk kein katok eo ad me jej lel̦o̦k ekkar ñan joñan maroñ ko ad. L̦õmn̦ak kõn menin katok ko ri-Israel ro rar lil̦o̦k ñan Jeova me rar oktak jãn doon im Jeova ear m̦õn̦õn̦õ kaki. Jet ri-Israel rar maroñ lel̦o̦k juon koon in jiip ak juon koot. Bõtab ri-Israel ro me rejeram̦õl rar maroñ lel̦o̦k “ruo tõrtel dõv ak ruo m̦ul̦e rem̦m̦an ded.” Im ñe ear lukkuun ejjel̦o̦k aer maroñ ñan lel̦o̦k ruo bao, Jeova ear m̦õn̦õn̦õ wõt ñe rej katok kõn“juon m̦õttan joñoul in epa in pilawã kwidik,” ak pilawã eo em̦m̦antata. (Lv. 5:7, 11) Meñe ekar dikl̦o̦k on̦ããn pilawã jãn bao ko, ak Jeova ekar m̦õn̦õn̦õ wõt kake el̦aññe ri-Israel ro rar katok kõn pilawã eo em̦m̦antata.

⁵ Ãindein bar eñjake eo an Anij eo ad ejouj kõn uwaak ko ad. Ñe jej uwaak, Jeova ejjab kõtmãne bwe kõj aolep en wãjepdik ad kõnono ãinwõt kar Apollõs ak bwe jen jel̦ã kareel ro jet kõn naan ko ad ãinwõt kar Paul. (Jrb. 18:24, UBS; 26:28) Men eo Jeova ekõn̦aan ej bwe jen uwaak ekkar ñan joñan eo jemaroñe. Keememej kõrã eo me emej l̦eo pãleen me ear jabawõt kõn ruo jããn jiddik. Jeova ear lukkuun kaorõke kõrã in kõnke ear lel̦o̦k ekkar ñan joñan maroñ eo an.​—Luk 21:1-4, UBS.

6. (1) Ñe jej roñjake uwaak ko an ro jet, ewi wãween an men in jelõt kõj ekkar ñan Hibru 10:24, 25? (2) Ewi wãween am̦ maroñ kwal̦o̦k kam̦m̦oolol ñan ro jet kõn uwaak ko aer me rar kõkajoor eok?

⁶ Jej kõkajoor doon kõn uwaak ko ad. (Riit Hibru 10:24, 25, UBS.) Kõj aolep em̦m̦an ippãd ñe jej roñjake uwaak ko reoktak jãn doon ilo iien kweilo̦k ko. El̦ap an em̦m̦an ippãd ñe jej roñjake uwaak ko repidodo an ajri ro, me ej itok jãn bũrueer. Ñe jej roñjake an juon uwaak kõn juon boin ekããl me ear loe ke ear katak, el̦ap an kõm̦akũt bũruod. Im el̦ap ad nõbar ro rej kate er ñan ‘peran’ in uwaak ilo iien kweilo̦k meñe rejookok im rej katak wõt kajin eo ad. (1 Te. 2:2) Ewi wãween ad kwal̦o̦k ad kam̦m̦oolol er kõn aer kate er? Jemaroñ kam̦m̦oolol er kõn uwaak ko aer rem̦m̦an im rekõketak ãlikin kweilo̦k. Bar juon wãween jemaroñ kwal̦o̦k ad kam̦m̦oolol er ej ilo ad bar bõk kun̦aad im uwaak. Innem jejjab bõk kõkajoor wõt ilo iien kweilo̦k ak jej bar lel̦o̦k ñan ro jet ñe jej uwaak.​—Rom 1:11, 12, UBS.

