1. (a) Woo docht David äwa Jehova? (b) To waut brocht am daut?

DE Kjennich David schreef: “De HAR es groot un sull opp daut aulahechste jeloft woaren” (Psa. 145:3). Hee leewd Jehova un daut brocht am bat doa, Jehova “enne Medd de Jemeende” to lowen (Psa. 22:23, Friesenbibel; 40:6). Gaunz secha leefst du Jehova un denkjst uk soo aus David, waut doa säd: “Jeloft best du, HAR, du Gott von onsen Voda Israel, von Eewichkjeit bat Eewichkjeit!” (1. Chr. 29:10-13).

2. (a) Woo kjenn wie Jehova lowen? (b) Waut fa Trubbels haben eenje? (c) Waut woa wie nu seenen?

² Wie kjennen Jehova biejlikj doaderch lowen, daut wie bie de Toopkomes Auntwuaten jäwen. Oba väl Breeda un Sestren haben eenen Trubbel. Dee wellen Auntwuaten jäwen, oba dee kjrieen sikj doa nich too, wäajen dee Angst haben. Woo kjennen dee doamet foadich woaren? Un waut kaun ons aulem halpen, soone Auntwuaten to jäwen, waut aundre Moot moaken? Ea wie dise Froagen beauntwuaten, woa wie veatlei seenen, wuarom wie bie de Toopkomes Auntwuaten jäwen.

3-5. (a) Wuarom jäw wie no Hebräa 13:15 no Auntwuaten bie de Toopkomes? (b) Velangt Jehova von jiedrem eenen jlikjen väl? Laj daut ut.

³ Jehova haft ons aulem daut Väarajcht jejäft, daut wie am lowen kjennen (Psa. 119:108). Onse Auntwuaten bie de Toopkomes jehieren to daut Opfa, waut wie brinjen toom Gott lowen, un kjeen aundra kaun dit Opfa fa ons jäwen (läs Hebräa 13:15). Oba velangt Jehova von jiedrem eenen  jlikjen väl, wan daut om Opfa ooda Auntwuaten jeit? Nä, hee deit nich.

⁴ Jehova weet, daut wie aula veschiedne Gowen un Omstend haben, un hee räakjent daut väl, waut wie am jäwen kjennen. Daut es doaraun to seenen, waut vonne Opfa de Israeliten am brinjen kunnen. Eenje hauden jenuach toom een Laum ooda eene Kos opfren. Oba wan een Israelit oam wia, dan kunn dee “twee Turtelduwen ooda twee aundre Duwen aus Opfa brinjen”. Un wan dee nich jenuach haud toom twee Duwen opfren, dan kunn dee uk “een tieendel Efa wittet Mäl” jäwen (3. Mo. 5:7, 11). Mäl wia nich soo dia, oba Jehova neem daut uk aun, wan daut von soon Mäl wia, waut don fa daut baste jetalt wort.

⁵ Ons leeftolja Gott denkjt vondoag dän Dach noch krakjt soo. Wan wie Auntwuaten jäwen, dan velangt hee nich, daut wie aula soo goot räden kjennen aus Apollos ooda Paulus (Apj. 18:24; 26:28). Jehova well eefach, daut wie ons bemieejen, de baste Auntwuaten to jäwen, waut wie kjennen. Denkj mol aun de Wätfru, waut twee kjliene Jeltstekja enläd. Jehova räakjend ar väl, wiels see äa bastet jeef (Luk. 21:1-4).

6. (a) Waut kjennen aundre äare Auntwuaten aun ons doonen, soo aus Hebräa 10:24-25 sajcht? (b) Woo kaust du diene Dankboakjeit wiesen fa de Auntwuaten, waut die Moot jäwen?

