1. Hao nao feeling bilong David abaotem Jehovah, and datwan muvim hem for duim wanem?

KING DAVID sei: “[Jehovah] hemi hae tumas, an hemi fitim fo yumi mekhae long hem.” (Sams 145:3) David lovem Jehovah and datfala love muvim hem for praisem God insaed long kongregeson. (Sams 22:22; 40:5) Tru nao, iu lovem Jehovah and agree long toktok bilong David wea sei: “Mi preisim yu [Jehovah], God blong Israel . . . Bae mifala i gohed fo preisim yu olowe.”—Fas Kronikols 29:10-13.

2. (a) Hao nao iumi savve praisem Jehovah? (b) Wanem nao samfala samting wea mekem hem no isi for givim koment, and wanem nao bae iumi storyim?

² Distaem, wanfala wei wea iumi savve praisem Jehovah nao hem for koment long olketa meeting. Nomata olsem, samfala brata and sista bilong iumi faendem hem no isi for duim datwan. Olketa laek for koment long meeting, bat fraet nao mekem olketa hol bak. Wanem nao olketa savve duim for deal witim datwan? And wanem nao samfala samting wea savve helpem iumi evriwan for givim koment wea encouragem narawan? Bifor iumi ansarem olketa kwestin hia, bae iumi storyim fofala important reason why iumi koment long olketa meeting.

3-5. (a) Olsem Hebrew 13:15 storyim, why nao iumi koment long olketa meeting? (b) Waswe, iumi evriwan mas givim sem type koment? Explainim datwan.

³ Jehovah givim iumi evriwan privilege for praisem hem. (Sams 119:108) Olketa koment bilong iumi long meeting hem part long olketa “sakrifaes wea iumi givim long God,” and iumiseleva nao mas givim datfala sakrifaes and hard for eniwan duim datwan for iumi. (Readim Hebrew 13:15.)  Waswe, Jehovah sei iumi evriwan mas givim sem type sakrifaes, or koment? Nomoa, hem no ting olsem!

⁴ Jehovah luksavve laef and savve bilong each wan long iumi hem no semsem, and hem barava tinghae long wanem iumi fit for givim. Tingim olketa difren kaen sakrifaes wea hem acceptim from olketa Israelite. Samfala Israelite fit for givim wanfala pikinini sheepsheep or goat. Bat Israelite wea poor maet givim tufala kurukuru or tufala young pigeon nomoa. And sapos wanfala Israelite no fit for givim tufala bird, Jehovah acceptim nomoa for olketa givim maet samting olsem wan kilo long gud flour. (Levitikas 5:7, 11) Long datfala taem, flour no expensive olsem sheepsheep and bird, bat Jehovah still tinghae long datfala sakrifaes bikos datfala flour hem barava gud wan.

⁵ Kaenfala God bilong iumi garem sem tingting distaem tu. Taem iumi koment, Jehovah no expectim iumi for savve tumas hao for story olsem Apollos and Paul. (Acts 18:24; 26:28) Jehovah no expectim iumi for givim samting winim wanem iumi fit for givim. Tingim datfala widow woman wea givim tufala smol coin. Jehovah barava tinghae long hem bikos hem givim best bilong hem.—Luke 21:1-4.

6. (a) Olsem Hebrew 10:24, 25 storyim, hao nao olketa koment long meeting hem affectim iumi? (b) Hao nao iu savve showimaot iu tinghae long koment wea narawan talem?

⁶ Iumi encouragem each other taem iumi givim koment. (Readim Hebrew 10:24, 25.) Iumi evriwan laek for herem olketa didifren koment long meeting. Iumi hapi tumas taem wanfala smol pikinini givim simpol koment wea kam from heart. Iumi kasem encouragement tu, taem iumi herem samwan koment abaotem wanfala interesting point wea hem just lanem nomoa. And iumi tinghae long olketa wea traem best for no fraet and givim koment nomata olketa shame or olketa just start for lanem languis bilong iumi. (1 Thess. 2:2) Hao nao iumi savve showimaot iumi tinghae long wanem olketa duim? Iumi savve thankiu long olketa bihaen meeting. Narafala wei, hem for iumi tu givim koment. Sapos iumi duim olsem, iumi no just kasem encouragement long olketa meeting nomoa bat iumi givim encouragement tu.—Rome 1:11, 12.

7. Wanem gud samting nao iumi kasem taem iumi koment?

 ⁷ Iumi kasem gud samting taem iumi koment. (Aesaea 48:17) Why nao olsem? First samting, sapos iumi plan for givim koment datwan bae muvim iumi for prepare gud for meeting. Taem iumi prepare gud, iumi bae barava minim gud toktok bilong God. And taem iumi minim gud toktok bilong God, datwan bae helpem iumi for followim olketa samting wea iumi lanem. Mek-tu samting, iumi bae barava enjoyim meeting sapos iumi tekpart insaed. Mek-thri samting, taem iumi traem best for koment iumi bae no kwiktaem forgetim olketa point wea iumi storyim.

