1. ¿Tlenon kimachiliaya David itech Jehová, niman tlenon okiyolmapeuj makichiua?

TEKIUAJ DAVID okijkuilo: “Sanoyej ueyixtikaj toTEKO, niman yejua, kimelaua yekteneualistli” (Sal. 145:3). David kitlasojtlaya Jehová, niman yejon tlasojtlalistli okiyolmapeuj makiueyichiua Jehová ipan tlanechikojli (Sal. 22:22; 40:5). Tejuamej noijki tiktlasojtlaj Jehová niman noijki titlanemiliaj ken David: “Nochipa mamitsueyichiujtokan, oh Jehová, inTajtsin israelitas, toTajtsin” (1 Crón. 29:10-13).

2. a) ¿Kenon uelis tikueyichiuaskej Jehová? b) ¿Kenon nomachiliaj sekimej tokniuan, niman tlenon tikitaskej?

² Ipan yejuin tonajli, uelis tikueyichiuaskej Jehová ijkuak titlanankiliaj ipan tlanechikoltin. San ika, miyekej tokniuan kintekiyomaka tlanankiliskej. Kinekij tlanankiliskej, san ika, xnoyolchikauaj. ¿Tlenon uelis kinpaleuis maka manomojtikan? ¿Niman tlenon techpaleuis tinochimej ika ijkuak titlanankiliskej matiteyolchikauakan? Matikitakan naui itech tleka titlanankiliaj ipan tlanechikoltin niman sakin tikinnankiliskej yejuin tlajtoltilistin.

3-5. a) ¿Tleka titlanankiliaj ipan tlanechikoltin? b) ¿Noneki tinochimej san noijki ijkon matitlanankilikan? Xkijto tleka ijkon titlanankilia.

³ Jehová techkauilia tinochimej matikueyichiuakan (Sal. 119:108). Ijkuak titlanankiliaj, ijkon tikueyichiuaj Jehová ika se “uentli” niman xyakaj topampa uelis kitemakas yejon uentli (xpoua Hebreos 13:15). ¿Techtlajtlanilia Jehová, tinochimej san noijki ijkon matitlanankilikan? Ka.

⁴ Jehová kimatstika ika xsan noijki ijkon tiuelij tikchiuaj niman ika titlamantikej, niman yejua melak kipatiojkaita uentli  tlen tiuelij tikmakaj. Matitlanemilikan itech uentli tlen kinseliliaya israelitas. Akin kipiayaj tomintsin, kiuentlaliliayaj se borreguita noso se chivita. Akin xkipiayaj tomintsin, kimakaya “ome kokotetsitsimej noso ome pichontsitsimej”. Niman tla se, nion ome tototl xueliya kiuentlaliaya, Jehová kiseliliaya “ome kilo de harina yejuan más kuajli” (Lev. 5:7, 11). Maski harina xpatioj katka, toTajtsin kipatiojkaitaya yejon uentli pampa katka “harina yejuan más kuajli”.

⁵ ToTajtsin ok san noijki ijkon tlanemilia ipan yejuin tonajli. Ijkuak titlanankiliaj, yejua techasikamati niman xkichia melak kuajli matitlajtokan ijkon ken Apolos noso matitetlaneltokiltikan ken Pablo (Hech. 18:24; 26:28). Yejua san techtlajtlanilia matokojtilikan tikchiuaskej hasta kampa tiueliskej. Matikilnamikikan yejon siuakaualtsintli akin okitemakak san ome tomintsin. Jehová okipatiojkaitak pampa yejon siuakaualtsintli okitemakak nochi tlen kipiaya (Luc. 21:1-4).

6. a) ¿Kenon mitspaleuiya ken tlanankiliaj tokniuan ipan tlanechikojli? b) ¿Kenon uelis tikteititis ika tikpatiojkaita ken tlanankiliaj tokniuan?

⁶ Ken titlanankiliaj, tinochimej toyolchikauaj (xpoua Hebreos 10:24, 25). Tikuelitaj tikinkakiskej kenon sesejneka ken tlanankiliaj ipan tlanechikojli. Se neskayotl, tikuelitaj tijkakiskej ijkuak tlanankiliaj kokonej, pampa kikuij tlajtojli tlen xouijtika niman tlen kisa ipan inyojlo. Techyolpaktia ijkuak yakaj ika pakilistli kijtoua itlaj tlen okinexti ipan Biblia. Niman techmojkatlachialtia ijkuak yakaj akin san pijpinaui noso akin nomachtijtika totlajtol noyolchikaua tlanankilia (1 Tes. 2:2). ¿Kenon uelis tikimititiskej ika tikpatiojkaitaj tlen kichiuaj? Uelis tikimititiskej tla ijkuak tlami tlanechikojli tikintlasojkamachiliaj itech ken otlanankilijkej niman tikimijliaj kenon melak otechyolchikaujkej. Noijki tikteititiaj ika tikinpatiojkaitaj ijkuak tejuamej titlanankiliaj. Ijkon xsan tikseliskej yolchikaualistli, noijki titeyolchikauaskej (Rom. 1:11, 12).