7. Ewi wãween ad bõk tokjãn ñe jej uwaak?

⁷ Jej bõk tokjãn ñe jej uwaak. (Ais. 48:17) Ewi wãween? Kein kajuon, ñe jej l̦õmn̦ak in uwaak, enaaj l̦apl̦o̦k ad itoklimo in kõpooje katak  eo jenaaj katak kake ilo kweilo̦k. Ñe elukkuun em̦m̦an ad kõpooje katak eo, enaaj m̦wilal̦l̦o̦k ad mel̦el̦e kõn Naanin Anij. Im ñe em̦wilal̦l̦o̦k ad mel̦el̦e, enaaj lukkuun em̦m̦anl̦o̦k ad l̦oore men ko jej katak kaki. Kein karuo, enaaj l̦apl̦o̦k ad m̦õn̦õn̦õ ilo iien kweilo̦k kõnke jej bar bõk kun̦aad. Im kein kajilu, kõnke jej lukkuun bõk iien im kõpooje uwaak ko ad, ekkã wõt ad naaj keememej men eo jaar uwaak kake.

8-9. (1) Ãinwõt an Malakai 3:16 kwal̦o̦k, ta eñjake eo an Jeova ñe jej uwaak? (2) Ta eo jet rej mijak wõt in kõm̦m̦ane?

⁸ Jej kam̦õn̦õn̦õik bũruon Jeova ñe jej kwal̦o̦k kõn tõmak eo ad. Jejel̦ã bwe ñe jej uwaak, Jeova ej roñjake im ej lukkuun kam̦m̦oolol kõn ad kate kõj ñan uwaak ilo iien kweilo̦k. (Riit Malakai 3:16, UBS.) Ej kõm̦m̦ane men in ikijjeen an kõjeraam̦m̦an kõj kõn ad kate kõj ñan kam̦õn̦õn̦õik bũruon.​—Mal. 3:10.

⁹ Kõn men in, ewõr unin ad aikuj uwaak ilo iien kweilo̦k. Bõtab ej wõr wõt jet rej mijak in kajutak peier. Ñe ãindein eñjake eo am̦, jouj im jab ebbweer. Em̦m̦an jen kiiõ etale jet naanin kakapilõklõk ko jãn Baibõl̦, jet waanjoñak ko, im jet wãween ko me remaroñ jipañ kõj aolep ñan kajjioñ uwaak ilo iien kweilo̦k.

10. (1) Ta eo kõj aolep jej mijak in kõm̦m̦ane? (2) Ñe kwõj mijak in uwaak, ta eo men in ej kaalikkar kõn kwe?

¹⁰ Kajjojo iien ñe kwõj l̦õmn̦ak in kajutak peim ñan uwaak, kwõlukkuun ke mijak im ikkũm̦kũm̦? El̦aññe aet, eokwe ejjab kwe wõt kwõj bõk eñjake kein. Ilo m̦ool, enañin kõj aolep jej mijak im ikkũm̦kũm̦ jidik ñe jej uwaak. Ñan kate eok jol̦o̦k am̦ mijak, kwõj aikuj jel̦ã ta eo ej kõm̦m̦an am̦ mijak. Ñan waanjoñak, kwõj ke mijak bwe kwõnaaj mel̦o̦kl̦o̦k naan ko am̦ ak bwe enaaj bõd men eo kwõj ba? Kwõj ke inepata bwe uwaak eo am̦ eban kanooj em̦m̦an jãn uwaak ko an ro jet? Eokwe kwõjel̦ã ta, men kein rej kaalikkar juon men em̦m̦an kõn kwe. Rej kwal̦o̦k bwe ettã bũruom̦ im kwõj watõk ro jet bwe reutiejl̦o̦k jãn kwe. Im Jeova ej yokwe kain armej rot in me ettã bũruon. (Sam 138:6; Pil. 2:3) Bareinwõt Jeova ekõn̦aan bwe kwõn  nõbar e im kõkajoor ro jeim im jatim ilo kweilo̦k. (1 Te. 5:11) Ej yokwe eok im enaaj kaperan eok bwe kwõn jab mijak in uwaak.

11. Ta naanin kakeememej ko jãn Baibõl̦ me remaroñ jipañ kõj?

¹¹ L̦õmn̦ak kõn naanin kakeememej ko jãn Baibõl̦. Baibõl̦ ej ba bwe kõj aolep ej bõd men ko jej ba im wãween ad kõnono. (Jem. 3:2, UBS) Jeova ejjab kõtmãne bwe jen weeppãn im ro jeid im jatid rejjab bar kõtmãne bwe jen ãindein. (Sam 103:12-14) Rej baam̦le eo ad ilo doulul in an Jeova im rej yokwe kõj. (Mark 10:29, 30, UBS; Jon 13:35) Bareinwõt remel̦el̦e bwe jet iien ñe jej uwaak, ej bõd naan ko jej ba im bwe ejjab eñin men eo jaar tõn ba.

