1. ¿Tlake kiyolmatiyaya David, uan tlake kichijki pampa kej nopa kiyolmatiyaya?

TLANAUATIJKETL DAVID kiijkuilok: “Nelia tiueyi, toTeko, uan kinamiki ma timitsueyimatikaj” (Sal. 145:3). Ya kiikneliyaya Jehová, uan nopa tlaiknelijkayotl kiyololinik ma kiueyichiua “ininixpa nochi tlakamej” o ipan tlanechikoli (Sal. 22:22; 40:5). Tojuantij nojkia tikikneliaj Jehová, uan yeka tikijtouaj sanse kej David: “ToTeko Dios, ta tiiTeko touejkapantata Israel. ¡Ma [...] mitsueyichiuakaj para nochipa!” (1 Crón. 29:10-13).

2. 1) ¿Kenijkatsa tijueyichiuaj Jehová? 2) ¿Tlake kinpano se keskij toikniuaj, uan tlake tikixtomasej?

² Ipan ni tonali uelis tijueyichiuasej Jehová kema titlanankilisej ipan tlanechikoli. Sekij toikniuaj tlauel ouij kimatij kichiuasej ni. Maske kinekij tlanankilisej, amo momatlananaj. ¿Tlake kinpaleuis ayokmo ma majmauikaj? ¿Uan tlake techpaleuis ma tikijtokaj tlen nelia teyolchikauas kema titlanankilisej? Maske tijnekij tijnankilisej ni tlajtlanili, achtoui ma tikitakaj naui tlamantli tlen tlauel ipati tlen kinextia kenke titlanankiliaj ipan tlanechikoli.

3-5. 1) Kej kiijtoua Hebreos 13:15, ¿kenke titlanankiliaj ipan tlanechikoli? 2) ¿Kinamiki nochi sanse titlanankilisej?

³ Jehová techkaua ma tijueyichiuakaj (Sal. 119:108). Kema titlanankiliaj kejuak tijmakaj Jehová se “tlakajkaualistli” pampa tijueyichiuaj ika tokamak, uan ni tlakajkaualistli san tojuantij  uelis tijmakasej (xijpoua Hebreos 13:15). ¿Kineki Jehová nochi ma tijchiuakaj sanse tlamantli kema titlanankilisej? Amo, ya amo kineki nopa.

⁴ Jehová kimati amo nochi tiuelij tijchiuaj sanse tlamantli, uan kipatiita nochi tlen tijmakaj. Ma timoiljuikaj ipan nopa tlakajkaualistli tlen kimakayaya israeleuanij. Katli tlapijpixtoyaj temakayayaj pilborregojtsitsij, uan katli teikneltsitsij san temakayayaj omej piltototsitsij. Uan tlaj se akajya amo kiaxiliyaya itomij tlen ika kinkouaskia omej piltototsitsij, uajka ueliskia temakas kipano “ome kilo harina”, uan Jehová nojkia kuali kiitayaya nopa (Lev. 5:7, 11). Maske nopa harina amo patiyo, toTeotsij kinekiyaya ma temakakaj tlen kuali katli kipixtoyaj, yeka kipatiitayaya nopa tlakajkaualistli.

⁵ ToTeotsij nojua kiampa kichiua ipan ni tonali. Kema titlanankiliaj, ya amo kiijtoua moneki tikamanaltisej kej Apolos kichiuayaya o kej Pablo, katli kinyoltilanayaya maseualmej ika tlen kiijtouayaya (Hech. 18:24; 26:28). Ya san kineki ma titlanankilikaj ika nochi toyolo. Ma tikilnamikikaj nopa siuatl katli san temakak “ome centavos”. Jehová tlauel kuali kiitak pampa kimakak nochi tlen kipixtoya (Luc. 21:1-4).

6. 1) Kej kiijtoua Hebreos 10:24, 25, ¿kenijkatsa techpaleuia kema tlanankiliaj? 2) ¿Kenijkatsa uelis tijnextisej tijpatiitaj tlen tlanankiliaj toikniuaj?

⁶ Nochi timoyolchikauaj kema titlanankiliaj (xijpoua Hebreos 10:24, 25). Nochi techpaktia kema toikniuaj tlanankiliaj ipan tlanechikoli, kej kema tijkakij kenijkatsa se okichpil kiijtoua tlen kiyolmati. Uan timosentlachiliaj kema tijkakij se akajya kiixtoma ika pakilistli se tlamantli tlen kipantik kema momachtik. Uan tijpatiitaj tlen kichiuaj toikniuaj katli tlanankiliaj maske kimatij ouij kiijtosej tlen kiyolmatij o katli namanok pejtokej momachtiaj totlajtol (1 Tes. 2:2). ¿Kenijkatsa uelis tijnextisej tijpatiitaj tlen kichiuaj? Uelis tikintlaskamatilisej kema tlamis tlanechikoli uan tikiniljuisej kenijkatsa techyolchikajkej ika tlen kiijtojkej. Nojkia uelis tijnextisej tijpatiitaj tlen kichiuaj tlaj tojuantij titlanankilisej, kiampa amo san techyolchikauasej, nojkia tikinyolchikauasej inijuantij (Rom. 1:11, 12).

