1. ¿Tlen okichi David uan tleka?

DAVID okijkuilo: “Jehová ueyititok uan san ye kinamiki ma tikueyichiuakan” (Sal. 145:3). David okitlasojtlaya Jehová, ik non, okiueyichi itech tlanechikol (Sal. 22:22; 40:5). Tejuan noijki tiktlasojtlaj Jehová uan noijki tikijtoaj ken David: “Timitsueyichiuaj Jehová, iDios totajtsin Israel, nochipa ma mitsueyichiuakan” (1 Crón. 29:10-13).

2. (1) ¿Ken uelis tikueyichiuaskej Jehová? (2) ¿Tlen kinpanoa sekimej tokniuan uan tlen timomachtiskej?

² Ijkuak timonechikoaj tikteititiaj tikueyichiuaj Jehová ijkuak titlanankiliaj tlen timomachtijtokej. Pero sekimej tokniuan kitaj oui ijkon kichiuaskej. Pero momojtiaj maski kinekij tlanankiliskej. ¿Tlen uelis kichiuaskej para amo ma momojtikan? ¿Tlen techpaleuis kuali ma titlanankilikan? Achto ma tikitakan naui tlamantli tlen techititia tleka titlanankiliaj ijkuak timonechikoaj.

3-5. (1) Ijkon ken kijtoa Hebreos 13:15, ¿tleka titlanankiliaj ijkuak timonechikoaj? (2) Xikijto ken kineki Jehová ma titlanankilikan ijkuak timonechikoaj.

³ Jehová techkauilia ma tikueyichiuakan (Sal. 119:108). Ijkuak titlanankiliaj tikueyichiuaj Jehová uan san toneuian uelis tikchiuaskej (xiktlajtolti Hebreos 13:15). Pero ¿Jehová kineki san se tlamantli ma titlanankilikan? Amo.

⁴ Jehová kimati tlatlamantli timokuayejyekoaj, tlatlamantli  tikpiaj tonemilis uan kipatioita tlen tikchiuaj ijkuak tikueyichiuaj. Israelitas tlatlamantli okitlamaniliayaj Jehová. Sekimej okitemakayaj se ichkakonetl noso se tentsonkonetl. Akinmej amitlaj okipiayaj, okintemakayaj palomajkonemej. Noijki akinmej sepa amitlaj okipiayaj, okitemakayaj harina (Lev. 5:7, 11). Maski harina amo okatka patio, toTajtsin Dios okipatioitaya. Pero omonekiaya kitemakaskej tlen okachi kuali.

⁵ ToTajtsin Dios amo kipatla iyelis. Ijkuak titlanankiliaj, techiknomati uan kimati amo titlanankiliskej ken Apolos noso ken Pablo akin okatka yolchikauak (Hech. 18:24; 26:28). Jehová san kineki ma timochijchikauakan kuali ma titlanankilikan. Ma tikilnamikikan tlen okichi siuatl tlen omikik inamik. Ye okitemakak ome tomintsitsintin uan Jehová okiseli porque okitemakak nochi tlen okipiaya (Luc. 21:1-4).

6. (1) Ijkon ken kijtoa Hebreos 10:24, 25, ¿ken techpaleuia ijkuak tokniuan tlanankiliaj? (2) ¿Ken tikteititiskej tikpatioitaj ijkuak tokniuan tlanankiliaj?

⁶ Tikinyolchikauaj tokniuan ijkuak titlanankiliaj (xiktlajtolti Hebreos 10:24, 25). Tinochtin techpaktia ijkuak tlanankiliaj tokniuan. Noijki techpaktia ijkuak tlanankiliaj konemej porque kijtoaj tlen okajsikamatkej ijkuak omomachtijkej. Noijki tiyolpakij ijkuak tokniuan kijtoaj tlen yikin okajsikamatkej. Noijki techtlajtlachialtiaj ijkuak tlanankiliaj tokniuan tlen momojtiaj noso tlen momachtijtokej okse tlajtoli (1 Tes. 2:2). ¿Ken tikteititiskej tikpatioitaj tlen kichiuaj? Ijkuak tlamis nechikol, ma tikintlasojkamatilikan uan ma tikinmiluikan otechyolchika tlen okijtojkej. Noijki tla titlanankiliskej, tikteititiskej timotlasojkamatij. Ijkon tinochtin timoyolchikauaskej (Rom. 1:11, 12).