12-13. Ta eo jej katak jãn waanjoñak eo an Nihimaia im Jona?

¹² L̦õmn̦ak kõn jet waanjoñak ko ilo Baibõl̦ me remaroñ jipañ eok ñan jol̦o̦k am̦ mijak. Juon waanjoñak ej Nihimaia. L̦ein ear jerbal ilo m̦weo im̦õn juon kiiñ ekajoor. Nihimaia ear bũrom̦õj kõnke ear roñ bwe wõrwõr ko ilo Jerusalem rar rup im jorrããn. (Nih. 1:1-4) Pijaikl̦o̦k m̦õk an lukkuun ikkũm̦kũm̦ im mijak ke kiiñ eo ear kajjitõk ippãn ñan kõmel̦el̦eik e kõn unin an jab m̦õn̦õn̦õ! Nihimaia ear m̦õkaj im jar im ãlikin an jar ear uwaake kiiñ eo. Tokjãn men in, ear l̦ap an kiiñ eo jipañ armej ro an Anij. (Nih. 2:1-8, UBS) L̦õmn̦ak kõn bar waanjoñak eo an Jona. Ke Jeova ear kajjitõk ippãn bwe en etal im kõnono ñan armejin Nineva, Jona ear mijak im ko ñan bar juon jikin. (Jona 1:1-3, UBS) Bõtab tokãlik, Jeova ear jipañe im ear maroñ etal im kwal̦o̦k naan ñan ri-Nineva ro. Im naan ko me ear ba rar kõm̦m̦an bwe ri-Nineva ro ren oktak. (Jona 3:5-10) Jãn bwebwenato eo an Nihimaia, jej katak bwe eaorõk ñan ad jar m̦okta jãn ad uwaake juon kajjitõk. Im jãn bwebwenato eo an Jona, jej katak bwe meñe jelukkuun mijak ak Jeova emaroñ jipañ kõj ilo ad karejar ñane. Baj l̦õmn̦ak m̦õk, ewi joñan an kaamijak uwaak ilo eklejia eo ñe jej keidi ñan kwal̦o̦k naan ippãn ri-Nineva ro?

¹³ Ta wãween ko remaroñ jipañ eok ñan kwal̦o̦k uwaak ko rekõketak ilo iien kweilo̦k? Jen lale jet iaan men kein.

14. Etke ej aikuj lukkuun em̦m̦an ad kõpooji katak ko ñan kweilo̦k, im ñããt eo jemaroñ kõm̦m̦ane men in?

¹⁴ Kõppojakl̦o̦k im̦aan ñan kajjojo kweilo̦k. Ñe kwõj l̦õmn̦akl̦o̦k im̦aan kõn katak eo im elukkuun em̦m̦an am̦ kõpooje, enaaj l̦apl̦o̦k am̦ peran im jab mijak in uwaak. (JK. 4:26, UBS) Ilo m̦ool, kõj aolep eoktak jikejuul̦ ko ad jãn doon ñan kõppojakl̦o̦k im̦aan ñan iien kweilo̦k. Eloise, juon jeid im jatid lel̦l̦ap me emej l̦eo pãleen im 80 jim̦a an iiõ, ej kõpooje Naan in Keeañ eo an ilo jinoin juon wiik. Ej ba, “El̦apl̦o̦k aõ m̦õn̦õn̦õ ilo iien kweilo̦k ñe ij katak l̦o̦k im̦aan.” Joy, eo me ej jerbal aolep raan, ej kõjenolo̦k jet awa ilo Jãdede bwe en kõpooje Naan in Keeañ eo an. Ej ba, “Ij katak ilo raan eo m̦okta wõt jãn kweilo̦k kõnke en em̦m̦an wõt aõ keememej men ko iar katak.” Ike, juon  jeid im jatid em̦m̦aan ej lale eklejia me el̦ap an poub im ej bar juon bainier, ej ba: “Iar lo bwe ijello̦kun aõ kõpooje aolepen katak eo ilo juon wõt iien, em̦m̦anl̦o̦k ñe ij etale katak eo jidik kõn jidik ilowaan wiik eo.”