7. ¿Kenijkatsa techpaleuia kema timosentlaliaj titlanankilisej?

⁷ Techpaleuis tlaj titlanankilisej (Is. 48:17). ¿Kenijkatsa techpaleuia? Se: tlaj  timosentlalisej titlanankilisej, techyololinis ma tijchiuakaj kampeka kuali timomachtisej tlen moixtomas ipan tlanechikoli. Uan kema kuali timomachtiaj, techpaleuia kuali ma tijkuamachilikaj toTeotsij iTlajtol uan ma tijchiuakaj ipan tonemilis tlen tijyekojtiauij. Ome: tlauel techpaktis tiitstosej ipan tlanechikoli pampa nojkia uelis tikijtosej tlen timomachtijkej. Uan eyi: amo nima tikilkauasej tlen titlanankilisej pampa monejki miakpa tikompauisej tlen titlanankiliskiaj.

8, 9. 1) Kej kiijtoua Malaquías 3:16, ¿kenijkatsa kiita Jehová nochi tlen tijchiuaj kema titlanankiliaj? 2) ¿Tlake nojua kinpano se keskij toikniuaj?

⁸ Jehová tlauel kipaktia kema tijnextiaj kuali titlaneltokaj ika tlen tikijtouaj. Jehová techtlakakilia kema titlanankiliaj ipan tlanechikoli, uan tlauel kipatiita nochi tlen tijchiuaj pampa tijnekij titlanankilisej (xijpoua Malaquías 3:16). Ya kinextia kipatiita tlen tijchiuaj, yeka techteochiua pampa tijnekij tijyolpakiltisej (Mal. 3:10).

⁹ Nochi tlen tikitstokej kinextia kinamiki titlanankilisej ipan tlanechikoli. Maske ni tlamantli techyololinia, sekij nojua majmauij o pinauaj momatlananasej. Tlaj ta kiampa mitspano, amo ximokueso. Tikitasej tlake techtlajtolmaka Biblia uan tlen kinpanok se keskij toTeotsij itekipanojkauaj. Uan nojkia tikitasej se keski tlamantli tlen techpaleuis nochi ma titlanankilikaj.

10. 1) ¿Tlake tijyolmatij nochi kema titlanankiliaj? 2) ¿Kenke uelis tikijtosej amo kenijki kema timajmauij?

¹⁰ ¿Nochipa peua tiyoltotomoka kema tijneki timomatlananas ipan tlanechikoli? Tlaj kena, amo san ta mitspano nopa. Nochi achi timajmauij kema titlanankiliaj. Tlaj nopa kichiua amo xitlanankili, moneki tijmatis kenke mitspano nopa. ¿Timajmaui pampa timoiljuia amo tijmatis tlake tikijtos o amo kuali titlanankilis? ¿Timoiljuia amo titlanankilis sanse kej sekinok katli kuali tlanankiliaj? Amo ximotekipacho, uelis kiampa tijyolmati pampa  amo timoueyimati uan tikinita sekinok “keja más uejueyij”. Jehová tlauel kuali kinita katli amo moueyimatij (Sal. 138:6; Filip. 2:3). Jehová amo san kineki amo ximoueyimati, nojkia kineki xijueyichiua uan xikinyolchikaua toikniuaj ipan tlanechikoli (1 Tes. 5:11). Ya tlauel mitsiknelia uan mitspaleuis amo ximajmaui.

11. ¿Tlake textos uelis techpaleuis?

¹¹ Ma tikitakaj se keski tlamantli tlen Biblia techtlajtolmaka. ToTeotsij iTlajtol kiijtoua nochi timokuapolouaj kema tikamanaltij (Sant. 3:2). Jehová kimati tojuantij amo tixitlauakej, uan toikniuaj nojkia kimatij nopa (Sal. 103:12-14). Toikniuaj elij kejuak tochampoyouaj uan tlauel techikneliaj (Mar. 10:29, 30; Juan 13:35). Kimatij amo nochipa titlanankilisej kej tojuantij tijnekiskiaj.

12, 13. ¿Tlake techmachtia tlen kinpanok Nehemías uan Jonás?