⁶ Wie spräakjen ons unjarenaunda Moot too derch onse Auntwuaten (läs Hebräa 10:24-25). Wie aula jleichen daut, bie de Toopkomes veschiedne Auntwuaten to hieren. Wie freien ons, wan een kjlienet Kjint met eefache Wieed von Hoaten eene Auntwuat jeft ooda wan wäa gaunz bejeistat vetalt, waut dee jroz jelieet haft. Un wie sent brow met soone, waut dän Moot haben sikj to vemulen, wan dee uk bleed sent ooda noch nich lang onse Sproak lieren (1. Tess. 2:2). Woo kjenn wie dee wiesen, daut wie äare Auntwuaten waut räakjnen? Wie kjennen ons no daut Toopkomen bie an bedanken. Un wie kjennen onse Dankboakjeit uk doaderch wiesen, daut wie selfst Auntwuaten jäwen. Dan kjrie wie bie de Toopkomes Moot, un de aundre uk (Reem. 1:11-12).

7. Woo kjemt ons daut togood, wan wie Auntwuaten jäwen?

⁷ Daut kjemt ons selfst togood, wan wie Auntwuaten jäwen (Jes. 48:17). Wuarom? Ieeschtens woa wie ons bäta  reedmoaken fa daut Toopkomen, wan wie doa eene Auntwuat jäwen wellen. Un wan wie ons fein reedmoaken, dan woa wie Gott sien Wuat noch bäta vestonen. Un je bäta wie daut vestonen, je bäta kjenn wie daut nokomen. Tweedens woa wie mea Freid bie daut Toopkomen haben, wan wie doa metmoaken un nich bloos toohorchen. Un dreddens woa wie foaken noch lang weeten, waut vonne Auntwuat wie jejäft haben, wiels wie ons sea bemieecht haben.

8-9. (a) Woo denkjt Jehova äwa onse Auntwuaten, soo aus Maleachi 3:16 sajcht? (b) Waut fa eenen Trubbel haben eenje?

⁸ Jehova jefelt daut, wan wie äwa onsen Gloowen räden. Wie kjennen ons secha sennen, daut Jehova daut hieet un väl räakjent, wan wie ons bemieejen Auntwuaten to jäwen (läs Maleachi 3:16). Hee woat ons säajnen, wan wie ons aunstrenjen am to jefaulen (Mal. 3:10).

⁹ Wie haben aulsoo goode Uasoak, bie de Toopkomes Auntwuaten to jäwen. Oba eenje woagen sikj daut doawäajen nich, de Haunt opptohäwen. Wan die daut uk soo jeit, dan woa nich mootloos. See wie nu mol een poa biblische Gruntsauzen un Biespels un gooden Rot, waut ons aulem halpen kaun, mea Auntwuaten to jäwen.

10. (a) Fa waut haben väle Angst? (b) Wuarom es daut nich schlajcht, wan eena Angst haft Auntwuaten to jäwen?

¹⁰ Bumst die uk emma daut Hoat, wan du doa noch mau bloos aun denkjst, eene Auntwuat to jäwen? Dan best du nich de eensja. De mieeschte sent een bät jerettelt, wan dee Auntwuaten jäwen. Oba daut du met diene Angst foadich woaren kaust, motst du weeten, fa waut du krakjt Angst hast. Jleefst du, du woascht daut vejäten, waut du sajen west, ooda waut orrajchtet sajen? Denkjst du, diene Auntwuat woat nich soo goot sennen aus de aundre äare? Soont to denkjen, es nich schlajcht. Daut kaun wiesen, daut du deemootich best un aundre fa hecha talst aus die selfst. Jehova  jleicht daut, wan wie deemootich sent (Psa. 138:6; Filip. 2:3). Oba hee well uk, daut du am bie de Toopkomes lofst un diene Breeda un Sestren doa Moot toosprakjst (1. Tess. 5:11). Hee leeft die un woat die dän Moot jäwen, waut die doatoo fält.

11. Woone Bibelvarzh kjennen ons halpen?

¹¹ Well wie mol äwa waut Bibelvarzh nodenkjen. De Schreft sajcht, wie aula sajen mol waut orrajcht ooda vedreit (Jak. 3:2). Jehova velangt nich, daut wie volkomen sent un onse Gloowesbreeda uk nich (Psa. 103:12-14). Dee sent onse jeistelje Famielje un leewen ons (Mar. 10:29-30; Joh. 13:35). Dee weeten daut goot, daut ons de Auntwuaten nich emma soo rutkomen, aus wie wudden wellen.

12-13. Waut kjenn wie von Nehemia un Jona lieren?