15. Ewi wãween bwe en lukkuun em̦m̦an am̦ kõpooji katak ko ñan kweilo̦k?

¹⁵ Ta eo kwõj aikuj kõm̦m̦ane bwe en lukkuun em̦m̦an am̦ kõpooji katak ko ñan kweilo̦k? M̦okta jãn am̦ katak, kwõn kajjitõk ippãn Jeova kõn jetõb kwõjarjar eo an. (Luk 11:13; 1 Jon 5:14) Ãlikin, kwõn bõk jet minit ñan etale kobban katak eo ilo am̦ lale taitõl̦ eo, unin tõl jiddik ko, pija ko, im bo̦o̦k ko. Im ñe kwõj jino etale kajjojo pãrokõrããp, kajjioñ riiti eoon ko joñan wõt am̦ maroñ. Lukkuun kõl̦mãnl̦o̦kjen̦ kake mel̦el̦e eo, im bõk iien ñan kõpooje men eo kokõn̦aan naaj uwaak kake. Ñe em̦m̦an am̦ kõpooje katak eo, enaaj l̦apl̦o̦k am̦ bõk tokjãn jãne, im enaaj pidodol̦o̦k am̦ uwaak.​—2 Ko. 9:6.

16. Ta kein jerbal ko me kwõmaroñ kõjerbali, im ewi wãween am̦ maroñ kõjerbali?

¹⁶ Ñe kwõmaroñ, kõjerbal kein jerbal ko jãn doulul in me ewõr ilo kajin eo kwõjel̦ã im mel̦el̦e kake. Ikijjeen doulul in an, em̦õj an Jeova letok kein jerbal ko ñan jipañ kõj kõpooji katak ko ñan kweilo̦k. Ñan waanjoñak, ikijjeen JW Library^® app eo jemaroñ taunl̦outi bokin katak ko ñan jeel̦boon eo nejid. Innem jemaroñ katak kõn bok kein ak ñe ejjel̦o̦k ad iien ñan kõm̦m̦ane men in, jemaroñ riit ak roñjake wõt katak ko ilo jabdewõt iien im jabdewõt jikin. Jet rej kõjerbal JW Library app in ñan katak ilo iien aer kakkije ilo jikin jerbal, ilo jikin jikuul̦, ak ilo iien ko rej itoitak ñan jikin ko jet. Watchtower Library im Watchtower ONLINE L̦ÃIBRÃRE^™ eo rej kõm̦m̦an bwe en lukkuun pidodo ñan ad kappukoti boin ko jet ilo katak eo me jekõn̦aan lukkuun kal̦apl̦o̦k ad mel̦el̦e kake.

17. (1) Etke em̦m̦an bwe jen kõpooj jejjo ad uwaak? (2) Ta eo kwõj katak jãn pija eo etan, Become Jehovah’s Friend​—Prepare Your Comment?

¹⁷ Ñe kwõmaroñ, kõpooj jejjo am̦ uwaak ñan kajjojo iaan katak ko. Etke? Kõnke eban aolep iien renaaj kũr eok ñe kwõnaaj kajutak peim̦. Im elõñ remaroñ bar kajutak peier ilo iien eo wõt kwõj bar kajutak peim̦ im eo ej tõl katak eo emaroñ kũr juon wõt iaami. Ñan kõm̦m̦an bwe kweilo̦k eo en m̦õj ilo iien eo em̦õj kajejjete, eo ej tõl emaroñ kõm̦m̦an bwe en jab lõñ rej uwaak kõn juon wõt boin. Kõn men in, jab inepata ak ebbweer ñe ejjab kũr eok m̦oktata. Ñe kwõj bar kõpooj jet am̦ uwaak, kwõnaaj maroñ uwaak ilo boin ko jet ilo katak eo. Juon iaan uwaak ko kwõmaroñ bar kõpooji ej ilo am̦ riiti juon eoon. Bõtab ñe kwõmaroñ, kajjioñ bar kõpooj juon am̦ uwaak ilo am̦ kõjerbal naan ko am̦ make. * (Lale kõmel̦el̦e eo itulal̦.)