¹² Ma tikitakaj tlake kinpaleuik amo ma majmauikaj se keskij toTeotsij itekipanojkauaj, kiampa tojuantij nojkia amo timajmauisej. ¿Tikilnamiki Nehemías, katli kitekipanouayaya se tlanauatijketl? Kema kikajki nopa kaltemitl uan tepamitl tlen kiyaualojtoya Jerusalén tlamisosolijtoya, ya tlauel mokuesok (Neh. 1:1-4). Ximoiljui kenijkatsa chikauak yoluiuitokak kema tlanauatijketl kiiljuik ma kiixtomili kenke mokuesojtoya. Nehemías nimantsi momaijtok, yeka amo majmajki kiixtomilis. Pampa kiampa kichijki, tlanauatijketl kinpaleuik toTeotsij itekipanojkauaj (Neh. 2:1-8). Nama ximoiljui ipan Jonás. Kema Jehová kiiljuik ma kinmatiltiti níniveeuanij tlen kinpanoskia, ya tlauel majmajki uan amo yajki kampa kititlankej (Jon. 1:1-3). Pampa Jehová kipaleuik, Jonás kichijki tlen kinauatijkej uan níniveeuanij momakixtijkej (Jon. 3:5-10). Tlen kichijki Nehemías techmachtia kema tijnekisej titlanankilisej, achtoui moneki timomaijtosej. Uan tlen kipanok Jonás techmachtia maske timajmauij, Jehová uelis techpaleuis ma tijtekipanokaj. Uan ma tikilnamiktokaj ni: toikniuaj amo elij níniveeuanij, yeka amo kinamiki tikinmakasisej.

¹³ ¿Tlake techpaleuis ma tikijtokaj tlen kinyolchikauas toikniuaj kema titlanankilisej? Ma tikitakaj tlake uelis tijchiuasej.

14. ¿Kenke kinamiki kuali timomachtisej tlen moixtomas ipan tlanechikoli, uan kema ueliskia tijchiuasej nopa?

¹⁴ Ma timomachtikaj nochi tlen moixtomas ipan tlanechikoli. Tlaj kuali timomachtisej techpaleuis amo tlauel ma timajmauikaj kema tijnekisej titlanankilisej (Prov. 21:5). Uelis amo nochi sanse tlamantli tijchiuasej kema timokualchijchiuasej. Eloise, katli ya mijki iueue uan kipia kipano 80 xiuitl, peua momachtia pilamochtsi Tlen Tematiltia kema peua se semana. Ya kiijtoua: “Kuali nijyolmati ipan tlanechikoli kema nimomachtia se keski tonali achtoui”. Uan se tosiuaikni katli itoka Joy, katli tekiti miak tonali, momachtia ika Tlen Tematiltia se tonali achtoui kema yas tlanechikoli. Ya kiijtoua: “Kiampa nikilnamiktok nochi  tlen moixtontia”. Uan Ike, katli tlatekipanoua kej ueuejtlakatl uan precursor, kiijtoua: “Ipan miak tonali yolik nimomachtijtia se kentsi tlen nopa tlamachtili”.

15. ¿Kenijkatsa kuali timomachtiaj tlen moixtoma ipan nochi tlanechikoli?

¹⁵ ¿Kenijkatsa uelis kuali timomachtisej tlen moixtomas ipan tlanechikoli? Achtoui moneki timomaijtosej uan tikiljuisej Jehová ma techmaka itonal (Luc. 11:13; 1 Juan 5:14). Teipa ma tikitakaj tlake kipia nopa tlamachtili: ma tikitakaj kenijkatsa itoka, kenijkatsa moxejxelojtok, tlaixkopinkayomej uan recuadros. Teipa, ma timomachtijtiakaj sejse párrafo uan ma tijpouakaj nochi textos. Ma timoyoliljuikaj ipan tlen timomachtiaj uan ma tikitstiakaj tlake tlamantli tijnekiskiaj tikijtosej kema titlanankilisej. Tlaj kuali timokualchijchiuasej, tlauel techpaleuis nopa tlamachtili uan amo ouij tijmatisej titlanankilisej (2 Cor. 9:6).

16. ¿Tlake tlamantli tijpia ipan motlajtol, uan kenijkatsa tijtekiuia?

¹⁶ Xijtekiui tlen eltok ipan motlajtol. ToTeotsij itlanechikol techmakatok miak tlamantli tlen techpaleuia kuali ma timomachtikaj tlen moixtoma ipan tlanechikoli. Ipan nopa aplicación JW Library^® uelis tijkixtisej amatlajkuiloli tlen ika timomachtiaj uan tijpixtosej ipan toteléfono o ipan tableta. Nopaya uelis timomachtisej o san tijpouasej o tijtlakakilisej se tlamachtili. Uelis tijchiuasej nopa, kema tojuantij tijnekisej maske kampa ueli tiitstosej. Sekij kitekiuiaj uan momachtiaj kema itstokej ipan ininteki o ipan escuela, uan sekinok kema yauij kanajya. Uan nojkia ika nopa Watchtower Library uan AMATLAJKUILOLI IPAN INTERNET Watchtower^™ amo ouij timomachtiaj se keski tlamantli tlen nojua tijnekij tijmatisej.