7. ¿Ken techpaleuis tla titlanankiliskej?

⁷ Techpaleuis tla titlanankiliskej (Is. 48:17). ¿Ken techpaleuis? Se tlamantli, moneki ma timomachtikan tla tiknekij titlanankiliskej. Ijkon kuali tikajsikamatiskej iTlajtol toTajtsin Dios uan tikchiuaskej tlen timomachtiaj. Ome tlamantli, okachi techpaktis ijkuak timonechikoskej porque yitikmatij tlen timomachtiskej. Eyi  tlamantli, tla tikajsikamatij tlen timomachtiaj, techpaleuis ma titlanankilikan uan amo tikilkauaskej tlen otikijtojkej.

8, 9. (1) Ijkon ken kijtoa Malaquías 3:16, ¿ken kita Jehová ijkuak timochijchikauaj titlanankiliskej? (2) ¿Ken momachiliaj sekimej ijkuak kinekij tlanankiliskej?

⁸ Jehová kipaktia ma tikijtokan tlen titlaneltokaj. Moneki ma tikneltokakan Jehová techkaki ijkuak titlanankiliaj uan kita timochijchikauaj titlanankiliskej (xiktlajtolti Malaquías 3:16). Noijki techteochiua porque kipatioita tlen tikchiuaj (Mal. 3:10).

⁹ Yotikitakej moneki timochijchikauaskej titlanankiliskej. Pero ualeua ok timomojtiaj titlanankiliskej. Tla ijkon techpanoa, amo ma timoyolkokokan. Tikinmitaskej seki principios uan tlen okichijkej itekipanojkauan Jehová tlen yiuejkika okatkaj uan okseki tlamantli tlen techpaleuis ma titlanankilikan.

10. (1) ¿Tlen techpanoa ijkuak tiknekij titlanankiliskej? (2) ¿Tlen tikteititiaj tla timomojtiaj ijkuak tiknekij titlanankiliskej?

¹⁰ ¿Timomojtiaj ijkuak tiknekij titlanankiliskej? Xamo tinochtin ijkon techpanoa. Tinochtin timomojtiaj ijkuak tiknekij titlanankiliskej. Ik non, moneki tikmatiskej tleka ijkon techpanoa. ¿Timomojtiaj porque amo ok tikilnamikij tlen tikijtoskej? Noso ¿timomojtiaj amo kuali titlanankiliskej? ¿Timomojtiaj porque amo titlanankiliaj ken oksekimej? Tla ijkon techpanoa, tikteititiaj tiyolyamankej uan tikinmitaj oksekimej okachi ixtlamatkej. Jehová kipaktia ma tiyetokan tiyolyamankej (Sal. 138:6; Filip. 2:3). Pero Jehová kineki ma tikueyichiuakan uan ma tikinyolchikauakan tokniuan ijkuak timonechikoaj (1 Tes. 5:11). Jehová techtlasojtla uan techpaleuis amo ma timomojtikan ijkuak titlanankiliskej.

11. ¿Tlen principios bíblicos uelis techpaleuiskej?

 ¹¹ Ma tikitakan seki principios bíblicos. Biblia kijtoa ualeua tejuan san tlen amo tikijtoaj (Sant. 3:2). Jehová kimatij tejuan titlajtlakolejkej uan noijki tokniuan kimatij (Sal. 103:12-14). Tokniuan katej ken tokalchanejkauan uan techtlasojtlaj (Mar. 10:29, 30; Juan 13:35). Noijki kajsikamatij ualeua tikijtoaj tlen amo kuali.

12, 13. ¿Tlen techmachtia tlen okipanok Nehemías uan Jonás?