7. ¿Kenon techpaleuiya tla titlanankiliaj?

⁷ Sa no tejuamej topaleuiyaj ijkuak titlanankiliaj (Is. 48:17). ¿Kenon? Kachtopa, tla tiknemiliaj tomateketsaskej, noneki melak kuajli tomachtiskej achto ika tiaskej ipan tlanechikojli. Tla kuajli tomachtiaj, kuajli tikasikamatiskej Biblia. Niman tla  kuajli tikasikamatij Biblia, tikchiuaskej ipan tonemilis tlen tomachtiaj. Ika ome, ijkon melak tikuelitaskej tinemiskej ipan tlanechikojli, pampa tikmatstoskej itech tlenon tlajtotoskej. Niman ika yeyi, pampa ijkuak titlanankilis nonekis timokojtilis, tlen tikijtoskej nokauas ipan totlamachilis.

8, 9. a) ¿Kenon kita Jehová pampa tokojtiliaj titlanankiliskej? b) Maski ijkon, ¿kenon ok uelis nomachiliskej sekimej?

⁸ Jehová kuelita matikijtokan tlen tikneltokaj. Kuajli matikmatstokan ika yejua techkaki niman kipatiojkaita ijkuak tokojtiliaj titlanankiliskej ipan tlanechikojli (xpoua Malaquías 3:16). * Kiteititia ika kipatiojkaita tlen tikchiuaj pampa melak techteochiua (Mal. 3:10).

⁹ Yotikasikamatkej ika melak tepaleui tla titlanankiliaj. Maski ijkon, sekimej kanaj ok nomojtiaj nomateketsaskej. Tla tejua ijkon timomachilia, maka xmajmana. Tikitaskej seki tlajtolyekanalistin niman seki neskayomej tlen kiteneua Biblia, niman noijki tikitaskej seki tlen techpaleuis miyekpa matitlanankilikan.

10. a) ¿Kenon tomachiliaj timiyekej ijkuak titlanankiliaj? b) ¿Tleka uelis tikijtoskej ika kuajli tla tomojtiaj titlanankiliskej?

¹⁰ ¿Melak timomojtia ijkuak tiknemilia timomateketsas ipan tlanechikojli? Tla kema, xsan tejua ijkon timomachilia. Timiyekej tomojtiaj ijkuak titlanankiliaj. San ika, tla yejon kichiua maka xtlanankili, noneki tikitas tleka ijkon timomachilia. ¿Mitsmojtia xok tikmatis tlenon tikijtos noso tla otikijto itlaj tlen xkuajli? ¿Mitsajmana tla xtiueli melak kuajli titlanankilia ijkon ken oksekimej? Kuajli tla tikmachilia yejon, pampa kijtosneki ika tiyolyemanki niman ika tikimita oksekimej uejueyixtokej xijkon ken tejua. Niman Jehová melak kuelita  ijkuak se yolyemanki (Sal. 138:6; Filip. 2:3). San ika, Jehová noijki kineki ika xueyichiua niman xkinyolchikaua mokniuan ipan tlanechikoltin (1 Tes. 5:11). Yejua mitstlasojtla niman tla mitspoloua, mitsyolchikauas.

11. ¿Katlejua itlajtolyekanalisuan Biblia uelis techpaleuiskej?

¹¹ Matikitakan seki itlajtolyekanalisuan Biblia. ITlajtol toTajtsin techilnamiktia ika tinochimej topopolouaj ijkuak titlajtouaj (Sant. 3:2). Jehová kimatstika ika topopolouanij niman tokniuan noijki kimatstokej yejon (Sal. 103:12-14). Yejuamej tochanejkauan akin nemij ipan ikalpan toTajtsin niman techtlasojtlaj (Mar. 10:29, 30; Juan 13:35). Kasikamatij ika kemantika xtikijtouaj ijkon ken tiknekiskiaj.

12, 13. ¿Tlenon techmachtia ineskayo Nehemías niman Jonás?