17. 1) ¿Kenke kualtiaskia tijtlapejpenisej miak párrafos kampa uelis titlanankilisej? 2) ¿Tlake tijyekok ipan video Ximouampojchiua iuaya Jehová: Ximokualchijchiua uan kuali xitlanankili?

¹⁷ Tlaj tiuelij, ma tijtlapejpenikaj miak párrafos kampa uelis titlanankilisej. ¿Kenke? Pampa amo nochipa techiljuisej ma titlanankilikaj kema timomatlananasej. Sekinok nojkia momatlananaj, uan katli kiixtoma nopa tlamachtili uelis kiiljuis seyok ma tlanankili. Uan uelis amo nochipa kikauas miakej ma tlanankilikaj pampa amo kineki tlauel uejkauas. Yeka, amo ma tikualanikaj yon ma timoyolkokokaj tlaj amo techiljuiaj ma titlanankilikaj ipan achtoui párrafos. Kema tijtlapejpeniaj miak párrafos, uelis ipan se kena techiljuisej ma titlanankilikaj. Uan uelis timomatlananasej kema mopouas se texto. Uan nojkia kualtiaskia ma tijchiuakaj kampeka timoiljuisej kenijkatsa titlanankilisej ika totlajtol uan amo san tijpouasej. *

18. ¿Kenke amo kinamiki tiuejkauasej kema titlanankilisej?

 ¹⁸ Amo ma tiuejkauakaj kema titlanankilisej. Kema se akajya amo uejkaua uan kitekiuia san se keski tlajtoli kema tlanankilia, tlauel teyolchikaua. Yeka, ma tijchiuakaj kampeka san tiuejkauasej se 30 segundos kema titlanankilisej (Prov. 10:19; 15:23). Uan tlauel kinamiki kiampa kichiuasej katli ya uejkajtok mosentiliaj ipan tlanechikoli. Tlaj uejkauasej miak minutos kema tlanankilisej, uelis kichiuas sekinok amo ma kinekikaj momatlananasej pampa moiljuisej amo uelis tlanankilisej kej inijuantij. Uan kema amo tiuejkauaj, tikinkauaj sekinok nojkia ma tlanankilikaj. Tlaj tojuantij achtoui titlanankilisej ipan se párrafo, kualtiaskia san ma tijnankilikaj nopa tlajtlanili uan amo ma tikijtokaj sekinok tlamantli tlen nopaya uala. Kiampa, kema ya moixtomas tlen tlauel ipati ipan nopa párrafo, uelis tikijtosej sekinok tlamantli tlen nopaya uala (xikita nopa recuadro “ ¿Tlake uelis nikijtos kema nitlanankilis?”).

19. ¿Kenijkatsa uelis techpaleuis katli kiyakana tlamachtili, uan tlake moneki tijchiuasej?

¹⁹ Ma tikiljuikaj katli kiyakanas tlamachtili ipan tlake párrafo tijnekij titlanankilisej. Tlaj tijchiuasej ni, uajka kema ayamo peua tlanechikoli, nima ma tikiljuikaj katli kiyakanas nopa tlamachtili. Kema moixtomas nopa párrafo, nimantsi uejkapa ma timomatlananakaj uan kiampa nopa toikni uelis techitas.

20. ¿Kenke tlanechikoli eli kej se tlakualistli?

²⁰ Uelis tijneskayotisej tlanechikoli kej kema titlakuaj ininuaya touampoyouaj. Ximoiljui se keskij touampoyouaj techtlaneuij ma titlakuatij ininchaj uan moneki tijuikasej se tlenijki, ¿tlake tijchiuasej? Maske uelis amo tlauel kuali titlakualchiuaj, tijchiuasej kampeka tijuikasej se tlenijki tlen nochi kinpaktis. Ipan tlanechikoli, Jehová, katli techtlanejtok, kikualchijchijtok miak tlamantli tlen kuali (Sal. 23:5; Mat. 24:45). Ya kipaktia kema tikijtouaj se tlenijki ika nochi toyolo. Yeka, kuali ma timokualchijchiuakaj uan nochipa ma titlanankilikaj. Kiampa amo san tijselisej tlen Jehová techmaka, nojkia tikinpaleuisej sekinok ma kiselikaj tlen Jehová kikualchijchijtok.