¹² Ma tikitakan tlen okichijkej sekimej itekipanojkauan Jehová tlen uelis techpaleuis amo ma timomojtikan. Ma tikilnamikikan tlen okichi Nehemías. Ye otekipanoaya kanin otlanauatiaya se tekiua. Omoyolkoko ijkuak okimatki oxixinki tepamitl tlen okiyaualoaya Jerusalén uan noijki puertas (Neh. 1:1-4). Ma timokuayejyekokan ken omomachili ijkuak tekiua okitlajtlani tleka omoyolkokoaya. Pero Nehemías san niman omotlatlaujti. Ik non, tekiua okinpaleui judíos (Neh. 2:1-8). Nehemías otechmachti moneki ma timotlatlaujtikan achto itlaj tikijtoskej. Axkan ma timokuayejyekokan tlen okipanok Jonás. Ijkuak Jehová okilui ma kinmatiltiti tlen kinchiuiliskia akinmej ochantiayaj Nínive, sapanoa omomojti uan oksekan oyajki (Jon. 1:1-3). Pero toTajtsin Dios okipaleui ma kichiua tlen okinauati uan ijkon tlen okijto Jonás okinpaleui akinmej ochantiayaj Nínive (Jon. 3:5-10). Tlen okipanok Jonás, techmachtia Jehová uelis techpaleuis ma tiktekichiuilikan maski ualeua timomojtiskej. Ma tikilnamiktokan, tokniuan amo techmomojtiaj ken Jonás okinmauili ninivitas.

¹³ ¿Tlen uelis techpaleuis kuali ma titlanankilikan uan ijkon tikinpaleuiskej tokniuan? Ma tikitakan seki tlamantli tlen uelis techpaleuis.

14. (1) ¿Tleka moneki kuali timomachtiskej? (2) ¿Keman moneki tikchiuaskej?

¹⁴ Kuali ma timomachtikan. Titlanankiliskej tla kuali timomachtiaj uan tla timajxiliaj ijkon tikchiuaskej (Prov. 21:5). Pero ma tikilnamikikan tlatlamantli tonemilis. Se tokni itoka Eloise tlen omikik inamik uan kipia 80 xiuitl, ye peua momachtia lunes revista Akin Tetlapouijtok. Ye okijto: “Okachi nechpaktia nimonechikos tla achto nimomachtia”. Okse tokni itoka Joy uan mojmostla tekipanoa. Ye momachtia revista Akin Tetlapouijtok ijkuak yimonechikoti. Ijkon kichiua porque okachi kilnamiktok tlen momachtia. Se tokni tlen itoka Ike uan tekipanoa ken tlayekanki uan precursor, okijto: “Ne nikita okachi kuali san tepitsin nimomachtijtias mojmostla”.

15. ¿Tlen moneki tikchiuaskej para okachi kuali timomachtiskej?

 ¹⁵ ¿Tlen moneki tikchiuaskej para okachi kuali timomachtiskej? Achto, moneki tikiluiskej Jehová ma techyekana ika iespíritu santo (Luc. 11:13; 1 Juan 5:14). Satepan, moneki ma tikitakan nochi tlen timomachtiskej. Ma tikitakan tlen itoka tlamachtil, ma tikinmitakan subtítulos, dibujos noso fotos uan recuadros. Satepan ma timomachtikan sejse párrafo uan ma tikintlajtoltikan nochi textos. Kuali ma timokuayejyekokan tlen timomachtiaj uan okachi ma tikilnamikikan tlen tiknekij tikijtoskej ijkuak titlanankiliskej. Tla okachi kuali timomachtiskej, sapanoa techpaleuis uan okachi tiknekiskej titlanankiliskej (2 Cor. 9:6).

16. ¿Tlen tlamantli tikpiaj para okachi kuali timomachtiskej uan ken tikintekitiltiaj?

¹⁶ Ma tikintekitiltikan amatlajkuilolmej electrónicas. Ialtepe Jehová yotechmakak miakej amatlajkuilolmej electrónicas para ika ma timomachtikan. Aplicación JW Library^® techpaleuia ma tikpiakan amatlajkuilolmej itech celular noso itech tableta. Ijkon uelis okachi kuali timomachtiskej amatlajkuilolmej, tikintlajtoltiskej noso tikinkakiskej san kanin tiyetoskej. Sekimej momachtiaj ika nin aplicación ijkuak tlakuaj ompa kanin tekipanoaj, kanin momachtiaj noso ijkuak kanaj yauij. Noijki tikpiaj Watchtower Library uan AMATLAJKUILOLMEJ ITECH INTERNET Watchtower tlen techpaleuiaj okachi kuali ma timomachtikan.