8-9. (a) Olsem Malakae 3:16 showimaot, long tingting bilong iu, hao nao Jehovah feel abaotem olketa koment bilong iumi? (b) Wanem nao hem no isi for samfala duim?

⁸ Iumi mekem Jehovah hapi taem iumi storyim wanem iumi bilivim. Iumi sure Jehovah lisin long iumi and hem barava tinghae taem iumi traem best for givim koment long meeting. (Readim Malakae 3:16.) Hem showimaot wei wea hem tinghae long iumi taem hem blessim iumi bikos iumi traem best for mekem hem hapi.—Malakae 3:10.

⁹ Tru nao, iumi garem olketa gud reason for koment long meeting. Nomata olsem, samfala maet fraet for apim hand bilong olketa. Sapos iu feel olsem, iu no wikdaon. Bae iumi storyim samfala Bible principle, samfala example, and samfala naes idea wea savve helpem iumi evriwan for givim koment long olketa meeting.

10. (a) Wanem nao samfala samting wea mekem staka fraet for koment? (b) Sapos iu fraet for koment, datwan maet showimaot iu garem wanem kaen fasin?

¹⁰ Waswe, heart bilong iu savve pampam evritaem iu ting for apim hand bilong iu for koment? Sapos olsem, ino iuseleva nomoa feel olsem. Tru samting nao, staka long iumi feel fraet lelebet taem iumi koment. For iu deal witim datfala feeling for fraet, iu need for luksavve wanem nao mekem iu for fraet. Waswe, iu fraet nogud iu forgetim wanem iu laek talem  or nogud iu talem rong samting? Waswe, iu wari nogud koment bilong iu hem no mas gud olsem koment bilong narawan? For tok stret, kaen wei for fraet olsem maet hem wanfala gud saen. Hem showimaot iu hambol and ting long olketa narawan olsem olketa winim iu. Jehovah lovem wei for hambol. (Sams 138:6; Phil. 2:3) Bat Jehovah laekem tu for iu praisem hem and encouragem olketa brata and sista long olketa meeting. (1 Thess. 5:11) Hem lovem iu and hem bae helpem iu for no fraet.

11. Wanem nao samfala Bible scripture wea savve helpem iumi?

¹¹ Tingim samfala Bible scripture wea savve helpem iumi. Bible sei iumi evriwan savve mistek staka taem long toktok bilong iumi and hao iumi savve talem datwan. (Jas. 3:2) Jehovah no expectim iumi for perfect and olketa brata and sista tu olsem. (Sams 103:12-14) Olketa hia spiritual famili bilong iumi and olketa lovem iumi. (Mark 10:29, 30; John 13:35) Olketa minim tu hao samfala taem iumi no talem nao samting wea iumi ting for talem.

12-13. Wanem nao iumi lanem from example bilong Nehemiah and Jonah?

¹² Tingim samfala Bible example wea savve helpem iu for deal witim wei wea iu fraet. Tingim Nehemiah. Hem waka long haos bilong wanfala king wea garem bigfala paoa. Nehemiah hem sorre bikos hem herem nius hao olketa no wakem bak yet olketa wall and gate bilong Jerusalem. (Nehemaea 1:1-4) Tingim, maet heart bilong hem pampam taem king askem hem why nao hem no luk hapi! Nehemiah kwiktaem prea and hem ansarem king. From datwan, king duim staka samting for helpem pipol bilong God. (Nehemaea 2:1-8) Tingim tu example bilong Jonah. Taem Jehovah askem hem for warnim pipol long Nineveh, Jonah fraet and ranawe go long difren ples. (Jona 1:1-3) Bat from Jehovah helpem Jonah, hem duim nao assignment bilong hem. And olketa toktok wea hem talem, barava helpem olketa long Nineveh. (Jona 3:5-10) Example bilong Nehemiah helpem iumi for luksavve hem barava important for prea bifor iumi koment. And example bilong Jonah helpem iumi for luksavve Jehovah savve helpem iumi for duim waka bilong hem nomata iumi barava fraet. Waswe, iu tingse eni kongregeson savve mekem iumi fraet olsem pipol long Nineveh?

¹³ Wanem nao samfala naes idea wea savve helpem iu for givim olketa naesfala koment long olketa meeting? Bae iumi storyim samfala idea.

14. Why nao iumi shud prepare gud for olketa meeting, and wanem taem nao maet iumi duim datwan?

¹⁴ Prepare for each meeting. Taem iu plan firstaem and prepare gud iu bae no fraet tumas for koment. (Prov. 21:5, NW) Iumi evriwan garem olketa difren schedule for prepare for olketa meeting. Eloise, wanfala widow wea winim 80 year, savve preparem Wastaoa Study  long start bilong week. Hem sei, “Mi savve enjoyim olketa meeting sapos mi prepare firstaem.” Joy, wea waka full-taem, savve markem taem long Saturday for preparem Wastaoa. Hem sei, “Mi laek for redyim datfala article no longtaem tumas bifor datfala meeting mekem mi no forgetim.” Ike, wanfala elder wea hem pioneer tu hem sei, “Mi faendem hem gud for prepare tu-thri taem insaed week winim wei for duim full wan wantaem nomoa.”