¹² Woone Biespels ut de Schreft kjennen die halpen, diene Angst to äwakomen? Denkj mol aun Nehemia. Hee deend eenen majchtjen Kjennich. Nehemia wia truarich, wiels hee jehieet haud, daut de Stautsmia un de Puaten von Jerusalem doljebroaken wieren (Neh. 1:1-4). Stal die mol väa, woo dän mott daut Hoat jebumst haben, aus de Kjennich am fruach, wuarom hee soo truarich wia. Nehemia bäd fuaz un jeef am de Auntwuat. Opp daut no deed de Kjennich dan väl fa Gott sien Volkj (Neh. 2:1-8). Ooda denkj mol aun Jona. Aus Jehova wull, daut hee sull met de Niniviten räden, haud hee soo Angst, daut hee gaunz sestwua hanrand (Jona 1:1-3). Oba met Jehova siene Help kunn hee daut. Un siene Wieed kjeemen de Menschen en Ninive sea togood (Jona 3:5-10). Von Nehemia lia wie, woo needich daut es to bäden, ea wie eene Auntwuat jäwen. Un von Jona lia wie, daut Jehova ons emma halpen kaun sienen Wellen to doonen, wan ons uk sea angst es. Un secha derw wie ons fa onse Breeda en de Vesaumlunk lang nich soo grulen aus fa de Menschen en Ninive!

¹³ Waut kaun ons noch halpen, bie de Toopkomes goode Auntwuaten to jäwen? Well wie mol seenen.

14. (a) Wuarom sell wie ons fein reedmoaken fa de Toopkomes? (b) Wanea wudd wie daut doonen kjennen?

¹⁴ Moak die fa jieda Toopkomen reed. Wan du plonst un die fein reedmoakst, dan woascht du leichta kjennen eene Auntwuat jäwen (Spr. 21:5). Jieda eena mott seenen, wanea daut fa am de baste Tiet es, sikj reedtomoaken. Eene Wätfru, waut aul äwa 80 Joa es un Eloise heet, fangt aul aunfangs Wäakj aun, sikj fa daut Woaktorm-Studium reedtomoaken. See sajcht: “Mie jeit daut bie de Toopkomes scheena, wan ekj daut aul ea studieet hab.” Joy schauft de Wäakj äwa un nemt sikj emma aum Sinowent Tiet, äaren Woaktorm to studieren. See sajcht: “Ekj jleich daut, wan ekj daut  noch gaunz kloa em Denkj hab.” Ike, een Eltesta un Pionia, waut väl to doonen haft, sajcht: “Fa mie es daut bäta, wan ekj de Wäakj äwa emma wada een Stootje studia enne Städ aules opp eemol.”

15. Woo kaust du die fein reedmoaken fa de Toopkomes?

¹⁵ Woo kaust du die fein fa de Toopkomes reedmoaken? Bäd Jehova emma om sienen heiljen Jeist, ea du studieescht (Luk. 11:13; 1. Joh. 5:14). Dan nemm die een poa Minuten Tiet toom die dän Artikjel beseenen: Denkj äwa dän Tietel, de Äwaschreften, de Bilda un de Kaustes no. Wan du jieda Varsch studieescht, dan läs die doa soo väl von de Bibelvarzh no, aus du kaust. Denkj doaräwa no, waut du studieescht, un besonda äwa daut, wua du eene Auntwuat jäwen west. Je bäta du die reedmoakst, je dolla kjemt die daut togood un je leichta kaust du eene Auntwuat jäwen (2. Kor. 9:6).

16. (a) Waut kaust du toom studieren brucken? (b) Woo brukst du dise Sachen?

¹⁶ Bruck de ellektroonische Bieekja un aundre Sachen, waut et opp eene Sproak jeft, waut du vesteist. Jehova jeft ons derch siene Organisazion väl niemootsche Sachen toom ons fa de Toopkomes reedmoaken. Met de JW Library^®-App kjenn wie ons opp onse Fons ooda Tablets Bieekja raufloden toom studieren. Dan kjenn wie dee irjentwua un irjentwanea studieren ooda weens läsen ooda äwahorchen. Eenje brucken dise App bie de Oabeit ooda School enne Meddachstiet ooda wan see hinjawäajes sent. Un de Watchtower Library un de Woaktorm ONLINE-BIBLIOTÄKJ halpen ons, daut wie ons leicht waut nosieekjen kjennen, wua wie mea äwa weeten wellen.