¹² Matikitakan seki neskayomej tlen onka ipan Biblia tlen techpaleuiskej maka matomojtikan. Kachtopa matomachtikan itech Nehemías, akin tekitiya itech se tekiuaj akin ueyixtika. Yejua melak onajman ijkuak okikak ika yoijtlakaujkaj itepanuan niman ipuertas Jerusalén (Neh. 2:1-8). Uelis tiknemiliskej kenon melak onomojti ijkuak tekiuaj okitlajtlanili makijli tleka melak najmantoya. Achto ika kinankilis, Nehemías okichijtiuets se teoyotl. Melak otepaleui tlen Nehemías okichiuj pampa tekiuaj melak okipaleui ikalpan toTajtsin (Neh. 2:1-8). Ineskayo Nehemías techmachtia ika melak noneki matikchiuakan teoyotl achto ika titlanankiliskej. Aman matitlanemilikan noijki itech Jonás. Ijkuak Jehová okinauati makinnojnotsati akin chantiyaj Nínive, melak onomojti niman hasta ocholoj oksekan (Jon. 1:1-3). San ika, ika itlapaleuilis toTajtsin, Jonás okichiuj yejon tekitl niman itlajtoluan melak okinpaleui akin chantiyaj ipan yejon ueyi kalpan (Jon. 3:5-10). Ineskayo Jonás techmachtia ika Jehová uelis techpaleuis matiktekichiuilikan maski melak matomojtikan. Niman tokniuan xijkon temomojtikej ken ninivitas, ¿xmelak?

¹³ ¿Tlenon uelis tikchiuaskej niman ijkon ijkuak titlanankiliskej makinyolchikaua tokniuan? Matikitakan seki.

14. a) ¿Tleka noneki kuajli matomachtikan tlen tikitaskej ipan tlanechikoltin? b) ¿Kemanon uelis tomachtiskej?

¹⁴ Matomachtikan nochi tlen noitas ipan tlanechikoltin. Tla tikxelouaj tiempo niman ijkon kuajli tomachtiaj, yejon techpaleuis matoyolchikauakan titlanankiliskej (Prov. 21:5). Melauak, xtinochimej san noijki tiuelij tikchiuaj. Eloise, se siuakaualtsintli akin kipiya ipantsin 80 xiuitl, peua nomachtia Amatl Tekakistilijketl ijkuak peua semana. Yejua kijtoua: “Melak nechyolpaktia tlanechikojli tla ninomachtia seki tonaltin achto ika tikpiyaskej totlanechikol”. Se tokniuj itoka Joy, akin tekiti nochi tonaltin, nomachtia Amatl Tekakistilijketl se tonajli achto ika yas ipan tlanechikojli pampa  yejua kijtoua ika kuelita kilnamiktos tlen kemach yonomachti. Ike, se tlayekanketl akin precursor niman melak miyek tekitl kipiya, kijtoua: “Yonikitak ika nejua nechpaleuiya ninomachtijtias san achijtsin ipan semana niman xsan sejpatipan nitlamis”.

15. ¿Kenon uelis kuajli tomachtiskej tlen tikitaskej ipan tlanechikojli?

¹⁵ ¿Kenon uelis kuajli tomachtiskej tlen tikitaskej ipan tlanechikojli? Kachtopa, noneki matiktlajtlanilikan Jehová iespíritu santo (Luc. 11:13; 1 Juan 5:14). Sakin, matikxelokan seki minutos niman ijkon tikitaskej itech tlenon tlajtos yejon tlamachtijli. Matikitakan kenon itoka yejon tlamachtijli, matikimitakan subtítulos, tlaixkopinaltin niman recuadros. Kuakon, matipeuakan matikimitstiakan párrafos niman matikpouakan nochi tlaxeloltin tlen tiueliskej. Matitlanemilikan itech yejon tlamachtijli, niman kuajli matikitakan kampa tiknekiskej titlanankiliskej. Tla kuajli tomachtiaj, melak techpaleuis niman xtomojtiskej titlanankiliskej (2 Cor. 9:6).

16. ¿Katlejua tlapaleuilistin tikinpiya niman kenon tikintekitiltia?