15. Hao nao iu savve prepare gud for meeting?

¹⁵ Hao nao iumi savve prepare gud for meeting? Bifor iu prepare, askem Jehovah for holy spirit bilong hem. (Luke 11:13; 1 John 5:14) Then, iusim tu-thri minute for luk thru long title, subheding, olketa piksa, and olketa box. Taem iu studyim each paragraf, readim evri scripture wea stap long paragraf sapos iu fit for duim. Ting raonem datfala information, especially olketa point wea iu laek for koment abaotem. Taem iu prepare gud bae iu kasem gud samting and datwan bae mekem hem isi for iu givim koment.—2 Cor. 9:6.

16. Olketa wanem tul nao stap and hao nao iu iusim?

¹⁶ Sapos fitim, iu savve iusim olketa electronic tul wea stap long languis wea iu savve long hem. Organization bilong Jehovah provaedem olketa electronic tul for helpem iumi for prepare for olketa meeting. JW Library^® app helpem iumi for daonlodim olketa pablikeson for study long mobile bilong iumi. Then iumi savve studyim taem iumi readim or lisin long hem enitaem or eni ples wea iumi stap. Samfala iusim disfala tul for study taem olketa lunch long waka ples or long skul or taem olketa travel. Watchtower Library and Wastaoa ONLINE LIBRARY^™ helpem iumi for duim research long olketa point wea iumi laek savve gud long hem.

17. (a) Why nao hem gud for preparem staka koment? (b) Wanem nao iu lanem from datfala video Kamap Fren Bilong Jehovah—Preparem Koment Bilong Iu?

¹⁷ Sapos fitim, preparem staka koment for each meeting. Why nao olsem? Bikos maet conductor no kolem iu taem iu apim hand bilong iu. Olketa narawan maet apim hand long semtaem, and maet conductor chusim wanfala long olketa. For mek sure meeting hem end long barava taem, conductor maet chusim tu-thri nomoa for givim koment. So no feel nogud or wikdaon sapos olketa no kolem iu long start bilong study. Sapos iu preparem staka koment, bae iu garem staka chance for share long meeting. Wanfala samting wea iu savve duim hem nao for readim scripture. Bat sapos fitim, iu savve preparem tu koment long own toktok bilong iu. *

18. Why nao hem gud for givim olketa short koment?

¹⁸ Givim olketa short koment. Staka taem  olketa koment wea short and simpol nao savve barava encouragem man. So garem goal for givim olketa short koment. Trae for givim koment for samting olsem 30 second nomoa. (Provebs 10:19; 15:23) Sapos iu bin ansa for staka year finis long olketa meeting, hem important for iu showim gud example long wei for givim olketa short koment. Sapos iu givim koment wea long tumas and iu storyim staka point, olketa narawan maet feel fraet and tingse olketa bae no savve koment gud olsem iu. And tu, olketa short koment givim taem for staka pipol share long meeting. Sapos olketa kolem iu first, talem simpol and klia ansa for datfala kwestin. No trae for storyim evri point long datfala paragraf. Bihaen olketa storyim main point long paragraf finis, iu savve koment long olketa nara point.—Lukim box “ Wanem Nao Mi Savve Koment Abaotem?”

19. Hao nao conductor savve helpem iu, bat wanem nao iu mas duim?

¹⁹ Talem conductor sapos iu laek for koment long wanfala paragraf. Sapos iu laek duim diswan, iu shud story gud witim conductor lelebet longtaem bifor meeting start. Taem hem kasem paragraf wea iu laek koment long hem, apim hand bilong iu kwiktaem and hae lelebet mekem conductor savve lukim.

20. Hao nao kongregeson meeting hem olsem wei for kaikai tugeta witim olketa fren?

²⁰ Ting long olketa kongregeson meeting olsem wei for kaikai tugeta witim olketa gud fren bilong iu. Olsem example, tingim sapos samfala long kongregeson invaetem iu for barbecue and olketa askem iu for preparem kam smol kaikai, hao nao bae iu feel? Maet iu wari lelebet, nomata olsem, bae iu traem best bilong iu for tekem kam kaikai wea evriwan bae enjoyim. Jehovah, man wea invaetem iumi, hem provaedem olketa meeting wea olsem tebol wea fulap long staka gud kaikai. (Sams 23:5; Matt. 24:45) And hem barava hapi taem iumi traem best for givim koment wea olsem iumi tekem kam wanfala simpol kaikai. So prepare gud and givim staka koment. Taem iu duim olsem, iu no kam kaikai long tebol bilong Jehovah nomoa bat iu tekem kam kaikai for sharem witim olketa narawan long kongregeson tu.