17. (a) Wuarom saul eena sikj miere Auntwuaten reedmoaken? (b) Waut hast du von daut Video jelieet Sie Jehova sien Frint – Moak die eene Auntwuat reed?

¹⁷ Wan mäajlich, moak die miere Auntwuaten reed. Wuarom? Wiels du veleicht nich jiedatsmol eene Auntwuat jäwen kaust. Secha woaren uk aundre bie deeselwje Froag de Haunt opphäwen un de Leida wält sikj veleicht eent von dee. Un eenjemol kaun dee uk nich aulem auntwuaten loten, daut daut Toopkomen nich too lank woat. Doawäajen sell wie nich beleidicht ooda mootloos sennen, wan wie nich fuaz eene Auntwuat jäwen kjennen. Wan du die miere Auntwuaten reedmoakst, dan woascht du mea Jeläajenheiten haben, bie daut Studium mettomoaken. Bie eent von diene Auntwuaten wurscht du kjennen eenen Bibelvarsch väaläsen. Oba wan du kaust, dan moak die uk eene Auntwuat reed met diene ieejne Wieed. *

18. Wuarom sell wie korte Auntwuaten jäwen?

 ¹⁸ Jeff korte Auntwuaten. Foaken jäwen ons de korte, eefache Auntwuaten väl Moot. Doawäajen moak diene Auntwuaten nich too lank; proow, daut dee ojjefäa 30 Sekunden sent (Spr. 10:19; 15:23). Wan du aul Joaren bie de Toopkomes Auntwuaten jejäft hast, dan hast du eene besondre Veauntwuatunk. Du kaust doaderch een goodet Biespel jäwen, daut diene Auntwuaten nich too lank sent. Wan du sea deepe Auntwuaten jefst, waut miere Minuten dieren, dan kjennen aundre denkjen, daut see daut kjeenmol soo fein vestonen woaren aus du, un woagen sikj veleicht nich mea, waut to sajen. Un wan de Auntwuaten kjarta sent, dan kjennen uk mea bie daut Toopkomen metmoaken. Jeff eene eefache, kloare Auntwuat opp de Froag, besonda wan du de ieeschta best, waut dee beauntwuat. Proow nich, von aules en dän Varsch to räden. Wan de Hauptiedee aul jesajcht es, dan kaust du uk von aundret räden, waut doabennen es. (See dän Kausten “ Waut kaun ekj sajen?”)

19. (a) Woo kaun de Leida die halpen, daut du kaust eene Auntwuat jäwen? (b) Waut saust du dan doonen?

¹⁹ Saj dän Leida daut em verut, daut du wurscht wellen bie eenen jewessen Varsch eene Auntwuat jäwen. Wan du daut doonen west, dan räd aul een Stoot ver daut Toopkomen met dän. Wan daut ieescht bat dän Varsch es, dan häw diene Haunt fuaz huach opp, daut de Leida daut seenen kaun.

20. En waut fa Stekjen es een Toopkomen soo aus eene Moltiet, waut eena met Frind toop at?

²⁰ Onse Toopkomes sent soo aus eene Moltiet, waut eena met goode Frind toop at. Waut wurscht du doonen, wan waut Frind die enlooden toom Fleesch baken un du sust een bät waut metbrinjen toom äten? Secha wurscht du dien bastet doonen, waut scheenet mettobrinjen, wan die daut uk een bät nerwees muak. Jehova haft ons uk enjelot un sitt doano, daut bie onse Toopkomes emma een Desch voll scheenet jeisteljet Äten es (Psa. 23:5; Mat. 24:45). Un hee freit sikj, wan wie ons bastet doonen toom een bät waut metbrinjen. Doawäajen well wie ons fein reedmoaken un soo väl aus mäajlich bie de Toopkomes metmoaken. Dan ät wie nich bloos aun Jehova sienen Desch, oba brinjen uk waut met fa de aundre en de Vesaumlunk.