17. (1) ¿Tleka moneki ma timomachtikan miakej párrafos? (2) ¿Tlen techmachtia video Kuali ximouika iuan Jehová: Ximoyektlali pampa titlanankilis?

¹⁷ Amo ma timomachtikan san seki párrafos. ¿Tleka? Porque amo nochipa uelis titlanankiliskej. Porque xamo oksekimej noijki kinekiskej tlanankiliskej uan akin tlamachtijtok amo techpejpenas ma titlanankilikan. Noijki akin tlamachtijtok amo uelis techiluis tinochtin ma tlanankilikan tlamo sapanoa uejkauas. Ik non, tla amo uelis titlanankiliskej, amo ma timoyolkokokan nion ma timosotlauakan tla akin tlamachtijtok amo otechpejpenki ma titlanankilikan. Okachi titlanankiliskej tla timomachtiskej miakej párrafos. * Noijki uelis tiktlajtoltiskej se texto. Pero noijki ma titlanankilikan tlen otikajsikamatkej ijkuak timomachtiaj.

18. ¿Tleka amo ma tiuejkauakan ijkuak titlanankiliskej?

 ¹⁸ Amo ma tiuejkauakan ijkuak titlanankiliskej. Titeyolchikauaskej tla amo tiuejkauaskej ijkuak titlanankiliskej uan amo oui tikijtoskej. Ik non, ijkuak titlanankiliskej moneki tiuejkauaskej san kanaj 30 segundos (Prov. 10:19; 15:23). Tokniuan tlen yikipiaj miak xiuitl momachtijtokej moneki ijkon kichiuaskej. Tla sapanoa uejkauaj uan amo moajsikamati tlen kijtoaj, xamo oksekimej mokuayejyekoskej amo uelis tlanankiliskej ken yejuan. Pero tla amo tiuejkauaskej ijkuak titlanankiliskej, tikinkauiliskej oksekimej ma tlanankilikan. Tla akin tlamachtia techiluia achto ma titlanankilikan, san ma titlanankilikan tlen moneki uan amo nochi ma tikijtokan. Tla yotlanankilijkej tlen moneki, uelis kijtoskej tlen okseki tlamantli techmachtia (xikita recuadro “ ¿Tlen uelis tikijtoskej ijkuak titlanankiliskej?”).

19. ¿Tlen uelis tikiluiskej akin tlamachtis uan tlen moneki tikchiuaskej?

¹⁹ Ma tikiluikan akin tlamachtis tlen párrafos tiknekij tikinnankiliskej. Tla tiknekij ijkon tikchiuaskej, moneki tikiluiskej tokni achto peuas nechikol. Ijkuak yitimomachtijtoskej non párrafo, totoka ma tikajkokuikan toma uan ijkon techitas tokni.

20. ¿Tleka tikijtoaj ijkuak timonechikoaj yetoskia ken titlakuaj inmiuan toyolikniuan?

²⁰ Ijkuak timonechikoaj iuan tokniuan yetoskia ken titlakuaskej inmiuan toyolikniuan. ¿Tlen tikchiuaskej tla sekimej tokniuan techiluiskej ma tikkuatij barbacoa uan techiluiskej itlaj ma tikuikakan? Xamo amo tikmatiskej tlen tikuikaskej pero timochijchikauaskej itlaj tikuikaskej tlen nochtin kinpaktis. Ijkuak timonechikoaj, yetoskia ye Jehová techiluia ma titlakuatij uan techmaka miak tlamantli (Sal. 23:5; Mat. 24:45, TNM). Jehová kineki ma tikmakakan tlen ueli tikchiuaj. Ik non, moneki kuali ma timomachtikan uan ma timochijchikauakan ma titlanankilikan. Tla ijkon tikchiuaskej, amo san tikkuaskej tlen techmakas Jehová, noijki tejuan itlaj tikmakaskej.