18. Etke eaorõk ñan uwaak ilo tukadu?

 ¹⁸ Uwaak ilo tukadu. Ekkã an uwaak ko rekadu im pidodo lukkuun kõketak kõj. Innem kajjioñ kate eok ñan uwaak ilo tukadu. Kajjioñ kadikl̦o̦k uwaak ko am̦ ñan 30 jekõn. (JK. 10:19; 15:23, UBS) Ñe eto am̦ pãd ilo m̦ool eo im elõñ iiõ in am̦ uwaak ilo kweilo̦k ko, eaorõk bwe kwõn likũt juon joñak em̦m̦an ilo am̦ uwaak ilo tukadu. El̦aññe elukkuun aetok am̦ uwaak, ro jet remaroñ mijak in uwaak kõnke remaroñ l̦õmn̦ak bwe em̦m̦anl̦o̦k uwaak eo am̦ jãn er. Bareinwõt ñe kwõj uwaak ilo tukadu, enaaj kõpel̦l̦o̦k jidik iien ñan an ro jet uwaak ilo iien kweilo̦k. El̦aptata ñe kwe eo rej kũr eok m̦oktata, kwal̦o̦k juon uwaak epidodo im kajju uwaake kajjitõk eo. Jab kajjioñ bõk aolep boin ko ilo pãrokõrããp eo. Ñe em̦õj etale boin eo ilo pãrokõrããp eo, kiiõ kwõmaroñ kakkobaba ilo boin ko jet.​—Lale bo̦o̦k eo “ Ta eo Imaroñ Uwaak Kake?”

19. Ewi wãween an eo ej tõl maroñ jipañ eok, im ta eo kwõj aikuj kõm̦m̦ane?

¹⁹ Kepaak eo ej tõl katak eo ñan kwal̦o̦k bwe kokõn̦aan uwaak ilo juon iaan pãrokõrããp ko. Ñe kwõj l̦õmn̦ak in kõm̦m̦ane men in, kwõj aikuj kepaak eo ej tõl m̦okta jãn an jino kweilo̦k. Im ñe ej iien ñan am̦ uwaak ilo pãrokõrããp eo, kwõn m̦õkaj in kajutak peim̦ ñan joñan eo me enaaj em̦m̦an an eo ej tõl loe.

20. Ewi wãween an kweilo̦k ko an eklejia ãinwõt juon iien m̦õñã ippãn ro m̦õttad?

²⁰ Ad pãd ilo kweilo̦k ko an eklejia ej ãinwõt ñe jej pãd ilo juon iien m̦õñã ippãn ro m̦õttad. Ñan waanjoñak, jen ba bwe jet ilo eklejia eo rar bũl̦ããne juon iien barbecue (BBQ) im rar kajjitõk ippam̦ bwe kwõn kõpooje jidik m̦õñã ñan iien eo. Enaaj kar ta eñjake eo am̦? Eokwe bõlen kwõnaaj kar ikkũm̦kũm̦ jidik, bõtab kwõnaaj kar lukkuun kate eok ñan kajjioñ kõpooje juon m̦õñã me enaaj enno̦ ippãn aolepen armej ro ilo iien eo. Ãindeinl̦o̦k wõt, Jeova ej kũr kõj ñan juon iien m̦õñã im em̦õj an kõpooj juon tebõl̦ me eobrak kõn m̦õñã ko renno̦ ñan kõj ilo iien kweilo̦k ko ad. (Sam 23:5; Matu 24:45, UBS) Im ej m̦õn̦õn̦õ ñe jej bõktok kun̦aad ñan iien eo, meñe emaroñ dik ak ej jãn joñan maroñ eo ad. Kõn men in, ej aikuj em̦m̦an ad kõpooje katak ko bwe en l̦ap ad bõk kun̦aad im uwaak joñan wõt ad maroñ. Innem jeban baj m̦õñã wõt jãn tebõl̦ eo an Jeova ak jenaaj bar bõktok kun̦aad ñan jake jebõl eo ilo eklejia eo.