¹⁶ Matiktekitiltikan tlen techmakaj ika matomachtikan tlen onka ipan dispositivos. Ikalpan Jehová yotechmakak tlen techpaleuiya ika matomachtikan. Aplicación JW Library techpaleuiya matikintemoltikan ipan tocelular noso tableta amatlajkuiloltin tlen ika tomachtiaj. Ijkon uelis tomachtiskej yejon tlamachtijli, tikpouaskej noso tijkakiskej maski san kemanon noso ijkuak tiknekiskej. Sekimej kikuij yejuin aplicación niman ijkon nomachtiaj ijkuak noseuiyaj ipan intekiyo noso kampa nomachtiaj noso ijkuak kanaj yauej. Noijki, programa Watchtower Library niman BIBLIOTECA IPAN INTERNET Watchtower, techpaleuiya matomachtikan seki tlen tiknekij kuajli tikasikamatiskej.

17. a) ¿Tleka tepaleui tla miyek tikyektlaliaj ken titlanankiliskej? b) ¿Tlenon otiuel itech video Xmouika iuan Jehová: Xmomachti ken titlanankilis?

¹⁷ Tla tiuelij, miyek matikyektlalikan ken titlanankiliskej. ¿Tleka? Pampa xnochipa uelis titlanankiliskej ijkuak tomateketsaskej. Kanaj sekimej ijkuakon nomateketsaj niman akin kiyekana tlamachtijli yejua kinuajmaka. Noijki, kanaj tokniuj xkinkauilis miyekej matlanankilikan pampa xkineki panos itech tiempo tlen kipiya. Kuakon, maka matikualanikan nion maka matajmanakan tla xtitlanankiliaj ipan kachtopa párrafos. Tikyektlaliskej miyek ken titlanankiliskej techpaleuis miyekpa matitlanankilikan. Noijki uelis tikinpouaskej seki tlaxeloltin. San ika, tla tiuelij, matoyektlalikan niman uelis titlanankiliskej ken tejuamej yotikasikamatkej. *

18. ¿Tleka noneki maka matiuejkauikan ijkuak titlanankiliskej?

 ¹⁸ Maka matiuejkauikan ijkuak titlanankiliskej. Melak titeyolchikauaj ijkuak xtiuejkauij niman tijkuij tlajtoltin tlen xouijtika. Kuakon, matikyejyekokan san 30 segundos matiuejkauikan (Prov. 10:19; 15:23). Melak noneki ika akin youejkaujkej tlanankiliaj ipan tlanechikoltin makitemakakan kuajli neskayotl. Tla ijkuak tlanankiliaj uejkauij niman kikuij tlajtoltin tlen ouijtika, kanaj sekimej xnoyolchikauaskej nomateketsaskej, kinemiliskej ika xueliskej tlanankiliskej ken yejuamej. San ika, tla xtiuejkauij ijkuak titlanankiliaj, miyekej tokniuan ueliskej tlanankiliskej. Tla techkauiliaj kachtopa matitlanankilikan ipan se párrafo, melak noneki san matiknankilikan tlajtoltilistli niman kuajli manasikamati, maka matikijtokan nochi tlen onka ipan párrafo. Ijkuak yonoteneuj tlen noneki nasikamatis, aman kema uelis noijtos okseki tlen onka ipan párrafo (xkita recuadro “ ¿Tlenon uelis nikijtos ijkuak nitlanankilis?”).

19. ¿Kenon uelis techpaleuis akin kiyekana tlamachtijli, san ika, tlenon noneki tikchiuaskej?

¹⁹ Matikijlikan akin kiyekana tlamachtijli kanon tikuelitaskiaj titlanankiliskej. Tla tiknekij ijkon tikchiuaskej, matitlajtokan iuan tokniuj achto ika peuas tlanechikojli. Ijkuak ajsis ipan yejon párrafo, nimantsin melak tlakpak matomateketsakan niman ijkon yejua techitas.

20. ¿Kenon totlanechikoluan san noijki ken ijkuak titlakuaj imiuan akin touikaj?

²⁰ Totlanechikoluan san noijki ken ijkuak titlakuaj imiuan akin touikaj. Tla sekimej tokniuan technotsaj matitlakuatij inchan niman kichiaj matikitkikan itlaj, ¿tlenon tikchiuaskej? Kanaj achijtsin tomojtiskej, san ika, kanaj tokojtiliskej tikitkiskej itlaj tlen nochimej makuelilikan. Ipan tlanechikoltin, Jehová yejua akin technotsa, yokitlali mesa niman ompa yokitlali miyek tlemach tlen uelik (Sal. 23:5; Mat. 24:45). Yejua kuelita itlaj matikitkikan, tlen tiueliskej tikitkiskej. Kuakon, kuajli matomachtikan niman matitlanankilikan nochi kech tiueliskej. Ijkon, xsan titlakuaskej ipan imesa Jehová, noijki titlapaleuiskej ika oksekimej noijki ompa matlakuakan.